1. Ngimba Yehova amwitikisye isyafiki umundu aliwesa?

YEHOVA amwitikisye umundu aliwesa ukuti aye nkipanga. Nalinga ukuti tuli nubudindo bwakukindana loli twesa tuli bakulondiwa fiyo kangi tukulondiwa ukutulana. Untumiwa Pauli ikututula ukupilikisya kanunu inkhani iyi. Bulebule?

2. Ukufwana na Baefesi 4:16, nongwa yafiki tukulondiwa ukubaketa abangi ukuya bakulondiwa fiyo?

² Ukufwana namuno ilemba lya mutu wa nkhani likuyobela, Pauli alingenie kanunu ukuti akayapo umbombi wa Yehova uyu abaghile ukuyoba ukuti: “Ngafumbwa nanuwe.” (1 Kor. 12:21) Linga tukulonda ukuti tuye palutengano, tukulondiwa ukubaketa abinitu ukuya bakulondiwa fiyo kangi tubombeleghe pampene. (Belenga Baefesi 4:16.) Linga tukubombela pampene, aliwesa ikuya pakwipilika ukuti aghaniwe kangi tukuya pakukolelana fiyo nkipanga.

3. Ngimba tukuya pakuyobesania isyafiki mu nkhani iyi?

³ Ngimba njila simo siliku isi tubaghile ukunangisya ulughindiko ku Bakristu abinitu? Mu nkhani iyi tukuya pakuyobesania muno abakulumba bakipanga babaghile ukunangisyila ulughindiko ku bakulumba abinabo. Ukufuma apo tukuya pakuyobesania muno twesa tubaghile ukubaketela abakamu na balumbu aba bakaya pabweghi ukuya bakulondiwa. Kangi pabumalilo, tukuya pakumanyila muno tubaghile ukubanangisyila  ulughano aba bakayimanya kanunu injobelo yitu.

4. Ngimba bulongosi buliku ubu Pauli ayobile pa Baroma 12:10 ubu abakulumba bikulondiwa ukukonga?

⁴ Abakulumba bosa nkipanga bikusaliwa na Yehova ukwendela mwa mbepo mwikemo. Loli aliwesa ali nifyabupe ifyakukindana. (1 Kor. 12:17, 18) Bamo basaliwe mwalululu kangi bakamanya nyingi ukufwana na bakulumba abangi. Bamo bakabaghila ukufwanisya ukubomba nyingi panongwa ya bukangale nindamyo isingi. Loli unkulumba aliwesa atikulondiwa ukuyoba ku nkulumba unnine ukuti, “Ngafumbwa nanumwe.” M’malo mwake, unkulumba aliwesa ikulondiwa ukukonga ubulongosi ubu Pauli ayobile pa Baroma 12:10.​—Belenga.

5. Ngimba abakulumba bikunangisya bulebule ukuti bikubaghindika abakulumba abinabo? Nongwa yafiki bikulondiwa ukubomba isi?

⁵ Abakulumba bikunangisya ukuti bikubaghindika abinabo mwakubapilikisya kanunu. Isi syakulondiwa fiyo linga baghene ukuti bayobesanie. Nongwa yafiki? Panongwa yakuti Ingasya ya Ndindilili ya Chizungu iya Okutobala 1, 1988, yatile: “Abakulumba bikumanya ukuti Yesu abaghile ukubombela mbepo mwikemo ukuntula unkulumba aliwesa nkipanga ukuyoba ifundo sya mu Baibolo. Isi sibaghile ukubatula ukusala kanunu isi bikulonda ukubomba. (Imbo. 15:6-15) Mbepo mwikemo ghukubatula abakulumba bosa nkipanga.

6. Ngimba abakulumba babaghile ukukolelana bulebule, kangi abakamu na balumbu babaghile ukusayiwa bulebule?

⁶ Unkulumba uyu ikubaghindika abinake akabalilo kosa atikubopela pakuyoba linga bali pakuyobesania. Umwene atikuketa ukuti ifundo syake syo syakulondiwa fiyo. M’malo mwake, ikuyoba aminong’ono ghake mwakwiyisya. Ikupilikisya kanunu linga abinake bikuyoba. Ikyakulondiwa fiyo, umwene ikukonga ifundo sya mu Baibolo nubulongosi ubwakufuma ku ‘mbombi unsubiliwa nuwa mahala.’ (Mat. 24:45-47) Linga abakulumba bikunangisania ulughano nukughindikana, mbepo wa Kyala ghubaghile ukubatula  nukubalongosya ukuti basaleghe kanunu ifyakubomba ifi fibaghile ukubakasya abakamu na balumbu.​—Yak. 3:17, 18.

7. Ngimba Yesu abaketagha bulebule abandu aba bakali pabweghi?

⁷ Amasiku agha nkipanga mukwaghiwa imbumba isi sili na bana na isi sikaya na bana. Kangi mukwaghiwa abakamu na balumbu aba bakaya pabweghi. Ngimba tukulondiwa ukubaketa bulebule aba bakaya pabweghi? Inong’onela muno Yesu abaketelagha abandu aba bakali pabweghi. Yesu akalyeghile. Umwene akindilile ukubombela kanunu akabalilo ukuti afwanisye ububombeli bwake. Yesu akamanyisyepo ukuti Unkristu ikulondiwa ukuya pabweghi pamo hayi. Loli umwene ayobile ukuti Abakristu bamo bikusala ukuleka ukuya pabweghi. (Mat. 19:11, 12) Yesu abaghindikagha bosa aba bakali pabweghi. Umwene akinong’onagha ukuti abandu aba bakali pabweghi bakali bakulondiwa.

8. Ukufwana na 1 Bakorinti 7:7-9, ngimba Pauli abakasisye Abakristu ukwinong’onela isyafiki?

⁸ Mwakufwana itolo na Yesu, untumiwa Pauli yope akali pabweghi bo ikubomba ubufumusi bwake. Pauli akayobilepo ukuti kubibi linga Unkristu ali pabweghi. Umwene asimenye ukuti umundu aliwesa ali nubwabuke ubwakusala. Loli Pauli akindilile ukubakasya Abakristu ubununu ubwakumbombela Yehova bo bakaya pabweghi. (Belenga 1 Bakorinti 7:7-9.) Pauli akabaketagha Abakristu aba bakali pabweghi ukuti bakali bakulondiwa. Umwene alinsalile uwakilumyana Timoti, uyu akali pabweghi ukuti ambombeleghe Yehova. * (Filip. 2:19-22) Ukuyoba ubwanaloli, kwayagha pakuya kubibi ukwinong’ona ukuti unkamu ayagha wakulondiwa pene apa linga ali pabweghi pamo hayi.—1 Kor. 7:32-35, 38.

9. Ngimba tubaghile ukuyoba isyafiki isyakufwana nukuya pabweghi pamo hayi?

⁹ Yesu na Pauli bakayobilepo ukuti Abakristu bikulondiwa ukuya pabweghi pamo hayi. Loli, ngimba tubaghile ukuyoba isyafiki isyakufwana nukuya pabweghi pamo hayi? Ingasya ya Ndindilili ya Chichewa iya October 1, 2012, yalingenie kanunu ukuti: “Ukuyoba ubwanaloli, ukuya pabweghi pamo ukuleka ukuya pabweghi fyabupe fyakufuma kwa Kyala. . . . Yehova atikulonda ukuti aba bakaya pabweghi bakosiweghe isoni pamo bayeghe  nikitima.” Linga tukwinong’onela isi, tukulondiwa ukubaghindika abakamu na balumbu aba bakaya pabweghi nkipanga.

10. Ngimba tubaghile ukubaghindika bulebule abakamu na balumbu aba bakaya pabweghi?

¹⁰ Ngimba tubaghile ukubaghindika bulebule abakamu na balumbu aba bakaya pabweghi? Tukulondiwa ukukumbukila ukuti Abakristu bamo basalile ukuleka ukuya pabweghi. Bamo bikulonda ukuya pabweghi loli bakamwagha umundu uwakweghana nawe. Loli bamo umwinabo uwambweghi afwile. Mulimosa muno sibaghile ukuyila, ngimba kwakulondiwa ukuti abakamu na balumbu babalalusyeghe Abakristu abinabo inongwa iyi bakaya pabweghi pamo ukubatula ukuti bamwaghe uwakweghana nawe? Bwanaloli ukuti bamo aba bakaya pabweghi babaghile ukulonda ubutuli. Loli linga batikulonda ubutuli, ngimba babaghile ukwipilika bulebule linga tukubabula ukuti bamwaghe umundu uwakweghana nabo? (1 Tes. 4:11; 1 Tim. 5:13) Isagha tuyobesanie isi abakamu na balumbu abasubiliwa aba bakaya pabweghi bayobile.

11-12. Ngimba tubaghile ukubawisya bulebule amaka aba bakaya pabweghi?

¹¹ Uwakwendela idela yumo uyu akaya pabweghi aketagha ukuti kununu fiyo ukuleka ukuya pabweghi. Loli ayobile ukuti ubaghile ukuwa amaka linga abakamu na balumbu bikulalusya ukuti: “Nongwa yafiki ukegha?” Unkamu uyu ikubombela pa ofesi atile: “Utubalilo tumo, nguketa ukuti abakamu na balumbu bamo bikubapelela ikisa aba bakaya pabweghi. Isi sibaghile ukubapangisya ukuti biketeghe ukuti ukuleka ukuya pabweghi ndamyo komma kyabupe.”

¹² Umulumbu uyu ikubombela pa Beteli atile: “Abakamu na balumbu bamo bikwinong’ona ukuti aba bakaya pabweghi bikuya nulusako ulwakuti bamwaghe umundu uwakweghana nawe linga bali pakilundilo. Akabalilo kamo nabukile ku kighaba kimo ukuti ngabombe ububombeli. Umulumbu uyu nikalagha nawe alimbulile ukuti nkipanga iki abunganagha balimo abakamu babili abasayizi yangu. Umwene alimbulile ukuti ikulonda ukundula ukuti numwaghe umundu uwakweghana nawe. Loli ilisiku limo bo tufikile itolo pangomano namayolo, umwene alindwele ku bakamu babili ukuti ngaghane nabo. Ukuyoba ubwanaloli, isi syali syakukosya isoni kumyangu na ku bakamu babili bala.”

13. Ngimba findu fiki fyalintulile umulumbu yumo uyu akaya pabweghi?

¹³ Umulumbu yumo uyu ikubombela pa Beteli atile: “Nsimenye ukuti abapayiniya aba bakaya pabweghi bali nubwighane ubwakumbombela Kyala, bikwiyipa ukubatula abangi kangi balusekelo. Abene batikuketa ukuti bakulondiwa fiyo ukukinda abangi panongwa yakuti bakaya pabweghi pamo bakaya na bana.” Yonongwa yake tukuhoboka fiyo ukuya nkipanga iki abakamu na balumbu bikughindikana kangi bikuketa ukuti aliwesa wakulondiwa. Tusimenye ukuti abakamu na balumbu bikuketa ukuti tuli bakulondiwa kangi batughanile fiyo.

14. Ngimba tubaghile ukunangisya bulebule ukuti tukubaghindika aba bakaya pabweghi?

¹⁴ Abakamu na balumbu aba bakaya pabweghi bikuya pakundaghisya fiyo linga tukubaketa ukuti bakulondiwa panongwa ya tuyilo twabo utununu. M’malo mwakubapelela ikisa, tukulondiwa ukubandaghisya panongwa yakuya basubiliwa. Ifyakukongapo fyake, abakamu na balumbu aba batikuya pakwipilika ukuti tukuyoba ukuti: “Ngafumbwa  nanuwe.” (1 Kor. 12:21) M’malo mwake, abene bikuya pakumanya ukuti tukubaghindika kangi bikuya pakuya balusekelo.

15. Ngimba bamo balondiwagha ukuchenja ifindu fiki ukuti babombe nyingi pakumbombela Yehova?

¹⁵ Kwa fyinja ifi fikindilepo, abafumusi bingi baliyipile ukumanyila injobelo iyingi ukuti bafwanisye ukubomba nyingi pakumbombela Yehova. Ukuti bafwanisye ukubomba isi, abene balondiwagha ukuchenja ifindu fimo pabumi bwabo. Abakamu na balumbu aba basamile ku kipanga kyabo ukuti bakambombeleghe Kyala kuno kwalondiwagha abafumusi bingi. (Imbo. 16:9) Unkristu aliwesa asalile ukubomba isi ukuti abombe nyingi pakumbombela Yehova. Nalinga ukuti balyeghile akabalilo akatali ukuti bamanyile injobelo imbya loli abene bafwanisye ukumbombela Yehova munjila isyakukindanakindana. Utuyilo twabo utununu twabakasisye abakamu na balumbu nkipanga. Tukuketa ukuti abakamu na balumbu aba bakulondiwa fiyo panongwa yakuti bikwiyipa pakumbombela Yehova.

16. Ngimba abakulumba bikulondiwa ukuketa isyafiki ukuti unkamu aye nkulumba pamo ntuli wakipanga?

¹⁶ Abakulumba bakipanga batikulondiwa ukwinong’ona ukuti unkamu akabaghila ukuya nkulumba pamo ntuli wakipanga panongwa yakuti akayimanya kanunu injobelo. Abene bikuya pakunsala unkamu linga abaghiliwe ukuya nkulumba pamo ntuli wakipanga mwakukolelana nifundo sya mu Baibolo komma panongwa yakuti akayimanya kanunu injobelo.—1 Tim. 3:1-10, 12, 13; Titi 1:5-9.

17. Ngimba abapapi bikulondiwa ukwinong’onela isyafiki linga bikulonda ukusamila nkisu ikingi?

¹⁷ Imbumba simo sisamile ku kisu ikingi panongwa ya ndamyo isi bikwaghana nasyo pamo ukuti bakalonde imbombo. Isi sibaghile ukubapangisya abanabo ukuti bande ukumanyila isukulu mu njobelo ya nkisu iki basamile. Abapapi bope bikulondiwa ukumanyila injobelo imbya ukuti bayaghe imbombo. Bule linga kiliko ikipanga pamo akagulu ka njobelo yabo? Ngimba imbumba bo iyi yikulondiwa ukubungana ku kipanga kiliku? Ngimba babaghile ukubungana nkipanga kya njobelo ya nkisu iki bikwikala pamo nkipanga kya njobelo yabo?

18. Ukufwana na Bagalatia 6:5, ngimba tubaghile ukunangisya bulebule ukuti tukughindika isi unnyambala asalile ukubomba?

¹⁸ Unnyambala ikulondiwa ukusala ikipanga iki imbumba yake yikuya pakubunganagha. Umwene ikulondiwa ukwinong’onela isi sibaghile ukuntula pampene nimbumba yake. (Belenga Bagalatia 6:5.) Tukulondiwa ukughindika isi unnyambala asalile ukubomba. Ukufwana na isi asalile, tukulondiwa ukwitikisya nukubambilila mwakubanangisya ulughano.—Rom. 15:7.

19. Ngimba unnyambala ikulondiwa ukusuma isyafiki kwa Yehova?

 ¹⁹ Imbumba simo sibaghile ukubungana nkipanga ikya njobelo yabo loli lumo abanabo bakabaghila ukuyimanya kanunu injobelo iyi. Abana babaghile ukutamiwa ukupilikisya pangomano kangi bakabaghila ukukula mwambepo. Nongwa yafiki? Panongwa yakuti abana babaghile ukumanyila isukulu iyi bikuyoba injobelo ya nkisu iki bikwikala komma injobelo yabo. Linga isi sibombiwe, abanyambala bikulondiwa ukwinong’onelapo kanunu nukusuma amahala kwa Yehova ukuti abatule ukusala ifyakubomba ukuti babatule abanabo ukuseghelela kwa Yehova. Lumo babaghile ukubatula abanabo ukuti bayimanye kanunu injobelo yabo pamo babaghile ukusala ukusamila ku kipanga kuno bikuyoba injobelo iyi abanabo bikupilika kanunu. Ukufwana na isi unnyambala asalile ukubomba, abakamu na balumbu ba nkipanga iki bikubunganako bikulondiwa ukubaghindika nukubanangisya ulughano.

20. Ngimba tubaghile ukunangisya bulebule ukuti tukubaghindika aba bikumanyila injobelo?

²⁰ Pa fundo isi tuyobesenie, mfipanga fingi mukwaghiwa abakamu na balumbu aba bikutamiwa ukumanyila injobelo. Kubaghile ukuya kukafu kumyabo ukuyobapo aminong’ono ghabo. Loli linga tutikwinong’onela itolo muno bikuyobela injobelo imbya, tukuya pakuketa muno bikunangisyila ulughano lwabo kwa Yehova nukukindilila ukumbombela. Linga tukuketa utuyilo twabo utununu, tukuya pakubaghindika nukubanangisya ulughano. Tutikuya pakuyoba ukuti “Ngafumbwa nanuwe” panongwa yakuti bakayimanya kanunu injobelo yitu.

21-22. Ngimba tuli nulusako luliku?

²¹ Tukundaghisya fiyo kwa Yehova panongwa yakuti atupele ubudindo ubwakulondiwa fiyo nkipanga. Kali tuli banyambala pamo bakikulu, tuli pabweghi pamo hayi, bakilumyana pamo bakusi, tuyimenye kanunu injobelo pamo hayi, twesa tuli bakulondiwa fiyo kwa Yehova.—Rom. 12:4, 5; Kolos. 3:10, 11.

²² Isagha twesa tukindilile ukukonga ifundo isyakulondiwa fiyo isi tumanyile kwa Pauli. Isi sikuya pakututula ukuketa isi tubaghile ukubomba ukuti tubakasye abakamu na balumbu bitu. Kangi sikuya pakututula ukuti akabalilo kosa tubanangisyeghe ulughano nukubaghindika.