Napapiwe mu 1983. Bo ndi nkeke, ngabinabinagha loli bo mfikile ifyinja 10, nalyandile ukwipiIika ifyakubaba umbili ghosa. Bo ifyinja fibili fikindilepo, isiku limo bo ndembwike nulubunju natoliwe ukwenda. Naghelile ukuti nende loli ngali namaka. Ukufuma pakabalilo ako, ngalyendilemo kangi. Ububine ubu bwalimbangisye kangi ukuti ningakulagha. Ukufika lino ngali nguboneka kamwana.

Kwa myesi minandi itolo bo nandile ukubina, ngasokangapo pakaya kangi Abaketi ba Yehova balisile pakaya. Utubalilo twingi linga abahesya bikwisa nibililagha. Loli isiku ili nabitikisye abakikulu aba ukuti bayobesanie nanine. Bo bayobile isyakufwana na Paladaiso, balingumbwisye isi napilikepo bo ndini fyinja 5. Pakabalilo ako, ummishonale yumo uyu ingamu yake yo Jethro uyu ikalagha ku Suriname, isagha ku kaya kitu kamokene pamwesi kangi amanyilagha Ibaibolo na tata wangu. Jethro ambombelagha ifindu mwakisa. Nalinganile fiyo. Kangi mbuya wangu abukagha nanine kungomano isya Baketi isi syabombiwagha nkaya kitu. Yonongwa yake bo Florence yumo mwabakikulu aba balisile isiku lila, alindalusisye ukuti ngimba kulonda ukumanya nyingi? Nalyamwile ukuti ena.

Isiku ilingi Florence alisile nundume wake, Justus kangi balyandile ukummanyisya Ibaibolo. Bo basyaghenie ukuti ngamanya ukubelenga, abene balimmanyisye ukubelenga. Bo akabalilo kakindilepo, nalyandile ukubelenga nimwene. Isiku limo, imbumba iyi yalimbulile ukuti bayitumile ukuti yikabombeghe ububombeli ku Suriname. Syakitima ukuti, akaliko nayumo ku Orealla uyu abaghile ukukindilila ukummanyisya Ibaibolo. Loli syakuhobosya ukuti Yehova ikungumbuka.

Bo akabalilo kakindilepo, Floyd uyu ali mpayiniya alisile ku Orealla, kangi alinyaghile bo ikufumusya kunyumba ni nyumba. Bo ambulile ukuti tumanyileghe Ibaibolo, namwemwetile. Umwene alindalusisye ukuti, “Nongwa yafiki kumwemwetela?” Nalimbulile ukuti namanyilagha ibulosha ilyakuti, Kodi Mulungu Amafunanji kwa Ife? kangi nalyandile ukumanyila ibuku ilyakuti, Chidziŵitso Chotsogolera ku Moyo Wosatha. * Nalindingenie inongwa iyi twalimile ukumanyila. Twamalile ukumanyila ibuku lya Chidziŵitso na Floyd loli ukufuma apo yope balintumile kubungi ukuti akabombeghe ububombeli. Akalipo kangi uwakummanyisya Ibaibolo.

 Mu 2004, Granville na Joshua, aba bali bapayiniya ba padela, babatumile ku Orealla. Balinyaghile pakaya bo bikufumusya kunyumba ni nyumba. Bo bandalusisye linga ngulonda ukumanyila Ibaibolo, namwemwetile. Nabasumile ukuti bande ukummanyisya ibuku lya Chidziŵitso ukufuma kubwandilo. Nalondagha ukumanya linga babaghile ukummanyisya isyakufwana itolo na isi abamanyisi bangu abakunyuma bammanyisyagha. Granville alimbulile ukuti ingomano sikubombiwa nkaya kitu. Nalinga ukuti ngasokilepo pakaya kwa fyinja 10 loli nalondagha ukuti ngaghiwepo pangomano. Granville alimbimbile nukumbika panjinga ya bandu abalemale nukundwala ku Nyumba ya Bunyafyale.

Ukufuma apo, Granville alingasisye ukuti ningile Isukulu ya Bafumusi. Umwene atile: “Uli ndemale loli kuyoba. Isiku limo, kwisa pakuyoba inkhani ya mu Baibolo. Sikwisakubombiwa.” Amasyu ghake ghalingasisye nukumba ulusubilo.

Nalyandile ukufumusya na Granville. Loli imisebo mingi iya nkaya yali nifibwina fingi yonongwa yake kwali kukafu ukwenda panjinga ya bandu abalemale. Nalinsumile Granville ukuti ambike mu wilubala nukunyendesya. Isi syatulile fiyo. Mu Epulelo 2005, nalyosiwe. Bo akabalilo kakindilepo, abakamu balimmanyisye ukuti ngetesyeghe amabuku nifyakukusyila amasyu pa Nyumba ya Bunyafyale.

Loli syakitima ukuti mu 2007 tata wangu afwile pangozi ya boti. Imbumba yitu yali nikitima fiyo. Granville aliputile nanuswe nukutubelengela amasyu agha lusubisyo agha mu Baibolo. Bo ifyinja fibili fikindilepo, twalyaghene kangi nindamyo iyingi, Granville afwile pangozi ya boti.

Ikipanga kyitu kikali nunkulumba aliwesa twasyele itolo nuntuli wakipanga yumoywene. Inifwa ya Granville yalimbabile fiyo panongwa yakuti ali mmanyani wangu wapandumbula. Utubalilo tosa andulagha ukuti nseghelele kwa Yehova kangi ambagha ifindu fingi ifyakumbili. Bo inifwa yake yikindile, napeliwe ulusako ukuti mbelengeghe amapalagilafu agha mu kimanyilo kya Ingasya ya Ndindilili. Bo mbelengile amapalagilafu mabili, nalyandile ukulila, amasosi ghalinkusoka ghene. Nalinong’wine isyakusokako ku pulatifomu.

Nalyandile ukwipilikako kanunu bo abakamu aba bafumile kukipanga ikingi bisile ukuti basatutule ku Orealla. Kangi ofesi yalintumile unkamu Kojo ukuti asabombeghe ubupayiniya bwa padela. Ikyakuhobosya fiyo kyo kyakuti, mama nunnung’una wangu balyandile ukumanyila Ibaibolo kangi bo akabalilo kakindilepo balyosiwe. Mu Malichi 2015, nalimikiwe ukuya ntuli wakipanga. Bo akabalilo kakindilepo, nayobile inkhani iya mu Baibolo akakwanda. Isiku ili namwemwetile kangi nahobwike fiyo, nakumbwike isi Granville alimbulile kunyuma ukuti: “Isiku limo, kwisa pakuyoba inkhani ya mu Baibolo. Sikwisakubombiwa.”

Ukwendela mu mapulogilamu agha pamwesi agha JW Broadcasting^®, namanyile isya Baketi abinangu aba bope bikwaghana nindamyo iyakufwana itolo niyangu. Nalinga ukuti balemele loli bikufwanisya ukubomba nyingi kangi balusekelo. Nanine mbaghile ukubomba nyingi. Ubwighane bwangu ko kumbombela Yehova muno mbaghile ukufwanisyila. Yonongwa yake nalyandile ubupayiniya bwa kabalilo kosa. Kangi mu Seputembala 2019 nabuliwe inkhani iyi ngasubilagha. M’mwesi ughu balimbulile ukuti nimikiwe ukuya nkulumba wakipanga iki kili nabafumusi 40.

Ngubandaghisya fiyo abakamu na balumbu aba bammanyisyagha Ibaibolo nukundula ukuti ngindilile ukumbombela Yehova. Ukukinda fyosa, kundaghisya fiyo Yehova panongwa yakuti ikungumbuka.