1. Ngimba Davidi ayobile isyafiki isyakufwana nukwiyisya kwa Yehova?

NGIMBA tubaghile ukuyoba ukuti Yehova wakwiyisya? Ena. Davidi akabalilo kamo atile: “Umbele une ingulu ya bupoki bwako, kangi kope nukwiyisya kwako kulinkumba une ubukulumba. (2 Samu. 22:36; Sal. 18:35 NWT) Pakabalilo aka Davidi ayobagha isi, lumo abaghile ukuti akumbukilagha akabalilo aka unsololi Samueli alisile kunyumba ya tata wake ukuti asale mwalafyale wa Israeli. Davidi ali nnandi ku bosa; loli yo asaliwe na Yehova ukuti ingile m’malo mwa Mwalafyale Sauli.—1 Samu. 16:1, 10-13.

2. Ngimba tukuya pakuyobesania isyafiki mu nkhani iyi?

² Davidi akolelene na isi sili pa Salimo 113 ukuyoba isya Yehova apa pikuti: ‘Ikufiketela pasi, ikya kumwanya nikya pasi yo yuyo ikubasumusya abalondo ndufumbi . . . ikubitughasya palikimo na banyafyale.’ (Sal. 113:6-8) Mu nkhani iyi, ikyakwanda tukuya pakuyobesania ukulondiwa kwa kwiyisya nukuketa muno Yehova anangisyile akayilo aka. Ukufuma apo, tukuya pakuyobesania isi tubaghile ukumanyilako ku Mwalafyale Sauli, unsololi Danieli na Yesu isyakufwana nakayilo akakwiyisya.

3. Ngimba Yehova ikutubombela bulebule ifindu kangi isi sikunangisya isyafiki?

³ Yehova ikunangisya ukuti wakwiyisya ukufwana namuno ikubombela ifindu nabandu abasitabugholofu. Umwene atikwitikisya kwene ukwiputa kwitu loli ikutuketa kangi ukuti tuli bamanyani bake. (Sal. 25:14) Ukuti tufwanisye ukuya nawe pabumanyani, Yehova abikile Umwanake ukuya ikemo panongwa ya butulanongwa bwitu. Yehova atunangisye kisa.

4. Ngimba Yehova atupele ifindu fiki kangi nongwa yafiki?

 ⁴ Inong’onela injila iyingi iyi Yehova ikunangisyila ukwiyisya. Pakuya Mpeli, Yehova akayagha pakutupa ubwabuke ubwakusala ifindu pabumi bwitu. Loli akabombile isi. Umwene atupelile nkifwani kyake kangi atupele ubwabuke ubwakusala ifyakubomba. Umwene ikulonda ukuti tumbombeleghe nindumbula yosa panongwa yakuti tunganile kangi tukumanya ubununu ubwakumpilikila. (Kukumbu. 10:12; Yes. 48:17, 18) Tukundaghisya fiyo panongwa yakuti Yehova wakwiyisya.

5. Ngimba Yehova ikutumanyisya bulebule ukuti tuye bakwiyisya? (Keta ikithuzi kya pakikope.)

⁵ Yehova ikutumanyisya ukuti tuyeghe bakwiyisya ukufwana namuno umwene ikubombela nanuswe. Umwene wa mahala fiyo ukukinda umundu aliwesa. Nalinga ukuti atikulonda ubulongosi ukufuma ku mundu yumo loli umwene ikwitikisya isi abangi basalile ukubomba. Mwakifwanikisyo, Yehova alimwitikisye Umwanake ukuti antule pakupela ifindu fyosa. (Mbu. 8:27-30; Kolos. 1:15, 16) Kangi nalinga ukuti Yehova wamaka ghosa loli ikubapa abangi ubudindo. Mwakifwanikisyo, umwene alinsalile Yesu ukuya Mwalafyale wa Bunyafyale bwake kangi abapele ubudindo aba 144,000 ukuti basalaghileghe na Yesu kumwanya. (Luka 12:32) Umwene alimmanyisye Yesu ukuya Mwalafyale kangi Mputi Unkulumba. (Hib. 5:8, 9) Kangi ikubamanyisya aba bisakulaghilagha na Yesu ukuti bafwanisye ububombeli bwabo loli atikubafimbilisya muno babaghile ukubombela. M’malo mwake, ikubasubila ukuti bikuya pakufwanisya ukubomba ubwighane bwake.—Ubuset. 5:10.

6-7. Ngimba tubaghile ukumanyilako isyafiki kwa Kyala, isyakufwana nukubapa abangi ubudindo?

⁶ Linga Kyala ikufwanisya ukubapa abangi  ubudindo, nanuswe tukulondiwa ukubomba mwakufwana itolo. Mwakifwanikisyo, ngimba muli mutu wambumba pamo nkulumba wakipanga? Mukulondiwa ukunkonga Yehova mwakubapa abangi ubudindo nukuleka ukubakayikila muno bikubombela. Linga mukunkonga Yehova, mutikuya pakufwanisya ukubomba kanunu bwene ububombeli bwinu loli mukuya pakubamanyisya abangi nukubatula ukuti baye bakifu. (Yes. 41:10) Ngimba mo munjila siliku isingi isi aba bali nubudindo babaghile ukumanyilako kwa Yehova?

⁷ Ibaibolo likunangisya ukuti Yehova ikuhoboka namasakisyo gha bandumi. (1 Banyaf. 22:19-22) Mwe bapapi, ngimba mubaghile ukunkonga bulebule Yehova? Linga kwakulondiwa, mubalalusyeghe abaninu aminong’ono ghabo muno babaghile ukubombela imbombo yimo. Kangi linga mukukolelana naminong’ono ghabo, mukongeghe isi basalile.

8. Ngimba Yehova abombile bulebule ifindu mbololo kwa Abrahamu na Sara?

⁸ Injila iyingi iyi Yehova ikunangisya ukuti wakwiyisya ko kuya mololo. Mwakifwanikisyo, Yehova ikunangisya ubololo linga aba bikumbombela bikulonda ukumanya isi ikulonda ukubomba. Umwene apilikisye bo Abrahamu ikuyoba aminong’ono ghake pakabalilo aka Yehova alondagha ukupyuta akaya ka Sodomu na Gomola. (Bwa. 18:22-33) Kangi kumbukila muno Yehova abombile ifindu na Sara unkasi wa Abrahamu. Umwene akakalele bo Sara ikuseka ukufwana na isi afingile ukuti isakuyagha nulwanda. (Bwa. 18:10-14) M’malo mwake, anangisye ubololo kwa Sara.

9. Ngimba abapapi na bakulumba bakipanga babaghile ukumanyilako isyafiki kwa Yehova?

⁹ Mwe bapapi na bakulumba bakipanga, ngimba mubaghile ukumanyilako isyafiki kwa Yehova? Ngimba mukubomba bulebule linga abaninu pamo abakamu na balumbu nkipanga batikukolelana na isi musalile? Ngimba mukuketa ukuti aminong’ono ghinu gho manunu ukukinda agha bangi? Pamo ngimba mukughelaghela ukuti mupilikisyeghe aminong’ono ghabo? Abakamu na balumbu bikuya pakusayiwa fiyo linga aba bali nubudindo bikunkonga Yehova. Ukufika apa, tuyobesenie isi tubaghile ukumanyilako kwa Yehova pankhani yakwiyisya. Lino tukuya pakumanyila ukufuma ku fifwanikisyo fya mu Baibolo ifya muno tubaghile ukunangisyila ukwiyisya.

10. Ngimba Yehova ikubombela bulebule ififwanikisyo fya bangi ukuti atumanyisye?

¹⁰ Pakuya ‘Mmanyisi witu Unkulumba,’ Yehova atupele ififwanikisyo fya bangi mu Baibolo ukuti tumanyileko. (Yes. 30:20, 21) Tukumanyilako ukufuma ku nkhani sya mu Baibolo isya bandu aba bali nutuyilo utununu bo ukwiyisya. Kangi tukumanyilako isi syabombiwe ku bandu aba batoliwe ukunangisya utuyilo utununu.—Sal. 37:37; 1 Kor. 10:11.

11. Ngimba tubaghile ukumanyilako isyafiki ku kifwanikisyo ikibibi kya Sauli?

¹¹ Inong’onela isi syabombiwe ku Mwalafyale Sauli. Pakwanda umwene ali wakwiyisya. Bo ndumyana asimenye isi abaghile ukufwanisya ukubomba kangi akanagha ukuti ambilile ubudindo ubungi. (1 Samu. 9:21; 10:20-22) Loli bo akabalilo kakindilepo, Sauli alyandile ukwibona kangi abombile ifindu ifi bukali budindo bwake ukubomba. Umwene alyandile ukunangisya akayilo aka bo asaliwe ukuya mwalafyale. Pakyakubombiwa kimo, akanangisye ubololo bo ikungulila unsololi Samueli. M’malo mwakunsubila Yehova, umwene  abikile ikemo ilyokye nalinga ukuti bukali budindo bwake ukubomba isi. Ifyakukongapo fyake, Yehova alinkanile kangi alimpokile ubunyafyale. (1 Samu. 13:8-14) Tukulondiwa ukumanyilako ukufuma ku kifwanikisyo iki mwakuleka ukubomba ifindu ifi tukapeliwa ubwabuke ubwakubomba.

12. Ngimba Danieli anangisye bulebule ukwiyisya?

¹² Mwakukindana nikifwanikisyo ikibibi kya Sauli, inong’onela ikifwanikisyo ikinunu ikya nsololi Danieli. Pabumi bwake bosa, umwene akindilile ukuya mbombi wakwiyisya wa Kyala uyu akabalilo kosa ansubilagha Yehova ukuti andongosyeghe. Mwakifwanikisyo, pakabalilo aka Yehova alimbulile ukuti asanusye injosi sya Nebukadinezara, Danieli akayobile ukuti afwanisye ukulingania isi pamwene. M’malo mwake, mwakwiyisya alimpele ulughindiko losa Yehova. (Dan. 2:26-28) Ngimba tukumanyilako isyafiki? Linga abakamu na balumbu bikupilikisya inkhani syitu isyakufuma mu Baibolo pamo linga tuli namaluso mubufumusi, tukulondiwa ukukumbukila ukumpa ulughindiko losa Yehova. Tukulondiwa ukumanya ukuti tukabaghila ukubomba isi kisita butuli bwa Yehova. (Filip. 4:13) Linga tukubomba isi, tukunkonga Yesu. Bulebule?

13. Ukufwana na Yohani 5:19, 30, ngimba tukumanyilako isyafiki kwa Yesu?

¹³ Nalinga ukuti ali Mwana ungolofu wa Kyala, Yesu ansubilagha Yehova. (Belenga Yohani 5:19, 30.) Umwene akaghelile ukupoka amaka kwa Tata wake wakumwanya. Pa Bafilipi 2:6 pikuyoba ukuti Yesu “alinkusita nukulonda ukuti ayeghe bo yu Kyala.” Yesu aghumenye umpaka wake kangi aghindikagha ubulaghili bwa Tata bwake.

14. Ngimba Yesu abombagha bulebule linga bansumile ukubomba ikindu iki akaya nubwabuke ubwakubomba?

¹⁴ Inong’onela isi Yesu abombile bo Yakobu, Yohani na mama wabo bansumile ikindu kimo iki umwene akali nubwabuke ukuti abape. Mwanakalinga Yesu ayobile ukuti Tata wake wakumwanya mwene yo abaghile ukusala ukuti yonani uyu ikulondiwa ukwikala kukililo pamo kukimama mu Bunyafyale bwa Kyala. (Mat. 20:20-23) Yesu anangisye ukuti aghindikagha umpaka wake. Umwene ali wakwiyisya. Kangi akabombagha kilikyosa iki akapeliwa ubwabuke na Yehova ukuti abombe. (Yoh. 12:49) Ngimba tubaghile ukunkonga bulebule Yesu?

15-16. Ngimba tubaghile ukukonga bulebule ubulongosi ubu buli pa 1 Bakorinti 4:6?

 ¹⁵ Tukukonga ikifwanikisyo kya Yesu ikya kwiyisya mwakukonga ubulongosi ubu buli pa 1 Bakorinti 4:6. Apa pikuti: ‘Mungakisyagha pali isi silembiwe.’ Yonongwa yake linga batusumile ubulongosi, tutikulondiwa ukubafimbilisya abangi ukuti bitikisye aminong’ono ghitu pamo ukuyoba kisita kwinong’onela. M’malo mwake, tukulondiwa ukukonga ubulongosi bwa mu Baibolo na mabuku aghakulingania isya mu Baibolo. Linga tukubomba isi, kokuti tukumanya umpaka witu. Linga tuli bakwiyisya tukundaghisya “imbombo sya bugholofu” isya Mwenemaka ghosa.—Ubuset. 15:3, 4.

¹⁶ Ukongelelapo pakungindika Yehova, filipo ififukwa fingi ifinunu ifyakunangisyila ukwiyisya. Ngimba ukuya bakwiyisya kubaghile ukututula bulebule ukuya balusekelo nukukolelana nabangi? Isi syo tukuya pakuyobesania.

17. Nongwa yafiki abandu abakwiyisya bikuya balusekelo?

¹⁷ Linga tuli bakwiyisya, tukuya pakuya balusekelo. Nongwa yafiki? Panongwa yakuti linga tusimenye ukuti tukabaghila ukufwanisya ukubomba fimo, tukundaghisya kangi tukuhoboka nubutuli ubwakufuma ku bangi. Mwakifwanikisyo, inong’onela ikyakubombiwa kimo bo Yesu ababumbulwisye abandu 10 aba bali nimbungo ya bukoma. Yumoywene yo aghomokile ukuti akandaghisye Yesu panongwa yakumbumbulusya, ikindu iki umundu akabaghila ukubomba pamwene. Umundu wakwiyisya uyu, andaghisye panongwa ya butuli ubu alyambilile kangi alimpalile Kyala.—Luka 17:11-19.

18. Ngimba ukwiyisya kubaghile ukututula bulebule ukuti tukolelaneghe nabangi? (Baroma 12:10)

¹⁸ Abandu abakwiyisya bikukolelana nabangi  kangi bikuya nabamanyani abanunu. Nongwa yafiki? Abene bikuhoboka ukumanya ukuti abandu abangi bali nutuyilo utununu kangi bikubasubila. Abene bikuhoboka linga abangi bikubomba kanunu ububombeli kangi bikubandaghisya.—Belenga Baroma 12:10.

19. Nongwa yafiki tutikulondiwa ukuya bakwibona?

¹⁹ Mwakukindana na isi, abandu abakwibona kukuya kukafu ukubandaghisya abangi, bikulonda ukuti abangi bo babandaghisyeghe. Abene bikwifwanikisya nabangi kangi bikuketa ukuti bakulondiwa fiyo ukukinda abangi. M’malo mwakubamanyisya abangi nukubapa ubudindo, utubalilo twingi umundu wakwibona ikwinong’ona ukuti abaghile ukubomba mwene ifindu fimo panongwa yakuti ikuketa ukuti abangi bakabaghila ukubomba kanunu. Umwene ikuketa ukuti wakulondiwa fiyo kangi ikuya nakabini linga abangi babombile kanunu. (Gal. 5:26) Abandu bo aba batikuya pabumanyani bwamaka nabangi. Linga tusyaghenie ukuti tuli bakwibona, tukulondiwa ukwiputa kwa Yehova ukufumila pasi pandumbula ‘ukuti tuye naminong’ono amanunu’ nukuleka ukukusya akayilo aka mundumbula yitu.—Rom. 12:2.

20. Nongwa yafiki tukulondiwa ukuya bakwiyisya?

²⁰ Tukundaghisya fiyo ikifwanikisyo kya Yehova. Tukuketa ukuti wakwiyisya muno ikubombela ifindu nababombi bake kangi tukulondiwa ukunkonga. Mwakongelelapo, tukulondiwa ukukonga ififwanikisyo ifinunu ifya mu Baibolo ifya bandu abakwiyisya aba bali nulusako ulwakumbombela Yehova mbusubiliwa. Isagha twesa tukindilileghe ukungindika Yehova nukumpa amapalo. (Ubuset. 4:11) Linga tukubomba isi, tukuya pabumanyani bwamaka na Yehova panongwa yakuti abaghanile abandu abakwiyisya.