INKHANI IYAKUMANYILA 34
Ukwisibila Nububombeli Ubupya
“Namanga Kyala akaya nsitabugholofu, ukuti ibweghe imbombo syinu, nulughano lwinu ulu mulunangisye panongwa ya ngamu yake.”—HIB. 6:10.
ULWIMBO 38 Wamuzgoraninge Ŵankhongono
ISI TUKUYA PAKUMANYILA *
1-3. Ngimba findu fimo filiku ifi fibaghile ukupangisya ukuti aba bali mububombeli ubwa kabalilo kosa, ububombeli bwabo buchenje?
ROBERT na Mary Jo batile, “Bo tufwanisye ifyinja 21 mububombeli bwitu ubwa bumishonale, abapapi bitu bosa 4 bakangele. Twahobokagha fiyo ukubapwelelela. Loli, syali syakubaba fiyo ukuleka ifindu ifi twalisibile ukubomba pabumi bwitu.”
2 William na Terrie batile, “Bo tusyaghenie ukuti tutikuya pakukindilila ukubomba ububombeli bwitu ubwa bumishonale panongwa ya bubine, twalyandile ukulila. Ubwighane bwitu ubwakumbombela Yehova nkisu ikingi bwatoliwe.”
3 Aleksey atile, “Twasyaghenie ukuti abalughu bitu balondagha ukwighala ofesi yitu kuno nambombelagha Yehova. Loli twakindilile ukuya nikitima bo isi sibombiwe kangi twasokilepo pa Beteli.”
4. Ngimba malalusyo ghaliku agha tukuya pakuyobesania mu nkhani iyi?
4 Kangi abakamu na balumbu bingi aba bali mububombeli ubwa kabalilo kosa, ukongelelapo bosa aba babombagha pa Beteli bapeliwe ububombeli ubupya. * Kubaghile ukuya kukafu fiyo ku bakamu na balumbu ukuleka ububombeli ubu babughanile fiyo. Ngimba findu fiki ifi fibaghile ukubatula ukuti bakindilile ukuhoboka linga ifindu fichenjile pabumi bwabo? Ngimba mubaghile ukubatula bulebule? Amaansala gha malalusyo agha ghabaghile ukututula twesa linga ifindu fichenjile pabumi bwitu.
MUNO TUBAGHILE UKUBOMBELA LINGA IFINDU FICHENJILE
Nongwa yafiki ukuleka ububombeli kubaghile ukutwala indamyo ku bakamu na balumbu aba bali mububombeli ubwa kabalilo kosa? (Keta ipalagilafu 5) *
5. Ngimba sibaghile ukutupalamasya bulebule pabumi bwitu linga ububombeli buchenjile?
5 Kali tukubomba ububombeli ku malo ghamo pamo pa Beteli, tukulondiwa ukumanyila ukubaghana abandu namalo agha tukubombako ububombeli. Loli linga ububombeli bwitu buchenjile, tubaghile ukusulumania mundumbula. Tukubasoba fiyo abakamu na balumbu bitu aba tubalekile, kangi tukubapasikisya, fiyofiyo linga tukusokako ku malo agha panongwa yabalughu aba bikutunyoza. (Mat. 10:23; 2 Kor. 11:28, 29) Mwakongelelapo, kubaghile ukuya kukafu fiyo ukusamila ku malo aghangi panongwa yakuti tubaghile ukuchenja inyiho simo isya kumalo agha tukubukako. Robert na Mery Jo batile, “Tukalisibile ninyiho syitu kangi twatoliwagha ukufumusya munjobelo yitu, panongwa yakuti twabombile ububombeli nkisu ikingi kwa kabalilo akatali. Twafwanagha tuli bahesya nkisu kitu.” Aba linga ububombeli buchenjile babaghile ukwaghana nindamyo ya ndalama. Babaghile ukutamiwa naminong’ono, ukutagha ulusubilo kangi nukuwa amaka. Ngimba findu fiki ifi fibaghile ukubatula?
Kwakulondiwa fiyo ukuseghelela kwa Yehova nukunsubila umwene (Keta amapalagilafu 6-7) *
6. Ngimba tubaghile ukuseghelela bulebule kwa Yehova?
6 Tusegheleleghe fiyo kwa Yehova. (Yak. 4:8) Ngimba tubaghile ukubomba bulebule isi? Mwakunsubila Kyala uyu “Ikwamula inyiputo.” (Sal. 65:2) Ilemba lya Salimo 62:8 likuti, “Isi sili mundumbula syinu syo muntaghileghe yuyo.” Yehova abaghile ukubomba “nyingi ukukinda isi tukunsuma.” (Ef. 3:20) Umwene atikutupa syene isi tukunsuma munyiputo. Yehova abaghile ukutubombela na isi tukaghulilagha pabumi bwitu ukuti tumalane nindamyo.
7. (a) Ngimba findu fiki ifi fibaghile ukututula ukuti tukindilile ukuseghelela kwa Yehova? (b) Ukufwana na Bahiburi 6:10-12, ngimba fyakukongapo filiku ifi fibaghile ukuyapo linga tukukindilila ukumbombela Yehova mbusubiliwa?
7 Ukuti tukindilile ukuseghelela kwa Yehova, tukulondiwa ukubelenga nukwinong’onelapo amasyu gha Kyala ilisiku lililyosa. Umishonale yumo atile: “Akabalilo kosa mukongeghe imbatiko iyakumanyila kwa pambumba kangi mwitendekesyeghe ingomano ukufwana namuno mwabombelagha kunyuma.” Kangi mukindilileghe ukwiyipa pakufumusya nkipanga kinu iki musamileko lino. Yehova ikubakumbukila bosa aba bikukindilila ukumbombela mbusubiliwa, nalinga ukuti bakabaghila ukubomba syosa isi babombagha kunyuma.—Belenga Bahiburi 6:10-12.
8. Ngimba amasyu agha ghali pa 1 Yohani 2:15-17 ghabaghile ukututula bulebule ukuti twikaleghe ubumi ubusita kulonda ifindu fingi?
8 Twikaleghe ubumi ubusita kulonda ifindu fingi. Tungitikisyagha aminong’ono agha nkisu kya Setano iki “ukututolesya” ukumbombela Yehova. (Mat. 13:22) Tungapilikisyagha isi abamanyani pamo abakamu bitu bikuyoba ukuti tulondeghe ikyuma nkisu kya Setano iki ukuti tuye nubumi ubununu. (Belenga 1 Yohani 2:15-17.) Tunsubileghe Yehova, uyu afingile ukuti ikuya pakutupa fyosa ifi tukulonda, ifyamwambepo nifyakumbili “pakabalilo kake.”—Hib. 4:16; 13:5, 6.
9. Ukufwana na Isya Mbupingamu 22:3, 7, nongwa yafiki tutikulondiwa ukukopa indalama isi tukabaghila ukufwanisya ukughomola, kangi ngimba findu fiki ifi fibaghile ukututula ukuti tubombeghe ifindu mwamahala?
9 Tungakopagha indalama isi tukabaghila ukufwanisya ukughomola. (Belenga Isya Mbupingamu 22:3, 7.) Kubaghile ukuya kukafu fiyo ukuti tusame, kangi isi sibaghile ukutupangisya ukuti tukope indalama. Ukuti tuchepesyeko ingongole, tukulondiwa ukumanya ifindu ifyakulondiwa fiyo ifi tukulonda ukula komma ifi fikaya fyakulondiwa. Linga twaghene nindamyo, kubaghile ukuya kukafu ukumanya indalama isi tukulondiwa ukukopa, mwakifwanikisyo linga tukumpwelelela unkamu witu uyu abinile. Mfyakubombiwa bo ifi, tukumbukeghe ukuti “ulwiputo nulupyelesyo” fibaghile ukututula ukuti tubombe ifindu mwamahala. Yehova abaghile ukwamula inyiputo syitu mwakutupa ulutengano ulwamundumbula ulu lukuya “pakusyubatila indumbula syitu ninyinong’ono syitu”.—Filip. 4:6, 7; 1 Pet. 5:7.
10. Ngimba tubaghile ukuya bulebule nabamanyani abapya?
10 Tuyeghe nabamanyani abanunu. Tubabuleghe abamanyani bitu muno tukwipilikila kangi nindamyo isi tukwaghana nasyo, fiyofiyo aba bali nulusekelo kangi bope bikwaghana nindamyo bo syitu. Ukubomba isi kubaghile ukututula ukuti tungatamiwagha naminong’ono. (Ndumbi. 4:9, 10) Abamanyani aba mwalinabo pakabalilo aka mwabombagha ububombeli bikuya pakukindilila ukuya bamanyani binu. Yonongwa yake, linga mwandile ububombeli ubupya, mukulondiwa ukuya nabamanyani abangi. Tukumbukeghe ukuti linga tukulonda ukuya nabamanyani, tukulondiwa ukuya bakisa. Ngimba tubaghile ukuya bulebule nabamanyani abapya? Tukulondiwa ukubabula abangi ifindu ifinunu ifi twaghene nafyo pakabalilo aka twambombelagha Yehova, isi sibaghile ukubapangisya ukuti bakete ulusekelo ulu tuli nalo. Nalinga ukuti yumo nkipanga atikumanya muno tukwipilikila panongwa ya bubombeli bwitu ubwa kabalilo kosa, loli bamo babaghile ukuhoboka nikifwanikisyo kitu kangi tubaghile ukuya nabo pabumanyani ubununu. Tutikulondiwa ukuyoba nyingi isyakufwana na uswe pamo ifindu ifi tubombile pakabalilo aka twambombelagha Yehova kangi nifindu ifibibi ifi twaghene nafyo.
11. Ngimba tubaghile ukubomba isyafiki ukuti imbumba yitu yikindilile ukuya nulusekelo?
11 Linga tulekile ububombeli panongwa yakuti umwinitu wambweghi abinile, tungankalalilagha. Kangi linga yoswe tukubina, tungayagha nikitima, mwakwinong’ona ukuti tukuya pakumbika umwinitu mundamyo. Tukumbukeghe ukuti, pakabalilo aka “tweghanagha” twafingile kwa Yehova ukuti tukuya pakukindilila ukupwelelelana nalinga po pakabalilo ka ndamyo. (Mat. 19:5, 6) Linga mulekile ububombeli panongwa yakuti mupapile umwana uyu mukaghulilagha, umwaninu ikulondiwa ukumanya ukuti wakulondiwa fiyo ukukinda ububombeli ubu mwabombagha. Akabalilo kosa mumbuleghe ukuti mukunketa ukuya “kyabupe” ikyakufuma kwa Kyala. (Sal. 127:3-5) Kangi mukulondiwa ukumbula isi mwaghanagha nasyo pakabalilo aka mwambombelagha Yehova. Mwakubomba isi mubaghile ukunkasya umwaninu ukuti aye naminong’ono ghakumbombela Yehova ukufwana itolo namuno umwe mwabombelagha kunyuma.
MUNO ABANGI BABAGHILE UKUBATULILA
12. (a) Ngimba tubaghile ukubatula bulebule bosa aba bali mububombeli ubwa kabalilo kosa ukuti bakindilile nububombeli bwabo ubupya? (b) Ngimba tubaghile ukubatula bulebule ukuti bisibile nububombeli bwabo ubupya?
12 Abakamu na balumbu bingi, bikubomba syosa isi babaghile ukufwanisya mwakubatula bosa aba bali mububombeli ubwa kabalilo kosa ukuti bakindilile ukumbombela Yehova. Bikubomba isi mwakubakasya ukuti bakindilile nimbombo yabo, mwakubapa indalama pamo ifindu ifingi ifyakuti fibatule pabumi bwabo, kangi ukubatula ukuti babapweleleleghe aba mumbumba syabo. (Gal. 6:2) Linga aba bali mububombeli bwa kabalilo kosa baghomokile ku fipanga fyabo, tunginong’onagha ukuti babombile ifindu fimo ifibibi. * M’malo mwake tukulondiwa ukubatula ukuti bakindilileghe ukumbombela Yehova. Tubambilileghe kangi tubandaghisyeghe pambombo iyi babombile, nalinga ukuti ifindu fikaya kanunu pabumi bwabo. Tubamanyeghe kanunu. Tumanyilengeko ukufuma kumyabo ukufwana na isi babombile, amaluso ghabo kangi na ifi baghene nafyo pabumi bwabo.
13. Ngimba butuli buliku ubu tubaghile ukubapa bosa aba bandile ububombeli ubupya?
13 Mwakongelelapo, bosa aba bandile ububombeli ubupya bikulondiwa ubutuli bwinu ukuti bayaghe inyumba, indalama iyakwendela, imbombo kangi nifindu ifingi ifyakulondiwa pabumi bwabo. Tukulondiwa kangi ukuti tubalinganie kanunu muno ifindu fiyilile, bo imisonkho, namuno babaghile ukusyaghila indalama isya inshulansi. Loli ikindu ikyakulondiwa fiyo ko kubapilikisya kanunu ukufwana nindamyo isi baghene nasyo. Babaghile ukutamiwa ukuti bamalane nindamyo isi baghene nasyo kangi ni sya bakamu babo. Abene babaghile ukuya nikitima panongwa ya nifwa ya mwinabo uwambweghi. * Kangi babaghile ukuya nikitima panongwa yakubasoba abakamu na balumbu kuno babombagha ububombeli. Fibaghile ukwegha akabalilo akatali ukumalana nindamyo ya minong’ono bo iyi.
14. Ngimba abakamu na balumbu balintulile bulebule umulumbu yumo ukuti isibile nububombeli ubupya?
14 Ubutuli nikifwanikisyo ikinunu iki tukunangisya, fibaghile ukubatula ukuti bisibile nububombeli ubupya. Umulumbu uyu alimbombile Yehova nkisu kimo kwa fyinja fingi atile, “Mububombeli bwangu ubwakwanda, namanyilagha na bamanyili ba Baibolo ilisiku lililyosa. Loli mububombeli bwangu ubupya, kwali kukafu ukuti nighule Ibaibolo nukunangisya ividiyo mubufumusi. Loli abakamu na balumbu bansumagha ukuti mbukeghe nabo kumabulendo aghakughomokelako. Linga nguketa muno abakamu na balumbu biyipilagha pakumanyila Ibaibolo na bamanyili, syandulagha ukuti nipilikeghe kanunu. Namanyile ukwanda ukuyobesania na bandu nkighaba kitu. Syosa isi syalindulile ukuti niye kangi nulusekelo.”
TUKINDILILEGHE UKUBOMBA SYOSA ISI TUBAGHILE UKUFWANISYA
Tulondeghe injila isi tubaghile ukukusyila ububombeli bwitu (Keta amapalagilafu 15-16) *
15. Ngimba mubaghile ukukindilila bulebule ukuhoboka nububombeli ubupya?
15 Tubaghile ukukindilila ukuhoboka nububombeli ubupya. Tunginong’onagha ukuti linga ububombeli buchenjile kokuti tukabombagha kanunu kunyuma. Loli tukulondiwa ukusubila ubutuli bwa Yehova nukukindilila ukufumusya amasyu ghake. Tukongeghe ikifwanikisyo ikya Bakristu abasubiliwa aba kunyuma. Kulikosa kuno babukagha, abene “bafumusyagha amasyu gha Kyala.” (Imbo. 8:1, 4) Ukwiyipa kwinu mwakukindilila ukufumusya amasyu gha Kyala kubaghile ukuya nifyakukongapo ifinunu fiyo. Mwakifwanikisyo, abapayiniya aba babakaghile ukufuma nkisu iki bikalagha babukile nkisu ikingi iki bapalamene nakyo kuno kope kwalondiwagha ubutuli. Bo imyesi ghikindilepo, abandu bingi balyandile ukumanyila ubwanaloli.
16. Ngimba tubaghile ukulwagha bulebule ulusekelo linga twandile ububombeli ubupya?
16 “Ubwikyele ubu ikubapa Yehova gho maka ghinu.” (Nehe. 8:10, amasyu ghapasi NWT.) Tukuya nulusekelo ulunywamu fiyo linga tuli pabumanyani ubununu na Yehova komma panongwa ya bubombeli ubu tukubomba. Yonongwa yake, tukulondiwa ukuseghelela fiyo kwa Yehova nukukindilila ukunsubila umwene. Tukumbukeghe ukuti twabughanile fiyo ububombeli ubu twabombagha kunyuma panongwa yakuti twiyipagha ukubatula abandu. Tukulondiwa ukwiyipa nindumbula yosa mububombeli ubu tukubomba lino nukuketa muno Yehova ikuya pakututulila.—Ndumbi. 7:10.
17. Ngimba tukulondiwa ukukumbukila isyafiki isya bubombeli ubu tukubomba lino?
17 Tukumbukeghe ukuti ukumbombela Yehova kwa bwila na bwila, loli ububombeli ubu tukubomba lino bwa kabalilo kapimba. Nkisu ikipya, twesa ububombeli bwitu bwisa kuchenja. Aleksey, uyu tunjobile pabwandilo atile, ukuchenja kwa bubombeli bwake kukuntula ukuti itendekesye ngani ukuchenja uku kukwisa kubombiwa nkyeni. Umwene atile, “Akabalilo kosa ngusubila ukuti Yehova ikuya pakufwanisya isi afingile nkisu ikipya, loli utubalilo tumo isi sikuboneka ukuti sikukabila ukufwanisiwa. Lino nguketa ukuti Yehova alipipi ukufwanisya syosa isi afingile.” (Imbo. 2:25) Kisita kwinong’onela isya bubombeli bwitu, isagha twesa tukindilileghe ukuseghelela fiyo kwa Yehova. Umwene atikuya pakutuleka, loli ikuya pakututula ukuti tulwaghe ulusekelo mwakubomba syosa isi tubaghile ukufwanisya pa bubombeli bwitu.—Yes. 41:13.
ULWIMBO 90 Tikhwimiskane Yumoza na Munyake
^ ipal.5 Utubalilo tumo, abakamu na balumbu aba bali mububombeli ubwa kabalilo kosa bikuleka ukukindilila ukumbombela Yehova, lumo abene babaghile ukwambilila ububombeli ubupya. Inkhani iyi yikulingania indamyo simo isi bikwaghana nasyo kangi isi sibaghile ukubatula ukuti bakindilile ukuhoboka mwakumbombela Yehova. Yikulingania kangi isi abangi babaghile ukubomba ukuti babakasye nukubatula bosa aba ifindu fichenjile kangi namuno Ibaibolo libaghile ukututulila twesa linga ifindu fichenjile.
^ ipal.4 Mwakufwana itolo, linga abakamu bamabudindo bakangele, abene bikubalekela amabudindo abakamu abakilumyana. Keta umutu uwakuti “Ŵakhristu Ŵachekuru—Yehova Wakumuzirwiskani Chifukwa Muli Ŵakugomezgeka,” mu Gongwe la Mulinda la Seputembala 2018, kangi uwakuti “Lutilirani Kuŵa na Mtende wa mu Mtima Nanga Vinthu Vingasintha,” mu Gongwe la Mulinda la Okutobala 2018.
^ ipal.12 Abakulumba ba kipanga kuno unkamu pamo umulumbu babunganagha, bikulondiwa ukulemba kalata mwanakalinga iyakubamanyisya abakulumba ba kuno ikubuka, ukuti akakindilile ukuya mpayiniya, nkulumba pamo ntuli wakipanga.
^ ipal.13 Keta umutu uwakuti “Wovwiri ku Awo Ŵali na Chitima,” mu Wukani! ya 2018 Na. 3.
^ ipal.57 ISI IKITHUZI KIKULINGANIA: Unkamu numulumbu aba babombagha ubumishonale nkisu kimo bikubalagha abakamu na balumbu.
^ ipal.59 ISI IKITHUZI KIKULINGANIA: Bo bafikile nkisu kyabo, abene bali pakwiputa kwa Yehova ukuti abatule ukumalana nindamyo isi baghene nasyo.
^ ipal.61 ISI IKITHUZI KIKULINGANIA: Nubutuli bwa Yehova, imbumba iyi yandile kangi ububombeli ubwa kabalilo kosa. Abene bikubombela injobelo iyi bamanyile pakabalilo aka babombagha ubumishonale pakufumusya amasyu amanunu nkighaba kyabo kubandu aba bafumile nkisu ikingi.
