1. Ngimba tusimenye bulebule ukuti Yehova ikulonda ukuti tuseghelele kumyake?

 YEHOVA ikutubula ukuti tuseghelele kumyake. (Yak. 4:8) Umwene ikulonda ukuti aye yo Kyala, Tata kangi Mmanyani witu. Ikwamula inyiputo syitu nukututula linga twaghene ni ndamyo. Kangi ikubombela igulu lyake ukutumanyisya nukutufighilila. Loli ngimba tukulondiwa ukubomba isyafiki ukuti tuseghelele kwa Yehova?

2. Ngimba tubaghile ukuseghelela bulebule kwa Yehova?

² Tubaghile ukuseghelela kwa Yehova mwakwiputa kumyake, ukubelenga Amasyu ghake nukwinong’onelapo. Linga tukubomba isi, tukungana fiyo kangi tukunndaghisya. Tukukasiwa ukuti tupilikileghe nukumpa ulughindiko ulu ikulondiwa. (Ubuset. 4:11) Linga tummenye kanunu Yehova, tukuya pakunsubila fiyo umwene ni gulu lyake ili atupele ukuti litutuleghe.

3. Ngimba Umohesi ikughelaghela bulebule ukutupaghula kwa Yehova, loli findu fiki fibaghile ukututula ukuti tungandekagha Kyala witu ni gulu lyake? (Salimo 31:13, 14)

³ Loli Umohesi ikughelaghela ukutupaghula kwa Yehova fiyofiyo linga tukwaghana ni ndamyo. Ngimba ikubomba bulebule isi? Umwene ikughelaghela ukuti atutolesye ukuya basubiliwa kwa Yehova ni gulu lyake. Loli tubaghile ukwepuka ku njila syake. Linga ulwitiko lwitu lwamaka tutikuya pakuleka ukunsubila Yehova, tutikuya pakundeka Kyala witu ni gulu lyake.​—Belenga Salimo 31:13, 14.

4. Ngimba tukuya pakuyobesania isyafiki mu nkhani iyi?

⁴ Mu nkhani iyi, tukuya pakuyobesania indamyo sitatu isi abandu aba bakaya Baketi bikutubombela; indamyo yiliyosa  yikuya pakughela ubusubiliwa bwitu kwa Yehova ni gulu lyake. Ngimba indamyo isi sibaghile ukutupaghula bulebule kwa Yehova? Kangi ngimba tubaghile ukubomba isyafiki ukuti tungasyobiwagha ni njila sya Setano?

5. Ngimba indamyo sibaghile ukughela bulebule ubusubiliwa bwitu kwa Yehova na ku gulu lyake?

⁵ Utubalilo tumo tubaghile ukwaghana ni ndamyo bo ukususiwa na ba mumbumba yitu pamo ukumalika kwa mbombo. Ngimba indamyo bo isi sibaghile ukughela bulebule ubusubiliwa bwitu ku gulu lya Yehova nukutupaghula kumyake? Linga twaghene ni ndamyo kwa kabalilo akatali, tubaghile ukwipilika ukuti tuli twibene kangi tubaghile ukuwa amaka. Setano ikulwaghilapo ulusako ukuti twinong’oneghe ukuti Yehova akatughana. Umwene ikulonda ukuti twinong’oneghe ukuti Yehova ni gulu lyake bo aba bikupangisya ukuti tutamiweghe. Isi sifwene itolo na isi syabombiwe ku Baisraeli bamo aba bali ku Egiputi. Pakwanda abene basubilagha ukuti Yehova alinsalile Mose na Aroni ukuti bakababule ku butumwa. (Kuso. 4:29-31) Loli ukufuma apo bo Farao apangisye ukuti baghane ni ndamyo, abene balyandile ukumpa inongwa Mose na Aroni, mwakubabula ukuti: “Mumpelile Farao na bandu bake ukutubenga uswe mubikile ulubo mmaboko ghabo ukuti batughoghe uswe.” (Kuso. 5:19-21) Abene babapele inongwa ababombi ba Kyala. Isi syali syakitima fiyo. Linga mwifimbilisye ku ndamyo kwa kabalilo akatali, ngimba mubaghile ukukindilila bulebule ukunsubila Yehova ni gulu lyake?

6. Ngimba tukumanyilako isyafiki ku nsololi Habakuku muno tubaghile ukwifimbilisyila ku ndamyo? (Habakuku 3:17-19)

⁶ Mumbuleghe Yehova ndwiputo isi sili mundumbula yinu kangi musubileghe ubutuli bwake. Unsololi Habakuku alyaghene ni ndamyo nyingi fiyo. Utubalilo tumo, umwene abonekagha ukuti ikukayikila linga Yehova ikumpasikisya. Yonongwa yake alimbulile Yehova ndwiputo syosa isi syali mundumbula yake. Umwene atile: “We Yehova ngwakufikagha poki ukukolela kumyako nukusuma ubutuli bo ukali ukambilika? . . . Nongwa yafiki kunyitikisya ukuya nubutolwe bo bububu?” (Haba. 1:2, 3) Yehova alyamwile ulwiputo ulwakufuma pasi pandumbula ulwa mbombi wake unsubiliwa uyu. (Haba. 2:2, 3) Bo Habakuku inong’onile muno Yehova abapokile abandu bake, umwene alyandile kangi ukuya walusekelo. Umwene ali nulusubilo losa ukuti Yehova ikumpasikisya kangi ayagha pakuntula ukuti ifimbilisye ku ndamyo yiliyosa. (Belenga Habakuku 3:17-19.) Ngimba tukumanyilako isyafiki? Linga twaghene ni ndamyo, twiputeghe kwa Yehova nukumbula muno tukwipilikila. Ukufuma apo tughulileghe ukuti ikuya pakututula. Linga tukubomba isi, tubaghile ukuya nulusubilo ukuti Yehova ikuya pakutupa amaka agha tukulondiwa ukuti twifimbilisyeghe. Kangi linga atutulile, ulwitiko lwitu kumyake lukuya lwamaka.

7. Ngimba abakamu ba Shirley babombile isyafiki, kangi findu fiki fyampangisyagha ukuti angayagha nulusubilo mwa Yehova?

⁷ Mukindilileghe ukumanyila ifindu fyamwambepo. Inong’onela muno ukubomba isi kwalintulile Shirley, umulumbu wa ku Papua New Guinea, bo aghene ni ndamyo. b Imbumba ya Shirley yali ndondo kangi utubalilo tumo yatamiwagha ukufyagha ifyakulya. Unkamu wake yumo aghelile ulwitiko lwake. Umwene atile: “Kuyoba ukuti mbepo mwikemo wa Kyala ghukutula, loli ubutuli buli kughu? Imbumba yako yikali ndondo. Kumalila itolo akabalilo kako pakufumusya.” Shirley atile:  “Nalilalusisye ukuti: ‘Ngimba Kyala ikutupasikisya pamo hayi?’ Mwanakalinga naliputile kwa Yehova nukumbula kilikyosa iki kyali mundumbula yangu. Ngalekile ukubelenga Ibaibolo na mabuku ghitu kangi nakindilile ukufumusya nukubungana.” Umwene alyandile ukuketa ukuti Yehova ikuyipasikisya imbumba yake. Imbumba yake yikaghonilepo ninjala kangi yali yalusekelo. Shirley atile: “Naketile ukuti Yehova amulagha inyiputo syangu.” (1 Tim. 6:6-8) Linga mukukindilila ukumanyila ifindu fyamwambepo, nanumwe mukabaghila ukwitikisya indamyo ukubapaghula kwa Yehova.

8. Ngimba findu fiki fibaghile ukubombiwa ku bakamu aba bali nubudindo mu gulu lya Yehova?

⁸ Ukwendela pa intaneti, abalughu bitu bikuyoba inkhani syabutungulu isyakufwana na bakamu bitu aba bikulongosya mu gulu lya Yehova. (Sal. 31:13) Abakamu bamo bapinyiwe mu jele panongwa yakubasyobekesya ukuti babombile ifindu ifibibi. Abakristu bakunyuma bope baghanagha ni ndamyo iyakufwana itolo bo untumiwa Pauli apinyiwe. Ngimba abene babombile bulebule?

9. Ngimba Abakristu bamo babombile isyafiki bo untumiwa Pauli apinyiwe mu jele?

⁹ Abakristu bamo ba kunyuma balekile ukuntula untumiwa Pauli bo apinyiwe mu jele ku Roma. (2 Tim. 1:8, 15) Nongwa yafiki? Ngimba abene bakosiwe isoni panongwa yakuti abandu banketagha Pauli ukuya mundu mbibi? (2 Tim. 2:8, 9) Pamo ngimba bope batilagha ukuti bikuya pakufwimiwa? Muli mosa muno syayilile, inong’onela muno Pauli alipilikile. Umwene alifimbilisye ku ndamyo nyingi kangi abikile ubumi bwake pangozi panongwa yabo. (Imbo. 20:18-21; 2 Kor. 1:8) Tutikulondiwa ukuya bo abene aba batoliwe ukuntula Pauli bo ikulondiwa ubutuli. Ngimba tukulondiwa ukukumbuka isyafiki linga abakamu aba bali nubudindo bikufwimiwa?

10. Ngimba tukulondiwa ukukumbuka isyafiki linga abakamu aba bali nubudindo bikufwimiwa kangi nongwa yafiki?

¹⁰ Mukumbukeghe inongwa iyi tukufwimiwa  na uyu ikupangisya. Pa 2 Timoti 3:12 pikuti: “Bosa aba bikulonda ukuya nubumi bwa kuntila Kyala mwa Kristu Yesu, bo bisakufwimiwagha.” Yonongwa yake tutikulondiwa ukuswigha linga Setano ikubafwima abakamu aba bikulongosya. Umwene ikulonda ukuti baleke ukuya basubiliwa kwa Yehova kangi ikulonda ukututetemesya nanuswe.​—1 Pet. 5:8.

11. Ngimba tukumanyilako isyafiki kwa Onesifori? (2 Timoti 1:16-18)

¹¹ Mukindilileghe ukubatula abakamu binu nukukolelana nabo. (Belenga 2 Timoti 1:16-18.) Unkristu wa nkabalilo ka kunyuma uyu ingamu yake ali yo Onesifori abombile ifindu mwakukindana bo Pauli apinyiwe mu jele. “Unnyololo wa [Pauli] ghulinkusita nukumpelela isoni.” Mmalo mwake, Onesifori afufuzile kuno Pauli aliko kangi bo amwaghile alintulile. Mwakubomba isi umwene abikile ubumi bwake pangozi. Ngimba tukumanyilako isyafiki? Tutikulondiwa ukwitikisya ukuti ukubatila abandu kututolesye ukubatula abakamu bitu aba bikufwimiwa. Mmalo mwake, isagha tughelegheleghe ukubomba syosa isi tubaghile ukufwanisya ukuti tubatule. (Mbu. 17:17) Abene bikulondiwa ulughano nubutuli bwitu.

12. Ngimba tukumanyilako isyafiki ku bakamu na balumbu ba ku Russia?

¹² Inong’onela muno abakamu na balumbu bitu ku Russia bikubatulila Abakristu abinabo aba bapinyiwe mu jele. Linga bamo babukile ku khoti, abakamu na balumbu bingi bikubuka ukuti bakabakasye. Ngimba tukumanyilako isyafiki? Linga abakamu aba bali nubudindo bikunyoziwa, bapinyiwe pamo bikufwimiwa, tungatilagha. Tubiputileghe, tusipweleleleghe imbumba syabo nukubatula mu njila isingi.​—Imbo. 12:5; 2 Kor. 1:10, 11.

13. Ngimba ukunyoziwa kubaghile ukughela bulebule ubusubiliwa bwitu kwa Yehova ni gulu lyake?

¹³ Abakamu bitu aba bakaya Baketi, aba tukubomba nabo imbombo pamo aba tukumanyila nabo isukulu babaghile ukutunyoza panongwa yakuti tukufumusya kangi tukukonga ifundo sya bugholofu isya Yehova. (1 Pet. 4:4) Abene babaghile ukuyoba ukuti: “Ngughanile uwe pakuya mundu loli ikipanga kyinu kili ni ndaghilo ngafu kangi sya iyolo.” Bamo babaghile ukutususya muno tukubombela ifindu nu mundu uyu epusiwe nkipanga, mwakuyoba ukuti: “Ngimba ubaghile ukwiyoba bulebule ukuti uli mundu walughano?” Amasyu bo agha ghabaghile ukutupangisya ukuti twande ukukayikila linga indaghilo sya Yehova syakutula. Tubaghile ukwilalusya ukuti: ‘Ngimba Yehova ikulonda ukuti tubombeghe ifindu ifi tukabaghila ukufwanisya? Ngimba igulu lyake lili ni ndaghilo syakutamya?’ Linga tukwaghana ni fyakubombiwa bo ifi, ngimba tubaghile ukuseghelela bulebule kwa Yehova ni gulu lyake?

14. Ngimba tukulondiwa ukubomba isyafiki linga abangi bikutunyoza panongwa yakuti tukukonga ifundo sya Yehova? (Salimo 119:50-52)

¹⁴ Mukindilileghe ukukonga ifundo sya Yehova. Yobu ali mundu uyu akongagha ifundo sya Yehova nalinga ukuti anyoziwagha linga ikubomba isi. Yumo mwa bamanyani bake alimbulile ukuti sikaya nimbombo kwa Kyala linga ikukonga ifundo syake pamo hayi. (Jobu 4:17, 18; 22:3) Loli Yobu akanile ukusubila ubutungulu ubu. Umwene asimenye ukuti ifundo sya Yehova isyakuyoba inunu ni mbibi syakutula fiyo kangi umwene akindilile ukusikonga. Akalitikisye ukuti abangi bantolesye ukunangisya ubusubiliwa bwake. (Jobu 27:5, 6) Ngimba tukumanyilako isyafiki? Tungitikisyagha ukuti ukunyoziwa kutupangisye ukukayikila ifundo sya Yehova. Inong’onela isi  mwalyaghene nasyo kunyuma pa bumi bwinu. Ngimba mukuketa ukuti ifundo sya Yehova nunu kangi sikubatula? Utubalilo tosa mughelegheleghe ukuya ku kighaba kya gulu lyake ili likutupa ifundo isi. Kisita kwinong’onela muno abandu bikubombela, tutikuya pakuleka ukumbombela Yehova.​—Belenga Salimo 119:50-52.

15. Nongwa yafiki Brizit anyoziwagha?

¹⁵ Inong’onela isi umulumbu Brizit uwa ku India alyaghene nasyo. Umwene anyoziwagha na ba mumbumba yake panongwa ya isi asubilagha. Bo akabalilo kakindilepo panandi ukufuma apa alyosiwe mu 1997, undume wake uyu akali Nketi imbombo yalimmalikile. Yonongwa yake undume wake, Brizit, na banabo abalindwana balinong’wine isyakusama ukuti bakikaleghe na bapapi ba ndume wake, aba bikalagha ku tawuni iyingi. Loli Brizit ayagha pakwaghana ni ndamyo nyingi. Panongwa yakuti undume wake akali pambombo, umwene alondiwagha ukubomba imbombo ukuti ayitule imbumba yake. Mwakongelelapo, ikipanga iki babunganagha kyali kubutali amakilomita aghakufwana 350. Syakitima ukuti aba mumbumba ya ndume wake bansusyagha fiyo panongwa ya isi asubilagha. Umwene akindilile ukususiwa yonongwa yake imbumba ya Brizit yalinong’wine ukuti yisame kangi. Bo akabalilo kakindilepo undume wake afwile. Ukufuma apo, umwanake yumo uwafyinja 12 afwile na kansa. Ikindu kyakubaba fiyo kyali kyo kyakuti aba mumbumba ya Brizit balyandile ukumpa inongwa ukuti yo apangisye syosa isi. Abene bayobagha ukuti linga akali Nketi wa Yehova syosa isi sikayagha pakubombiwa. Loli umwene akindilile ukunsubila Yehova nukukolelana ni gulu lyake.

16. Ngimba Brizit asayiwe bulebule panongwa yakunsubila Yehova ni gulu lyake?

¹⁶ Panongwa yakuti Brizit ikalagha kubutali nikipanga, uwakwendela idela alinkasisye ukuti afumusyeghe nkighaba iki ikalagha nukupanga ingomano pakaya kake. Pakwanda aketagha ukuti ukubomba isi kukafu fiyo. Loli akongile ubulongosi ubu unkamu alimpele. Umwene afumusyagha amasyu amanunu na bangi, apangagha ingomano pakaya kake kangi ayagha nakabalilo akakumanyila kwa  pambumba nabanake abalindwana. Ngimba ifyakukongapo fyake fyali fyo filiku? Brizit afwanisyagha ukumanyila na bandu bingi Ibaibolo kangi abamanyili bingi balyosiwe. Mu 2005 alyandile ubupayiniya bwa kabalilo kosa. Umwene asayiwe fiyo panongwa yakunangisya ubusubiliwa kwa Yehova na ku gulu lyake. Abanake bikumbombela Yehova mbusubiliwa kangi lino filiko ifipanga fibili ku kighaba kyabo. Brizit ali nulusubilo ukuti Yehova alimpele amaka ukuti ifimbilisye ku ndamyo nukunyoziwa na ba mumbumba yake.

17. Ngimba tukukasiwa ukubomba isyafiki?

¹⁷ Setano ikulonda ukuti tusubileghe ukuti Yehova atikuya pakututula kangi linga tukukolelana ni gulu lyake sikuya pakupangisya ukuti tukindilile ukwaghana ni ndamyo. Umwene ikulonda ukuti tuye nubogha linga abakamu aba bali nubudindo fikunyoziwa, bikufwimiwa pamo ukupinyiwa mu jele. Kangi linga bikutunyoza, ikulonda ukuti tuleke ukusubila ifundo sya Yehova ni gulu lyake. Loli tusimenye injila syake imbibi kangi tutikusyobiwa. (2 Kor. 2:11) Isagha tughelegheleghe ukukana ubutungulu bwa Setano nukukindilila ukuya basubiliwa kwa Yehova ni gulu lyake. Mukumbukeghe ukuti, Yehova atikuya pakubaleka. (Sal. 28:7) Yonongwa yake mungitikisyagha kilikyosa ukuti kibapaghule kwa Yehova.​—Rom. 8:35-39.

18. Ngimba twisakuyobesania isyafiki mu nkhani iyakukongapo?

¹⁸ Mu nkhani iyi, tuyobesenie indamyo isi tubaghile ukwaghana nasyo ukufuma ku bandu aba bakaya Baketi. Loli ubusubiliwa bwitu kwa Yehova na ku gulu lyake bubaghile kangi ukugheliwa ni ndamyo isyakufuma nkipanga. Ngimba tubaghile ukulimbana bulebule ni ndamyo isi? Twisakuyobesania isi mu nkhani iyakukongapo.