1. Ukufwana na Matai 7:13, 14, nongwa yafiki tubaghile ukuyoba ukuti tuli pabulendo?

TWESA tuli pabulendo. Ubwighane bwitu bo bwakuti tusikale nkisu ikipya pasi pabulaghili bwa Yehova ubwa lughano. Isiku lililyosa tukughelaghela ukwenda munjila iyi yikutulongosyela ku bumi. Loli ukufwana namuno Yesu ayobile, injila iyi mfinye kangi utubalilo tumo kubaghile ukuya kukafu ukwendamo. (Belenga Matai 7:13, 14.) Panongwa yakuti tuli basitabugholofu, kubaghile ukuya kupepe ukuleka ukwenda munjila iyi.—Gal. 6:1.

2. Ngimba tukuya pakumanyila isyafiki mu nkhani iyi? (Keta ibokosi ilyakuti, “ Ukwiyisya Kukututula Ukuti Tuchenje Ifindu Fimo.”)

² Linga tukulonda ukukindilila ukwenda munjila ifinye iyi yikubuka ku bumi, tukulondiwa ukwiyipa ukuti tuchenje aminong’ono ghitu, utuyilo twitu nifyakubomba fyitu. Untumiwa Pauli abakasisye Abakristu ba ku Korinti ukuti bakindilile “ukuchenja.” (2 Kor. 13:11) Ubulongosi ubu bukututula nanuswe amasiku agha. Mu nkhani iyi, tukuya pakumanyila muno Ibaibolo libaghile ukututulila ukuchenja namuno abamanyani bitu aba bali nififwanikisyo ifinunu babaghile ukututulila ukuti tukindilile ukwenda munjila iyakubuka ku bumi. Kangi tukuya pakumanyila akabalilo aka kubaghile ukuya kukafu ukukonga ubulongosi ubwakufuma ku gulu lya Yehova. Tukuya pakuketa muno ukwiyisya kubaghile ukututulila ukuti tuchenje kisita kuleka ukumbombela Yehova mwalusekelo.

3. Ngimba amasyu gha Kyala ghabaghile ukututula bulebule?

³ Kukaya kupepe ukuchenja aminong’ono ghitu. Nongwa yafiki? Panongwa yakuti indumbula yitu yibaghile ukutusyoba kangi kubaghile ukuya kukafu ukumanya kuno yikutulongosyela. (Yere. 17:9) Kubaghile ukuya kupepe ukwisyoba twibene ‘nifundo  isyabutungulu.’ (Yak. 1:22) Tukulondiwa ukubombela amasyu gha Kyala ukuti tuchenje. Amasyu gha Kyala ghikusisetula isi sili nkati ‘munyinong’ono syitu na kuno silabile’ isya mundumbula syitu. (Hib. 4:12, 13) Amasyu gha Kyala ghikubomba ukufwana na X-ray iyi yikututula ukuketa ifindu ifi fili nkati. Loli tubaghile ukuya bakwiyisya linga tukukonga ubulongosi ubwakufuma mu Baibolo pamo kwa aba bimikiwe na Kyala.

4. Ngimba findu fiki fikunangisya ukuti Umwalafyale Sauli alyandile ukwibona?

⁴ Ikifwanikisyo kya Mwalafyale Sauli kikunangisya isi sibaghile ukubombiwa linga tukaya bakwiyisya. Sauli alyandile ukwibona panongwa yakuti akanile ukwitikisya ukuti ikulondiwa ukuchenja. (Sal. 36:1, 2; Haba. 2:4) Isi syabonike pakabalilo aka Yehova alimpele ubulongosi ubwa isi alondiwagha ukubomba linga abatolile Abaamaleki. Loli Sauli akalimpilikile Yehova. Kangi pakabalilo aka unsololi Samueli ayobesaniagha nawe pa nkhani iyi, Sauli akanile ukwitikisya ubusobi bwake. M’malo mwake, atile yikali nkhani nywamu kangi abandu bo balimfimbilisye ukubomba isi. (1 Samu. 15:13-24) Kangi kunyuma, Sauli abombilepo bo isi. (1 Samu. 13:10-14) Umwene alitikisye ukuya wakwibona mundumbula yake. Kangi akachenjile aminong’ono ghake yonongwa yake Yehova alimfundile nukunkana.

5. Ngimba tubaghile ukumanyilako isyafiki kwa Sauli?

⁵ Tubaghile ukumanyilako kwa Sauli, mwakwilalusya amalalusyo agha: ‘Linga ngubelenga ubulongosi ubwakufuma m’masyu gha Kyala, ngimba ngukyagha ikifukwa ikyakuleka ukubukongela? Ngimba ngwinong’ona ukuti isi ngubomba sikaya mbibi fiyo? Ngimba ngubapa abangi inongwa pa isi mbombile?’ Linga ansala wa malalusyo agha yo wakuti ena, tukulondiwa ukuchenja aminong’ono nutuyilo twitu. Linga tukabaghila ukuchenja, tubaghile ukwanda ukwibona kangi tukabaghila ukuya pabumanyani na Yehova.—Yak. 4:6.

6. Lingania ukukindana kwa pakati pa Mwalafyale Sauli nu Mwalafyale Davidi.

⁶ Keta ukukindana pakati pa Mwalafyale Sauli nu Mwalafyale Davidi, uyu asighanile ‘indaghilo sya Yehova.’ (Sal. 1:1-3) Davidi asimenye ukuti Yehova ikubapoka abakwiyisya loli ikubaywelula aba bikwibona. (2 Samu. 22:28) Yonongwa yake Davidi alitikisye ukuti indaghilo sya Kyala sichenje aminong’ono ghake. Umwene alembile ukuti: ‘Nikuntufya Yehova uyu ikumba amahala, pope napakilo yo yuyo ikuyimanyisya indumbula yangu.’—Sal. 16:7.

7. Ngimba tukuya pakubomba isyafiki linga tuli bakwiyisya?

⁷ Linga tuli bakwiyisya, tukuya pakwitikisya amasyu gha Kyala ukuti ghachenje aminong’ono ghitu amabibi bo tukali ukusala ifyakubomba. Amasyu gha Kyala ghabaghile ukufwana itolo nilisyu ili likutubula ukuti: ‘Injila yo iyi. Amuyikonge yiyo.’ Ghikuya pakutusoka linga twandile ukubomba ifindu ifibibi. (Yes. 30:21) Linga tukupilikisya kwa Yehova tukusayiwa munjila isyakukindanakindana. (Yes. 48:17) Mwakifwanikisyo, tutikuya pakukosiwa isoni panongwa yakuti umundu yumo ikutupa ubulongosi. Kangi tukuya pakuseghelela fiyo kwa Yehova panongwa yakuti tukumanya ukuti ikutupasikisya pakuya tata walughano.—Hib. 12:7.

8. Ukufwana na Yakobu 1:22-25, ngimba tubaghile ukubombela bulebule amasyu gha Kyala ukufwana nigilasi?

⁸ Amasyu gha Kyala ghafwene itolo nigilasi kumyitu. (Belenga Yakobu 1:22-25.) Twebingi tukwiketa pigilasi isiku lililyosa bo tukali ukusokapo pakaya. Tukubomba isi ukuti tukete apa tukulonda ukutendekesya bo abangi bakatubona. Mwakufwana itolo, linga tukubelenga Ibaibolo isiku lililyosa, tukuketa muno tubaghile ukuchenjela aminong’ono nutuyilo twitu. Bingi bikuketa ukuti kwakutula fiyo ukubelenga akabuku ka Kusanda Malemba Zuŵa na Zuŵa isiku lililyosa nulubunju bo bakali ukusokapo pakaya. Abene bikulonda ukuti isi bikubelenga sichenje aminong’ono ghabo. Kangi bikuketa muno babaghile  ukukongela ubulongosi ubwakufuma m’masyu gha Kyala. Mwakongelelapo, tukulondiwa ukuya nimbatiko, isi sikongelapo ukubelenga nukwinong’onelapo amasyu gha Kyala isiku lililyosa. Isi sibaghile ukuboneka ukuti sikaya syakulondiwa loli kyo kindu kimo ikyakulondiwa iki tukulondiwa ukubomba ukuti kitutule ukukindilila ukwenda munjila ifinye iya yikubuka ku bumi.

9. Ngimba po pakabalilo kaliku aka ummanyani winu abaghile ukubapa ubulongosi?

⁹ Ngimba mwabombilepo simo isi syayagha pakonanga ubumanyani bwinu na Yehova? (Sal. 73:2, 3) Linga ummanyani winu anangisye ubukifu mwakubapa ubulongosi, ngimba mwalimpilikile nukukonga ubulongosi bwake? Linga mo syayilile, mwabombile kanunu kangi kisita kukayika mwalindaghisisye fiyo panongwa yakuti abasokile.—Mbu. 1:5.

10. Ngimba mukulondiwa ukubomba isyafiki linga ummanyani winu ikubapa ubulongosi?

¹⁰ Amasyu gha Kyala ghikutukumbusya ukuti: ‘Ukufulasya kwa masyu gha mmanyani kununupo.’ (Mbu. 27:6) Ngimba isi sikusanusya isyafiki? Inong’onela ikifwanikisyo iki: Tufwanikisye ukuti mukughulila ukuti muloboke pansebo ughu abandu bingi bikwendapo loli panandi itolo mukusofanisiwa nifoni yinu. Mukwanda ukwenda nukwingila munsebo kisita kuketa kuno mukubuka. Panandi itolo ummanyani winu ikubakola ikiboko nukubakwabila kumbali. Panongwa yakuti abakwabile namaka, mwipalatwile ikiboko loli abatulile ukuti mungakanyiwagha nigalimoto. Nalinga ukuti mukuya pakupilika ifyakubaba kwa masiku mingi, ngimba mukuya pakukalala panongwa yakuti ummanyani winu abakolile ikiboko? Hayi. Mukuya pakunndaghisya panongwa ya butuli bwake. Mwakufwana itolo, linga ummanyani winu ikubasoka ukuti ifyakuyoba pamo ifyakubomba fyinu fitikukolelana nifundo sya Kyala isyabugholofu, pakwanda mubaghile ukukalala. Loli mungakanagha pamo ukukalala panongwa yabulongosi ubu ikubapa. Bubaghile ukuya bukonyofu ukukana. (Ndumbi. 7:9) M’malo mwake munndaghisye ummanyani winu panongwa yakunangisya ubukifu.

11. Ngimba findu fiki fibaghile ukumpangisya umundu ukukana ubulongosi ubununu ubwakufuma ku mmanyani wake?

¹¹ Ngimba findu fiki fibaghile ukumpangisya umundu ukukana ubulongosi ubununu ubwakufuma ku mmanyani wake? Ukwibona. Abandu abakwibona bikupilika “isi sikusihobosya imbulukutu syabo.” Abene “batikulonda ukupilika amasyu agha bwanaloli.” (2 Tim. 4:3, 4 NWT) Bikuketa ukuti batikulondiwa ubulongosi panongwa yakuti bamahala kangi bakulondiwa ukukinda abangi. Loli untumiwa Pauli alembile ukuti: “Linga yumo ikwiyinong’ona ikuti ne nongi ndibe, bo ikwisyoba itolo.” (Gal. 6:3) Umwalafyale Solomoni alingenie kanunu ifundo iyi. Umwene atile: “Umwana uyu ndondo loli wamahala yo ali kanunu ukukinda umwalafyale unkangale uyu akaya namahala ikukana ukusokiwa.”—Ndumbi. 4:13, 14.

12. Ukufwana na Bagalatia 2:11-14, ngimba tukumanyilako isyafiki ku ntumiwa Peteri?

¹² Keta ikifwanikisyo iki untumiwa Peteri anangisye pakabalilo aka Pauli ampagha ubulongosi pa gulu lya bandu. (Belenga Bagalatia 2:11-14.) Peteri abaghile ukukalala na isi Pauli ambulagha panongwa yakuti ayobile pa gulu lya bandu. Loli Peteri ali wamahala. Umwene alyambilile ubulongosi kangi akalinkalalile Pauli. M’malo mwake, alinjobile Pauli ukuti ‘wamyitu.’—2 Pet. 3:15.

13. Ngimba fundo siliku isi tukulondiwa ukukumbukila bo tukali ukubapa abangi ubulongosi?

¹³ Bo mukali ukumpa ummanyani winu ubulongosi, ngimba mukulondiwa ukukumbukila ifundo siliku? Bo mukali ukwanda ukuyobesania, amwilalusye ukuti, ‘Ngimba ngwiketa ukuti ‘ndingolofu’?’ (Ndumbi. 7:16) Umundu uyu ikwiketa ukuya ngolofu ikubalonga abangi,  komma nifundo sya Yehova loli isyake kangi atikuya nikisa. Linga mwinong’onile ikifukwa iki mukulonda ukumpela, mumbule indamyo yake nukundalusya amalalusyo agha ghabaghile ukuntula ukumanya isi asobile. Loli mukulondiwa ukukumbuka ukuti bukaya budindo bwinu ukundonga loli muntule ukumanya muno Yehova ikwipilikila na isi ikubomba. (Rom. 14:10) Mubombeleghe amahala agha ghikwaghiwa M’masyu gha Kyala kangi linga mukumpa umundu ubulongosi mukongeghe ikibabilisi kya Yesu. (Mbu. 3:5; Mat. 12:20) Nongwa yafiki? Panongwa yakuti Yehova isakutubombela mwakufwana itolo namuno tukubabombela abangi.—Yak. 2:13.

14. Ngimba igulu lya Yehova likutupa ifindu fiki?

¹⁴ Yehova ikutulongosya ku njila iyakubuka ku bumi ukwendela mu gulu lyake ilya pa kisu kyapasi, ili likutupa amavidiyo, amabuku ningomano isi sikututula twesa ukukonga ubulongosi bwa m’masyu gha Kyala. Ifundo isi syakulondiwa fiyo panongwa yakuti sikufuma m’malemba. Linga abakamu aba Nkabughatila Kakulongosya bikulonda ukusala injila inunu iyakufumusyila, bikusubila mbepo mwikemo. Kangi utubalilo tosa bikuketa isi basalile linga sikulondiwa ukuchenja. Nongwa yafiki? Panongwa yakuti ‘ifyakubombiwa fya nkisu fikuchenja,’ kangi igulu lya Yehova lyope likulondiwa ukuchenja ukuti likolelane nukuchenja ukupya.—1 Kor. 7:31.

15. Ngimba ndamyo siliku isi abafumusi bamo bikwaghana nasyo?

¹⁵ Kisita kukayika, tukukonga ubulongosi bwa mu Baibolo ubu tukwambilila nalinga ukuti ifundo simo sibaghile ukuchenja. Loli ngimba tukubomba isyafiki linga igulu lya Yehova lichenjile ifindu fimo ifi fitupalamasisye fiyo pabumi bwitu? Mwakifwanikisyo, mfyinja fya kunyuma amalo aghakwiputilapo agha ghalondiwagha ukuyengiwa nukutendekesiwa ghali mingi. Yonongwa yake aba Nkabughatila Kakulongosya balinong’wine ukuti ifipanga fingi fibunganeghe mu Nyumba ya Bunyafyale yimoyene. Ukuchenja uku kwapangisye ukuti ifipanga fibunganeghe pampene kangi Inyumba sya Bunyafyale simo syalyulisiwe. Indalama isi syatulile ukuyengela Inyumba sya Bunyafyale ku malo kuno kwalondiwagha ubutuli. Linga mukwikala ku malo agha Inyumba sya Bunyafyale syalyulisiwe kangi kuno ifipanga fikubungana pampene, kubaghile ukuya kukafu kumyinu ukwisibila nukuchenja uku. Abafumusi bamo bikulondiwa ukwenda ubulendo ubutali ukuti bakafike ku ngomano.  Kangi bamo aba baliyipile ukuyenga nukutendekesya Inyumba ya Bunyafyale babaghile ukuswigha inongwa iyi bulisyagha. Babaghile ukwinong’ona ukuti bataghile kabalilo namaka ghabo pa itolo. Loli abene bikukolelana nukuchenja uku kangi tukulondiwa ukubandaghisya.

16. Ngimba ukukonga ubulongosi bwa pa Bakolosi 3:23, 24 kubaghile ukututula bulebule ukukindilila ukuya balusekelo?

¹⁶ Tukuya pakukindilila ukuya balusekelo linga tukukumbukila ukuti tukumbombela Yehova kangi ukuti umwene yo ikulongosya igulu lyake. (Belenga Bakolosi 3:23, 24.) Umwalafyale Davidi anangisye ikifwanikisyo ikinunu pakabalilo aka abikagha indalama isyakuyengela itempile. Umwene atile: “Ngimba ne ani une, abene abandu bangu kandu ka fiki, ukuti tukupeghe ifyabupe nindumbula bo yiyiyi? Namanga ifindu fyosa fikufuma kumyako uwe, po lelo uswe tukukupa ifi fifumile kumyako.’ (1 Syambu. 29:14) Linga tukubika indalama, nanuswe tukumpa Yehova ifi fifumile kumyake. Nalinga mo siyilile, Yehova ikuhoboka fiyo linga tukubombela akabalilo, amaka, nindalama syitu, ukuti tubombe imbombo yake.—2 Kor. 9:7.

17. Nongwa yafiki mutikulondiwa ukuwa amaka linga mukulonda ukuchenja ifindu fimo?

¹⁷ Ukuti tukindilile ukwenda munjila ifinye iyi yikubuka ku bumi, twesa tukulondiwa ukunkonga Yesu. (1 Pet. 2:21) Linga mukuketa ukuti mukulondiwa ukuchenja ifindu fimo, mungawagha amaka. Isi sibaghile ukunangisya ukuti mukulonda ukukonga indaghilo sya Yehova. Tukumbukeghe ukuti Yehova asimenye ukuti tuli basitabugholofu. Yonongwa yake atikughulila ukuti tukuya pakunkonga Yesu mbugholofu.

18. Ngimba tukulondiwa ukubomba isyafiki ukuti tufwanisye ubwighane bwitu?

¹⁸ Isagha twesa tukindilile ukwinong’onela isya nkyeni nukwiyipa fiyo ukuti tuchenje aminong’ono, utuyilo nifyakubomba fyitu. (Mbu. 4:25; Luka 9:62) Isagha tukindilile ukuya bakwiyisya, ‘nukukindilila ukuya balusekelo mwakuchenja aminong’ono ghinu.’ (2 Kor. 13:11) Linga tukubomba isi, ‘Kyala walughano kangi nuwalutengano isakuyagha nanuswe.’ Kangi umwene ikuya pakututula ukuti tuye balusekelo lino kangi nkyeni ikwisakutupa ubumi bwa bwila na bwila.