“Abagholofu Bayeghe Nulusekelo Mwa Yehova”
DIANA ali ni fyinja ifyakukinda 80 kangi abinile fiyo ifyinja finandi ifi fikindilepo. Undume wake uyu abinagha imbungo ya kibwa (Alzheimer) afwile. Abanake babili abanyambala bope bafwile kangi yope atamiwagha ni mbungo iya kansa wa m’mabele. Loli abakamu na balumbu linga bikumbona Diana ku ngomano sya kipanga na mubufumusi, bikunketa ukuti walusekelo akabalilo kosa.
John ali wakendela idela kwa fyinja ifyakukinda 43. umwene abughanile fiyo ububombeli ubu kangi akalinong’winepo ukubomba ikindu kilikyosa ukukinda ububombeli bwake! Loli akabalilo kamo alimile ukubomba ububombeli ubu panongwa yakuti ali nubudindo bwa kumpasikiksya unkamu wake uyu abinagha, lino ikubombela ku kipanga kyake. Linga abakamu na balumbu aba bam’menye John baghene nawe pa ngomano sya dela ni sya kighaba, bikunketa ukuti akachenjapo. Umwene ikukindilila ukuya nulusekelo.
Ngimba findu fiki ifi fikubapangisya ukuti Diana na John bakindilile ukuya nulusekelo? Ngimba sibaghile ukubombiwa bulebule ukuti umundu uyu ikubina aye nulusekelo? Ngimba umundu abaghile ukuya nulusekelo bulebule linga imile ububombeli ubu abughanile fiyo? Ibaibolo likwamula ukuti: ‘Abagholofu bikuya pakusekela mwa Yehova.’ (Sal. 64:10) Tubaghile ukupilikisya kanunu ubwanaloli ubu linga tusimenye isi sibaghile ukutupangisya ukuti tuye nulusekelo ulusita kumalika, na isi sikabaghila ukutupangisya ukuti tuye nulusekelo.
ULUSEKELO ULU LUKUMALIKA
Ifindu fimo ifi tukuya nafyo utubalilo twingi fikutwala ulusekelo. Mwakifwanikisyo, inong’onela isya bandu aba bikuya pakweghana. Pamo inong’onela isya mundu yumo uyu mpapi pamo yumo uyu ambilile ububombeli ubupya ubwakumbombela Yehova? Ifindu ifi fikutwala ulusekelo panongwa yakuti fyosa fyabupe ifi fikufuma kwa Yehova. Umwene atupele ubweghi, ulusako lwakuya na bana, kangi nimbombo iyakuti tubombeghe mu gulu lyake.—Bwa. 2:18, 22; Sal. 127:3; 1 Tim. 3:1.
Loli pali ifindu fimo ifi fikutwala ulusekelo ulu lukaya lwabwanaloli. Syakitima ukuti abandu aba beghene, utubalilo twingi batikusubilana pamo bikufwa. (Eze. 24:18; Hos. 3:1) Abana bamo batikubapilikila abapapi babo na Kyala, kangi lumo babaghile ukwepusiwa nkipanga. Mwakifwanikisyo, abana ba Samueli balekile ukumbombela Yehova nindumbula yosa kangi Davidi yope ali nindamyo nyingi mumbumba yake panongwa yakuti abombile ubulowe na Batisheba. (1 Samu. 8:1-3; 2 Samu. 12:11) Linga ifindu bo ifi fibombiwe, fikabaghila ukutwala ulusekelo lwanaloli loli fibaghile ukutwala ikitima nifyakubaba fingi.
Mwakufwana itolo, utubalilo tumo tukabaghila ukukindilila nububombeli ubu tukubomba mu gulu lya Yehova panongwa ya bubine lumo tukulondiwa ukupasikisya imbumba yitu pamo panongwa yakuchenja kwa findu mu gulu lya Yehova. Abandu bingi aba balekile ububombeli ubu balinabo, bikuyoba ukuti bataghile ulusekelo ulu bahobokagha nalo.
Tubaghile ukuketa ukuti ukuya nulusekelo pa fifukwa bo ifi, ulusekelo lwitu lukabaghila ukuya lwabwanaloli. Ngimba umundu abaghile ukukindilila ukuya nulusekelo linga aghene nindamyo? Ena, panongwa yakuti Samueli, Davidi na bangi bakindilile ukuya nulusekelo nalinga baghanagha nindamyo.
ULUSEKELO ULU LUTIKUMALIKA
Yesu alumenye ulusekelo lwabwanaloli muno lukuyila. Bo akali pakwisa pa kisu kyapasi, Ibaibolo likutubula ukuti umwene ‘bwila alinkuya nulusekelo mwa Yehova.’ (Mbu. 8:30) Bo ali pa kisu kyapasi, utubalilo tumo umwene aghanagha nindamyo. Kisita kukuyika, Yesu ali nulusekelo panongwa yakuti abombagha ubwighane bwa Tata wake. (Yoh. 4:34) Pakuyoba ifyakubaba ifi alyaghene nafyo bo ali pipi ukufwa, tukubelenga ukuti: ‘Panongwa ya lusekelo ulu lwabikiwe nkyeni myake, alinkukubilwa itolo pakipiki.’ (Hib. 12:2) Yonongwa yake tubaghile ukumanyilako nyingi ukufuma pa findu fibili ifi Yesu ayobile isyakufwana nulusekelo ulwabwanaloli.
Bo abafundiwa 70 ba Yesu baghomwikeko ku mbombo yakufumusya, bahobwike fiyo panongwa ya mbombo yosa iyi babombile bo ukusosya imbepo inyali. Loli Yesu ababulile ukuti: ‘Syo mungasekelagha sisisi apa linga mwaghile imbepo sikulamba kumyinu, loli musekeleghe papo ingamu syinu sisimbiwe kumwanya.’ (Luka 10:1-9, 17, 20) Momumo, ukumbombela Yehova nindumbula yosa kwakulondiwa fiyo kangi kukutwala ulusekelo ulunywamu, ukukinda imbombo yiliyosa iyapamwanya.
Pakabilo akangi, bo Yesu ikuyoba nikilundilo kya bandu, unkikulu yumo uwa Chiyuda apalamasiwe fiyo na isi Yesu amanyisyagha kangi ayobile ukuti mama wake abaghile ukuti ali walusekelo. Loli Luka 11:27, 28) Linga tukuhoboka na banitu, sibaghile ukutupangisya ukuti tuye nulusekelo. Loli isi sikutupa ulusekelo ulusita kumalika ulu ko kumpilikila Yehova nukuya pabumanyani ubununu nu mwene.
Yesu alyamwile ukuti: ‘Loli basayiwa ukukinda aba bikupilika ilisyu lya Kyala nukulisunga!’ (Tukuya nulusekelo ulunywamu fiyo linga tukwipilika ukuti Kyala ikuhoboka nuswe. Nalinga indamyo sikupangisya ukuti tungahobokagha loli sikabaghila ukupoka ulusekelo ulu tuli nalo. Linga tukukindilila ukuya nulwitiko pakabalilo aka twaghene nindamyo, ulusekelo lwitu lukuya lwamaka. (Rom. 5:3-5) Mwakongelelapo, Yehova ikubapa mbepo wake bosa aba bali nulusubilo m’myake kangi ulusekelo kighaba kya seke sya mbepo mwikemo. (Gal. 5:22) Isi sikututula ukupilikisya kanunu ilemba lya Salimo 64:10 ili likuti: ‘Abagholofu bayeghe nulusekelo mwa Yehova.’
Ngimba findu fiki ifi fyalintulile John ukuti akindilile ukuya nulusekelo?
Diana na John, aba tubayobile pabwandilo bakindilile ukuya nulusekelo nalinga baghanagha nindamyo. Diana ayobile ukuti: “Nanketagha Yehova ukuya pabuponelo bwangu bo muno umwana ikumbombela nu mpapi wake.” Umwene alyongelile ukuti: “Ngwipilika ukuti ansayile fiyo mwakumba amaka ukuti ngindilileghe ukufumusya akabalilo kosa nulusekelo.” Ngimba findu fiki ifi fyalintulile John ukuti akindilile ukuya nulusekelo kangi nukwiyipa pambombo yakufumusya bo alekile ububombeli bwakwendela idela? Umwene ayobile ukuti: “Ukufuma mu 1998 bo nsaliwe ukuti ngamanyisyeghe Isukulu Iyakumanyisya Ubufumusi (M.T.S), mbombile nyingi fiyo pakumanyila kwa pa nimwene ukukinda pabwandilo.” Umwene ayobile ukuti ukuchenja kwa findu pa bumi bwabo, kwa batulile ukuti bakindilile ukubomba kanunu ifindu panongwa yakuti akabalilo kosa bitikisyagha ukubomba ububombeli bosa ubu Yehova abapagha. Kangi alyongelile ukuti: Twabombagha isi kisita kwilumbusya.”
Abandu bingi aba baghenemo nasyo bo isi, bikwitikisya ukuti ilemba lya Salimo 64:10 likuyoba isya bwanaloli. Mwakifwanikisyo, imbumba yimo iyi yabombile ububombeli bwa pa Beteli ukukinda ifyinja 30 ku United States, babatumile ku bupayiniya bwa padela. Abene bayobile ukuti: “Ikitima kikuyapo linga kukileka ikindu kimo iki ukighanile fiyo,” loli balyongelile ukuti: “Ukabaghila ukuya nikitima bwila na bwila.” Bo bandile ububombeli bwabo ubupya, balyandile ukufumusya nikipanga. Bayobile kangi ukuti: “Twiputagha pa findu fimo ifyakulondiwa fiyo pa bumi bwitu. Twaketagha ukuti inyiputo syitu sikwamuliwa kangi twakasiwagha fiyo, isi syatupagha ulusekelo. Bo tufikile, mwanakalinga abakamu na balumbu bamo nkipanga, balyandile ubupayiniya kangi twali nabamanyili babili ba Baibolo aba babukagha pa nkyeni.”
“UKUYA NULUSEKELO BWILA NA BWILA”
Bwanaloli ukuti akabalilo kosa kukaya kupepe ukuti tuyeghe balusekelo. Utubalilo tumo tubaghile ukuya nikitima. Loli Yehova ikutukasya na masyu agha tukughagha pilemba lya Salimo 64:10. Nalinga ukuti filipo ifindu fimo ifi fibaghile ukutuwisya amaka loli tubaghile ukuya nulusubilo ukuti linga tukukindilila ukuya basubiliwa tukuya ‘pakuya balusekelo mwa Yehova.’ Kangi ukinda fyosa tukulondiwa ukughulila akabalilo aka Yehova isakufwanisya isi afingile isya ‘kumwanya ukupya ni kisu kyapasi ikipya’ ukuya syabwanaloli. Aliwesa isakuyagha ngolofu kangi ‘isakwikyelagha nulusekelo bwila na bwila’ panongwa ya fyosa ifi Yehova isakubombagha.—Yes. 65:17, 18.
Inong’onela isi muno sisakuyilagha. Twisakuyagha nubumi ubununu kangi twisakubombagha imbombo amasiku ghosa namaka. Kisita kwinong’onelapo isi twaghanagha nasyo kunyuma isi syatupangisyagha ukuti tuyeghe nikitima, tutisakwipilikagha kangi ifyakubaba. Yehova ikutusimikisyila ukuti ‘isi syaliko iyolo, abandu bisakwibwagha syosa itolo.’ Tukwisa kubambililagha abakamu bitu aba bafwile kangi tukwisa kwipilika bo abapapi ba mwana wa fyinja 12 uyu Yesu alinsyusisye: ‘Popapo ikiswighu ikikulumba kilinkubagha.’ (Mar. 5:42) Pabumalilo umundu aliwesa pa kisu kya pasi ikwisa kuya “ngolofu” kangi ikwisa kuya ‘nulusekelo mwa Yehova’ bwila na bwila.