1. Ngimba Yehova ikutwitikisya ukuti tubombeghe isyafiki?

YEHOVA ikumwitikisya umundu aliwesa ukubomba isi ikulonda pabumi bwake. Umwene ikutumanyisya muno tubaghile ukubombela ukuti tusaleghe kanunu ifyakubomba, kangi linga tusalile ukubomba isi sikunhosya, umwene ikututula ukuti tufwanisye isi tusalile. (Sal. 119:173) Yonongwa yake linga tukukonga isi tukumanyila mu masyu gha Kyala, sikututula ukuti tusaleghe kanunu ifyakubomba.—Hib. 5:14.

2. Ngimba ndamyo yiliku iyi tubaghile ukwaghana nayo linga tusalile ifyakubomba?

² Nalinga ukuti tusalile kanunu ifyakubomba loli kubaghile ukuya kukafu fiyo ukuti tufwanisye isi twandile ukubomba. Inong’onela ififwanikisyo ifi: Unkamu uwakilumyana asalile ukuti abelengeghe Ibaibolo isiku lililyosa. Umwene andile kanunu ukubelenga Ibaibolo kwa masabata manandi itolo, loli pafifukwa fimo alekile ukubelenga. Umulumbu asalile ukuti ande ubupayiniya ubwa kabalilo kosa loli umwene ikukabila ukwanda. Akabughatila ka bakulumba kasalile ukuti kabakasye abakamu na balumbu, loli pakindile imyesi myingi bo bakali ukwanda ukubomba isi. Ifyakubombiwa ifi fikindene, loli filipo ifindu fimo ifi fifwene mfyakubombiwa ifi. Bosa basalile ifyakubomba loli batoliwe ukufwanisya. Abakristu ba ku Korinti bope bali nindamyo bo iyi. Isagha tukete isi tubaghile ukumanyilako ukufuma kumyabo.

3. Ngimba Abakristu ba ku Korinti basalile ukubomba isyafiki, loli findu fiki ifi fyabombiwe?

³ Mfyinja fya m’ma 55 C.E., Abakristu ba ku Korinti basalile kanunu ifyakubomba. Abene bamenye ukuti abakamu na balumbu ba ku Yerusalemu na ku Yudeya baghanagha nindamyo kangi bali balondo, ifipanga fimo fyabatulagha mwakubapa indalama. Abakristu ba ku Korinti bali nikisa kangi nindumbula yakupa abene balondagha ukuti bope babatule abakamu aba balondiwagha ubutuli, yonongwa  yake balinsumile untumiwa Pauli muno babaghile ukubombela ukuti babatule. Umwene abapele ubulongosi kukipanga nukunsala Titi ukuti eghe indalama isi basangulagha. (1 Kor. 16:1; 2 Kor. 8:6) Bo imyesi minandi yikindilepo, Pauli asyaghenie ukuti Abakristu ba ku Korinti bakafwanisye ukubomba isi bafingile. Ifyakukongapo fyake, ifyabupe fyabo fikayagha pakubikiwa mwanakalinga ukuti fibuke ku Yerusalemu pampene nifyabupe ifyakufuma ku fipanga ifingi.—2 Kor. 9:4, 5.

4. Ukufwana na 2 Bakorinti 8:7, 10, 11, ngimba Pauli abakasisye Abakristu ba ku Korinti ukubomba isyafiki?

⁴ Abakristu ba ku Korinti basalile kanunu ifyakubomba, kangi Pauli abandaghisisye fiyo panongwa ya kisa kyabo nindumbula yabo iyakupa. Loli umwene alondiwagha kangi ukubakasya ukuti basimalisyeghe isi basalile ukusibomba. (Belenga 2 Bakorinti 8:7, 10, 11.) Isi babombile sikutumanyisya ukuti Abakristu abasubiliwa bope babaghile ukutamiwa ukufwanisya isi basalile ukusibomba.

5. Ngimba malalusyo ghaliku agha tukuya pakwamula?

⁵ Mwakufwana itolo na Bakristu ba ku Korinti, nanuswe kubaghile ukuya kukafu fiyo ukuti tufwanisye isi tusalile ukubomba. Nongwa yafiki? Panongwa yakuti tuli basitabugholofu, tubaghile ukukabila ukuti tufwanisye isi tusalile ukubomba. Lumo ifindu ifi tukaghulilagha fibaghile ukutupangisya ukuti tutoliwe ukufwanisya ukubomba isi twasalile. (Ndumbi. 9:11; Rom. 7:18) Ngimba tukulondiwa ukubomba isyafiki linga tukwinong’onela isi twasalile kunyuma nukuketa linga tukulonda ukuchenja? Kangi ngimba tubaghile ukubomba bulebule ukuti tusimalisye isi twasalile ukusibomba?

6. Nongwa yafiki utubalilo tumo tubaghile ukuchenja ifyakubomba?

⁶ Ifyakusala fimo ifi fyakulondiwa fiyo tutikulondiwa ukuchenja. Mwakifwanikisyo, tukwiyipa ukumbombela Yehova nindumbula yosa, kangi tukulondiwa ukukindilila ukuya basubiliwa ku mwinitu uwa mbweghi. (Mat. 16:24; 19:6) Loli ifyakusala fimo tubaghile ukuchenja. Nongwa yafiki? Panongwa yakuti ifindu fikuchenja pabumi bwitu. Ngimba findu fiki ifi fibaghile ukututula ukuti tufwanisyeghe ifi tusalile?

7. Ngimba tukulondiwa ukusuma isyafiki, kangi nongwa yafiki?

⁷ Musumeghe amahala kwa Yehova. Yakobu alembile ukuti: ‘Loli linga yumo mmyinu aghilwe amahala, yo alisumagha kwa Kyala uyu ikubapa bosa itolo.’ (Yak. 1:5) Ukuyoba ubwanaloli, twesa ‘tukwaghilwa amahala.’ Yonongwa yake tukulondiwa ukunsubila Yehova linga tukusala ifyakubomba pamo linga tukulonda ukuchenja ifyakubomba pabumi bwitu. Yehova ikuya pakututula ukuti tusale mwamahala ifyakubomba.

8. Ngimba tukulondiwa ukufufuza isyafiki bo tukali ukusala ifyakubomba?

⁸ Mufufuzeghe kanunu. Tubelengeghe Ibaibolo, amabuku agha igulu likutupa, nukuyobesania nabandu aba tukubasubila. (Mbu. 20:18) Ukubomba isi kwakulondiwa fiyo bo tukali ukusala ukuti tuchenje imbombo, ukusama, pamo ukusala ifimanyilo ifi fibaghile ukututula pabumi bwitu nukukindilila ukumbombela Yehova.

9. Ngimba tukuya pakusayiwa bulebule linga tuli babwanaloli?

⁹ Muyeghe naminong’ono amanunu. Yehova ikwinong’onelapo fiyo ukufwana na isi tukubomba. (Mbu. 16:2) Umwene ikulonda ukuti tubombeghe ifindu fyosa munjila iyabwanaloli. Yonongwa yake linga tukusala ifyakubomba, tukulondiwa ukuya babwanaloli patwibene kangi nukuya naminong’ono amanunu ku binitu. Linga tukaya babwanaloli, kubaghile ukuya kukafu fiyo ukuti tufwanisye isi tusalile ukubomba pabumi bwitu. Mwakifwanikisyo, unkamu uwakilumyana abaghile ukusala ukuti aye mpayiniya wakabalilo kosa. Bo akabalilo kakindilepo, abaghile ukutamiwa ukuti afwanisye amaawala agha ghikulondiwa kangi lumo abaghile ukuleka ukuhoboka mubufumusi. Umwene abaghile  ukwinong’ona ukuti ubwighane bwake ubwakubomba ubupayiniya bwali bwakuti anhobosye Yehova. Lumo aminong’ono ghake aghakwanda ubupayiniya ghali ghakuti abahobosye itolo abapapi bake pamo umundu yumo.

10. Ngimba findu fiki ifi fikulondiwa ukuti tuchenje pabumi bwitu?

¹⁰ Inong’onela isya mmanyili wa Baibolo uyu ikulonda ukuleka ukukwesa ingambo. Pabwandilo, atamiwagha, akakwesagha ingambo kwa sabata yumoywene pamo kwa basabata babili, loli alyandile kangi ukukwesa ingambo. Pabumalilo, umwene alekile ukukwesa ingambo! Ulughano lwake kwa Yehova nubwighane ubwakunhobosya fyalintulile ukuti amalane nakayilo aka.—Kolos. 1:10; 3:23.

11. Nongwa yafiki mutikulondiwa ukuchenjachenja imbatiko yinu?

¹¹ Mukongeghe imbatiko yinu. Linga mutikuchenja imbatiko yinu kukuya pakuya kupepe ukufwanisya isi musalile ukusibomba. Mwakifwanikisyo, mubaghile ukuya nimbatiko iyakubelenga Ibaibolo isiku lililyosa. Loli linga imbatiko yinu yikaya nunu mukabaghila ukufwanisya isi musalile ukusibomba. * Lumo abakulumba bakipanga babaghile ukusala ukuti babakasyeghe abakamu na balumbu utubalilo twingi, loli bo akabalilo kakindilepo, batoliwe ukufwanisya isi basalile. Ukuti bafwanisye isi basalile, bikulondiwa ukwilalusya amalalusyo agha: “Ngimba tulembile ingamu sya bakamu na balumbu aba babaghile ukusayiwa panongwa yakubendela ukuti tukabakasye? Ngimba tusalile akabalilo akanunu akakubendela?”

12. Ngimba tukulondiwa ukubomba isyafiki kangi nongwa yafiki?

¹² Mufwanisyeghe isi musalile ukubomba. Akayapo nayumo uyu ali nakabalilo, ifibombelo, pamo amaka ukuti abombe kilikyosa iki ikulonda. Yonongwa yake tukulondiwa ukuti tufwanisyeghe isi tusalile ukubomba nukwinong’ona kanunu. Linga kwakulondiwa, tubaghile ukuchenja isi tusalile isi tukuketa ukuti tukabaghila ukufwanisya. (Ndumbi. 3:6) Inong’onela ifyakusala ifi mwalondagha ukuchenja, kangi keta linga mubaghile ukufwanisya. Keta injila 5 isi sibaghile ukubatula ukufwanisya isi mwandile ukusibomba.

13. Ngimba mubaghile ukughagha bulebule amaka agha mukulondiwa ukuti mufwanisye isi musalile ukusibomba?

¹³ Mwiputeghe ukuti Kyala abape amaka. Kyala abaghile ukubapa ‘amaka ukuti mubombe’ syosa isi mukulonda. (Filip. 2:13) Yonongwa yake mukulondiwa ukusuma ukuti Yehova abape mbepo mwikemo ukuti muye namaka agha mukulondiwa. Mukindilileghe ukwiputa nalinga sikuboneka ukuti mutikwamuliwa mwanakalinga. Bo muno Yesu ayobile ukuti: ‘Amusumeghe, kangi mwisakwambililagha mbepo mwikemo.’—Luka 11:9, 13.

14. Ngimba ilemba lya Isya Mbupingamu 21:5 libaghile ukubatula bulebule ukuti mufwanisye isi musalile ukusibomba?

¹⁴ Mupangeghe ipulani. (Belenga Isya Mbupingamu 21:5.) Ukuti mufwanisye imbombo yiliyosa iyi mwandile ukubomba, mukulondiwa ukuya nipulani. Kangi mukulondiwa ukukonga ipulani yinu. Mwakufwana itolo linga mukusala ifyakubomba, mukulondiwa ukuya nimbatiko inunu ukuti mufwanisye isi musalile ukusibomba. Linga muli nimbombo nyingi mukulondiwa ukuchepesya ukuti mufwanisye isi musalile ukusibomba. Pauli abakasisye Abakristu ba ku Korinti ukuti basungeghe indalama ukuti basanguleghe ‘pisiku lyakwanda mwasabata’ m’malo mwakusangula indalama pene apa linga umwene afikile. (1 Kor. 16:2) Ukuchepesya imbombo kubaghile ukubatula ukuti mufwanisye kanunu isi musalile ukusibomba.

15. Linga mupangile ipulani, ngimba mukulondiwa ukubomba isyafiki?

¹⁵ Linga mulembile ipulani kubaghile ukuya kupepe fiyo ukufwanisya isi mukulonda ukubomba. (1 Kor. 14:40) Mwakifwanikisyo, akabughatila  kabakulumba kikusala unkulumba yumo ukuti alembe isi bikulonda ukubomba, ukongelelapo uyu asaliwe ukuti aketesye isi silembiwe nakabalilo aka bikuya pakumalisyila isi bikulonda ukubomba. Linga abakulumba balembile isi bayobesenie kukuya kupepe fiyo kumyabo ukufwanisya isi bikulonda ukubomba. (1 Kor. 9:26) Mwakufwana itolo nanuswe tukulondiwa ukughelaghela ukubomba isi pabumi bwitu. Mwakifwanikisyo, tukulondiwa ukuya nimbatiko iya findu ifi tukulonda ukubomba nukulemba ifindu ifyakulondiwa fiyo pamalo aghakwanda. Isi sikuya pakututula ukuti tufwanisye isi twandile ukubomba kangi ukuti tubombe nyingi.

16. Ngimba findu fiki ifi fyakulondiwa ukuti tufwanisye isi tusalile ukusibomba, kangi ngimba ilemba lya Baroma 12:11 libaghile ukututula bulebule?

¹⁶ Mwiyipeghe fiyo. Tukulondiwa ukwiyipa fiyo ukuti tukonge ipulani yitu nukufwanisya isi twandile ukusibomba. (Belenga Baroma 12:11.) Pauli alimbulile Timoti ukuti ‘umilisyeghe itolo’ kangi ‘asikongeghe’ ukuti aye mmanyisi nnunu. Tubaghile ukukonga ubulongosi ubwa Pauli ubu ukuti tufwanisye ukumbombela Yehova.—1 Tim. 4:13, 16.

17. Ngimba ilemba lya Baefesi 5:15, 16 libaghile ukututula bulebule ukuti tufwanisye isi tusalile ukusibomba?

¹⁷ Mubombeleghe kanunu akabalilo kinu. (Belenga Baefesi 5:15, 16.) Musaleghe akabalilo akanunu aka mukulonda ukubomba isi mukulonda kangi mungachenjagha. Mungaghulilagha kwa kabalilo akatali mpaka ifindu fimo fibatolesye ukufwanisya isi musalile. (Ndumbi. 11:4) Muyeghe maso nifindu ifi fikaya fyakulondiwa ukuti mufwanisyeghe ukubomba ifindu ifyakulondiwa. (Filip. 1:10) Linga kwakulondiwa musaleghe akabalilo akanunu aka nayumo uyu abaghile ukubasofania isi mukulonda ukubomba. Mubabuleghe abangi ukuti mukulondiwa akabalilo akakubombela isi mukulonda ukubomba. Mukumbukeghe ukusimya ifoni ukuti yingabasofaniagha. *

18-19. Ngimba findu fiki ifi fibaghile ukututula ukuti tufwanisye isi tusalile ukubomba nalinga ukuti kukaya kupepe?

¹⁸ Mwinong’oneleghe ifyakukongapo fyake. Ifyakukongapo fyake, ifyakufwana na ifi musalile ukubomba fifwene itolo nubulendo ubutali. Linga naloli mukulonda ukufika kuno mukubuka, mubaghile ukukindilila ubulendo bwinu nalinga ukuti mukwenda injila iyingi ukuti mukafike kuno mukubuka. Mwakufwana itolo, linga tukwinong’onela isi tusalile ukusibomba, tutikuya pakuwa amaka mwanakalinga nalinga twaghane nindamyo.—Gal. 6:9.

¹⁹ Ukusala kanunu ifyakubomba kukafu fiyo, kangi kubaghile ukuya kukafu ukuti tufwanisye ukubomba isi tusalile. Loli nubutuli bwa Yehova, tubaghile ukuya namahala kangi namaka ukuti tufwanisye isi tusalile ukusibomba.