1. Ngimba twamanyile isyafiki palukomano lwa pakyinja lwa 2023?

 PALUKOMANO lwa pakyinja mu 2023, a twapilikisye kanunu fimo mwa findu ifi tukusubila kangi twapilike amalipoti aghakuhobosya pambombo yitu iyakufumusya. Mwakifwanikisyo, twaketile ukuti abandu bamo babaghile ukuya nulusako ulwakuya kulubafu lwa babombi ba Yehova panyuma pakuti Babeloni Unkulumba onangiwe. Kangi twaketile ukuti ukwanda mu Novembala 2023, abafumusi ba Bunyafyale batikuya pakulembagha fimo mwa ifi babombile mubufumusi. Ngimba ukuchenja uku kukusanusya ukuti ubufumusi bukaya bwakulondiwa lino? Hayi.

2. Nongwa yafiki ubufumusi bwitu bukuya bwakulondiwa isiku lililyosa? (Marko 13:10)

² Isiku lililyosa, ubufumusi bukulondiwa ukubombiwa mwanakalinga fiyo. Nongwa yafiki? Panongwa yakuti akabalilo kasyele kanandi itolo kangi ubumalikisyo bwa kisu buli pipi. Mwinong’oneleghe isi Yesu ayobile isyakufwana nimbombo iyakufumusya. (Belenga Marko 13:10.) Ukufwana ni buku lya Matai, Yesu ayobile ukuti amasyu amanunu ghisakufumusiwagha nkisu kyosa bo “ubumalikisyo” bukali ukwisa. (Mat. 24:14) Isi sikusanusya ukuti ikisu ikibibi kya Setano iki  kili pipi ukonangiwa. Yehova abikile “isiku nakabalilo” aka isi sisakubombiwa. (Mat. 24:36; 25:13; Imbo. 1:7) Isiku lililyosa, tukuseghelela ku kabalilo aka. (Rom. 13:11) Lino tukindilileghe ukufumusya amasyu amanunu ukufika pabumalikisyo.

3. Ngimba findu fiki fikutupangisya ukuti tufumusyeghe?

³ Linga tukwinong’onela isya bufumusi, twilalusyeghe ukuti: Nongwa yafiki tukufumusya amasyu amanunu? Mbupimba, ulughano lo lukutupangisya ukuti tufumusyeghe. Linga tukufumusya tukunangisya ulughano ku masyu amanunu, kubandu kangi ukukinda fyosa tukunangisya ulughano lwitu kwa Yehova ningamu yake. Isagha tuyobesanie ifundo isi.

TUKUFUMUSYA PANONGWA YAKUTI TUGHAGHANILE AMASYU AMANUNU

4. Ngimba tukwipilika bulebule linga tupilike inkhani yimo inunu?

⁴ Ngimba mukukumbuka muno mwalipilikile bo mupilike inkhani yimo iyakuhobosya bo ukupapiwa kwa mwana mumbumba yinu pamo bo muyaghile imbombo iyi mwalondagha kwa akabalilo akatali? Ukuyoba ubwanaloli mwahobwike fiyo kangi mwalondagha ukubabulako abamumbumba yinu. Ngimba mwahobwike bo mupilike amasyu amanunu fiyo agha Bunyafyale bwa Kyala?

5. Ngimba mwalipilike bulebule bo mupilike akakwanda amasyu amanunu? (Keta kangi ifithuzi.)

⁵ Amwinong’onele muno mwalipilikile bo mumanyile ubwanaloli. Mwaketile ukuti Tata winu wakumwanya abaghanile, ikulonda ukuti muye ku lubafu lwake, umwene ikuya pakusosyapo indamyo syosa isi mukwaghana nasyo kangi aba bafwile bisakusyuka. (Mar. 10:​29, 30; Yoh. 5:​28, 29; Rom. 8:​38, 39; Ubuset. 21:​3, 4) Ukumanya ubwanaloli kwabatulile ukuya balusekelo. (Luka 24:32) Mubughanile ubwanaloli kangi mukulonda ukubabulako abangi.—Fwanikisya na Yeremiya 20:9.

6. Ngimba tukumanyilako isyafiki ku isi syabombiwe kwa Ernest na Rose?

 ⁶ Amwinong’onele ikifwanikisyo iki. Unkamu Ernest b ali nifyinja 10 pakabalilo aka tata wake afwile. Ernest atile: “Nalilalusisye ukuti: ‘Ngimba tata wangu abukile kumwanya? Pamo atisakusyuka kangi?’ Nali nubufi kubana abangi aba bali na batata babo.” Ernest abukagha kumapumba, afughamagha pasi pipumba lya tata wake nukuyoba ukuti: “Ngukusuma we Kyala, ngulonda ukumanya kuno tata wangu abukile.” Bo ifyinja 17 fikindile ukufuma apa tata wake afwile, Ernest alyandile ukumanyila Ibaibolo. Umwene ahobwike fiyo bo asyaghenie ukuti abafwe batikumanya kilikyosa, baghonile utulo kangi bisakusyuka. (Ndumbi. 9:​5, 10; Imbo. 24:15) Pabumalilo, aghaghile amaansala gha malalusyo agha ali nagho kwa fyinja fingi. Ernest ali walusekelo fiyo panongwa yakumanyila ubwanaloli ubwa mu Baibolo. Unkasi wake, Rose yope amanyilagha. Mu 1978 balyosiwe. Abene babafumukisyagha abamumbumba yabo, abamanyani babo, na bosa aba balondagha ukumanyila. Ernest na Rose babatulile abandu abakukinda 70 ukuti bosiwe.

7. Ngimba findu fiki fikubombiwa linga tubughanile ubwanaloli? (Luka 6:45)

⁷ Ukuyoba ubwanaloli, linga tubughanile ubwanaloli ubwakufuma mu Baibolo tukuya pakubabulako abangi. (Belenga Luka 6:45.) Tukukolelana nabafundiwa ba Yesu aba bayobile ukuti: “Buno uswe tukabaghila ukuleka ukusiyoba isi tusibwene nisi tusipilike.” (Imbo. 4:20) Tubughanile ubwanaloli yonongwa yake tukuya pakukindilila ukubabulako abangi.

TUKUFUMUSYA PANONGWA YAKUTI TUBAGHANILE ABANDU

8. Nongwa yafiki tukubabulako abangi amasyu amanunu? (Keta ibokosi ilyakuti “Mubaghaneghe Abandu Nukubapela Bafundiwa.”) (Keta kangi ikithuzi.)

⁸ Mwakufwana itolo na Yehova nu mwanake, nanuswe tubaghanile abandu. (Mbu. 8:31; Yoh. 3:16) Tukubinong’onela abandu aba “basita Kyala” kangi “basitalusubilo.” (Ef. 2:12) Tukulondiwa ukubafumukisya abandu ukuti bamanye ubwanaloli nukusokamo mungisi. Panongwa yakuti tubaghanile, tukuya pakubomba kilikyosa ukuti tubafumukisyeghe ukuti bamanye ubwanaloli. Linga bamanyile ubwanaloli bikuya nulusubilo, bikuya nubumi ubununu lino, kangi bikuya nulusako ulwakwisakwikala nu “bumi bwanaloli” ubu bo bumi bwa bwila na bwila.—1 Tim. 6:19.

9. Ngimba tukubasoka isyafiki abandu pa isi sikwisa nkyeni kangi nongwa yafiki? (Ezekieli 33:​7, 8)

 ⁹ Ulughano lwitu kubandu lukutupangisya ukuti tubafumukisyeghe isya bumalikisyo bwa kisu ikibibi iki. (Belenga Ezekieli 33:​7, 8.) Tukubinong’onela abapalamani bitu kangi nabamumbumba yitu aba bakaya Baketi. Abandu bingi batikumanya ukuti bukwisa “ubutolwe ubukulumba, ubu bukabonekamo siku, ukufuma pabwandilo bwa kisu ukufika kulilino kuno kangi butisakuyangako kangi.” (Mat. 24:21) Tukulonda ukuti bamanye isi sikuya pakubombiwa pisiku lya bulongi. Ikyakwanda Babeloni unkulumba ikuya pakonangiwa, ukufuma apo ikisu kyosa kikuya pakonangiwa pa Armagedoni. (Ubuset. 16:​14, 16; 17:​16, 17; 19:​11, 19, 20) Tukunsuma Kyala ukuti abatule ukukonga isi tukubafumukisya nukwanda ukumbombela Yehova. Bule pakuyoba isya bandu aba batikubwambilila ubwanaloli ukongelelapo abamumbumba yitu?

10. Nongwa yafiki kwakulondiwa ukuti tubasokeghe abandu?

¹⁰ Bo muno twamanyilile munkhani iyi yakindagha, bubaghile ukuya bwighane bwa Yehova ukuti abandu aba balapile nukuchenja, bapokiwe linga baketile ukonangiwa kwa Babeloni Unkulumba. Kwakulondiwa fiyo ukuti tukindilileghe ukubafumukisya abandu isi. Amwinong’onele isi: Isi tukubabula lino syo isi bisakukumbuka pakabalilo ako. (Fwanikisya na Ezekieli 33:33.) Bikuya pakukumbuka isi tukubabula lino nukwanda ukumbombela Yehova. Mwakufwana itolo nundindililanyumba ya bannyololo uyu alitike amasyu bo “ikisenyenda ikikulumba kibombiwe,” aba batikuchenja lino lumo bikuya pakupilika amasyu linga Babeloni Unkulumba onangiwe.—Imbo. 16:​25-34.

TUKUFUMUSYA PANONGWA YAKUTI TUNGANILE YEHOVA NINGAMU YAKE

11. Ngimba tubaghile ukumpa bulebule Yehova ubukulumba, ulwimiko, namaka? (Ubusetuli 4:11) (Keta kangi ifithuzi.)

¹¹ Ikifukwa ikinywamu iki tukufumusya, lo lughano lwitu kwa Yehova ningamu yake. Tukubuketa ububombeli bwitu ukuya njila yimo iyakunndaghisyila Kyala uyu tunganile. (Belenga Ubusetuli 4:11.) Twesa tukwitikisya ukuti Yehova Kyala abaghiliwe ukwambilila ubukulumba, ulwimiko namaka ukufuma ku babombi bake abasubiliwa. Tukumpa ulughindiko linga tukubatula abangi ukuti bapilikisye ukuti umwene “yo mpeli wa fyosa” kangi nukubamanyisya ukuti tuli nubumi panongwa yakuti atupelile. Tukumpa amaka linga tukubombela akabalilo, amaka, nifindu fitu  ukuti tubafumukisyeghe abandu. (Mat. 6:33; Luka 13:24; Kolos. 3:23) Tubaghile ukuyoba ukuti, tukuhoboka ukuyoba isya Kyala uyu tunganile. Tukuya balusekelo linga tukubabulako abangi isya ngamu ya Kyala kangi ukuti umwene yo Kyala nnunu. Nongwa yafiki?

12. Ngimba tubaghile ukuyikemesya bulebule ingamu ya Yehova mubufumusi?

¹² Ulughano lwitu kwa Yehova, lukutupangisya ukuti tuyikemesyeghe ingamu yake. (Mat. 6:9) Tukulonda ukubabulako abangi ukuti isi Setano ayobile isyakufwana na Yehova syabutungulu. (Bwa. 3:​1-5; Jobu 2:4; Yoh. 8:44) Mubufumusi, tukubabulako abangi isya Yehova na isi umwene ikulonda. Tukulonda aliwesa amanye ukuti Kyala yo lughano, umwene ngolofu, kangi Ubunyafyale bwake bukuya pakusosyapo indamyo syosa nukutwala ulutengano. (Sal. 37:​10, 11, 29; 1 Yoh. 4:8) Linga tukubabulako abangi isya Yehova mubufumusi, tukuyikemesya ingamu yake. Tuli balusekelo panongwa yakughelaghela ukubomba isi tubaghile ukufwanisya pakuya Baketi ba Yehova. Nongwa yafiki tukuyoba bo ulu?

13. Nongwa yafiki tukuhoboka ukukoleliwa ukuti Baketi ba Yehova? (Yesaya 43:​10-12)

¹³ Yehova atusalile uswe ukuti tuye “baketi” bake. (Belenga Yesaya 43:​10-12.) Ifyinja ifi fikindile, kalata yumo uwakufuma ku Kabughatila Kakulongosya atile: “Aliwesa wa uswe ikwambilila ulughindiko ulunywamu linga ikukoleliwa ukuti Nketi wa Yehova.” c Nongwa yafiki isi sili bo ulu? Inong’onela ikifwanikisyo iki. Linga mukulonda ukuti umundu yumo aye nketi winu mukhoti, mubaghile ukusala umundu uyu mummenye  kanunu kangi mukunsubila. Kangi mubaghile ukunsala umundu uyu ali nutuyilo utununu kangi abandu babaghile ukunsubila linga ikuyoba mukhoti. Mwakutusala uswe ukuya Baketi bake, Yehova ikunangisya ukuti atumenye kangi ikutusubila ukuti tubaghile ukuyoba ubwanaloli ukuti umwene yo Kyala wanaloli. Tuli balusekelo fiyo ukuya Baketi kangi tukubombela ulusako lulilosa ukuyifumusya ingamu yake nukuti fyosa ifi abandu ababibi bikunjobela fikaya fyabwanaloli. Mwakubomba isi, tukunangisya ukuti tuli Baketi ba Yehova.—Sal. 83:18; Rom. 10:​13-15.

TUKUYA PAKUKINDILILA UKUFUMUSYA MPAKA KUBUMALIKISYO

14. Ngimba findu fiki ifyakuhobosya ifi fisakubombiwa nkyeni?

¹⁴ Tuli balusekelo ukuketa isi sikuya pakubombiwa nkyeni. Nubutuli bwa Yehova, tukuya pakuketa abandu bingi bikwisa mu gulu lyake bo ubutolwe ubukulumba bukali ukwanda. Kangi tuli balusekelo ukumanya ukuti pabutolwe ubukulumba, aka kisakuya kabalilo kapalapala fiyo, abandu bisakusokako kulubafu lya Setano nukwanda ukumpala Yehova.—Imbo. 13:48.

15-16. Ngimba tukuya pakukindilila ukubomba isyafiki, kangi ukufika ndili?

¹⁵ Lino tuli nimbombo iyakuti tubombe. Tuli nulusako lwakubomba imbombo iyi yitisakubombiwagha kangi nkyeni iyi ko kufumusya Ubunyafyale bwa Kyala. Tupeliwe ulughindiko fiyo pakubomba imbombo iyi. Tukulondiwa ukukindilila ukubasoka abandu isi sikwisa nkyeni. Abandu bikulondiwa ukumanya ukuti ikisu ikibibi iki kili pipi ukonangiwa. Linga akabalilo kabulongi kafikile abandu bisakumanya ukuti isi twabafumukisyagha, bwanaloli ubwakufuma kwa Yehova.—Eze. 38:23.

¹⁶ Ngimba tukuya pakubomba isyafiki? Panongwa yakuti tughaghanile amasyu amanunu, abandu, kangi ukukinda fyosa ulughano lwitu kwa Yehova Kyala, tukuya pakukindilila ukufumusya ku bandu mpaka kubumalikisyo, apa Yehova isakutubulagha ukuti, “Kufwene.”