Ngimba mubelengilepo inkhani simo sya mwalulu isya mu Ingasya ya Ndindilili? Linga mubelengilepo, keta linga mubaghile ukwamula amalalusyo agha:

Ngimba malemba ghaliku agha ghikunangisya ukuti Kyala ali nikitima nanuswe?

Pakabalilo aka Abaisraeli bali batumwa ku Igiputi, Kyala asimenye kanunu indamyo syabo kangi apilike ifyakubaba fyabo. (Kuso. 3:7; Yes. 63:9) Kyala atupelile nkifwani kyake kangi nanuswe tukuya nikitima. Ikuya nikitima nanuswe nalinga tubaghile ukwipilika ukuti tukaya bakulondiwa kumyake.—wp18.3-TB, pp. 8-9.

Ngimba ifimanyisyo fya Yesu fyabatulile bulebule abandu akuti bangasalanagha?

Bo Yesu ali pakisu kyapasi, Abayuda bingi basalanagha. Umwene akalipilike kanunu mundumbula kangi ababulile ukulondiwa kwa kuya bandu bakwiyisya ukuti baleke ukuya na kayilo ka kusalana. Yesu ababulile abafundiwa bake ukuti bayeghe banyamundu.—w18.06-TB, pp. 9-10.

Ngimba tukumanyilapo isyafiki panongwa iyi Kyala akalitikisye ukuti Mose ingile Nkisu Ikya lufingo?

Mose ali pabumanyani bwamaka fiyo na Yehova. (Kukumbu. 34:10) Kubumalilo bwa fyinja 40, bo bali m’matengele, abandu balyandile ukwilumbusya kangi kwa Mose panongwa yakusoba kwa misi. Kyala alimbulile Mose ukuti ayobe ku lyalabwe ukuti lisosye amisi. M’malo mwake Mose akomile pa lyalabwe ni ngili. Yehova aketile ukuti Mose akapilikile ubulongosi bwake pamo ukuti Mose akalimpele Yehova ulughindiko panongwa ya kika iki abombile. (Kuba. 20:6-12) Isi sikutumanyisya ukuti kwakulondiwa fiyo ukumpilikila Yehova nukumpa ulughindiko.—w18.07-TB, pp. 13-14.

Ngimba tubaghile ukonanga bulebule linga tukubalonga abandu muno bikubonekela?

Pali ifindu fitatu ifi fikwandisya ukuti tubalongeghe abandu muno bikubonekela, ifindu ifi fyo: kuno bakulile, ubukabi bwabo kangi ni fyinja fyabo. Kwakulondiwa fiyo ukuti tubaketeghe abandu bo muno Yehova ikubaketela kisita kusala! (Imbo. 10:34, 35)—w18.08-TB, pp. 8-12.

Ngimba mo munjila simo siliku isi Abakristu abakangale babaghile ukubatula abangi?

Unkristu unkangale uyu ubudindo bwake buchenjile Kyala ikunketa ukuti wakulondiwa fiyo kangi abaghile ukubomba nyingi ukuti abatule abangi. Abaghile ukwangala ni mbumba iyi undume pamo unkasi wake mfumusi wa nkipanga, ukuntula ukuti iyipeghe pakufumusya, ukubamanyisya Ibaibolo, nukukusya uluso lwake mubufumusi.—w18.09-TB, pp. 8-11.

Ngimba findu fiki ifi Abakristu bikubombesyela pakumanyila na bandu Ibaibolo?

Pali utumakhadi nu tumapepala twakubakolelela abandu ku ngomano. Pali mitundu 8 iminunu iya matilakiti kangi pali Ingasya ya Ndindilili na Wukani! na magazini aghangi. Pa Webusayiti yitu pakwaghiwa kangi amabulosha,amabuku agha tukumanyila na bandu Ibaibolo kangi na mavidiyo 4 aghakulondiwa fiyo ukongelelapo iyakuti, Nongwa yafiki mukulondiwa ukumanyila Ibaibolo?—w18.10-TB, p. 16.

Ngimba Unkristu abaghile “ukula” bulebule “ubwanaloli” bo muno ilemba lya Isya Mbupingamu 23:23 likuyobela?

Tutikubika indalama ukuti tule ubwanaloli. Loli tukulondiwa ukumalila akabalilo kitu mwakwiyipa ukuti tubukabe.—w18.11, p. 4.

Ngimba tubaghile ukumanyilako isyafiki muno Hosea abombile nu nkasi wake, Gomora?

Gomora abombile ubulowe mwakwandisania, loli Hosea alinhobokile nukukindilila ukwikala nawe. Linga mumbumba ya Chikristu, undume pamo unkasi abombile ubulowe, uyu akabombapo ubulowe abaghile ukusala ukunhobokela unnine. Linga undume pamo unkasi, asalile ukughonana kangi nu nnine uwambweghi uyu abombile ubulowe, atikulondiwa kangi ukuya naminong’ono ghakumasya ubweghi.—w18.12, p. 13..