NGIMBA bulipo ububombeli ubu mukulonda ukubomba nkipanga loli mukabaghila ukufwanisya ukubomba lino? Lumo mukulonda ukuya nubudindo bumo ubu unkamu yumo alinabo. Lumo bubombeli, pamo lusako lwa findu fimo ifi mwabombagha kunyuma. Loli ubukangale, ububine, ukusoba kwa ndalama, pamo ukuya nubudindo ubwa kupwelelela imbumba fikubapangisya ukuti mutoliweghe ukubomba nyingi. Lumo panongwa yakuchenja kwa findu mugulu, mulekile ukubomba ububombeli ubu mwabombagha kunyuma. Panongwa ya isi, mubaghile ukwipilika ukuti mukutoliwa ukufwanisya ukubomba nyingi mububombeli bwa Kyala. Mfyakubombiwa bo ifi, utubalilo tumo fibaghile ukubawisya amaka. Nalinga ukuti mosiyilile, ngimba findu fiki ifi fibaghile ukubatula ukuti mungawagha amaka kangi mungakalalagha? Ngimba mubaghile ukukindilila bulebule ukuya nulusekelo?

Tubaghile ukumanyilako ifindu fimo ifyakulondiwa fiyo ukufuma kwa Yohani Umosi, muno tubaghile ukukindilila ukuya nulusekelo. Yohani akasimenye isi syayagha pakubombiwa pabumi bwake, loli umwene akindilile ukunsubila fiyo Yehova mwakumbombela nindumbula yake yosa. Umwene akasimenye ukuti ayagha pakupinyiwa mu jele kwa kabalilo katali. Loli, Yohani akindilile ukuya nulusekelo kangi naminong’ono amanunu pabumi bwake bosa. Ngimba findu fiki ifi fyalintulile? Kangi ngimba tubaghile ukukindilila bulebule ukuya nulusekelo nalinga ukuti tukwaghana nindamyo?

Mfyinja fya m’ma 29 C.E., Yohani alyandile ububombeli bwake ubu Yehova alimpele, ubwa kubamanyisya abandu isya kwisa kwa Mesiya, umwene afumusyagha ukuti: “Amupindukeghe, buno Ubunyafyale bwa kumwanya buseghelile.” (Mat. 3:2; Luka 1:12-17) Abandu bingi bapindwike. Kangi ikilundilo kya bandu kyalisile ukufuma kubutali ukuti kipilikisye amasyu amanunu, ukufuma apo abandu bingi bapindwike nukosiwa. Yohani abasokile kangi abakulumba ba matchalichi ukuti bisakulongiwagha panongwa ya mbibi isi babombagha. (Mat. 3:5-12) Umwene abombile ikindu ikyakulondiwa fiyo mbufumusi bwake nkabalilo ka m’ma 29 C.E. bo Yesu osiwe. Ukufuma apo, Yohani abakasisye abangi ukuti bankongeghe Yesu, Mesiya uyu Kyala afingile ukuti isakwisagha.—Yoh. 1:32-37.

Yesu aketile ukuti Yohani abombile imbombo iyakulondiwa fiyo, yonongwa yake atile: “Muli aba bapapiwe mbakikulu, akabonekamo nayumo unkulumba  ukunkinda Yohani Umosi.” (Mat. 11:11) Kisita kukayika tubaghile ukuketa ukuti Yohani asayiwe fiyo. Mwakufwana itolo na Yohani, abandu bingi amasiku agha bikwambilila ulusayo ulwakufuma kwa Kyala. Mwakifwanikisyo unkamu Terry. Umwene nunkasi wake Sandra, babombile ububombeli bwa kabalilo kosa kwa fyinja 50. Terry atile: “Nali nulusako fiyo. Nabombagha ubupayiniya bwakabalilo kosa, pa Beteli, ubupayiniya bwapadela, ukwendela idela, ukuketesya ikighaba, kangi lino ngukindilila nubupayiniya bwapadela.” Sikuya syakuhobosya fiyo linga twambilile ububombeli ukufuma kwa Yehova, loli ukuti tukindilile ukuya balusekelo tukulondiwa ukwiyipa linga ifindu fichenjile pabumi bwitu.

Yohani Umosi akindilile ukuya walusekelo panongwa yakuti andaghisyagha ulusako ulu alinalo. Inong’onela ikifwanikisyo iki. Bo Yesu osiwe, abandu aba bankongagha Yohani balyandile ukuya banandi loli aba bankongagha Yesu balyandile ukuya bingi. Isi syapangisye ukuti abafundiwa aba bankongagha Yohani bande ukupasya, abene batile: “Keta yope ikosya, abandu bosa bikunkulukila.” (Yoh. 3:26) Yohani alinkwamula alinkuti: “Uyu ali nunkikulu uyu ikweghiwa yo mweghankikulu. Loli ummanyani wa mweghankikulu, uyu ikwima nukumpilikisya, yo ikulisekelela fiyo ilisyu lya mweghankikulu. Popapo lelo ulusekelo lwangu ulu lufikilepo.” (Yoh. 3:29) Yohani akalimbanagha na Yesu, kangi umwene akalinong’winepo ukuti imbombo iyi abombagha yali yapasi panongwa yakuti imbombo ya Yesu yali yakulondiwa fiyo. M’malo mwake Yohani akindilile ukuya walusekelo panongwa yakuti aketagha ukuti ukuya “mmanyani wa mweghankikulu” kwakulondiwa fiyo.

Akayilo ka Yohani kalintulile ukuti akindilile ukuya walusekelo nalinga ukuti ububombeli bwake bwali bwakutamia. Mwakifwanikisyo, Yohani ali Nnaziri, kangi umwene akitikisiwagha ukunwa ubwalwa. (Luka 1:15) Pakuyoba isya bumi bwa Yohani, Yesu atile, “Yohani alisile alinkusita ukulya nukunwa.” Munjila iyingi, Yesu na bafundiwa bake bakabombagha ifindu mwakufwana na ba Naziri loli abene babombagha ifindu bo muno abandu abangi babombelagha. (Mat. 11:18, 19) Kangi bo Yohani aketile ukuti akabombapo ikika nakimo, umwene amenye ukuti abafundiwa ba Yesu, ukongelapo bosa aba bankongagha umwene, bapeliwe amaka gha kubomba ifika. (Mat. 10:1; Yoh. 10:41) M’malo mwakuti inong’oneleghe fiyo ukukindana pakati pa bandu aba bankongagha umwene na bandu aba bankongagha Yesu, umwene akindilile ukwiyipa pabubombeli ubu apeliwe na Yehova.

Linga nanuswe tukukindilila ukwiyipa pakumbombela Yehova tukuya pakukindilila ukuya balusekelo. Terry, uyu tunjobile pabwandilo atile, “Niyipagha fiyo pabubombeli bulibosa ubu napeliwagha. Kangi atile, linga ngukumbukila akabalilo aka nabombagha ububombeli ubwa kabalilo kosa, ndikwiyipa inongwa loli ngukumbukila ifindu ifinunu fyene ifi nabombagha kunyuma.”

Tubaghile ukuya balusekelo linga tukwinong’onela isi sikupangisya ububombeli bulibosa pamo ubudindo ukuya bwakulondiwa fiyo mugulu lya Yehova. Tuli nulusako fiyo ukuya “Babombanisi pambombo ya Kyala.” (1 Kor. 3:9) Ikindu ikyakulondiwa fiyo kibaghile ukukindilila ukuya kinunu linga tukukipwelelela akabalilo kosa, mwakufwana itolo tukuya pakukindilila ukuya balusekelo linga tukukindilila ukwinong’onela ulusako ulu tuli nalo ulwakumbombela Yehova. Tutikuya pakwifwanikisya ukwiyipa kwitu nukwiyipa kwa bangi. Kangi tutikuya pakwinong’ona ukuti ububombeli ubu Yehova atupele bwa pasi fiyo ukukinda ububombeli ubu abapele abangi .—Gal. 6:4.

Yohani abaghile ukuti asimenye ukuti ububombeli bwake bukayagha pakukindilila kwa kabalilo katali, loli umwene akalinong’onilepo muno bwayagha pakumalikila. (Yoh. 3:30) Mu 30 C.E., bo imyesi 6 yikindilepo ukufuma apa Yesu alyosiwe, Yohani apinyiwe mu jele Numwalafyale Herodi. Loli umwene akindilile ukufumusya. (Marko 6:17-20) Ngimba findu fiki ifi fyalintulile ukuti akindilile ukuya nulusekelo nalinga ukuti ifindu fyachenjile pabumi bwake? Umwene akindilile ukubomba ifindu ifyamwambepo.

Bo Yohani ali mu jele, apilike imbombo sya Kristu. (Mat. 11:2; Luka 7:18) Umwene ali nubuketi bosa ukuti Yesu ali yo Mesiya loli abaghile ukuti aswighagha muno Yesu ayagha pakufwanisyila syosa isi amalemba ghikuyoba isi Mesiya ayagha pakufwanisya. Panongwa yakuti Mesiya ayagha pakwambilila ubunyafyale, ngimba ko kuti ubulaghili bwake bwayagha pakwanda mwalululu? Ngimba syaghaya pakupangisya ukuti Yohani asoke mu jele? Yohani alondagha ukumanya nyingi isi Yesu ayagha pakubomba,  umwene abatumile abafundiwa babili ukuti bakandalusye Yesu ukuti: “Kali we uwe we batighi ikwisagha, pamo tungulileghe uyungi?” (Luka 7:19) Bo abafundiwa baghomwikeko, Yohani abaghile ukuti apilikisye nyingi bo bikulingania ukuti Yesu abombile nyingi fiyo bo ukubabumbulusya abandu kangi abatumile abafundiwa bala ukuti bakambule Yohani syosa isi basibwene ukuti: “Abafwamaso bikuketa, aba bikukwema bikwenda, aba mbungo yabukoma bikwelusiwa, abamapuli bikupilika, abafwe bikusyuka, nabalondo bikupilika ukulumbilila kwa masyu amanunu.”—Luka 7:20-22.

Isi abamanyili bake balimbule syalinkasisye fiyo. Syanangisye ukufwanisiwa kwa busololi bwa Mesiya. Nalinga ukuti Yesu akalimwabwile Yohani mu jele, loli Yohani asimenye ukuti ububombeli bwake bwali bwakulondiwa fiyo. Nalinga ukuti aghanagha nindamyo, loli umwene akindilile ukuya walusekelo.

Mwakufwana itolo na Yohani, linga nanuswe tukukindilila ukubomba ifindu ifyamwambepo, tubaghile ukufwanisya ukwifimbilisya mwalusekelo kangi na mbololo. (Kolos. 1:9-11) Tubaghile ukubomba isi mwakubelenga Ibaibolo nukwinong’onelapo pa isi tukubelenga, isi sibaghile ukututula ukumanya ukuti imbombo yiliyosa iyi tukubomba mugulu lya Yehova yakulondiwa. (1 Kor. 15:58) Sandra atile: “Ukubelenga ichaputala ilya mu Baibolo ilisiku lililyosa syalindulile fiyo ukuti nseghelele kwa Yehova. Sikundula kangi ukuti ninong’oneleghe isyake m’malo mwakwinong’onela isyangu.” Ukwinong’onela fiyo imbombo iyi abakamu na balumbu bikubomba mugulu lya Yehova sibaghile ukututula ukuti tuleke ukwinong’onela si syitu syene m’malo mwake, tubaghile ukwanda ukwinong’onela isi Yehova ikufwanisya mugulu lyake. Sandra atile, “Amapulogilamu gha pa mwesi agha pa JW Broadcasting ghikututula ukuti tukolelaneghe fiyo nigulu lya Yehova, kangi ghikututula ukuti tukindilileghe ukuya balusekelo mububombeli bwitu.”

Pakabalilo akapimba aka Yohani Umosi afumusyagha, umwene afumusyagha “mumbepo na mmaka gha Eliya,” kangi ukufwana itolo na Eliya yope “ali mundu itolo bo yuyuswe.” (Luka 1:17; Yak. 5:17) Linga tukukonga ikifwanikisyo kyake ikyakundaghisya nukukindilila ukubomba ifindu ifyamwambepo, nanuswe tubaghile ukukindilila ukuya balusekelo pakumbombela Yehova, nalinga ukuti tukwaghana nindamyo pabumi bwitu.