Hulda Afwanisye Ubwighane Bwake
LINGA mwabukileko kulusungo ulunandi ulwa ku Sangir Besar ku Indonesia mfyinja ifi fikindilepo, lumo mwayagha pakubagha abalumbu bitu batatu Babukristu. Abene bamanyiwe fiyo panongwa yakufumusya nukubatula abandu ukuti balipilikisyeghe kanunu Ibaibolo. Loli pakabalilo aka, babombagha imbombo yimo iyingi itolo.
Ulusungo lwa Sangir Besar kululu kwa Indonesia
Abene bingilagha mwasumbi ukulonda amabwe amanywamu nukufyuka nagho pansanga. Amabwe ghamo ghayagha manywamu bo ibola. Ukufuma apo, abakikulu aba bikalagha pafikota ifinandi nukwanda ukuponda amabwe ghala nihamala ukuti ghaye manandinandi bo muno ghayilile amafumbi gha nguku. Baghabikagha amabwe amanandinandi agha mubeseni lya pulasitiki nukubuka nagho kuno bikalagha. Ukufuma apo, baghabikagha amabwe agha mufikwama ifinywamu ifi bakwesyagha mmagalimoto nukughabombela imbombo pakupangila unsebo.
Hulda ikubungania amabwe mumbali mwasumbi
Yumo mwa balumbu aba ali yo Hulda. Ukufwana namuno ifindu fyayilile pabumi bwake, umwene amalilagha akabalilo akanywamu ukubomba imbombo iyi ukukinda abinake. Utubalilo twingi indalama isi asyaghagha ulilagha ifindu ifyakulondiwa pambumba yake. Loli pakabalilo aka, alondagha ukusunga indalama ukuti abombele ikindu kimo. Umwene alondagha ukula itabuleti ukuti afwanisyeghe ukwingila pa JW Library® app. Hulda asimenye ukuti amavidiyo nifingi ifi fikwaghiwa pa Library iyi, fibaghile ukuntula ukuti abafumukisyileghe abangi, amanyileghe nukupilikisya kanunu ifundo sya mu Baibolo.
Hulda abombagha kwa maawala mabili nulubunju lulilosa kwa mwesi ghumowene na hafu, ukuti aponde amabwe mingi agha ghabaghile ukwisula mugalimoto. Pabumalilo, asyaghile indalama kangi alyulile itabuleti.
Hulda akolile itabuleti yake
Hulda atile, “Nalinga ukuti nakatalagha fiyo kangi mmaboko mwababagha panongwa yakuponda amabwe, loli nibwagha mwanakalinga ifyakubaba panongwa yakuti itabuleti iyi yandulagha fiyo mubufumusi kangi kwayagha kupepe ukwitendekesya ingomano sya Bukristu.” Kangi umwene atile itabuleti iyi yalintulile fiyo pakabalilo ka mbungo ya COVID-19 panongwa yakuti yo iyi babombela ingomano syosa sya kukipanga. Tuli balusekelo fiyo pampene na Hulda panongwa yakuti afwanisye ubwighane bwake.
