1-2. Nongwa yafiki tubaghile ukuketa ukuti Yehova atikwamula inyiputo syitu?

 “WIKYELEGHE mu mwa Yehova, po umwene isakukupagha isi indumbula yako yikulonda.” (Sal. 37:4) Ulufingo ulu lwakuhobosya fiyo. Loli ngimba tukulondiwa ukwinong’ona ukuti Yehova ikuya pakutupa kilikyosa pakabalilo aka tukukilonda? Nongwa yafiki kwakulondiwa ukwilalusya ilalusyo bo ili? Inong’onela ififwanikisyo ifyakukongapo ifi. Umulumbu uyu akaya pabweghi, ikwiputa ukuti abuke ku Sukulu ya Bafumusi Babunyafyale. Loli ifyinja fingi fikukinda kisitakukoleliwa. Unkamu wakilumyana ikwiputa ukuti abumbuluke kumbungo imbalapala iyi yikuntamya ukuti abombeghe nyingi nkipanga. Loli atikubumbuluka kububine bwake. Abapapi bikumwiputila umwanabo ukuti akindilile ukuya mbwanaloli. Loli umwanabo ikusala ukuleka ukumbombela Yehova.

² Lumo nanumwe munsumilemo Yehova ukuti abapepo ifindu fimo, loli mukalyambilile. Pabumalilo pake, mubaghile ukuketa ukuti Yehova ikwamula inyiputo sya bandu abangi komma isyinu. Kangi mubaghile ukwanda ukwinong’ona ukuti lumo mubombile ikindu kimo ikibibi. Momuno alipilikile umulumbu Janice. b Umwene nu ndume wake, bansumagha Yehova ukuti bakabombeleghe pa Beteli. Umwene atile: “Nasubilagha ukuti bikuya pakutukolela mwanakalinga pa Beteli.” Loli pakindile akabalilo akatali kisitakukoleliwa. Janice atile: “Nakalele kangi nasofanisiwe fiyo. Nilalusyagha ukuti mbombile isyafiki isi sinkalalisye Yehova. Naliputile fiyo isyakuti mbuke pa Beteli. Nongwa yafiki akalyamwile ulwiputo lwangu?”

3. Ngimba tukuya pakuyobesania isyafiki munkhani iyi?

 ³ Utubalilo tumo tubaghile ukwilalusya ukuti ngimba Yehova ikwamula inyiputo syitu? Abandu abasubiliwa aba baliko kunyuma bope bilalusyagha ilalusyo bo ili. (Jobu 30:20; Sal. 22:2; Haba. 1:2) Ngimba findu fiki fibaghile ukutupangisya ukuti tusubileghe ukuti Yehova ikwamula inyiputo syitu? (Sal. 65:2) Ukuti tumwaghe ansala wa ilalusyo ili, ikyakwanda tukulondiwa ukwamula amalalusyo agha: (1) Ngimba Yehova ikuya pakubomba isyafiki? (2) Ngimba Yehova ikulonda ukuti tubombeghe isyafiki? (3) Nongwa yafiki tubaghile ukuchenja simo mwa isi tukusuma?

4. Ukufwana na Yeremiya 29:​12, ngimba Yehova afingile ukuti ikuya pakubomba isyafiki?

⁴ Yehova afingile ukuti ikuya pakupilika inyiputo syitu. (Belenga Yeremiya 29:12.) Kyala witu atughanile fiyo panongwa yakuti tukumbombela mbusubiliwa. Isi sikupangisya ukuti apilikeghe inyiputo syitu. (Sal. 10:17; 37:28) Loli isi sitikusanusya ukuti ikuya pakutupagha kilikyosa iki tukusuma kumyake. Lumo tubaghile ukughulila mpaka nkisu ikipya ukuti asatupe ifi tukunsuma.

5. Ngimba Yehova ikuketa isyafiki linga ikupilikisya inyiputo syitu? Lingania.

⁵ Yehova ikuketa linga isi tukunsuma sikukolelana nubwighane bwake. (Yes. 55:​8, 9) Kimo mwa findu ifi Yehova ikulonda kyo kyakuti ikisu kisule nabandu aba bikwikyela ukumpilikila pakuya Ndaghili wabo. Loli Setano ikuyoba ukuti abandu babaghile ukuya balusekelo fiyo linga bikwilongosya bene. (Bwa. 3:​1-5) Ukuti Umohesi aboneke ukuya ntungulu, Yehova abitikisye abandu ukuti bilaghileghe bene. Loli ubulaghili bwa bandu bupangisye indamyo nyingi isi tukwaghana nasyo amasiku agha. (Ndumbi. 8:9) Tusimenye ukuti Yehova atikuya pakusosyapo indamyo syosa pakabalilo aka. Linga asosisyepo indamyo syosa pakabalilo aka, abandu aba batikunsubila Kyala bikuya pakuketa ukuti indamyo isi sisosiwe na bandu. Bikuya pakuketa kangi ukuti abandu babaghile ukufwanisya ukwilongosya pabene.

6. Nongwa yafiki tukulondiwa ukusubila ukuti utubalilo tosa Yehova ikubomba ifindu mwalughano kangi mbugholofu?

⁶ Yehova abaghile ukwamula inyiputo munjila isyakukindanakindana. Mwakifwanikisyo, pakabalilo aka Umwalafyale Hezekiya abinile fiyo, alinsumile Yehova ukuti ambumbulusye. Yehova alyamwile ulwiputo lwake kangi abumbulwike. (2 Banyaf. 20:​1-6) Loli pakabalilo kamo, bo untumiwa Pauli ikumpyelesya Yehova ukuti ansosye “umwifwa wa mumbili,” ubu bubaghile ukuti bwali bubine, Yehova akayisosisyepo indamyo iyi. (2 Kor. 12:​7-9) Inong’onela kangi ikifwanikisyo kya ntumiwa Yakobu na Peteri. Umwalafyale Herodi alondagha ukubaghogha bosa babili. Ikipanga kyamwiputilagha Peteri na Yakobu. Yakobu aghoghiwe loli uwandumi alimpokile Peteri. (Imbo. 12:​1-11) Tubaghile ukwilalusya ukuti, ‘Nongwa yafiki Yehova alimpokile Peteri komma Yakobu?’ Ibaibolo litikuyoba inongwa yake. c Isi tusimenye syo syakuti injila sya Yehova “syabugholofu.” (Kukumbu. 32:4) Kangi tusimenye ukuti Yehova alinganile Peteri na Yakobu. (Ubuset. 21:14) Utubalilo tumo Yehova akabaghila ukwamula inyiputo syitu munjila iyi twasubilagha. Loli panongwa yakuti tukusubila ukuti utubalilo tosa Yehova ikwamula inyiputo munjila iyalughano kangi iyabwanaloli, tutikwilumbusya panongwa ya njila isi ikubombela.—Jobu 33:13.

7. Ngimba findu fiki ifi tutikulondiwa ukubomba kangi nongwa yafiki?

⁷ Tutikulondiwa ukufwanikisya indamyo syitu nisya bangi. Mwakifwanikisyo, tubaghile ukunsuma Yehova ukuti atutule munjila yimo loli  akabaghila ukwamula isi tunsumile. Panyuma pake, tubaghile ukusyaghania ukuti umundu yumo yope ali nindamyo iyakufwana itolo loli Yehova alyamwile ulwiputo lwake. Syo isi syalimbonekile umulumbu Anna. Iputagha ukuti undume wake, Matthew uwa fyinja 39, abumbuluke kububine bwa kansa. Mwakufwana itolo, abalumbu babili aba bakangele fiyo ukukinda undume wake, bope babinagha kansa. Anna amwiputilagha fiyo undume wake Matthew na balumbu aba. Abalumbu aba babumbulwike loli Matthew afwile. Pakwanda, Anna ilalusyagha ukuti linga yo Yehova ababumbulwisye abalumbu aba nongwa yafiki akambumbulusya undume wake? Syabwanaloli ukuti tutikumanya muno abalumbu babili aba babumbulukile. Loli tusimenye ukuti Yehova isakumasya indamyo syosa kangi ikulonda ukuti asabasyusye bosa abamanyani bake aba bafwile.—Jobu 14:15.

8. (a) Ukufwana na Yesaya 43:​2, ngimba Yehova ikututula bulebule? (b) Ngimba ulwiputo lukututula bulebule linga twaghene nindamyo inywamu? (Keta ividiyo iyakuti Ulwiputo Lukututula Ukwifimbilisya.)

⁸ Yehova ikututula utubalilo tosa. Pakuya yo Tata uyu atughanile, Yehova atikulonda ukuti tutamiweghe. (Yes. 63:9) Loli pope atikusikanisya indamyo syosa. Indamyo isi tubaghile ukusifwanikisya nisoko kangi nindapi sya moto. (Belenga Yesaya 43:2.) Loli umwene afingile ukuti ikuya pakututula ‘linga tukwenda’ mfindu bo ifi. Nalinga lino tubaghile ukwaghana nindamyo inywamu, Yehova ikuya pakututula ukuti tukindilile ukumbombela mbusubiliwa. Mwakongelelapo, Yehova ikutupa mbepo wake mwikemo ukuti ghututule ukwifimbilisya. (Luka 11:13; Filip. 4:13) Isi sikutupangisya ukuti tusubileghe ukuti utubalilo tosa Yehova ikuya pakututula ukwifimbilisya nukukindilila ukumbombela mbusubiliwa. d

9. Ukufwana na Yakobu 1:​6, 7, nongwa yafiki tukulondiwa ukusubila ukuti Yehova ikuya pakututula?

⁹ Yehova ikulonda ukuti tunsubileghe. (Hib. 11:6) Utubalilo tumo, tukuwa amaka panongwa ya ndamyo isi twaghene nasyo. Lumo tubaghile ukwanda ukukayikila linga Yehova ikuya pakututula naloli. Loli Ibaibolo likutusimikisyila ukuti tubaghile “ukulunduka pamwanya pilinga.” (Sal. 18:29) Yonongwa yake mmalo mwakukindilila ukukayikila, tukulondiwa ukunsuma Kyala ukuti atupepo ulwitiko ulwamaka nukusubila ukuti umwene ikuya pakwamula inyiputo syitu.—Belenga Yakobu 1:​6, 7.

10. Yoba ikifwanikisyo kya isi tukulondiwa ukubomba linga twiputile kwa Yehova ukuti atutule.

¹⁰ Yehova ikulonda ukuti tubombeghe ifindu ukufwana ninyiputo syitu. Mwakifwanikisyo, unkamu abaghile ukunsuma Yehova ukuti aleke ukubuka kumbombo panongwa yakuti ikulonda ukubuka kulukomano lwakighaba. Ngimba Yehova abaghile ukwamula bulebule ulwiputo ulu? Kyala abaghile ukuntula unkamu uyu ukuti aye nkifu bo ikunsuma bwana wake. Loli pope unkamu uyu ikulondiwa ukubuka kwa bwana wake nukwakunsuma. Ikulondiwa ukukindilila ukunsuma bwana wake. Kangi lumo abaghile ukunsuma ukuti asabombe amasiku aghangi. Linga kwakulondiwa, abaghile ukwiyipa ukuti angambililagha indalama pamasiku agha akabombapo imbombo.

11. Nongwa yafiki tukulondiwa ukukindilila ukwiputa pa isi tukwiyaya nasyo?

¹¹ Yehova ikulonda ukuti tukindilileghe ukwiputa pankhani isyakulondiwa kumyitu. (1 Tes. 5:17) Bo muno tuketile isi Yesu ayobile, fimo mwa findu ifi tukusuma, fikabaghila ukwamuliwa mwanakalinga. (Luka 11:9) Yonongwa yake tutikulondiwa ukuwa amaka. Tukulondiwa ukukindilila ukwiputa ukufuma pasi pandumbula.  (Luka 18:​1-7) Linga tukukindilila ukusuma ikindu kimo kwa Yehova, ko kuti tukunangisya ukuti ikindu ikyo kyakulondiwa fiyo kumyitu. Tubaghile ukunangisya kangi ukuti tuli nulwitiko ukuti abaghile ukututula.

12. (a) Ngimba ilalusyo limo liliku ili tukulondiwa ukwilalusya pankhani ya isi tukusuma kwa Kyala kangi nongwa yafiki? (b) Ngimba tubaghile ukusimikisya bulebule ukuti inyiputo syitu sikunangisya ukuti tukungindika Yehova? (Keta ibokosi ilyakuti “ Ngimba Inyiputo Syangu Sikunangisya Ukuti Ngungindika Yehova?”)

¹² Linga tutikwambilila isi tukusuma ndwiputo, tubaghile ukwilalusya amalalusyo matatu. Ilyakwanda lyo lyakuti, ‘Ngimba ngusuma ikindu ikinunu?’ Utubalilo twingi, tukwinong’ona ukuti tukimenye ikindu ikinunu kumyitu. Loli ifi tukusuma lumo fikabaghila ukututula. Linga tukwiputa ukuti Kyala atutule pandamyo yimo, umwene abaghile ukututula munjila iyingi ukukinda iyi twansumagha. Kangi ifindu fimo ifi tukusuma lumo fitikukolelana nu bwighane bwa Yehova. (1 Yoh. 5:14) Mwakifwanikisyo, inong’onela isya bapapi aba tubayobile pakwanda. Baliputile kwa kabalilo akatali kwa Yehova ukuti antule umwanabo ukuti akindilile ukumbombela Kyala. Isi basumagha sikufwana syali kanunu itolo. Loli Yehova atikumfimbilisyamo umundu aliwesa ukuti ambombeleghe. Kyala ikulonda ukuti aliwesa ukongelelapo abana, asaleghe mwene ukumbombela. (Kukumbu. 10:​12, 13; 30:​19, 20) Yonongwa yake abapapi aba balondiwagha ukunsuma Yehova ukuti abatule ukumfika pandumbula umwanabo linga bikummanyisya ukuti anganeghe Yehova nukuya mmanyani wake.—Mbu. 22:6; Ef. 6:4.

13. Ukufwana na Bahiburi 4:​16, ngimba po pakabalilo kaliku apa Yehova isakututula? Lingania.

¹³ Ilalusyo ilyabubili lyo lyakuti, ‘Ngimba aka ko kabalilo kakuti Yehova ambeghe isi ngusuma?’  Lumo tubaghile ukuketa ukuti tukulondiwa ukwamuliwa mwanakalinga ulwiputo lwitu. Loli Yehova yo uyu akamenye akabalilo akanunu akakuti atutule. (Belenga Bahiburi 4:16.) Linga tutikwambilila isi tukusuma munjila inunu, lumo tubaghile ukuketa ukuti Yehova akanile. Loli ubwanaloli bwake bo bwakuti Yehova isakwamula inyiputo syitu. Mwakifwanikisyo, inong’onela isya nkamu wakilumyana uyu iputagha ukuti abumbuluke kububine bwake. Linga Yehova alimbumbulwisye mwakubomba ikika, Setano ayagha pakuyoba ukuti unkamu uyu ikukindilila ukumbombela Yehova panongwa yakuti abumbulusiwe. (Jobu 1:​9-11; 2:4) Mwakongelelapo, Yehova abikile kale akabalilo aka isakusosyapo imbungo syosa. (Yes. 33:24; Ubuset. 21:​3, 4) Tughulileghe itolo mpaka pakabalilo aka isakutubumbulusya. Yonongwa yake, unkamu uyu ikulondiwa ukunsuma Yehova ukuti ampepo amaka nulutengano lwamundumbula ukuti ifimbilisye kububine bwake nukukindilila ukumbombela Kyala mbusubiliwa.—Sal. 29:11.

14. Ngimba tukumanyilako isyafiki pa isi alyaghene nasyo Janice?

¹⁴ Inong’onela isya Janice, uyu iputagha isyakuti abombeleghe pa Beteli. Bo pakindile ifyinja 5, asyaghenie ukuti Yehova alyamwile ulwiputo lwake loli munjila iyingi itolo. Umwene atile: “Yehova abombile akabalilo kala ukuti ammanyisye ifindu fingi nukundula ukuti njenje ukuya Nkristu wakwiyipa. Nalondiwagha ukunsubila fiyo. Nalondiwagha ukulipilikisya fiyo Ibaibolo pakumanyila kwa panimwene. Nalondiwagha kangi ukusimanya ukuti mbaghile ukuya walusekelo pene linga ngumbombela Yehova.” Panyuma pake, Janice nundume wake bakoleliwe ukuti babombeghe ububombeli bwakwendela idela. Bo ikukumbuka isya kunyuma, Janice atile: “Yehova alyamwile ulwiputo lwangu munjila iyi ngasubilagha. Palyeghile akabalilo ukuti ngete  namaso ghangu muno Yehova alyamulile kangi lino ndi nulusekelo ukumanya ukuti isi Yehova alyamwile kyali kyabupe kinunu fiyo. Ndi walusekelo kangi panongwa yakuti alimbele ulusako ulu papo anganile kangi mololo.”

15. Nongwa yafiki utubalilo tumo tukulondiwa ukongelelamo isingi munyiputo syitu? (Keta kangi ifithuzi.)

¹⁵ Ilalusyo ilyabutatu lyo lyakuti, ‘Ngimba kilipo iki ngulondiwa ukusuma ndwiputo?’ Nalinga ukuti tukulondiwa ukumbula Kyala isi sili mundumbula kisita kufisa, loli tukulondiwa ukubwaghania ubwighane bwa Yehova nukubuyoba munyiputo syitu. Inong’onela isya mulumbu uyu akaya pabweghi kangi ikwiputa ukuti ingile Isukulu ya Bafumusi ba Bunyafyale. Ikulonda ukwingila isukulu ukuti akabombeleghe kuno abafumusi bingi bikulondiwa. Polelo linga ikukindilila ukwiputa ukuti ingile isikulu iyi, ikulondiwa kangi ukunsuma Yehova ukuti antule ukusimanya injila isingi isyakongelela ububombeli bwake. (Imbo. 16:​9, 10) Linga iputile pankhani iyi, ikulondiwa ukundalusya uwakwendela idela linga ikipanga kimo ikya pabupipi kikulondiwa ubutuli bwa bapayiniya bingi. Pamo abaghile ukulemba kalata ku ofesi ukuti alalusye kuno abafumusi bingi ba Bunyafyale bikulondiwa ukuti akatuleko. e

16. Ngimba tukulondiwa ukusubila isyafiki?

¹⁶ Bo muno tumanyilile, tusubileghe ukuti Yehova ikwamula inyiputo syitu munjila iyalughano kangi iyabugholofu. (Sal. 4:3; Yes. 30:18) Utubalilo tumo, tukabaghila ukwamuliwa munjila isi twasubilagha. Loli Yehova akabaghila ukusisulako inyiputo syitu. Umwene atughanile fiyo. Kangi atisakutulekamo. (Sal. 9:10) Yonongwa yake tukulondiwa ukukindilila “ukusubila mu mmyake bwila itolo,” nukumbula isi sili mundumbula yitu ndwiputo.—Sal. 62:8.