1-2. Ngimba ifindu ifisitabugholofu fibaghile ukutupalamasya bulebule?

 YESU ayobile ikifwanikisyo kya nkikulu umfwilwe uyu asumile ubutuli ku nndongi ukuti andongele mbugholofu. Abafundiwa ba Yesu bapilikisye muno unkikulu uyu ipilikilagha panongwa yakuti nkabalilo kala abandu bingi bababombelagha ifindu ifisitabugholofu. (Luka 18:​1-5) Nanuswe tubaghile ukupilikisya muno unkikulu uyu ipilikilagha panongwa yakuti utubalilo tumo bikutubombela ifindu ifisitabugholofu.

² Abandu bingi amasiku agha, bikusalana, bakaya nikisa kangi bikwitufya. Yonongwa yake tutikuswigha linga bikutubombela ifindu ifisitabugholofu. (Ndumbi. 5:8) Loli tubaghile ukuwa amaka linga unkamu pamo umulumbu atubombile ifindu ifisitabugholofu. Ukuyoba ubwanaloli abakamu na balumbu batikususya ubwanaloli. Abene basitabugholofu. Tubaghile ukumanyilako nyingi ku isi Yesu abombile bo abakususya bikumbombela ifindu ifisitabugholofu. Linga tukunangisya ubololo kubakususya aba bikutubombela ifindu ifisitabugholofu, tubaghile kangi ukunangisya ubololo ku Bakristu abinitu. Ngimba Yehova ikwipilika bulebule linga batubombile ifindu ifisitabugholofu nabakamu na balumbu bitu pamo umundu aliwesa? Ngimba ikupalamasiwa?

3. Ngimba Yehova sikumpalamasya bulebule linga tukwaghana nifindu ifisitabugholofu, kangi nongwa yafiki?

³ Yehova ikupalamasiwa fiyo namuno abangi bikutubombela ifindu. “Yehova abughanile ubwanaloli.” (Sal. 37:28) Yesu ikutusimikisyila ukuti Yehova “isakubalongela mbibimbibi itolo” pakabalilo akanunu. (Luka 18:​7, 8) Kangi mwalululu,  ikuya pakusosyapo ifindu ifibibi fyosa nukusosyapo ubusitabugholofu bosa.—Sal. 72:​1, 2.

4. Ngimba Yehova ikututula bulebule amasiku agha?

⁴ Bo tukughulila akabalilo aka kwisakuya ubugholofu, Yehova ikututula ukwifimbilisya kufindu ifisitabugholofu. (2 Pet. 3:13) Umwene ikutumanyisya muno tubaghile ukubombela mwamahala linga bamo bikutubombela ifindu ifibibi. Ukwendela Mmwanake, Yehova atupele ikifwanikisyo ikinunu ikya muno tubaghile ukubombela ukuti twifimbilisyeghe linga bamo batubombile ifindu ifisitabugholofu. Kangi ikutubula isi tubaghile ukubomba linga batubombile ifindu ifisitabugholofu.

TUYEGHE MASO NA ISI TUKUBOMBA LINGA BATUBOMBILE IFISITABUGHOLOFU

5. Nongwa yafiki tukulondiwa ukuya maso na isi tukubomba linga bamo batubombile ifindu ifisitabugholofu?

⁵ Tubaghile ukukalala fiyo nukutamiwa aminong’ono linga batubombile ifindu ifisitabugholofu. (Ndumbi. 7:7) Ababombi ba Yehova abasubiliwa bo Yobu na Habakuku, bope momuno bipilikilagha. (Jobu 6:​2, 3; Hab. 1:1-3) Ukwipilika bo ulu kukaya kubibi, loli tukulondiwa ukuya maso namuno tukubombela ukuti tuleke ukubomba kilikyosa ikibibi.

6. Ngimba ikifwanikisya kya Abisalomu kikutumanyisya isyafiki? (Keta kangi ikithuzi.)

⁶ Linga yumo atubombile uswe pamo umwinitu yumo ifindu ifisitabugholofu tubaghile ukulonda ukughomokesya. Ukubomba bo ulu kubaghile ukupangisya indamyo nyingi. Amwinong’onele ikifwanikisyo kya Abisalomu umwana wa Mwalafyale Davidi. Umwene akalele fiyo bo uwamyabo Amunoni ankolelile ilumbu wake Tamara. Ukufwana nindaghilo isi Kyala abapele Abaisraeli ukwendela mwa Mose, Amunoni alondiwagha ukughoghiwa panongwa ya isi abombile. (Levi. 20:17) Nalinga ukuti ubukalale bwa Abisalomu bwali bwakupilikiwa, loli akali namaka ghakughomokesya pamwene.—2 Samu. 13:​20-23, 28, 29.

7. Ngimba ifindu ifisitabugholofu fyalimpalamasisye bulebule uwamasalimo?

⁷ Linga aba bikubomba ifisitabugholofu batikufundiwa, tubaghile ukwanda ukwinong’ona ukuti ukubomba inunu kukaya nimbombo. Amwinong’onele isya uwamasalimo uyu aketagha ukuti ababibi ifindu fikubendela kanunu ukukinda abagholofu. Umwene ayobile ukuti “aba bo babibi; bwila itolo batengene.” (Sal. 73:12) Umwene akalalagha panongwa ya findu ifisitabugholofu ifi afiketagha kangi inong’onagha ukuti ukumbombela Yehova kukaya  kwakulondiwa. Uwamasalimo uyu atile: “Loli bo ngwinong’ona injila yakusyaghanikisya sisisi, yilinkufwana mbombo yakukatasya kumyangu.” (Sal. 73:​14, 16) Kangi atile: “Loli une amalundi ghangu ghali pipi itolo ukutyelemukila ku lupanga, ni nyayo syangu syali pipi itolo ukutyelemuka.” (Sal. 73:2) Syo isi syalimbonekile unkamu Alberto.

8. Ngimba ifindu ifisitabugholofu fyalimpalamasisye bulebule unkamu yumo?

⁸ Alberto balimpele inongwa iyakuhiya indalama sya kipanga. Isi syapangisye ukuti bamwimike tasi pambombo yakuya nkulumba wakipanga kangi abakamu na balumbu nkipanga aba basipilike isi balekile ukungindika. Umwene atile, “Nakalele kangi nawile amaka.” Umwene alitikisye ukuti aminong’ono ghake ghonange ubumanyani bwake na Yehova kangi alekile ukubuka kungomano kwa fyinja 5. Ikyakubombiwa iki, kikunangisya isi sibaghile ukubombiwa linga tukalele kisitakwighomola panongwa yafindu ifisitabugholofu.

TUNKONGEGHE YESU PANKHANI YAKWIFIMBILISYA KUFINDU IFISITABUGHOLOFU

9. Ngimba findu filiku ifisitabugholofu ifi Yesu alifimbilisye? (Keta kangi ikithuzi.)

⁹ Yesu atunangisye ikifwanikisyo ikinunu pankhani yakwifimbilisya kufindu ifisitabugholofu.  Amwinong’onele ifindu ifisitabugholofu ifi umwene alyaghene nafyo, ukufuma ku bamumbumba yake na bangi. Abakamu bake banjobagha ukuti asyutile untu, abalongosi bamatchalichi banjobagha ukuti akolelanagha nimbepo inyali, kangi abasilikali Baroma bansekagha, bannyozagha kangi balingoghile. (Mar. 3:​21, 22; 14:55; 15:​16-20, 35-37) Nalinga syali bo ulu, loli Yesu ifimbilisyagha kufindu ifisitabugholofu kangi akaghomokesyagha imbibi. Ngimba tubaghile ukumanyilako isyafiki kukifwanikisyo iki?

10. Ngimba Yesu alifimbilisye bulebule ku findu ifisitabugholofu? (1 Peteri 2:​21-23)

¹⁰ Belenga 1 Peteri 2:​21-23. a Yesu atulekile ikifwanikisyo ikinunu iki tubaghile ukukonga linga batubombile ifindu ifisitabugholofu. Umwene amanyagha akabalilo kakuyila mye nakabalilo kakuyobela. (Mat. 26:​62-64) Utubalilo tosa linga bikuntungulupila, umwene asalagha ukuya mye itolo. (Mat. 11:19) Linga ikuyoba umwene ayobagha mwalughindiko kangi akabatetemesyagha abakususya. Utubalilo tosa, Yesu ikolagha panongwa yakuti abikagha “ulusubilo lwake mwa Kyala uyu ikusitumulila mbugholofu.” Yesu asimenye ukuti Yehova ikuketa ifindu fyosa ifi aghanagha nafyo. Umwene asubilagha ukuti Yehova isakusosyapo ifindu ifisitabugholofu pakabalilo kake.

11. Ngimba tubaghile ukwikola bulebule mu isi tukuyoba? (Keta kangi ifithuzi.)

¹¹ Tubaghile ukunkonga Yesu mwakwikola mu isi tukuyoba linga bamo batubombile ifindu ifisitabugholofu. Utubalilo tumo ifindu ifisitabugholofu fibaghile ukuya fipepe, yonongwa yake tukulondiwa ukusulako itolo. Pamo tubaghile ukuya mye panongwa yakuti linga tuyobile simo sibaghile ukupangisya indamyo  isingi. (Ndumbi. 3:7; Yak. 1:​19, 20) Loli utubalilo tumo, tukulondiwa ukuyoba linga tuketile ukuti batubombile ifindu ifisitabugholofu pamo ukuti tubufighilile ubwanaloli. (Imbo. 6:​1, 2) Linga tukuyoba tughelegheleghe ukuyoba mbololo kangi mwalughindiko.—1 Pet. 3:15. b

12. Ngimba tubaghile ukunsubila bulebule “uyu ikusitumulila mbugholofu”?

¹² Tubaghile ukunkonga kangi Yesu mwakunsubila “uyu ikusitumulila mbugholofu.” Linga bamo bikutuketa ububibi pamo bikutunyoza, tusubileghe ukuti Yehova yo asimenye syosa. Isi sibaghile ukututula ukwifimbilisya kufindu ifisitabugholofu panongwa yakuti tusimenye ukuti Yehova ikuya pakusosyapo ifindu ifisitabugholofu fyosa. Linga tukunsubila Yehova nukughulila ukuti amasye indamyo syosa tutikuya pakukalala nukubabenga abangi. Ukubakalalila abangi kubaghile ukupangisya ukuti tubombe ifindu ifibibi, kukutupoka ulusekelo lwitu, nukonanga ubumanyani bwitu na Yehova.—Sal. 37:8.

13. Ngimba findu fiki fibaghile ukututula ukuti twifimbilisyeghe kufindu ifisitabugholofu?

¹³ Bwanaloli ukuti tukabaghila ukufwanisya ukukonga fyosa ifi Yesu abombagha. Utubalilo tumo, tubaghile ukubomba pamo ukuyoba simo isi panyuma pake tubaghile ukwiyipa inongwa. (Yak. 3:2) Kangi ifindu fimo ifisitabugholofu, fibaghile ukutupangisya ukuti tutamiweghe naminong’ono kangi kubaghile ukuya kukafu ukwifimbilisya. Linga momuno siyilile kumyinu, mukulondiwa ukumanya ukuti Yehova asimenye isi mukwaghana nasyo. Kangi Yesu uyu yope alyaghenepo nifindu ifisitabugholofu, abaghile ukubapilikisya muno mukwipilikila. (Hib. 4:​15, 16) Ukongelelapo pa kifwanikisyo ikinunu ikya Yesu, Yehova ikutupa kangi ubulongosi ubu bukututula ukwifimbilisya kufindu ifisitabugholofu. Isagha tuyobesanie amavesi mabili agha mu buku lya Baroma agha ghabaghile ukututula.

“INGALALISI SYO MUNDEKELEGHE”

14. Ngimba amasyu aghakuti “ingalalisi syo mundekeleghe” ghikusanusya isyafiki? (Baroma 12:19)

¹⁴ Belenga Baroma 12:19. Apa untumiwa Pauli ababulagha Abakristu ukuti “ingalalisi syo mundekeleghe,” ngimba asiyobagha ingalalisi syanani? Ukufwana nilemba ili, isi syo ngalalisi sya Yehova. Tubaghile ukundekela ingalalisi Yehova ukuti abombe ifindu mbugholofu pakabalilo kake kangi munjila iyi umwene ikulonda. Bo bambombile ifindu ifisitabugholofu, unkamu John atile: “Nalondiwagha ukwikola ukuti ningabombagha ikindu ikibibi loli kwali kukafu ukubomba isi. Ilemba lya Baroma 12:​19, lyalindulile fiyo ukungulila Yehova.”

15. Nongwa yafiki kwakulondiwa ukungulila Yehova ukuti amalane nindamyo?

¹⁵ Tukusayiwa linga tukungulila Yehova ukuti abombepo simo pandamyo yitu. Linga tubombile isi, tubaghile ukwepuka kundamyo isi sikuyapo panongwa yakughelaghela ukumalana nindamyo patwibene. Yehova ikwiyipa ukuti atutule. Umwene ikutubula ukuti tungulileghe yuyo kangi afingile ukuti ikuya pakusosyapo ifindu ifisitabugholofu. Linga tukwitikisya isi Yehova afingile isyakuti, “Nisakubukisyagha yuyune,” tubaghile ukusubila ukuti umwene ikuya pakumalana nindamyo munjila inunu. Isi syo isi syalintulile John uyu tunjobile pakwanda. Umwene atile, “Linga mbaghile ukungulila itolo Yehova, umwene ikuya pakumalana nindamyo munjila inunu ukukinda muno une mbaghile ukubombela.”

“IMBIBI USILAMBIKILEGHE NUBUNUNU”

16-17. Ngimba ulwiputo lubaghile ukututula bulebule ukuti “imbibi tusilambikileghe nubununu”? (Baroma 12:21)

¹⁶ Belenga Baroma 12:21. Pauli ababulile kangi Abakristu ukuti “imbibi usilambikileghe  nubununu.” Pabufumusi bwake bwapakyamba, Yesu atile: “Amubaghaneghe abalughu binu, nukubiputila aba bikubafwima.” (Mat. 5:44) Isi syo isi abombile naloli. Lumo twinong’winepo isya ndamyo isi Yesu alifimbilisye bo abasilikali ba Roma bankomelile pa mpiki. Tubaghile ukwanda ukwinong’onela ifyakubaba ifi ipilikagha, ukunyoziwa nifindu ifisitabugholofu ifi ifimbilisyagha.

¹⁷ Yesu akindilile ukuya nsubiliwa nukungana Yehova nalinga ukuti atamiwe fiyo. Mmalo mwakubaghuna abasilikali bala, umwene aliputile ukuti: “We Tata, ubasweghe, namanga bakasimanya isi bikubomba.” (Luka 23:34) Linga tukubiputila aba bikutunyoza fibaghile ukututula ukuti tuleke ukutamiwa naminong’ono pamo ukukalala kangi tubaghile ukuchenja muno tukubaketela aba bikutonangila.

18. Ngimba ulwiputo lwalintulile bulebule Alberto na John ukuti bifimbilisye kufindu ifisitabugholofu?

¹⁸ Ulwiputo lwabatulile abakamu babili aba tubayobile pakwanda ukuti bifimbilisyeghe kufindu ifisitabugholofu ifi balyaghene nafyo. Alberto atile: “Nabiputilagha abakamu aba balimbombile ifindu ifisitabugholofu. Niputagha kwa Yehova akabalilo kosa ukuti andule ukuleka ukukalala panongwa ya isi balimbombile.” Syakuhobosya ukuti lino Alberto ikumbombela Yehova mbusubiliwa. John atile: “Utubalilo twingi namwiputilagha unkamu uyu alimbombile ifindu ifibibi. Ulwiputo lwalindulile ukuti nunketeghe kanunu kisita kundonga. Kangi ulwiputo lwalindulile ukuya nulutengano lwamundumbula.”

19. Ngimba tukulondiwa ukubomba isyafiki mpaka kubumalilo bwa kisu ikibibi iki? (1 Peteri 3:​8, 9)

¹⁹ Bo tukwikala nkisu ikibibi iki, abandu bikuya pakutubombelagha ifindu ifisitabugholofu. Mulimosa muno sibaghile ukuyila, isagha tukindilileghe ukusuma ubutuli kwa Yehova. Kangi tukindilileghe ukukonga muno Yesu abombelagha bo abandu bikunnyoza, nukukindilila ukukonga ubulongosi bwa mu Baibolo. Linga tukubomba isi tubaghile ukusubila ukuti Yehova ikuya pakutusaya.—Belenga 1 Peteri 3:​8, 9.