1. Ngimba unsololi Yesaya ababulile isyafiki Abaisraeli abinake?

 UNSOLOLI Yesaya alinjobile Yehova ukuya yo “Kyala unsubiliwa.” Ilisyu ili lisanusiwe ukuti “unsubiliwa” likusanusya ukuti “ameni.” (Yes. 65:​16, amasyu ghapasi NWT) “Ameni” ko kuti “mo siyileghe,” pamo ukuti “naloli.” Linga ilisyu ilyakuti “ameni” libombeliwe mu Baibolo pakuyoba isya Yehova pamo Yesu, likusanusya ukuti syabwanaloli. Pilemba ili, Yesaya ababulagha Abaisraeli ukuti: Linga Yehova ayobile ngani ikindu kimo, utubalilo tosa kikufwanisiwa. Kangi utubalilo tosa, Yehova ikufwanisya isi afingile.

2. Nongwa yafiki tukulondiwa ukusubila isi Yehova afingile kangi tukuya pakuyobesania amalalusyo ghaliku?

² Ngimba nanuswe tukulondiwa ukusubila ukuti isi Yehova afingile sisakufwanisiwa naloli? Bo pakindile ifyinja 800 ukufuma nkabalilo ka Yesaya, untumiwa Pauli alingenie inongwa iyi tukulondiwa ukusubila ukuti isi Kyala afingile sikufwanisiwa utubalilo tosa. Pauli atile: “Kukabaghila ukuti Kyala atungulupilengemo.” (Hib. 6:18) Inong’onela ikifwanikisyo iki. Imbwibwi iyi yikusosya amisi amanunu yikabaghila ukusosya kangi amisi gha munyu. Mwakufwana itolo, panongwa yakuti ubwanaloli bukufuma kwa Yehova, akabaghila ukutungulupa. Yonongwa yake tukulondiwa ukuya nulusubilo losa ukuti fyosa ifi Yehova afingile ukongelelapo ulusubilo lwitu lwa  nkyeni, fisakufwanisiwa. Munkhani iyi, tukuya pakuyobesania amalalusyo agha: Ngimba Yehova afingile ukuti ikuya pakutupa ifindu fiki nkyeni? Kangi ngimba Yehova ikutusimikisyila bulebule ukuti isi afingile sisakufwanisiwa naloli?

3. (a) Ngimba lufingo luliku ulu ababombi ba Kyala balughanile? (Ubusetuli 21:​3, 4) (b) Ngimba abandu bamo bikwamula bulebule linga tukubafumukisya isya lufingo lwa nkyeni?

³ Ulufingo ulu tukuya pakuyobesania, lwakulondiwa fiyo kubabombi ba Kyala pakisu kyosa. (Belenga Ubusetuli 21:​3, 4.) Yehova afingile akabalilo aka “ubufwe nalinga bo busulumanie, nalinga ko kukuta pamo ko kubaba fitisakuyangako kangi.” Twebingi tukubombela amavesi agha ukuti tubasubisye abandu aba tukubafumukisya nukubanangisya muno ubumi bwisakuyila mu Paladaiso. Ngimba abandu bamo bikwamula bulebule linga tukubabula isya lufingo ulu? Bamo bikuyoba ukuti, “Ulufingo ulu lununu fiyo, loli ndikusubila linga lwisakufwanisiwa naloli.”

4. (a) Pakabalilo aka Yehova afingagha isya Paladaiso, ngimba asimenye ukuti syafiki sisakubombiwa mmasiku ghitu? (b) Ukongelelapo pa isi afingile ukuti ikuya pakubabombela abandu, ngimba Yehova isakubomba kangi isyafiki?

⁴ Pakabalilo aka Yehova ambulagha Yohani ukuti alembe muno ubumi bwisakuyila mu Paladaiso, asimenye ukuti uswe twisakubabulagha abandu isya lusubilo ulu mwakufumusya amasyu gha Bunyafyale amasiku agha. Yehova asimenye kangi ukuti kwisakuya kukafu ku bandu bingi ukusubila ukuti ulufingo ulu lwisakufwanisiwa naloli nkyeni. (Yes. 42:9; 60:2; 2 Kor. 4:​3, 4) Ngimba tubaghile ukubatula bulebule abangi ukuti basubileghe ukuti isi Kyala afingile pa Ubusetuli 21:​3, 4 sisakufwanisiwa naloli? Kangi ngimba nanuswe tubaghile ukubomba isyafiki ukuti tukasye ulusubilo lwitu mwa Yehova na isi afingile? Yehova atupele ififukwa ifyakupilikiwa ifi tukulondiwa ukusubila ukuti isi afingile sisakufwanisiwa naloli. Ngimba fifukwa filiku ifi atupele?

5. Ngimba mavesi ghaliku agha ghikutupa ififukwa ifi fikutupangisya ukuti tusubileghe isi Kyala afingile isya Paladaiso, kangi ghikuti fiki?

⁵ Tukufyagha ififukwa fyakusubila isi Yehova afingile isyakufwana na Paladaiso mmavesi agha ghali pankyeni. Tukubelenga ukuti: “Umwene uyu itughesye pakikota, kya bunyafyale yo alinkuyoba alinkuti: ‘Keta, fyosa nikufipela fipya.’ Kangi alinkuyoba alinkuti: ‘Simbagha, buno amasyu agha gho masubiliwa kangi ghanaloli.’ Popapo alinkumbula alinkuti: ‘Simalike. Yo une Alefa na Omega, yo une ne bwandilo kangi ne bumalikilo.’”—Ubuset. 21:​5, 6a NWT.

6. Nongwa yafiki isi sili pa Ubusetuli 21:​5, 6 sikutukasya ukuti tusubileghe isi Kyala afingile?

⁶ Nongwa yafiki amasyu agha ghikutukasya ukuti tusubileghe isi Kyala afingile? “Mmavesi agha, isi Yehova ikubomba sifwene itolo nukusayinila ipepala ili likubasimikisyila abandu ukuti ikuya pakufwanisya isi afingile.” b Isi Kyala afingile sikuyobiwa pa Ubusetuli 21:​3, 4. Ukufuma apo, ivesi lya 5 na 6, Yehova ikusayinila kumyitu ukuti isi afingile sisakufwanisiwa naloli. Isagha tukete muno Yehova atusimikisyile ukuti tunsubileghe.

7. Ngimba yonani uyu ikwanda ukuyoba mu vesi 5, kangi nongwa yafiki isi syapadela?

⁷ Vesi 5 likwanda namasyu aghakuti: “Umwene uyu itughesye pakikota, kya bunyafyale yo alinkuyoba alinkuti.” (Ubuset. 21:5a) Amasyu agha, ghapadela fiyo panongwa yakuti aka ko kamo mwatubalilo tutatu mu buku  lya Ubusetuli apa Yehova ikuyoba. Yonongwa yake uyu ikutusimikisyila apa, akaya wandumi pamo Yesu loli yo Yehova. Ifundo iyi yikunangisya ukuti tubaghile ukughasubila amasyu aghakukongapo. Nongwa yafiki sili bo ulu? Panongwa yakuti Yehova “akabaghila ukutungulupa.” (Titi 1:2) Yonongwa yake tukusubila ukuti amasyu agha tukubelenga pa Ubusetuli 21:​5, 6 ghikuya pakufwanisiwa naloli.

8. Ngimba Yehova ikuyoba isyafiki ukuti atusimikisyile ukuti isi afingile sisakufwanisiwa naloli? (Yesaya 46:10)

⁸ Ukufuma apo, Yehova atile: “Keta!” (Ubuset. 21:5) Ilisyu lya Nkigiriki ili lisanusiwe ukuti “keta!” libombeliwe utubalilo twingi mubuku lya Ubusetuli. Ibuku limo lyayobile ukuti amasyu agha ghabombeliwe ukuya “njila yakuntula uyu ikubelenga ukuti apilikisye kanunu amasyu aghakukongapo.” Ngimba Kyala ayobile isyafiki ukufuma apo? Umwene atile: “Fyosa nikufipela fipya.”—Belenga Yesaya 46:10.

9. (a) Ngimba amasyu aghakuti “fyosa nikufipela fipya” ghikusanusya isyafiki? (b) Ngimba syafiki sisakukibonekela “ikyakumwanya” ni “kisu kyapasi”?

⁹ Isagha tukete amasyu aghakukongapo agha ghikwaghiwa pa Ubusetuli 21:5 apa pikuti: “Fyosa nikufipela fipya.” Ngimba asanusyagha isyafiki? Muchaputala ili, amasyu agha ghikusanusya imbombo sibili isi Yehova ikubomba isi ko kuchenja ifindu nukughomolelapo. Ikyakwanda, Yehova isakukyonanga ikisu iki. Ikyabubili, isakukipela ikisu ukuya kipya. Pa Ubusetuli 21:​1, tukubelenga ukuti: “Ikya kumwanya ikitasi nikya pasi ikitasi fyo fyayongile.” Amasyu aghakuti “ikya kumwanya ikitasi” ghikuyoba isya maboma agha ghikulongosiwa na Setano nabandumi bake. (Mat. 4:​8, 9; 1 Yoh. 5:19) Ilisyu ilyakuti “ikya pasi” ili libombeliwe mu Baibolo, libaghile ukusanusya abandu aba bikwikala nkisu. (Bwa. 11:1; Sal. 96:1) Yonongwa yake amasyu aghakuti “ikya pasi ikitasi” ghikuyoba isya bandu ababibi mmasiku agha. Yehova isakukipela kipya “ikya kumwanya nikya pasi” mwakubapyuta abandu bosa ababibi. Ukufuma apo, ikuya pakukipela “ikya kumwanya ikipya nikya pasi ikipya,” isi sikusanusya ukuti iboma ilipya lisakubalongosyagha abandu abagholofu.

10. Ngimba findu fiki ifi Yehova ikuya pakufipela ukuya fipya?

¹⁰ Ngimba mo munjila yiliku iyingi iyi Yehova isakufipela fyosa ukuya fipya? (Ubuset. 21:5) Yehova isakukipela ikisu na bandu ukuti baye bagholofu. Bo muno Yesaya ayobile ngani, Yehova isakukipela ikisu kyosa ukuya kinunu fiyo bo muno wayilile ungunda wa Edeni. Nanuswe twisakuya bapya mwakubumbulusiwa kwa bwila na bwila. Abalemale, abafwamaso na aba batikupilika bisakubumbulusiwa. Bope aba bafwile bisakuya kangi nubumi.—Yes. 25:8; 35:​1-7.

11. Ngimba Yehova alimbulile Yohani ukuti abombe isyafiki kangi nongwa yafiki?

¹¹ Ngimba Kyala ikuyoba kangi isyafiki ukuti atusimikisyile ukuti isi afingile sisakufwanisiwa naloli? Yehova alimbulile Yohani ukuti: “Simbagha, buno amasyu agha gho masubiliwa kangi gha naloli.” (Ubuset. 21:5) Yehova akalimbulile itolo Yohani ukuti “simbagha.” Mmalo mwake, alimbulile ikifukwa kyake. Umwene atile: “Buno amasyu agha gho masubiliwa kangi gha naloli.” Apa ansimikisyilagha Yohani ukuti amasyu ghake gha naloli kangi isi ayobile sikubombiwa. Tukundaghisya fiyo panongwa yakuti Yohani apilikile ululaghilo ulwakuti “simbagha.” Isi sikututula ukuti tubelengeghe ulufingo lwa Kyala pakuyoba isya Paladaiso nukwinong’onela ulusayo ulununu ulu tukughulila nkyeni.

12. Nongwa yafiki Yehova atile: “Simalike”?

 ¹² Ngimba Kyala ayobile isyafiki ukufuma apo? Umwene atile, “Simalike.” (Ubuset. 21:6) Nongwa yafiki Yehova ikufwana asibombile kale syosa isi ayobagha isya lufingo lwa Paladaiso? Panongwa yakuti nakimo iki kibaghile ukuntolesya ukufwanisya ubwighane bwake. Ukufuma apo, Yehova ayobile kangi isingi isi sikutusimikisyila ukuti tusubileghe ukuti isi afingile sisakufwanisiwa naloli. Ngimba atile fiki?

13. Nongwa yafiki Yehova atile: “Yo une Alefa na Omega”?

¹³ Bo muno tuketile pakwanda, Yehova ayobile utubalilo tutatu mfisetuka ifi Yohani afibwene. (Ubuset. 1:8; 21:​5, 6; 22:13 NWT) Pakabalilo kalikosa aka ayobagha, Yehova atighi: “Yo une Alefa na Omega.” Ilisyu ilyakuti alefa, bo bwandilo bwa alufabeti ya Kigiriki kangi ilyakuti omega bo bumalilo bwa masyu ghake. Apa abombelagha amasyu aghakuti “Alefa na Omega,” Yehova anangisyagha ukuti linga andile imbombo yimo, ikuyimalisya kisita kutoliwa.

14. (a) Ngimba po pakabalilo kaliku apa Yehova ayobile ukuti “Alefa” kangi isakuyoba ndili ukuti “Omega”? (b) Ngimba amasyu agha ghali pa Ubwandilo 2:​1-3 ghikutusimikisyila isyafiki?

¹⁴ Bo Yehova ampelile Adamu na Eva, ababulile isya bwighane bwake kubandu na kukisu. Ibaibolo likuti: “Kyala alinkubasaya, kangi alinkubabula alinkuti: ‘Molokeghe, mwisule nkisu, kangi mukilambikeghe.’” (Bwa. 1:28) Pakabalilo kala, Yehova ayobile ubwighane bwake kubandu na kukisu. Ubu bwali bwandilo pamo ukuti “Alefa.” Linga ubwighane bwake bufwanisiwe kangi abana ba Adamu na Eva aba bikupilikila biswile nkisu nukukipela ukuya Paladaiso, isakuya “Omega.” Bo amalisisye imbombo yakukipela “ikisu ikya pasi nikya  kumwanya na fyosa ifi filimo,” Yehova ayobile simo ukuti anangisye ukuti ubwighane bwake bwisakufwanisiwa naloli. Isi ayobile sikwaghiwa pa Ubwandilo 2:​1-3. (Belenga.) Yehova atile isiku lya Sabati liyeghe lyakulondiwa fiyo. Ngimba isi sikusanusya isyafiki? Yehova asimikisyile ukuti ikuya pakufwanisya ubwighane bwake kubandu na kukisu kisita kutoliwa kubumalilo bwa isiku lya sabati.

15. Nongwa yafiki Setano inong’onagha ukuti ikuya pakuntolesya Yehova ukufwanisya ubwighane bwake?

¹⁵ Bo Adamu na Eva bansambukile Kyala, bali batulanongwa, kangi babambukisye abanabo ubutulanongwa nubufwe. (Rom. 5:12) Isi sipangisye ukuti ubwighane bwa Kyala ubwakuti abandu aba bikumpilikila bisuleghe nkisu, bufwaneghe butoliwe ukufwanisiwa. Ngimba Setano abaghile ukuntolesya Yehova ukufwanisya ubwighane bwake? Lumo Setano inong’onagha ukuti Yehova akabaghila ukufwanisya ubwighane bwake. Lumo inong’onagha ukuti Kyala ikuya pakungogha Adamu na Eva nukuyipela imbumba iyingi ingolofu ukuti afwanisye ubwighane bwake kubandu. Loli linga Kyala abaghoghile, Umohesi ayagha pakunjoba Yehova ukuti ntungulu. Nongwa yafiki? Panongwa yakuti bo muno pikuyobela pa Ubwandilo 1:​28, Yehova alimbulile Adamu na Eva ukuti abanabo bayagha pakwisula nkisu.

16. Nongwa yafiki Setano inong’onagha ukuti Yehova atikuya pakufwanisya isi afingile?

¹⁶ Ngimba Setano abaghile ukuti inong’onagha kangi ukuti Kyala abaghile ukusala ukubomba kangi siliku? Lumo Setano inong’onagha ukuti Yehova ikuya pakumwitikisya Adamu na Eva ukupapa abana aba bakabaghila ukuya bagholofu. (Ndumbi. 7:20; Rom. 3:23.) Linga Adamu na Eva bapapile abana aba bakabaghila ukuya bagholofu, Umohesi ayagha pakunjoba Yehova ukuti atoliwe ukufwanisya ubwighane bwake. Ikisu kikayagha pakwisula na bandu abagholofu.

17. Ngimba Yehova ayimasisye bulebule inkhani yakusambukila kwa Setano na bandu bakwanda kangi syafiki sisakubombiwa pabumalilo? (Keta kangi ikithuzi.)

¹⁷ Setano akalondiwagha ukwinong’onela isi Yehova abaghile ukubomba. Yehova ali ninjila inunu iyakuti afwanisye isi afingile nalinga ukuti Setano, Adamu na Eva balinsambukile. (Sal. 92:5) Mmalo mwake, Yehova alitikisye ukuti Adamu na Eva bapape abana kangi ukubomba isi kwanangisye ukuti isi ayobile syali sya naloli. Yehova akaya ntungulu. Kangi Yehova anangisye ukuti linga ayobile ukuti ikuya  pakubomba simo, nakimo kitikuntolesya. Yehova asimikisye ukuti ubwighane bwake bwisakufwanisiwa mwakuntuma “uwanduyungu” uyu isakubapoka abana ba Adamu na Eva aba bikupilikila. (Bwa. 3:15; 22:18) Uwanduyungu uyu, isakubika ubumi bwake ukuti abatabule abandu. Setano akamenye ukuti Yehova abaghile ukubombela injila iyi. Nongwa yafiki? Panongwa yakuti ikitabulilo kyabikiwe panongwa ya lughano lwanaloli. (Mat. 20:28; Yoh. 3:16) Setano akaya nulughano lwanaloli kangi iyighanile mwene. Ngimba syafiki sikuya pakubombiwa panongwa ya kitabulilo? Kubumalilo bwa fyinja 1,000 ifyabulaghili bwa Kristu, abana ba Adamu na Eva abagholofu bisakwikalagha mu paladaiso pakisu bo muno Yehova alondelagha pakwanda. Pakabalilo ako, Yehova isakufwana ikuyoba ukuti, “Omega.”

18. Ngimba fifukwa filiku fitatu ifi Kyala ikutusimikisyila ukuti isi afingile fisakufwanisiwa naloli? (Keta kangi ibokosi ilyakuti “ Ififukwa Fitatu ifi Tukusubila Ulufingo lwa Yehova.”)

¹⁸ Munkhani iyi, tuketile ififukwa ifi tukulondiwa ukusubila ukuti ikisu kisakuya Paladaiso naloli. Ngimba tubaghile ukubabula isyafiki abandu ukuti basubile ukuti isi Kyala afingile sisakufwanisiwa naloli? Ikyakwanda, yo Yehova uyu afingile isi. Ibuku ilya Ubusetuli likuti: “Umwene uyu itughesye pakikota, kya bunyafyale yo alinkuyoba alinkuti: ‘Keta, fyosa nikufipela fipya.’” Umwene ali namahala, amaka kangi ikulonda ukufwanisya naloli isi afingile. Ikyabubili, Yehova asimenye ukuti isi ayobile sitikutoliwamo. Yonongwa yake atile: “Amasyu agha gho masubiliwa kangi gha naloli. . . . Simalike.” Ikyabutatu, nakimo iki kibaghile ukuntolesya Kyala ukumalisya imbombo iyi andile ukubomba. Yonongwa yake atile: “Yo une Alefa na Omega.” Yehova isakunangisya ukuti Setano ntungulu kangi atoliwe ukuntolesya ukufwanisya ubwighane bwake.

19. Ngimba tubaghile ukubomba isyafiki linga abandu bikukayikila isi Kyala afingile isya Paladaiso?

¹⁹ Kumbuka ukuti linga mukubabula abandu ukuti Yehova isakufwanisya naloli isi afingile, ko kuti mukukasya ulusubilo lwinu mmyake. Linga mukumbelengela umundu ulufingo ulwakuhobosya pakuyoba isya Paladaiso uyu ikwisa bo muno pikuyobela pa Ubusetuli 21:4 kangi umundu yumo ikuti, “Ulufingo ulu lununu fiyo,” ngimba mubaghile ukubomba isyafiki? Mubaghile ukubelenga nukubalingania ivesi 5 na 6. Munangisyeghe muno Yehova asimikisyile ukuti isakufwanisya isi afingile mwakusayinila.​—Yes. 65:16.