1. Ngimba tuli nulusako luliku?

TULI nulusako ulunywamu fiyo ukuya nkipanga kya Yehova. Tukuhoboka fiyo ukuya palutengano bo tukumbombela Yehova pampene na bakamu na balumbu. Ngimba muli nubudindo buliku nkipanga?

2. Ngimba kifwanikisyo kiliku iki Pauli alembile mu bakalata bake?

² Tubaghile ukumanyilako nyingi isyakufwana ninkhani iyi ukufuma ku kifwanikisyo iki untumiwa Pauli alembile mu bakalata bake. Mwakalata aliwesa, Pauli afwanikisye ikipanga numbili wa mundu. Kangi umwene afwanikisye umundu aliwesa pamwene nkipanga nutumbakasya utwa mumbili.​—Rom. 12:4-8; 1 Kor. 12:12-27; Ef. 4:16.

3. Ngimba findu fitatu filiku ifi tukuya pakuyobesania mu nkhani iyi?

³ Mu nkhani iyi, tukuya pakuketa ifindu fitatu ifi tubaghile ukumanyilako kwa Pauli. Ikyakwanda, tukuya pakuketa ukuti umundu aliwesa ali nubudindo * nkipanga. Ikyabubili, tukuya pakuyobesania isi tubaghile ukubomba linga tukuketa ukuti kukafu ukumanya ubudindo bwitu. Kangi ikyabutatu, tukuya pakuyobesania inongwa iyi tukulondiwa ukwiyipa ukubomba ububombeli ubu Yehova atupele.

4. Ngimba ilemba lya Baroma 12:4, 5 likutumanyisya isyafiki?

⁴ Ikindu kyakwanda iki tukumanyilako kwa Pauli kyo kyakuti, aliwesa wakulondiwa fiyo mu gulu lya Yehova. Pauli atile: ‘Namanga bo apa mumbili ghumowene tuli nato utumbakasya tu twingi, loli utumbakasya tosa tutikubomba imbombo yimoyene, bunobuno nanuswe twe bingi, twipelile ukuya mbili ghumowene mwa Kristu, uyu kambakasya ka nnine, uyu kambakasya ka nnine.’ (Rom. 12:4, 5) Ngimba Pauli asanusyagha isyafiki? Umwene asanusyagha ukuti umundu aliwesa ali nubudindo ubwakukindanakindana nkipanga loli aliwesa wakulondiwa fiyo.

5. Ngimba “fyabupe” filiku ifi Yehova atupele?

⁵ Linga tukwinong’onela isya bandu aba bali nubudindo nkipanga, tubaghile ukwanda ukwinong’ona isya aba bikulongosya. (1 Tes. 5:12; Hib. 13:17) Syabwanaloli ukuti ukwendela mwa Kristu, Yehova abapele “abandu ifyabupe” nkipanga. (Ef. 4:8) “Ifyabupe fya bandu” ifi fikongelelapo aba Nkabughatila Kakulongosya, abatuli ba Nkabughatila Kakulongosya, aba mukomiti ya pa Ofesi, abakwendela idela, abalongosi ba masukulu ghakumanyisya Ibaibolo, abakulumba nabatuli bakipanga. Abakamu bosa aba bikusaliwa na mbepo mwikemo ukuti basipasikisyeghe ing’osi sya Yehova nukubakasya abakamu na balumbu nkipanga.—1 Pet. 5:2, 3.

6. Ukufwana na 1 Batesalonike 2:6-8, ngimba abakamu aba basaliwe na mbepo mwikemo bikughelaghela ukubomba isyafiki?

⁶ Abakamu bikusaliwa na Yehova ukwendela mwa mbepo mwikemo ukuti bafwanisyeghe ubudindo bwabo. Ukufwana itolo nutumbakasya utwa mumbili, bo muno ikiboko ninyayo fikubombela ukuti fighutule umbili, bope abakamu aba bikusaliwa na mbepo mwikemo, bikwiyipa ukuti babatule bosa nkipanga. Abene batikulonda ukuti abangi babatufyeghe. M’malo mwake, bikughelaghela ukubakasya abakamu na balumbu. (Belenga 1 Batesalonike 2:6-8.) Tukunndaghisya fiyo Yehova panongwa ya bakamu aba bikubika ifindu fya bangi pamalo aghakwanda ukukinda ifyabo.

7. Ngimba abafumusi bakabalilo kosa bikusayiwa bulebule?

⁷ Bamo nkipanga bikwiyipa ukumbombela Yehova bo abamishonale, abapayiniya bapadela kangi abapayiniya ba kabalilo kosa. Kangi abakamu na balumbu bingi pa kisu kyosa basalile ukuti bafumusyeghe nukupela abafundiwa. Abene basalile ukubomba isi ukuti babatulile abandu bingi ukuya bafundiwa ba Kristu. Nalinga ukuti abafumusi aba bakaya nifindu fingi loli Yehova ikubasaya fiyo. (Mar. 10:29, 30) Tubaghanile abakamu na balumbu aba kangi tukundaghisya fiyo panongwa yakuti bikukasya ikipanga.

8. Nongwa yafiki umfumusi aliwesa wakulondiwa fiyo kwa Yehova?

⁸ Ngimba abakamu aba basaliwe na aba bali mububombeli ubwa kabalilo kosa bo bene aba bali nubudindo nkipanga? Hayi! Umfumusi aliwesa uyu ikufumusya wakulondiwa fiyo kwa Kyala na nkipanga. (Rom. 10:15; 1 Kor. 3:6-9) Isi sili bo ulu panongwa yakuti ikindu ikyakulondiwa fiyo nkipanga ko kupela abafundiwa ba Mwalafyale Yesu Kristu. (Mat. 28:19, 20; 1 Tim. 2:4) Bosa aba bikufumusya, aba bosiwe na aba bakosiwa bikuketa ukuti imbombo yakufumusya yakulondiwa fiyo.—Mat. 24:14.

9. Nongwa yafiki tukubandaghisya abalumbu?

 ⁹ Yehova abapele abalumbu ubudindo ubwakulondiwa fiyo nkipanga. Umwene ikubaketa abakikulu aba bikumbombela mbusubiliwa ukuya bakulondiwa fiyo. Ibaibolo likuyoba isya bakikulu bingi aba banhobosyagha Kyala. Tukubandaghisya fiyo panongwa yatuyilo twabo utununu utu bikunangisya bo amahala, ulwitiko, ukwiyipa, ubukifu, ukupa nimbombo inunu. (Luka 8:2, 3; Imbo. 16:14, 15; Rom. 16:3, 6; Filip. 4:3; Hib. 11:11, 31, 35) Kangi tukunndaghisya fiyo Yehova panongwa ya bakikulu aba bali nutuyilo utununu utu.

10. Nongwa yafiki tukubaketa abakusi ukuya bakulondiwa fiyo?

¹⁰ Kangi tukusayiwa fiyo ukuya nabakusi nkipanga. Mfipanga fimo muli abakamu na balumbu abakangale aba bikukindilila ukumbombela Yehova mbusubiliwa. Bamo babaghile ukuti bamanyile ubwanaloli mwalululu. Kangi lumo bikwaghana nindamyo isyakukindanakindana panongwa ya bukangale. Indamyo isi sibaghile ukubapangisya ukuti bangabombagha nyingi nkipanga na mubufumusi. Loli abene bikubomba syosa isi babaghile ukufwanisya mubufumusi nukubakasya abangi. Kangi tukukasiwa fiyo panongwa yakwiyipa kwabo. Abene bakulondiwa fiyo kwa Yehova na kumyitu.—Mbu. 16:31.

11-12. Ngimba mukukasiwa bulebule na bakilumyana nkipanga kyinu.

¹¹ Inong’onela kangi isya bakilumyana. Abene bikwaghana nindamyo nkisu ikibibi ikya Setano Umohesi kangi bikusofanisiwa na mahala gha nkisu. (1 Yoh. 5:19) Loli tukukasiwa fiyo linga tukuketa abakilumyana bikwamulapo pangomano, bikufumusya kangi bikufighilila mwabukifu isi bikusubila. Ukuyoba ubwanaloli, abakilumyana bali nubudindo ubwakulondiwa fiyo nkipanga.—Sal. 8:2.

¹² Loli kukafu fiyo ku bakamu na balumbu bamo ukusubila ukuti bakulondiwa fiyo nkipanga. Ngimba findu fiki fibaghile ukututula  ukuti twipilikeghe ukuti tuli bakulondiwa fiyo nkipanga? Isagha tukete.

13-14. Nongwa yafiki bamo babaghile ukuketa ukuti bakaya bakulondiwa nkipanga?

¹³ Isagha tukete ikindu ikyabubili iki tukumanyilako kwa Pauli. Umwene alingenie indamyo iyi bamo bali nayo amasiku agha; abene kukuya kukafu kumyabo ukusubila ukuti bakulondiwa nkipanga. Pauli atile: “Linga ikilundi kyatighi, ‘apa une ngaya kiboko, po ngaya wa mumbili.’ Linga imbulukutu yatighi, ‘apa une ngaya kisighe, po ngaya wa mumbili; nalinga bo siye, pope yikabaghila ukusitakuya ya mumbili.’ (1 Kor. 12:15, 16) Ngimba Pauli alondagha ukuyoba isyafiki?

¹⁴ Linga tukwifwanikisya nabangi nkipanga tubaghile ukwanda ukwinong’ona ukuti tukaya bakulondiwa. Bamo nkipanga bali namaluso pakumanyisya, pakufumusya nukubakasya abangi. Loli lumo tubaghile ukuketa ukuti tukaya namaluso bo agha. Isi sikunangisya ukuti tuli bakwiyisya. (Filip. 2:3) Loli tukulondiwa ukuya maso fiyo. Linga tukwifwanikisya nabangi aba bali namaluso tukuya pakuwa amaka. Tubaghile ukwanda ukwinong’ona ukuti tukaya bakulondiwa nkipanga. Ngimba findu fiki fibaghile ukututula ukumalana naminong’ono bo agha?

15. Ukufwana na 1 Bakorinti 12:4-11, ngimba tukulondiwa ukumanya isyafiki isyakufwana nifyabupe ifi tuli nafyo?

¹⁵ Inong’onela isi: Yehova abapele Abakristu bamo abakunyuma ifyabupe fyamwambepo loli bakali bosa aba balyambilile ifyabupe ifi. (Belenga 1 Bakorinti 12:4-11.) Yehova abapele ifyabupe ifyakukindanakindana loli aliwesa ali wakulondiwa fiyo. Amasiku agha tutikwambilila ifyabupe munjila yakuswighisya. Loli ifundo sya Yehova sikukindilila ukubomba imbombo. Tukabaghila ukuya namaluso aghakufwana itolo loli twesa tuli bakulondiwa kwa Yehova.

16. Ngimba bulongosi buliku ubu ayobile untumiwa Pauli ubu tukulondiwa ukukonga?

 ¹⁶ M’malo mwakwifwanikisya na Bakristu abangi, tukulondiwa ukukonga ubulongosi ubu Pauli ayobile ukuti: ‘Loli umundu wesa abuketeghe bununu ubumi bwake, po isakuyagha nisya kwitukifyamo yuyo mwene, momma njungi.’—Gal. 6:4

17. Ngimba tukuya pakusayiwa bulebule linga tukukonga ubulongosi ubu Pauli ayobile?

¹⁷ Linga tukukonga ubulongosi ubu Pauli ayobile nukuketa muno tukubombela ifindu, tukuya pakuketa ukuti tuli namaluso agha bamo bakaya nagho. Mwakifwanikisyo, unkulumba uyu akaya nuluso lwakuyoba inkhani ya mu Baibolo abaghile ukuya waluso ukupela abafundiwa. Lumo umwene atikubomba kanunu ifindu bo abakulumba abangi nkipanga loli abaghile ukuya nkulumba walughano uyu abakamu na balumbu bikuhoboka nawe. Lumo ikwambilila kanunu abahesya. (Hib. 13:2, 16) Linga tukuketa amaluso agha tuli nagho, tukuya pakwipilika kanunu panongwa ya isi tubaghile ukufwanisya ukubomba nkipanga. Kangi isi sikuya pakututula ukuti tungayagha nakabini ku bakamu na balumbu aba bali namaluso agha ghakindene naghitu.

18. Ngimba tubaghile ukukusya bulebule amaluso ghitu?

¹⁸ Kisita kwinong’onela isi tukubomba nkipanga, twesa tukulondiwa ukwiyipa pakumbombela Yehova nukukusya amaluso ghitu. Ukuti tukusye amaluso ghitu Yehova ikutumanyisya ukwendela mu gulu lyake. Mwakifwanikisyo, pangomano sya nkati mwa sabata tukwambilila ubulongosi ubu bukututula ukuti tuyeghe namaluso mubufumusi. Ngimba tukughelaghela ukukonga isi tukumanyila pangomano?

19. Ngimba tubaghile ukubomba isyafiki ukuti twingile isukulu ya Bafumusi ba Bunyafyale?

¹⁹ Isukulu iyingi iyakulondiwa fiyo yo ya Bafumusi ba Bunyafyale. Aba babaghile ukubuka kusukulu iyi bo bakamu na balumbu aba bali mubombeli bwa kabalilo kosa kangi bali nifyinja fya pakati pa 23 na 65. Lumo sibaghile ukuboneka ukuti tukabaghila ukufwanisya isi. M’malo mwakwinong’ona ukuti tukabaghila ukwingila isukulu iyi, tukulondiwa ukuya naminong’ono aghakwingila isukulu iyi. Ukufuma apo tukulondiwa ukuya nimbatiko iyi yibaghile ukututula ukuti tufwanisye. Linga tukwiyipa nindumbula yosa, Yehova ikuya pakututula ukuti tufwanisye isi tukulonda ukubomba.

20. Ngimba tukumanyilapo isyafiki pa Baroma 12:6-8?

²⁰ Ikindu ikyabutatu iki tukumanyilako kwa Pauli kikwaghiwa pa Baroma 12:6-8. (Belenga.) Umwene ayobile kangi ukuti umundu aliwesa nkipanga ali nifyabupe ifyakukindanakindana. Loli umwene ikutukasya ukuti tukulondiwa ukubombela ikyabupe kilikyosa iki tuli nakyo ukuti tubakasye abakamu na balumbu.

21-22. Ngimba tukumanyilako isyafiki kwa Robert na Felice?

²¹ Inong’onela ikifwanikisyo kya nkamu Robert. Umwene bo ikumbombela Yehova ku kisu ikingi, balinkolile ukuti akabombeleghe ku Beteli ya ku kisu kyabo. Nalinga ukuti abakamu bayobile ukuti akabombilepo nakimo ikibibi, umwene atile: “Kwa myesi mingi ngahobokagha panongwa yakuti ninong’onagha ukuti natoliwagha ukubomba kanunu ububombeli. Akabalilo kamo ninong’onagha ukuleka ububombeli bwa pa  Beteli.” Ngimba mo munjila yiliku iyi alwaghile kangi ulusekelo? Unkulumba wakipanga umwinake alinkasisye ukuti Yehova ikutumanyisya ukuti tufwanisyeghe ububombeli ubu tupeliwe. Robert asyaghenie ukuti alondiwagha ukuleka ukwinong’onela isya kunyuma nukukindilila ukwiyipa pabubombeli ubupya.

²² Unkamu Felice Episcopo alyaghene nindamyo iyakufwana itolo. Umwene nu nkasi wake bamalisisye isukulu ya Gilead mu 1956 kangi bendelagha idela ku Bolivia. Mu 1964 abene bapapile umwana. Felice atile: “Kwali kukafu fiyo ukuleka ububombeli ubu. Kwa kyinja kimokyene nawile fiyo amaka. Loli nubutuli bwa Yehova nachenjile aminong’ono ukuti mfwanisye ubudindo bwangu pakuya mpapi.” Ngimba nanumwe mukwipilika bo Robert na Felice? Ngimba mukuwa amaka panongwa yakuti mukaya nulusako lwa bubombeli ubu mwali nabo kunyuma? Linga mo siyilile, tukulondiwa ukwiyipa nindumbula yosa pakumbombela Yehova pampene na bakamu na balumbu bitu. Tukindilileghe ukubatula abangi mwakubombela amaluso ghitu. Kangi isi sikuya pakututula ukuti tuye balusekelo.

23. Ngimba tukulondiwa ukubomba isyafiki? Ngimba mu nkhani iyakukongapo tukwisa pakuyobesania amalalusyo ghaliku?

²³ Twesa tuli bakulondiwa kwa Yehova. Umwene ikulonda ukuti tuye mugulu lyake. Linga tukwinong’onelapo isi tubaghile ukubomba ukuti tubakasye abakamu na balumbu, tukuya pakwiketa ukuti tuli bakulondiwa fiyo. Loli bule muno tukubaketela abangi nkipanga? Ngimba tubaghile ukunangisya bulebule ukuti tubaghanile? Mu nkhani iyakukongapo tukwisa pakuyobesania amalalusyo agha.