NKABALILO kakunyuma, undindilili abombagha imbombo isya pakaya pamo ukupwelelela katundu uwa mundu yumo. Amasyu agha ghasanusiwe ukuti “undindilili” mu Chihiburi na mu Chigiriki utubalilo tumo ghikusanusya ukuti undongosi pamo uwakuketesya inyumba.

Bo Yosefu, umwana wa Yakobu, ali kubutumwa ku Egiputi, umwene ali ndindilili nnyumba ya mwalafyale wake. Mwalafyale wake ‘abikile kilikyosa m’maboko ghake.’ (Bwa. 39:2-6) Pabumalilo bo Yosefu apeliwe amaka, yope alinsalile undindilili ukuti aketesyeghe nnyumba yake.—Bwa. 44:4.

Nkabalilo ka Yesu, abenekaya utubalilo twingi bikalagha ku tawuni kubutali nimighunda yabo. Yonongwa yake abenekaya basalagha abalindilili ukuti baketesyeghe imbombo isi abandu babombagha.

Ngimba yonani uyu asaliwagha ukuya ndindilili? Nkabalilo kakunyuma undembi yumo uwa ku Roma uyu ingamu yake yo Columella ayobile ukuti untumwa uyu asaliwagha ukuya ndongosi, pamo ndindilili, alondiwagha “ukuya mundu uyu amenye ukubomba kanunu imbombo.” Umwene alondiwagha ukuti “aketesyeghe abandu aba bikubomba imbombo kisita kubabombela ifyankhaza.” Ayobile kangi ukuti: “Ikindu ikyakulondiwa fiyo ku ndindilili kyali kyakuti umwene akalondiwagha ukwinong’ona ukuti amenye ukubomba ikindu kilikyosa kangi alondiwagha ukuti ayeghe nubwighane ubwakumanyila ifindu ifipya.”

Amasyu gha Kyala ghikuyoba isya kifwanikisyo kya ndindilili kangi nimbombo yake ukuti ghalinganie isya mbombo simo isi sikubombiwa nkipanga kya Bukristu. Mwakifwanikisyo, untumiwa Peteri ikubakasya Abakristu ukuti babombeleghe amaluso agha Kyala abapele ukuya gha ‘kubombelanila ukuti bayeghe bo balindilili abanunu, aba fikungilwa fya Kyala ifyakukindanakindana.’—1 Pet. 4:10.

Yesu yope abombile ikifwanikisyo kya ndindilili ukuti alinganie isi sili pilemba lya Luka 16:1-8. Kangi mubusololi bwake pakuyoba isya kimanyikilo kya Bunyafyale bwake, Yesu abasimikisyile abamanyili bake ukuti ayagha pakusala ‘untumwa unsubiliwa nuwa mahala,’ pamo “undindilili unsubiliwa.” Imbombo inywamu iya ndindilili yayagha pakuya yakutendekesya ifyakulya ifyamwambepo ifya bamanyili ba Kristu m’masiku ghakubumalikisyo. (Mat. 24:45-47; Luka 12:42) Tukundaghisya fiyo panongwa yakuti tukwambilila amabuku agha ghikukasya ulwitiko lwitu agha undindilili unsubiliwa ikutendekesya kangi ghikwaghiwa pa kisu kyosa kyapasi.