1-2. (a) Ngimba findu fiki ifi fibaghile ukututula ukuti tukindilileghe ukwifimbilisya ku ndamyo isiku lililyosa? Lingania. (b) Ngimba tukuya pakuyobesania isyafiki mu nkhani iyi?

“LINGA ngwinong’onela isya ndamyo iyi nalyaghene nayo, ngumanya ukuti ngayagha pakumalana nayo nimwene.” Ngimba nanumwe muyobilemo bo ulu? Twebingi tuyobilemo. Lumo mukuyoba isi bo muketile muno mwafwanisyile ukumalana nindamyo ya bubine ubunywamu pamo ukwifimbilisya ku nifwa ya nkamu winu. Linga mukwinong’onela isi, mubaghile ukuketa ukuti mukufwanisya ukwifimbilisya ku ndamyo isiku lililyosa panongwa yakuti mbepo mwikemo wa Yehova ghukubapa “amaka amakindilisi.”—2 Kor. 4:7-9.

² Tukulondiwa kangi mbepo mwikemo ukuti ghututule ukwifimbilisya ku ndamyo isya nkisu ikibibi iki. (1 Yoh 5:19) Mwakongelelapo tukulondiwa amaka ukuti tulimbane “nimbepo inyali iya mumpalanga.” (Ef. 6:12) Lino tukuya pakuyobesania injila sibili isya muno mbepo mwikemo ghukututulila ukuti tulimbane nindamyo isi. Ukufuma apo tukuya pakuyobesania isi tukulondiwa ukubomba ukuti tutuliwe na mbepo mwikemo.

3. Ngimba njila yimo yiliku iyi Yehova ikututulila ukuti twifimbilisyeghe ku ndamyo?

³ Mbepo mwikemo wa Yehova ghukututula ukuti tufwanisye isi tukulonda nalinga ukuti tubaghile ukwaghana nindamyo. Untumiwa Pauli asimenye ukuti abaghile ukufwanisya ukumbombela Yehova nalinga ukuti aghanagha nindamyo panongwa yakuti umwene asubilagha ‘amaka gha Kristu.’(2 Kor. 12:9) Pabulendo bwake ubwabubili ubwa bumishonale, Pauli akiyulagha pene pambombo iyakufumusya loli umwene abombagha kangi imbombo ukuti afyaghe ifyakulondiwa pabumi bwake. Pauli ikalagha ku Korinti ku nyumba ya Akwila na Prisila. Abene bapangagha amahema (amatenti). Panongwa yakuti Pauli apangagha amatenti, umwene abombagha  nabo amasiku ghamo. (Imbo. 18:1-4) Mbepo mwikemo walintulile Pauli ukuti afwanisye ububombeli bwake nukufyagha ifindu ifyakulondiwa pabumi bwake.

4. Ukufwana na 2 Bakorinti 12:7b-9, ngimba ndamyo yiliku iyi Pauli ali nayo?

⁴ Belenga 2 Bakorinti 12:7b-9. Pa mavesi agha, ngimba Pauli asanusyagha isyafiki bo ikuyoba ukuti ikutamiwa “numwifwa wa mumbili”? Linga mwaghene nindamyo pabumi bwinu, mubaghile ukupilika ifyakubaba. Yonongwa yake Pauli yope ayobile ukuti alipilike ifyakubaba panongwa ya ndamyo isi alyaghene nasyo. Umwene atile indamyo isi syafwene itolo “nuwandumi wa Setano” uyu alondagha ukuti ‘ningiyumbikagha.’ Setano pamo abandumi bake lumo bakali bo aba bapangisyagha ukuti Pauli aghane nindamyo, isi syali bo mwifwa wa mumbili. Loli bo imbepo inyali isi simenye isyakufwana “numwifwa,” uwa mumbili wa Pauli syabaghile ukuti syapangisye ukuti atamiwe fiyo. Ngimba Pauli abombile isyafiki?

5. Ngimba Yehova alyamwile bulebule inyiputo sya Pauli?

⁵ Pakwanda, Pauli alondagha ukuti Yehova ansosye “umwifwa.” Umwene atile: “Ndinkupyelesya katatu ku Mwalafyale [Yehova] . . . ukuti kasokemo mmyangu.” Nalinga ukuti Pauli aliputile kwa Yehova, loli umwifwa ghukasokilemo mumbili wake. Ngimba isi sikusanusya ukuti Yehova akalyamwile inyiputo sya Pauli? Hayi. Umwene alyamwile. Yehova akamasisye indamyo, loli alimpele Pauli amaka ukuti ifimbilisye indamyo iyi alyaghene nayo. Yehova atile: “Namanga amaka ghangu ghikuya mapelelesye mbonywa.” (2 Kor. 12:8, 9) Kangi nubutuli bwa Yehova, Pauli akindilile ukuya walusekelo nukuya nulutengano ulwa mundumbula!—Filip. 4:4-7.

6. (a) Ngimba Yehova abaghile ukwamula bulebule inyiputo syitu? (b) Ngimba lufingo luliku ulwa m’malemba agha ghali mu palagilafu ulu lukubapa amaka?

⁶ Mwakufwana itolo na Pauli, ngimba munsumilemo Yehova ukuti amasye indamyo iyi muli nayo? Lumo mwiputilemo kwa kabalilo kingi ukuti Yehova amasye indamyo, loli sitikumalika—ngimba isi sikubapangisya ukuti mwinong’oneghe ukuti Yehova atikuhoboka nanumwe? Linga mo siyilile mukumbukeghe ikifwanikisyo kya Pauli. Bo muno Yehova alyamulile inyiputo sya Pauli, kisita kukayika umwene ikuya pakwamula inyiputo syinu! Utubalilo tumo Yehova akabaghila ukumasya indamyo. Loli, ukwendela mwambepo mwikemo, umwene abaghile ukubapa amaka ukuti mwifimbilisye ku ndamyo. (Sal. 61:3, 4) Mubaghile “ukubighiwa pasi,” loli Yehova akabaghila ukubatagha.—2 Kor. 4:8, 9; Filip. 4:13.

7-8. (a) Ngimba mo munjila yiliku iyi mbepo mwikemo ghufwene itolo numbelo? (b) Ngimba Peteri alingenie bulebule muno mbepo mwikemo ghukubombela imbombo?

⁷ Ngimba njila yiliku iyingi iyi mbepo mwikemo ghukututulila? Ukufwana itolo numbelo uwamaka ughu ghukuputa pa sumbi, mbepo mwikemo ghukuya pakututula ukukindilila ukumbombela Yehova mpaka nkisu ikipya nalinga ukuti tukwaghana nindamyo.

⁸ Panongwa yakuti untumiwa Peteri ali ndobi, umwene asimenye nyingi isyakufwana nukwenda pa sumbi. Yonongwa yake umwene alingenie kanunu isya muno mbepo mwikemo ghukubombela imbombo mwakubombela amasyu agha ghafwene itolo nubulendo ubwa pa sumbi. Umwene alembile ukuti: “Ubusololi bukalisilemo siku mbwighane bwa mundu, loli abandu bayobagha isi sifumile kwa Kyala, bo abasukenie mbepo mwikemo.” Amasyu gha mu Chigiriki agha baghasanwisye ukuti “abasukenie” utubalilo twingi ghikusanusya “ukulongosiwa.”—2 Pet. 1:21.

9. Ngimba Peteri alondagha ukuti abandu binong’oneghe isyafiki apa ayobagha amasyu aghakuti “ukulongosiwa”?

⁹ Ngimba Peteri alondagha ukuti abandu binong’oneghe isyafiki apa ayobagha amasyu aghakuti “ukulongosiwa”? Amasyu agha ghafwene itolo namasyu agha mu Chigiriki agha Luka aghabombile imbombo, uyu alembile ibuku lya Imbombo Sya Batumiwa, pakulingania isya iboti ili “lyanyakiwe” numbelo. (Imbo. 27:15) Yonongwa  yake bo Peteri ikulemba ukuti abalembi ba Baibolo “balongosiwagha,” umwene abombile “amasyu agha isya mbupingamu,” bo muno ummanyili yumo ayobile. Peteri ayobile ukuti, mwakufwana itolo namuno iboti likulongosiwa numbelo ukuti likafike kuno likubuka, yonongwa yake bope abasololi ba Baibolo na balembi balongosiwe na mbepo mwikemo ukuti bafwanisye imbombo iyi bapeliwe. Ummanyili yula ayobile kangi ukuti: “Abalembi ba Baibolo bafwene itolo na maboti agha bikupinya ifindu ifi fikutula ukuti iboti lyendeghe kanunu, abene balitendekisye ukubomba imbombo iyi mbepo mwikemo wabalongosyagha ukubomba.” Yehova abombile ikighaba kyake. Umwene abatulile “numbelo,” pamo ukuti mbepo mwikemo. Abalembi ba Baibolo bope babombile imbombo iyi bapeliwe. Abene babombile mwakulongosiwa na mbepo mwikemo.

10-11. Ngimba findu fibili filiku ifi tukulondiwa ukubomba ukuti tulongosiweghe na mbepo mwikemo? Yoba ikifwanikisyo.

¹⁰ Bwanaloli ukuti amasiku agha Yehova atikubombela mbepo wake mwikemo ukuti abandu bafwanisye ukulemba amabuku gha mu Baibolo. Loli Yehova ikukindilila ukubombela mbepo wake mwikemo ukuti abalongosye ababombi bake. Yehova ikukindilila ukubomba ikighaba kyake. Ngimba mbepo mwikemo wa Kyala ghubaghile ukututula bulebule? Tukulondiwa ukughelaghela ukuti tukindilile ukubomba ikighaba kyitu. Ngimba tubaghile ukubomba bulebule isi?

¹¹ Inong’onela ikifwanikisyo iki. Linga uwakwendesya iboti ikulonda ukuti atuliwe numbelo, ikulondiwa ukubomba ifindu fibili ifi. Ikyakwanda, ikulondiwa ukubika iboti lyake kuno umbelo ghukubuka. Loli, iboti lyake likabaghila ukubuka nkyeni linga uwakwendesya iboti imile kubutali na kuno umbelo ghukubuka. Ikyabubili, umwene ikulondiwa ukukwesya nukubalula ifindu ifi fikutula ukuti iboti lyendeghe kanunu. Ukuyoba ubwanaloli, nalinga ukuti umbelo ghukuputa, iboti libaghile ukubuka nkyeni pene linga ifindu ifi fikutula ukuti iboti lyendeghe kanunu fikuputiwa numbelo. Mwakufwana itolo, tubaghile ukukindilila ukumbombela Yehova pene linga tukutuliwa na mbepo mwikemo. Ukuti tutuliwe na  mbepo mwikemo, tukulondiwa ukubomba ifindu fibili ifi. Ikyakwanda, tukulondiwa ukubomba ifindu ifi mbepo mwikemo wa Kyala ghukutulongosya ukubomba. Ikyabubili, tukulondiwa “ukwiyipa” fiyo ukubomba imbombo ya Yehova mulimosa muno tubaghile ukufwanisyila. (Sal. 119:32) Linga tukubomba isi, mbepo mwikemo ghukuya pakutupa amaka ukuti tukindilile ukumbombela Yehova mbusubiliwa mpaka nkisu ikipya.

12. Ngimba tukuya pakuyobesania isyafiki?

¹² Ukufika apa tuyobesenie injila sibili isya muno mbepo mwikemo ghukututulila. Mbepo mwikemo ghukutupa amaka kangi ghukututula ukukindilila ukuya basubiliwa linga twaghene nindamyo. Kangi ghukutulongosya nukututula ukuti tukindilile ukubomba imbombo iyi Yehova atupele iyi yikuya pakutupangisya ukuti tusabwaghe ubumi bwa bwila na bwila. Lino tukuya pakuyobesania ifindu 4 ifi tukulondiwa ukubomba ukuti tutuliwe na mbepo mwikemo.

13. Ukufwana na 2 Timoti 3:16, 17, ngimba amasyu gha Kyala ghabaghile ukututula bulebule, loli ngimba tukulondiwa ukubomba isyafiki?

¹³ Ikyakwanda tumanyileghe Amasyu gha Kyala. (Belenga 2 Timoti 3:16, 17.) Kyala abombile mbepo wake “ukubika” aminong’ono ghake mu balembi ba Baibolo. Linga tukubelenga Ibaibolo nukwinong’onelapo pa isi tukubelenga, ifundo sya Kyala sikutufika pandumbula. Amasyu agha Kyala aghatuyile, ghikututula ukuti tuchenje pabumi bwitu nukunhobosya umwene. (Hib. 4:12) Loli ukuti tutuliwe fiyo na mbepo mwikemo, tukulondiwa ukuya na kabalilo akakumanyila Ibaibolo isiku lililyosa nukwinong’onelapo fiyo pa isi tukubelenga. Ukufuma apo amasyu gha Kyala ghikuya pakutukasya pa isi tukuyoba nukubomba.

14. (a) Nongwa yafiki tubaghile ukuyoba ukuti mbepo mwikemo ghukwaghiwa pangomano? (b) Ngimba findu fiki ifi fibaghile ukututula ukuti tusayiweghe na mbepo mwikemo pangomano?

¹⁴ Ikyabubili, twiputeghe pampene. (Sal. 22:22) Akabalilo kosa linga tuli pangomano mbepo mwikemo wa Yehova ghukututula fiyo. (Ubuset. 2:29) Nongwa yafiki tukuyoba bo ulu? Panongwa yakuti linga tubungene na Bakristu abinitu, tukusuma mbepo mwikemo, tukwimba inyimbo isya Bunyafyale isi sikufuma M’masyu gha Kyala nukupilikisya ubulongosi ubwakufuma mu Baibolo ubu bukuyobiwa na bakamu aba basaliwe na mbepo mwikemo. Kangi mbepo mwikemo ughu ghukubatula abalumbu ukuti bitendekesye nukubomba ifighaba fyabo. Ukuti tutuliwe na mbepo mwikemo, tukulondiwa ukwitendekesya kanunu ukuti tukamulepo pangomano. Injila iyi, yikututula ukuti linga tuli pangomano twambilileghe mbepo mwikemo ughu ghufwene itolo “nifindu ifi fikutula ukuti iboti lyendeghe kanunu”.

15. Ngimba mbepo mwikemo ghukututula bulebule pambombo iyakufumusya?

¹⁵ Ikyabutatu, tufumusyeghe amasyu gha Kyala. Linga tukubombela Ibaibolo pakufumusya nukumanyisya, tukwitikisya mbepo mwikemo ukuti ghututule. (Rom. 15:18, 19) Ukuti tusayiweghe na mbepo mwikemo wa Kyala, akabalilo kosa tukulondiwa ukweghapo ikighaba pambombo iyakufumusya nukubombela Ibaibolo linga kwakulondiwa. Injila yimo iyi tubaghile ukukonga ukuti tuyobesanieghe kanunu na bandu mubufumusi ko kubombela imbatiko iya muno tubaghile ukuyobela pakufumusya ukufuma mu kabuku ka Ukufumusya nu Bumi Bwitu Bwabukristu.

16. Ngimba tukulondiwa ukubomba isyafiki ukuti twambilile mbepo mwikemo?

¹⁶ Ikya nambala 4, twiputeghe kwa Yehova. (Mat. 7:7-11; Luka 11:13) Ukuti twambilile mbepo mwikemo tukulondiwa ukunsuma Yehova ndwiputo. Kikayapo nakimo iki kibaghile ukututolesya ukwambilila mbepo wa Kyala. Mbepo mwikemo ghubaghile ukututula nalinga ukuti tupinyiwe kangi Setano akabaghila ukubomba nasimo ukuti tutoliwe ukwambilila mbepo mwikemo. (Yak. 1:17) Ngimba tukulondiwa ukwiputa bulebule ukuti tutuliwe na mbepo mwikemo? Ukuti twamule, isagha tuyobesanie nyingi isyakufwana nulwiputo  mwakwinong’onela ikifwanikisyo iki kikwaghiwa mwene mu buku ilya masyu amanunu gha Luka. *

17. Ngimba kimanyilo kiliku ikyakufwana nulwiputo iki tubaghile ukumanyilako ku kifwanikisyo kya Yesu iki kili pa Luka 11:5-9, 13?

¹⁷ Belenga Luka 11:5-9, 13. Ikifwanikisyo kya Yesu kikunangisya muno tubaghile ukusumila mbepo mwikemo. Nkifwanikisyo iki unnyambala alyambilile isi alondagha “panongwa ya lumilisyo lwake.” Umwene akatilagha ukusuma ubutuli ku mmanyani wake nalinga ukuti pali popakilo pakati. (Keta ilisyu ili likulingania ivesi mu mwb18 iya Julayi pa Luka 11:8.) Ngimba Yesu ayobile ukuti ikifwanikisyo iki kikutumanyisya isyafiki isya lwiputo? Umwene atile: “Amusumeghe, po mwisakupeghiwagha; amulondeghe, po mwisakufyaghagha; amukung’undeghe kulwighi, po mwisakwighuliliwagha.” Ngimba uswe tukumanyilako isyafiki? Ukuti twambilile mbepo mwikemo tukulondiwa, ukukindilila ukwiputa.

18. Ukufwana nikifwanikisyo kya Yesu, nongwa yafiki tuli nulusubilo losa ukuti Yehova ikuya pakutupa mbepo mwikemo?

¹⁸ Ikifwanikisyo kya Yesu kikututula kangi ukuketa inongwa iyi Yehova ikuya pakutupa mbepo mwikemo. Umundu uwa nkifwanikisyo iki alondagha ukuti amwambilile kanunu unhesya wake. Umwene aketile ukuti alondiwagha ukumpako ifyakulya unhesya wake uyu alisile pakilo loli umwene akali nafyo nafimo. Yesu atile umpalamani wake alimpele ifyakulya panongwa ya lumilisyo lwake. Ngimba ifundo ya Yesu yali yakuti fiki? Linga umundu unsitabugholofu ikufwanisya ukuntula umpalamani wake, nanuswe tuli nulusubilo losa ukuti Tata witu wakisa ikuya pakubatula bosa aba bikukindilila ukunsuma ukuti abape mbepo mwikemo! Yonongwa yake tuli nulusubilo losa ukuti Yehova ikuya pakwamula inyiputo syitu linga tukusuma ukuti atupe mbepo mwikemo.—Sal. 10:17; 66:19.

19. Nongwa yafiki tuli nulusubilo losa ukuti tukuya pakwifimbilisya ku ndamyo?

¹⁹ Tuli nulusubilo losa ukuti tukuya pakwifimbilisya nalinga ukuti Setano ikukindilila ukutufwima. Nongwa yafiki? Panongwa yakuti mbepo mwikemo ghukututula munjila sibili. Iyakwanda, ghukutupa amaka ukuti twifimbilisye ku ndamyo. Iyabubili, amaka ghake ghikututula ukuti tukindilileghe ukumbombela Yehova mpaka nkisu ikipya. Isagha tukindilileghe ukusubila fiyo ubutuli bwa mbepo mwikemo!