1. Nongwa yafiki Yehova apelile ifindu?

KALIPO akabalilo aka Yehova ali mwene. Loli isi sikampangisyagha ukuti asulumanieghe. Umwene atikulondiwa umundu yumo ukuti anhobosyeghe. Loli Kyala alondagha ukuti abangi bahobokeghe nu bumi. Panongwa ya lughano, Yehova alyandile ukupela ifindu.—Sal. 36:9; 1 Yoh. 4:19.

2. Ngimba Yesu na bandumi balipilike bulebule bo Yehova ikupela ifindu?

² Ikyakwanda, Yehova alimpelile Umwanake, Yesu. Ukufuma apo, Yehova apelile ‘ifindu fyosa’ ukwendela mu Mwanake, ukongelelapo abandumi. (Kolos. 1:16) Yesu ahobokagha fiyo ukubombela pampene na Tata wake. (Mbu. 8:30) Kangi bope abandumi bahobokagha fiyo. Abene baketagha bo Yehova nu Mwanake bikupela kumwanya nikisu kyapasi. Ngimba abandumi babombile isyafiki? Abene balimpalile Kyala bo ikisu kipeliwe kangi bakindilile ukumpala bo bikuketa ifindu fyosa ifi apelile, fiyofiyo abandu. (Jobu 38:7; Mbu. 8:31) Ifipeliwa fyosa ifi fikunangisya amahala nulughano lwa Yehova.—Sal. 104:24; Rom. 1:20.

3. Ukufwana na 1 Bakorinti 15:21, 22, ngimba ikemo lya Yesu likututula bulebule?

³ Yehova alondagha ukuti abandu bikaleghe kwa bwila na bwila pa kisu ikinunu iki apelile. Loli bo Adamu na Eva balekile ukumpilikila Yehova bataghile ulusako ulwakwikala nu bumi bwa bwila na bwila pa kisu. Abene na banabo balyandile ukufwa. (Rom. 5:12) Ngimba Yehova abombile isyafiki? Mwanakalinga umwene ayobile muno ikuya pakubapokela abandu. (Bwa. 3:15) Umwene abikile Umwanake Yesu  ukuya ikemo ukuti abana ba Adamu na Eva babuliwe ku butulanongwa nu bufwe. Ukufuma apo, alimpele umundu aliwesa ubwabuke ubwakusala ukumbombela ukuti asabwaghe ubumi bwa bwila na bwila.—Yoh. 3:16; Rom. 6:23; belenga 1 Bakorinti 15:21, 22.

4. Ngimba malalusyo ghaliku agha tukuya pakuyobesania mu nkhani iyi?

⁴ Ghalipo amalalusyo mingi agha tubaghile ukulalusya aghakufwana na isi Kyala ifingile pankhani yakusyusya abandu aba bafwile. Mwakifwanikisyo, ngimba ukusyuka kukwisa pakubombiwa bulebule? Ngimba tukwisa pakubamanya abakamu bitu linga basyukile? Ngimba mo munjila siliku muno inkhani yakusyuka yisakuya yakuhobosya? Kangi ngimba inkhani yakusyuka yikutumanyisya isyafiki isyakufwana nubololo, amahala nulughano lwa Yehova? Isagha tuyobesanie amalalusyo agha.

5. Nongwa yafiki tubaghile ukuyoba ukuti abandu bosa batisakusyuka pakabalilo kamokene?

⁵ Ukwendela mu Mwanake, Yehova ikwisa kubasyusya abandu bingi loli lumo bakaya bosa aba bisakusyuka pakabalilo kamokene. Nongwa yafiki? Panongwa yakuti linga abandu basyukile pakabalilo kamokene, ifindu fikabaghila ukwenda kanunu. Kangi Yehova atikubomba ifindu kisita kuya nimbatiko. Umwene asimenye ukuti abandu bikulondiwa ukuya bakukolelana ukuti bikale mwalutengano. (1 Kor. 14:33) Yehova anangisye amahala nu bololo bo ikubomba pampene na Yesu pakabalilo aka bapelagha ikisu kyakuti abandu basikaleghe. Nkyeni Yesu isakunangisyagha utuyilo utu mu bulaghili bwa fyinja 1,000 linga ikwisakubomba pampene na aba bisakupona pa Armagedoni bo bikutendekesya  ifindu nkisu ukuti basabambilileghe aba bisakusyuka.

6. Ukufwana na Imbombo Sya Batumiwa 24:15, ngimba bo banani aba Yehova isakubasyusya?

⁶ Ikindu kyakulondiwa fiyo kyo kyakuti aba bisakupona pa Armagedoni bisakubatula abandu aba bisakusyuka ukuti bamanyile isyakufwana nu Bunyafyale bwa Kyala na isi Yehova ikulonda. Nongwa yafiki? Panongwa yakuti bingi aba bisakusyuka bisakuya bamo mwa bandu ‘abasitabugholofu.’ (Belenga Imbombo Sya Batumiwa 24:15.) Abene bisakulondiwa ukuchenja utuyilo twabo ukuti basasayiwe nikemo lya Yesu nukuti basakabe ubumi bwa bwila na bwila. Inong’onela isya mbombo inywamu iyi tukwisakuya nayo iyakubamanyisya abandu bingi isya bwanaloli ubwakuyoba isya Yehova. Ngimba umundu aliwesa isakumanyilagha mwakufwana itolo namuno tukumanyilila nabandu Ibaibolo amasiku agha? Ngimba abene bisakubunganagha nifipanga nukumanyisiwa ukuti basabamanyisyeghe aba bisakusyuka? Tukulondiwa ukughulila ukuti tusakete. Loli tusimenye ukuti pabumalilo bwa fyinja 1,000 ifya bulaghili bwa Kristu, ‘ikisu kisakwisulagha nubumanyi bwa Yehova.’ (Yes. 11:9) Twisakuya nimbombo iyakuhobosya fiyo mfyinja 1,000!

7. Nongwa yafiki ababombi ba Kyala bisakulondiwa ukuya bakisa linga bisakubamanyisyagha aba bisakusyuka?

⁷ Nkabalilo ka fyinja 1,000 ifya bulaghili bwa Kristu, ababombi bosa ba Yehova bisakulondiwa ukukindilila ukuchenja utuyilo twabo ukuti banhobosyeghe umwene. Yonongwa yake bosa bisakulondiwa ukuya bakisa ukuti basabatule aba bisakusyuka ukuchenja utuyilo twabo nukukonga ifundo sya Yehova. (1 Pet. 3:8) Kisita kukayika, aba bisakusyuka bisakukolelanagha nababombi ba Yehova abakwiyisya kangi bope ‘bisakwiyulagha ukubukaba ubupoki bwabo.’—Filip. 2:12.

8. Nongwa yafiki tuli nififukwa ifinunu ifyakuti twisakubamanya aba mumbumba na bamanyani bitu aba bisakusyuka?

⁸ Filipo ififukwa fingi ifi tubaghile ukuyobela ukuti abandu aba bali nubumi bisakufwanisya ukubamanya abakamu babo aba bisakusyuka. Mwakifwanikisyo, ukufwana namuno Yehova abasyusyilagha abandu nkabalilo kakunyuma, sikuboneka ukuti Yehova ikuya pakupela kangi abandu ukuti babonekeghe, bayobeghe nukwinong’ona ukufwana namuno babombelagha bo bakali ukufwa. Kumbukila ukuti Yesu afwanikisye ubufwe nutulo kangi ukusyuka nukundembusya umundu uyu ali ntulo. (Mat. 9:18, 24; Yoh. 11:11-13) Linga umundu bandembwisye ukufuma ntulo, ikuketa nukupilika mwakufwana itolo kangi ikukumbukila ifindu ifyakufwana itolo bo akalambalala. Inong’onela ikifwanikisyo kya Lazaro. Umwene aghonile amasiku 4 mwipumba, yonongwa yake umbili wake walyandile ukubola. Loli bo Yesu ansyusisye, mwanakalinga abalumbu bake balimmenye kangi Lazaro yope abakumbukile.—Yoh. 11:38-44; 12:1, 2.

9. Nongwa yafiki aba bisakusyuka, batisakusyuka naminong’ono ni mibili yabugholofu?

⁹ Yehova afingile ukuti mu Paladaiso, atisakuyapo yumo umundu uyu isakuyoba ukuti: “Ndi mbine.” (Yes. 33:24; Rom. 6:7) Yonongwa yake aba bisakusyuka bisakuya nimibili yamaka. Loli batisakuya bagholofu mwanakalinga. Linga syali bo ulu, aba mumbumba na bamanyani babo bakabaghila pakubamanya. Sikuboneka ukuti abandu bosa bisakuyagha bagholofu nkabalilo ka fyinja 1,000 ifya bulaghili bwa Kristu. Pabumalilo bwa fyinja 1,000, Yesu isakughomokesya Ubunyafyale kwa Tata wake. Pakabalilo ako, Ubunyafyale bwa Kyala bwisakuya ukuti bubombile kilikyosa iki  Yehova alondagha, ukongelelapo ubugholofu bwa bandu.—1 Kor. 15:24-28; Ubuset. 20:1-3.

10. Ngimba ukusyuka kwisakubapangisya ukuti musipilike bulebule?

¹⁰ Inong’onela muno sisakuyila apa mukwisa kwaghana kangi na bakamu binu. Ngimba ulusekelo lwinu lwisakubapangisya ukuti musasekelele pamo ukulila? Ngimba mwisakuhoboka fiyo nukwanda ukwimba inyimbo isyakumpala Yehova? Tuli nulusubilo losa ukuti twisakuya nulughano ulwakufumila pasi pandumbula kwa Tata witu nu Mwanake unganiwa aba bisakupangisya ukuti abafwe basyuke.

11. Ukufwana na masyu gha Yesu agha ghali pa Yohani 5:28, 29, findu fiki fisakubombiwa ku bandu aba bikumpilikila Kyala?

¹¹ Inong’onela isya lusekelo ulu aba bisakusyuka bikwisakuya nalo bo bikuchenja utuyilo twabo ukuti bampilikileghe Kyala. Aba bisakuchenja utuyilo twabo bisakwikala nu bumi bwa bwila na bwila mu Paladaiso. Loli Yehova atisakubitikisya aba batikuchenja utuyilo twabo ukukindilila ukuya mu Paladaiso.—Yes. 65:20; belenga Yohani 5:28, 29.

12. Ngimba mo munjila yiliku iyi abandu bisakusaghiwagha na Yehova?

¹² Mu Bunyafyale bwa Kyala, ababombi bake bikuya pakuketa ukuti isi sili pa Isya Mbupingamu 10:22 syabwanaloli, apa pikuti: ‘Ulusayo lwa Yehova lukutwala ubukabi kangi lutikwisa palikimo nubusulumanie.’ Nubutuli bwa mbepo mwikemo ababombi ba Yehova bikuya pakukula mwambepo nukuya bagholofu. (Yoh. 13:15-17; Ef. 4:23, 24) Isiku lililyosa imibili yabo yisakuyagha yamaka kangi bisakuyagha nu bumi ubununu. Ubu bwisakuya bumi bwakuhobosya fiyo. (Jobu 33:25) Ngimba ukwinong’onela inkhani yakusyuka kubaghile ukututula bulebule lino?

13. Ukufwana na Salimo 139:1-4, ngimba inkhani yakusyuka yikunangisya bulebule ukuti Yehova atumenye kanunu?

¹³ Ukufwana namuno tumanyilile pabwandilo, pakabalilo aka Yehova isakusyusyagha abandu, umwene isakubatula ukuti bakumbukileghe ifindu ifi babombagha bo bakali ukufwa. Inong’onela isi ifundo iyi yikusanusya. Yehova atughanile fiyo yonongwa yake ikumanya nu kukumbukila isi tukwinong’ona, muno tukwipilikila, isi tukuyoba na isi tukubomba. Linga tusyukile umwene isakututula ukukumbukila ifindu ifi twabombagha bo tukali ukufwa. Mwalyafyale Davidi asimenye ukuti Yehova ikum’manya umundu aliwesa pamwene. (Belenga Salimo 139:1-4.) Ngimba tukwipilika bulebule ukumanya ukuti Yehova atumenye kanunu?

14. Ngimba tukulondiwa ukwipilika bulebule linga tukwinong’onela muno Yehova atumanyile?

¹⁴ Linga tukwinong’onela muno Yehova atumanyile, tutikuya pakupasya. Nongwa yafiki? Tukumbukileghe ukuti Yehova ikutupasikisya. Ikunketa umundu aliwesa ukuya wakulondiwa. Umwene ikumanya indamyo syosa isi tukwaghana nasyo pabumi bwitu. Isi syakukasya fiyo. Tutikulondiwa ukwipilika ukuti tuli twibene. Akabalilo kosa Yehova ikuya nanuswe kangi ikututula.—2 Syambu. 16:9.

15. Ngimba inkhani ya kusyuka yikunangisya bulebule ukuti Yehova wamahala?

¹⁵ Linga abandu bikutila ukufwa, abalughu babo babaghile ukubafimbilisya ukubomba ifindu ifi bakabaghila ukubomba mwakutila ukuti bikuya pakubaghogha. Abandu aba bikulongosiwa na Setano bikubombela injila iyi mwakubafimbilisya abandu ukuti bababombeleghe abinabo ifindu ifibibi. Loli abene bakabaghila ukutufimbilisya ukubomba isi.  Tusimenye ukuti linga abalughu batughoghile, Yehova ikwisa pakutusyusya. (Ubuset. 2:10) Tuli nulusubilo losa ukuti kikayapo nakimo iki kibaghile ukututolesya ukuya pabumanyani na Yehova. (Rom. 8:35-39) Yehova ikunangisya ukuti wamahala fiyo mwakutupa ulusubilo ulwakuti isakusyusya abandu aba bafwile. Panongwa ya isi, tutikutila linga aba bikunkonga Setano bikututilisya ukuti bikuya pakutughogha linga tutikubomba isi bikulonda. Kangi isi sikututula ukuti tuye bakifu nukukindilila ukuya basubiliwa kwa Yehova.

16. Ngimba tukulondiwa ukwilalusya amalalusyo ghaliku, kangi amaansala ghabaghile ukututula bulebule ukumanya ukuti tukunsubila Yehova?

¹⁶ Linga abalughu ba Yehova bikubatilisya ukuti bikuya pakubaghogha, ngimba mukuya pakunsubila Yehova ukuti ikwisa pakubasyusya? Ngimba mubaghile ukumanya bulebule? Injila yimo yo yakwilalusya ukuti, ‘Ngimba ifyakusala fyangu fikunangisya ukuti isiku lililyosa ngunsubila Yehova?’ (Luka 16:10) Ilalusyo ilingi lyo lyakuti, ‘Ngimba muno ngubombela akabalilo nindalama syangu sikunangisya ukuti ngusubila isi Yehova afingile ukuti ikuya pakundula linga ngubika ifindu fya Bunyafyale pamalo ghakwanda?’ (Mat. 6:31-33) Linga ansala wamalalusyo agha yo wakuti ena, sikuya pakunangisya ukuti tukunsubila Yehova kangi tukuya pakwitendekesya linga twaghene nindamyo.—Mbu. 3:5, 6.

17. (a) Ngimba inkhani yakusyuka yikunangisya bulebule ukuti Yehova mololo? (b) Ngimba tubaghile ukunangisya bulebule ukuti tukundaghisya ubololo bwa Yehova?

¹⁷ Yehova mwene yo ikumanya akabalilo aka isakubapyuta abandu ababibi. (Mat. 24:36) Umwene atisakuya mololo nukuleka ukubombapo simo pakabalilo kake. Umwene ikulonda ukubasyusya abandu aba bafwile loli ikunangisya ubololo. (Jobu 14:14, 15) Ikughulila akabalilo akanunu akakuti asabasyusye. (Yoh. 5:28) Tuli nififukwa ifinunu ifyakundaghisyila ubololo bwa Yehova. Inong’onela isi: Panongwa yakuti Yehova mololo, abandu bingi ukongelelapo uswe, tukuya nakabalilo akakuti ‘tulape imbibi syitu.’ (2 Pet. 3:9) Yehova ikulonda ukuti abandu baye nulusako ulwakwisa kubwagha ubumi bwa bwila na bwila. Yonongwa yake tukulondiwa ukunangisya ukuti tukundaghisya panongwa ya bololo bwake. Bulebule? Mwakubomba syosa isi tubaghile ukufwanisya ukuti tubaghe abandu aba ‘bimikiliwe ku bumi bwa bwila’ nukubatula ukuti banganeghe Yehova nukumbombela. (Imbo. 13:48) Ukufuma apo abene bisakusayiwagha  panongwa ya bololo bwa Yehova mwakufwana itolo nanuswe.

18. Nongwa yafiki tukulondiwa ukuya bololo ku bangi?

¹⁸ Yehova ikuya pakughulila mbololo mpaka ifyinja 1,000 ukuti tuye bagholofu. Ukufika pakabalilo ako Yehova isakutuhobokelagha ubutulanongwa bwitu. Yonongwa yake tukulondiwa ukukonga ikifwanikisyo kyake nukuketa utuyilo utununu mu bangi nukubanangisya ubololo. Inong’onela ikifwanikisyo ikya mulumbu yumo uyu undume wake alyandile ukutamiwa naminong’ono kangi alekile ukubungana. Umwene atile, “Kwali kukafu fiyo kumyangu. Ubumi bwitu bwachenjile mwanakalinga kangi tukafwanisye ukubomba ifi twalondagha.” Loli unkikulu walungano uyu akindilile ukuya mololo ku ndume wake. Umwene ansubilagha Yehova kangi akawile amaka. Mwakufwana itolo na Yehova, umwene inong’onelagha utuyilo utununu utu undume wake ali nato. Umwene atile, “Undume wangu ali nutuyilo utununu kangi umwene ikubomba isi abaghile ukufwanisya ukuti angatamiwagha naminong’ono. Tukulondiwa ukubanangisya ubololo aba mumbumba pamo abakamu na balumbu bitu aba bikughelaghela ukulimbana nindamyo.

19. Ngimba tukulondiwa ukubomba isyafiki?

¹⁹ Yesu na bandumi bali nulusekelo bo ikisu kikupeliwa. Loli inong’onela muno bisakuyila nulusekelo linga bisakuketa ikisu kiswile nabandu abagholofu aba banganile kangi bikumbombela Yehova. Inong’onela muno aba bisakulaghilagha na Yesu kumwanya bisakuyila nulusekelo linga bikuketa abandu bikuhoboka nimbombo iyi bisakubomba. (Ubuset. 4:4, 9-11; 5:9, 10) Kangi inong’onela muno twisakuyila nulusekelo linga indamyo syosa isi twaghanagha nasyo simalike. (Ubuset. 21:4) Yonongwa yake tukulondiwa ukukindilila ukunkonga Tata witu walughano, uwamahala nu mololo. Linga tukubomba isi, tukuya pakukindilila ukuya balusekelo nalinga tukwaghana nindamyo. (Yak. 1:2-4) Tukundaghisya fiyo panongwa yalufingo lwa Yehova ulwakuti “kwisakuyako ukusyuka.”​—Imbo. 24:15.