NGIMBA mukutoliwa ukukindilila nukuhoboka linga mukumanyila Ibaibolo pamwibene? Momuno twesa tukwipilikila utubalilo tumo. Loli inong’onela isya findu ifingi ifi tukubomba utubalilo tosa bo ukogha. Ukogha kukwegha akabalilo na maka. Loli ngimba tukwipilika bulebule linga toghile? Ukumanyila Ibaibolo kope kubaghile ukufwanikisiwa nukusuka “namisi pamopene nisyu.” (Ef. 5:26) Inong’onela ghamo mwa masakisyo agha ghabaghile ukututula:

• Mupangeghe imbatiko. Ukumanyila Ibaibolo kwa pamwibene, kyo kimo mwafindu ‘ifinunu’ iki Unkristu ikulondiwa ukubomba. (Filip. 1:10) Ukuti mukongeghe imbatiko yinu, mubikeghe pamalo ghakuti muyiketeghe kanunu. Pamo mubaghile ukubika alamu pafoni ukuti yibakumbusyeghe.

• Musaleghe akabalilo ninjila inunu. Ngimba kupepe kumyinu ukubikapo amahala linga mukubelenga kwakabalilo akatali pamo akanandi? Mumenye muno findu fiyilile kumyinu. Muchenjeghe apa pikulondiwa. Linga mukwipilika ukuti mukabaghila ukumanyila pakabalilo aka musalile, ngimba mukabaghila ukumanyila kwa maminiti 10 itolo? Nalinga ukuti mubaghile ukumanyila kwa maminiti 10 itolo, loli mubaghile ukumanyila ifindu fingi fiyo. Linga mwandile ukubelenga, sibaghile ukubapa ubwighane bwakuti mukindilile ukubelenga.—Filip. 2:13.

• Musalileghe ngani isi mukuya pakumanyila. Linga akabalilo kafwene akakumanyila loli mukasimanya isi mukuya pakumanyila, mukulondiwa ukumanya ukuti “akabalilo kinu kosa itolo kayeghe kambombo.” (Ef. 5:16) Ngimba mukabaghila ukulemba imitu ninkhani isi mukulonda ukumanyila? Linga mulyaghile ilalusyo ili mutikulipilikisya kanunu, mulembeghe pamalo ghamo. Kangi pabumalikisyo bwa kumanyila, mubaghile ukongelelapo amasakisyo pa isi mukulonda ukumanyila.

• Muchenjeghe linga kwakulondiwa. Mugheleghe ukongelelapo isi muchenjile mumbatiko yinu, bo akabalilo aka mukumalila pakubelenga pamo imitu yankhani iyi musalile. Ikindu ikyakulondiwa fiyo kakaya kabalilo, ubutali, pamo isi mukumanyila loli ukumanyila akabalilo kosa.

Tukusayiwa fiyo linga tukukindilila ukumanyila akabalilo kosa. Tukuseghelela kwa Yehova, nukumanyila ukuti tubombeghe mwamahala, kangi tukuya pakukasiwagha fiyo.—Yos. 1:8.