1. Nongwa yafiki tubaghile ukuyoba ukuti tukwikala nkabalilo akakuhobosya fiyo?

 TUKWIKALA nkabalilo akakuhobosya fiyo. Isiku lililyosa, tukuketa ukufwanisiwa kwa busololi bwa mu Baibolo. Mwakifwanikisyo, tukumbona “umwalafyale wa kululu” kangi “numwalafyale wa kwitongo” bikulimbana panongwa yakuti aliwesa ikulonda ukuya namaka ghabulaghili pakisu kyosa. (Dan. 11:40) Tukuketa amasyu amanunu gha Bunyafyale bwa Kyala ghikufumusiwa mfighaba fingi kangi abandu bingi bikupilikisya fiyo. (Yes. 60:22; Mat. 24:14) Mwakongelelapo, tukwambilila ifyakulya fingi ifya mwambepo “linga akabalilo kafikile.”—Mat. 24:​45-47.

2. Ngimba tufimenye ifindu fiki kangi syafiki isi tukulondiwa ukusyaghania?

² Yehova ikukindilila ukututula ukuti tufipilikisyeghe kanunu ifindu ifyakulondiwa ifi fikuya pakubombiwa mwalululu nkyeni. (Mbu. 4:18; Dan. 2:28) Tukusubila ukuti linga ubutolwe ubukulumba bwandile itolo, twisakufimanya fyosa ifi tukulondiwa ukufimanya ukuti fisatutule ukuya basubiliwa nukukindilila ukuya bakukolelana pakabalilo akapalapala ako. Loli pope filipo fimo ifi tukabaghila ukufimanya ifi fisakubombiwa nkyeni. Munkhani iyi, ikyakwanda tukuya pakuyobesania inongwa iyi tuchenjile isi twayobile pankhani ya fimo mwafyakubombiwa ifi. Ukufuma apo, tukuya pakuketa fimo mwa ifi tufimenye ifya nkyeni namuno Tata witu wakumwanya isakubombela.

 IFI TUKAFIMANYA

3. Ngimba kunyuma twayobagha isyafiki pankhani yakabalilo aka abandu batisakuya nulusako lwakumanyila isya Yehova, kangi findu fiki fyatupangisyagha ukuyoba isi?

³ Kunyuma, twasubilagha ukuti linga ubutolwe ubukulumba bwandile itolo, abandu batisakuya nulusako lwakuya nulwitiko mwa Yehova nukupona pa Armagedoni. Twasubilagha bo ulu panongwa yakuti twapilikisyagha ukuti Umwelesyo wa nkabalilo ka Nowa wimilagha ikindu kimo iki kisakubombiwa nkabalilo kitu. Mwakifwanikisyo, twalinganiagha ukuti bo muno Yehova alighalile ikifigho kya ngalaba bo Umwelesyo ghukali ukwanda, kubwandilo kwa butolwe ubukulumba kope isakwighalila, “ikifigho” nkisu kya Setano iki ukuti abandu bangaponagha.—Mat. 24:​37-39.

4. Nongwa yafiki tutikulondiwa ukuyoba ukuti kilikyosa iki kyabombiwe pa Mwelesyo, kikwimila ifindu fimo mmasiku agha? Lingania.

⁴ Ngimba syabwanaloli ukuti kilikyosa iki kyabombiwe pa Mwelesyo kikwimila ifindu fimo ifi fisakubombiwa nkyeni? Hayi. Nongwa yafiki? Panongwa yakuti Ibaibolo litikuyobapo isi. a Yesu afwanikisye muno syayilile “mmasiku gha Nowa” nakabalilo kakuyapo kwake. Loli akayobilepo ukuti Umwelesyo ghukwimila ifindu fimo ifya nkyeni. Mwakifwanikisyo, akayobilepo isi similagha bo Yehova ikwighalila ikifigho kya ngalaba. Loli filipo ifi tubaghile ukumanyilapo pankhani ya Nowa pamo Umwelesyo.

5. (a) Ngimba Nowa anangisye bulebule ukuti ali nulwitiko bo Umwelesyo ghukali? (Bahiburi 11:7; 1 Peteri 3:20) (b) Ngimba findu fiki fifwene pambombo iyakufumusya iya nkabalilo ka Nowa na masiku agha?

 ⁵ Pakabalilo aka Nowa ampilikilagha Yehova bo ikunsoka, anangisye ukuti ali nulwitiko mwakuyenga ingalaba. (Belenga Bahiburi 11:7; 1 Peteri 3:20.) Mwakufwana itolo, abandu aba bikupilika amasyu amanunu agha Bunyafyale bwa Kyala, bikulondiwa ukubomba ifindu ukufwana na isi bikumanyila. (Imbo. 3:​17-20) Peteri ayobile ukuti Nowa ali “ndumbilili wa bugholofu.” (2 Pet. 2:5) Loli bo muno tuketile munkhani iyi yakindagha, tutikumanya linga Nowa alimfumukisye aliwesa pakisu bo Umwelesyo ghukali. Amasiku agha, tukubomba imbombo iyakufumusya pakisu kyosa ikyapasi, kangi tukubomba imbombo iyi nindumbula yosa. Nalinga ukuti tukwiyipa fiyo, loli pope tukabaghila ukumfika aliwesa na masyu amanunu bo ubumalilo bukali ukufika. Nongwa yafiki tukabaghila?

6-7. Nongwa yafiki tubaghile ukuyoba ukuti tukabaghila ukumfumukisya umundu aliwesa pakisu bo ubumalilo bukali ukwisa? Lingania.

⁶ Inong’onela isi Yesu ayobile pankhani ya mbombo iyakufumusya. Yesu ayobile ngani ukuti amasyu amanunu ghisakufumusiwagha “nkisu kyosa, ukuti lo luyeghe lusisimikisyo ku fikolo fyosa.” (Mat. 24:14) Ubusololi ubu bukufwanisiwa fiyo amasiku agha ukukinda kunyuma kosa. Amasyu gha Bunyafyale, ghikufumusiwa munjobelo isyakukinda 1,000. Kangi panongwa ya webusayiti yitu iya jw.org, abandu bingi pakisu bikumanyila amasyu amanunu agha Bunyafyale bwa Kyala.

⁷ Loli pope Yesu ababulile abafundiwa bake ukuti batisakufwanisya ukufumusya ku “fikolo fyosa fya bandu,” pamo ukumfumukisya umundu aliwesa bo umwene akali ukwisa. (Mat. 10:23; 25:​31-33) Isi Yesu ayobile sikubombiwa na mmasiku ghitu agha. Abandu amamiliyoni mingi, bikwikala mfisu ifi imbombo yitu iyakufumusya yikukanisiwa. Mwakongelelapo, abana amahandiledi mingi bikupapiwa paminiti yiliyosa. Tukwiyipa fiyo ukuti tubafumukisye amasyu amanunu abandu aba bafumile ku “fikolo fyosa, aba mfisu fyosa naba munjobelo syosa.” (Ubuset. 14:6) Loli ifundo yoyakuti tukabaghila ukumfumukisya umundu aliwesa pamwene amasyu amanunu pakisu bo ubumalilo bukali ukwisa.

8. Ngimba ilalusyo liliku ili tubaghile ukulalusya pakuyoba isya muno Yehova isakubalongela abandu nkyeni? (Keta kangi ifithuzi.)

⁸ Ukufwana na isi tuyobesenie, tubaghile ukwilalusya ukuti: Ngimba sisakuya bulebule kubandu aba bali nulusako lwakupilika amasyu amanunu bo ubutolwe ubukulumba bukali ukwanda? Ngimba Yehova nu Mwanake uyu amwimike bisakubalonga bulebule abandu aba? (Yoh. 5:​19, 22, 27; Imbo. 17:31) Ifundo ya mu lemba ili pafumile umutu wankhani iyi, yikuti Yehova “akighana ukuti bamo bapyutiweghe.” Mmalo mwake, ikulonda ukuti “bosa bapindukeghe ku mbibi syabo.” (2 Pet. 3:9; 1 Tim. 2:4) Nalinga ukuti tusimenye isi, loli Yehova akatubula isi isakubomba nabandu aba bakapilikamo amasyu amanunu. Bwanaloli ukuti umwene atikulondiwa ukutubula kilikyosa iki abombile pamo iki isakubomba.

9. Ngimba Yehova atunangisye isyafiki mu Baibolo?

⁹ Ukwendela mu Baibolo, Yehova atunangisye ifindu fimo ifi isakubomba. Mwakifwanikisyo, Ibaibolo likutubula ukuti Yehova isakubasyusya abandu “abaniongafu” aba bakali nulusako lwakupilikisya amasyu amanunu nukuchenja utuyilo twabo. (Imbo. 24:15; Luka 23:​42, 43) Ifundo iyi yikupangisya ukuti paye amalalusyo aghangi aghakulondiwa.

10. Ngimba malalusyo ghaliku agha tuli nagho?

¹⁰ Ngimba bosa aba bisakufwa pabutolwe  ubukulumba bisakupyutiwa kwa bwila na bwila kisita kusyuka kangi? Amalemba ghikulingania mwakupilikiwa fiyo ukuti Yehova nabasilikali bake bisakubapyuta abakususya pa Armagedoni kangi batisakusyuka. (2 Tes. 1:​6-10) Loli bule pakuyoba isya bandu abangi? Mwakifwanikisyo, bamo babaghile ukufwa pabutolwe ubukulumba panongwa ya bubine, ubukangale, ingozi pamo panongwa yakughoghiwa nabandu abinabo? (Ndumbi. 9:11; Zeka. 14:13) Ngimba abandu aba bali mugulu lya bandu “abaniongafu,” bisakusyuka nkisu ikipya? Tutikumanya.

IFI TUFIMENYE

11. Ngimba abandu bisakulongiwa bulebule pa Armagedoni?

¹¹ Tufimenye ifindu fingi ifi fisakubombiwa nkyeni. Mwakifwanikisyo, tusimenye ukuti pa Armagedoni, abandu bisakulongiwa ukufwana namuno bababombelagha abakamu ba Kristu. (Mat. 25:40) Aba bisakulongiwa ukuti ng’osi bo aba banangisye ukuti babatulagha abapakiwa na Kristu. Tusimenye kangi ukuti abakamu abapakiwa bisakukindilila ukuyapo pakisu linga ubutolwe ubukulumba bwandile mpaka apa Armagedoni yisakuya pipi ukwanda. Pakabalilo aka abakamu abapakiwa bisakuyapo pakisu, abandu abandumbula inunu bisakuya nulusako lwakubatula abene nimbombo iyi bikubomba. (Mat. 25:​31, 32; Ubuset. 12:17) Nongwa yafiki ifundo isi syakulondiwa fiyo?

12-13. Ngimba abandu bamo, babaghile ukwisakubomba isyafiki linga baketile ukuti “Babeloni Unkulumba” onangiwe? (Keta kangi ifithuzi.)

¹² Nalinga ukuti ubutolwe ubukulumba bwisakuya ukuti bwandileko, fibaghile ukubombiwa ukuti abandu bamo aba bisakuketa bo “Babeloni Unkulumba” ikonangiwa, bisakukumbukagha ukuti Abaketi ba Yehova bayobagha kwa fyinja fingi ukuti isi sisakubombiwa. Ngimba bamo babaghile ukwisakuchenja utuyilo twabo linga bafibwene fimo mwa fyakubombiwa ifi?—Ubuset. 17:5; Eze. 33:33.

¹³ Linga isi sibombiwe, sibaghile ukufwana itolo na isi syabombiwe ku Egiputi nkabalilo ka Mose. Kumbuka ukuti “abandu bingi fiyo abafikolo ifingi” babukile pampene na Baisraeli bo bikusokako ku Egiputi. Bamo mwa  bandu aba babaghile ukuti balyandile ukuya nulwitiko mwa Yehova bo baketile ukuti Ifika 10 fikufwanisiwa ifi Mose ayobile ngani ukuti fikuya pakubombiwa bo ikunsoka Farao. (Kuso. 12:38) Linga abandu bamo bisakuchenja panyuma pakonangiwa kwa Babeloni Unkulumba, ngimba mwisakukalala? Hayi. Tukulonda ukukonga utuyilo twa Tata witu wakumwanya, uyu yo ‘Kyala wa kibabilisi nuwa kisa, uyu atikukalala mbibimbibi uyu iswile nikibabilisi nubwanaloli.’ b—Kuso. 34:6.

14-15. Ngimba ukuti umundu asabwaghe ubumi bwa bwila na bwila, fikweghela ukuti afwe tasi pamo fikweghela kuno ikwikala? Lingania. (Salimo 33:​4, 5)

¹⁴ Utubalilo tumo, unkamu pamo umulumbu abaghile ukunjoba uwamumbumba yabo pamo unkamu wake ukuti, “Mwe kubaghile ukuya kununu ukuti unkamu wangu afwe bo ubutolwe ubukulumba bukali ukwanda papo abaghile ukwisakusyuka.” Ukuyoba ubwanaloli, ukuyoba bo ulu kununu itolo. Loli umundu atisakukaba ubumi bwa bwila na bwila panongwa yakuti afwile. Yehova Ndongi ungolofu kangi utubalilo tosa ikusala ifindu mbugholofu. (Belenga Salimo 33:​4, 5.) Tukusubila ukuti “Undongi wa kisu kyosa” isakubomba inunu.—Bwa. 18:25.

¹⁵ Kwamahala kangi ukuyoba ukuti fitikweghela kuno umundu ikwikala ukuti asabwaghe ubumi bwa bwila na bwila. Kukaya kwamahala ukwinong’ona ukuti Yehova isakubalonga abandu amamiliyoni mingi ukuya “mbene” panongwa yakuti bikwikala mfisu ifi lukayako ulusako lwakumanyila amasyu gha Bunyafyale. (Mat. 25:46) Undongi ungolofu uwa kisu  kyosa, ikubinong’onela fiyo abandu aba ukukinda muno uswe tukwipilikila. Tutikumanya muno Yehova isakubombela ifindu pabutolwe ubukulumba. Lumo bamo mwa bandu aba bisakuya nulusako lwakumanyila isya Yehova, ukuya nulwitiko mmyake nukuya kulubafu lwa Yehova linga ayikemisye ingamu yake kufikolo fyosa.—Eze. 38:16.

16. Ngimba syafiki isi tusimenye isyakufwana na Yehova? (Keta kangi ikithuzi.)

¹⁶ Ukwendela mu isi tumanyile mu Baibolo, tusyaghenie ukuti abandu bakulondiwa fiyo kwa Yehova. Alintumile Umwanake ukuti abike ubumi bwake ukuti twesa tusaye nulusako lwa bumi bwa bwila na bwila. (Yoh. 3:16) Twesa tukuketa ukuti Yehova atughanile fiyo. (Yes. 49:15) Ammenye aliwesa ingamu yake. Umwene atumenye kanunu fiyo nalinga tubaghile ukufwa, abaghile ukutusyusya papo ikukumbuka kilikyosa muno twayilile. (Mat. 10:​29-31) Naloli, tuli nikifukwa ikinunu ikyakusubila ukuti Tata witu walughano Yehova isakundonga umundu aliwesa mbugholofu panongwa yakuti umwene wamahala, ngolofu kangi wakisa.—Yak. 2:13.

17. Ngimba twisakuyobesania isyafiki munkhani iyakukongapo?

¹⁷ Panongwa yakuti tuyipilikisye kanunu fiyo ifundo iyi, sikutupangisya ukuti tuyiketeghe imbombo iyakufumusya ukuti yikulondiwa ukubombiwa mwanakalinga fiyo lino ukukinda kunyuma kosa. Nongwa yafiki tukuyoba bo ulu? Kangi ngimba findu fiki fikututuma ukuti twiyipeghe fiyo pakufumusya amasyu amanunu? Twisakuyobesania amaansala gha malalusyo agha munkhani iyakukongapo.