1-2. Ukufwana na Salimo 34:8, ngimba tubaghile ukumanya bulebule isya bununu bwa Yehova?

INONG’ONELA ukuti umundu yumo abapele ifyakulya ifi mukalyamo lumo ukuti mulye. Mubaghile ukufimanya ifyakulya ifyo mwakufiketa, mwakunusya, muno bafipiyile, pamo mwakubalalusya abangi isyakufwana ni fyakulya ifi. Loli injila inunu iyi yibaghile ukubatula ukumanya ukuti ifyakulya ifi finunu ko kughela.

² Tubaghile ukumanyilapo simo isyakufwana nubununu bwa Yehova mwakubelenga Ibaibolo na mabuku ghitu nukuketa muno Yehova abasayile abangi. Loli tukuya pakummanya kanunu Yehova linga “tughelile” ubununu bwake. (Belenga Salimo 34:8.) Isagha tukete ikifwanikisyo ikya muno tubaghile ukubombela. Tufwanikisye ukuti mukulonda ukumbombela Yehova mu bubombeli bwa kabalilo kosa loli ukuti mufwanisye isi, mukulondiwa ukuya nubumi ubusita kulonda ifindu fingi. Lumo akabalilo kingi mubelengilepo isi Yesu afingile isyakuti linga mukubika ifindu fya Bunyafyale pa malo aghakwanda, Yehova ikuya pakubapa ifi mukulonda loli mukuketa ukuti Yehova akababombelamo isi. (Mat. 6:33) Loli panongwa yakuti tuli nulwitiko mu isi Yesu afingile, tukughelaghela ukubombesyela kanunu indalama, ukuya ni mbatiko inunu iya muno tukubombela imbombo isya kumbili nukukindilila ukufumusya. Linga tukubomba isi, tukuya pakuketa ukuti Yehova ikutupasikisya naloli. Aliwesa pamwene “ikughela” ubununu bwa Yehova.

3. Ukufwana na Salimo 16:1, 2, ngimba bo banani aba bikwambilila ubununu ukufuma kwa Yehova?

³ Yehova yo “nnunu kuli bosa itolo” na ku bandu aba bakammanya.  (Sal. 145:9; Mat. 5:45) Loli umwene ikubabombela ifindu fingi ifinunu ababombi bake bosa aba bikwiyipa kumyake. (Belenga Salimo 16:1, 2) Isagha tuyobesanie ifindu fimo ifinunu ifi Yehova atubombile.

4. Ngimba Yehova ikunangisya bulebule ubununu bwake ku aba bikuseghelela kumyake?

⁴ Akabalilo kosa aka tukukonga isi tukumanyila ukufuma kwa Yehova, tukuketa muno sikututulila. Bo tumanyile isyakufwana nu mwene nukungana, umwene atutulile fiyo ukumalana na minong’ono amabibi pa bumi bwitu. (Kolos. 1:21) Kangi bo twiyipile kwa Yehova nukosiwa, twaketile ubununu bwake mwakutupa amabyebye amanunu nukuya nawe pabumanyani ubwamaka.—1 Pet. 3:21.

5. Ngimba tukuketa bulebule ubununu bwa Yehova linga tuli mubufumusi?

⁵ Tukukindilila ukuketa ubununu bwa Yehova linga tuli mubufumusi. Ngimba muli nisoni? Ababombi ba Yehova bingi bali nisoni. Lumo bo mukali ukuya yumo mwa babombi ba Yehova, mukalinong’onilepo ukuyobesania numundu yumo isyakufwana ni Baibolo. Loli lino, akabalilo kosa syo mukubomba. Yehova abatulile, kangi mukuhoboka fiyo ni mbombo yake iyakufumusya. Muketile muno Yehova abatulile mu njila isyakukindanakindana. Umwene abatulile ukuti munangisyeghe ubololo linga abangi bikubasusya. Abatulile kangi ukuti mukumbukile ilemba ilyakuti muyobesanie nu mwenenyumba. Kangi atupele amaka ukuti tukindilile ukufumusya nalinga abandu batikulonda ukupilikisya.—Yere. 20:7-9.

6. Ngimba isi Yehova ikutumanyisya sikunangisya bulebule ubununu bwake?

⁶ Yehova atunangisye kangi ubununu bwake mwakutumanyisya ukuti tufumusyeghe kanunu. (Yoh. 6:45) Pangomano syitu isya nkati mwasabata, tukumanyila ififwanikisyo ifinunu ifi fikututula muno tubaghile ukubombela linga tuli mubufumusi. Pakwanda tubaghile ukutila ukubafumukisya abandu loli linga tukughelaghela, tubaghile ukwanda ukufumusya kisita kutila. Kangi linga tuli pangomano tukukasiwa ukumanyila injila isyakukindanakindana isya muno tubaghile ukufumukisya. Isi sibaghile ukutupangisya ukuti tuye nubogha loli linga tukughelaghela ukubomba isi, Yehova ikuya pakutusaya fiyo. Lino tukuya pakuyobesania isya findu fimo ifinunu ifi Yehova ikuya pakutupa linga tukunsubila nukughelaghela ukubomba isi tubaghile ukufwanisya nalinga tukwaghana ni ndamyo. Ukufuma apo, tukuya pakuyobesania muno tubaghile ukufwanisyila ubwighane bwitu.

7. Ngimba tukusayiwa bulebule linga tukwiyipa ukuti tubombe nyingi pabufumusi bwitu?

⁷ Tukuseghelela fiyo kwa Yehova. Inong’onela ikifwanikisyo kya nkulumba yumo uyu ingamu yake yo Samuel, * uyu ikubomba ububombeli nu nkasi wake ku Colombia. Imbumba iyi yahobokagha fiyo ukubomba ubupayiniya ku kipanga kya ku myabo, loli abene balondagha ukubomba nyingi ukuti batule ku kipanga iki kyalondiwagha ubutuli. Ukuti bafwanisye isi basalile, balondiwagha ukwiyipa fiyo. Samuel atile, “Twakongile amasyu gha pa Matai 6:33 nukuleka ukula ifindu ifi fikali fyakulondiwa.” Loli kwali kukafu fiyo ku myitu ukusama. Twasamile mu nyumba iyi twalondagha kangi tukonangagha indalama nyingi.” Bo basamile ku kipanga ikipya, abene balondiwagha indalama nandi ukuti sibatuleghe pabumi bwabo ukukinda pakwanda. Umwene atile, “Twaketile muno Yehova atulongosyile nukwamula inyiputo syitu.  Tukuketa ukuti Yehova ikuhoboka nanuswe namuno ikutunangisyila ulughano lwake mu njila isi tukaghulilagha.” Ngimba mukughelaghela ukubomba nyingi pa bufumusi bwinu munjila yimo? Linga mo siyilile, mubaghile ukuseghelela kwa Yehova kangi umwene ikuya pakubapa ifi mukulonda.—Sal. 18:25.

8. Ngimba mukumanyilako isyafiki ku isi Ivan na Viktoria bayobile?

⁸ Tukulwagha ulusekelo mububombeli bwitu. Keta isi unkamu Ivan na Viktoria bayobile, imbumba iyi yikubomba ubupayiniya ku Kyrgyzstan. Abene bikalagha ubumi ubusita kulonda ifindu fingi, ukuti batulepo pabubombeli bulibosa, ukongelelapo ubwakuyenga. Ivan atile: “Twiyipagha fiyo pabubombeli bulibosa. Nalinga ukuti twakatalagha linga tubombile ububombeli, loli twahobokagha fiyo panongwa yakuti twambombelagha Yehova. Kangi twalwaghile ulusekelo panongwa yakuya nabamanyani abapya aba batubulagha isi balyaghene nasyo.”—Mar. 10:29, 30.

9. Ngimba umulumbu yumo uyu ali nindamyo abombile isyafiki ukuti akusye ububombeli bwake?

⁹ Tukulwagha ulusekelo linga tukumbombela Yehova nalinga ukuti tukwaghana ni ndamyo. Mwakifwanikisyo, Mirreh, uyu mfwilwe uwa ku West Africa, alekile imbombo iya budokotala nukwanda ubupayiniya. Mirreh ikubina ububine ubunywamu ubu bukumpangisya ukuti atamiweghe ukwenda kangi ikufwanisya itolo ikufumusya kwa awala yimoyene. Loli umwene ikufwanisya ukufumusya. Kangi ali namabulendo mingi aghakughomokelako, na bamanyili ba Baibolo kangi bamo ikumanyila nabo pa foni. Nongwa yafiki Mirreh ikulonda ukumbombela nyingi Yehova? Umwene atile, “Nguhoboka fiyo nulughano ulu Yehova na Kristu Yesu bikunangisya. Kangi akabalilo kosa ngwiputa ukuti Yehova andule ukubomba nyingi mububombeli bwake.”—Mat. 22:36, 37.

10. Ukufwana na 1 Peteri 5:10, ngimba aba bikwiyipa bikwambilila isyafiki ukufuma kwa Yehova?

¹⁰ Tukwambilila ifimanyisyo ifingi ukufuma kwa Yehova. Kenny uyu ikubomba ubupayiniya ku Mauritius, aketile ukuti ifundo iyi yabwanaloli. Bo amanyile ubwanaloli, alekile ifimanyilo ifya ku yunivesite nukosiwa kangi alyandile ububombeli bwa kabalilo kosa. Umwene atile, “Ngughelaghela ukukonga amasyu gha nsololi Yesaya aghakuti: ‘Undume une, oko mbuke une.’” (Yes. 6:8) Kenny atulilepo fiyo pambombo iyakuyenga nukusanusya amabuku agha ghikulingania isya Baibolo munjobelo yake. Umwene atile, “Namanyile amaluso mingi agha ghalindulile ukufwanisya ukubomba ububombeli bwangu.” Kangi amanyile nyingi ukukinda itolo ukubomba imbombo iyi. Umwene alyongelile ukuti, “Mmanyile kangi ifindu ifi pakwanda kwali kukafu ukufibomba nu tuyilo utu mbaghile ukunangisya ukuti niye mbombi wa Yehova nnunu.” (Belenga 1 Peteri 5:10.) Lumo nanumwe mubaghile ukuchenja ifindu fimo ukuti Yehova abamanyisye munjila nyingi.

11. Ngimba abalumbu ba ku South Korea babombile isyafiki ukuti bafwanisye ukufumusya, kangi ifyakukongapo fyake fyali fyo filiku? (Keta ikithuzi kya pakikope.)

¹¹ Nalinga Abaketi aba bafumwisye kwa fyinja fingi bikulondiwa ukumanyisiwa linga bikwanda ububombeli ubupya. Pakabalilo ka mbungo ya COVID-19, abakulumba ba nkipanga ku South Korea batile: “Bamo aba binong’onagha ukuti bakabaghila ukufumusya panongwa yabubine, lino bikufumusya ukwendela pa vidiyo komfelensi. Abalumbu ba fyinja fya m’ma 80 bamanyile muno babaghile ukubombela injila imbya iyi kangi bikufwanisya ukufumusya isiku lililyosa.” (Sal. 92: 14, 15) Ngimba mukulonda ukongelela ububombeli bwinu nukukindilila ukughela ubununu bwa Yehova? Inong’onela injila isi mubaghile ukukonga ukuti sibatule ukufwanisya ubwighane ubu.

12. Ngimba Yehova afingile isyafiki ku bosa aba bikunsubila?

¹² Munsubileghe Yehova. Umwene afingile ukuti ikuya pakutupa ifindu ifinunu linga tukunsubila nukwiyipa kumyake. (Mal. 3:10) Umulumbu Fabiola uyu ikwikala ku Colombia aketile muno Yehova afwanisyile ulufingo ulu. Umwene alondagha ukuya mpayiniya wakabalilo kosa bo osiwe itolo. Loli undume na banake batatu bansubilagha umwene ukuti abatuleghe. Yonongwa yake bo ikulonda ukuleka imbombo aliputile kwa Yehova ukuti antule. Umwene atile: “Pikwegha akabalilo akatali ukuti umundu ambilile indalama isya bumalilo linga ali pa mbombo loli une nalyambilile bo pakindile umwesi ghumowene itolo. Syali syakuswighisya fiyo.” Bo imyesi mibili yikindilepo, alyandile ubupayiniya. Lino ali nifyinja ifya mma 70 kangi abombile ubupayiniya kwa fyinja 20. Pakabalilo ako, abatulile abandu 8 ukuti bosiwe. Umwene atile: “Nalinga ukuti utubalilo tumo ndikuya namaka loli Yehova ikundula isiku lililyosa ukuti ngindilile ukubomba ubupayiniya.”

13-14. Ngimba fifwanikisyo filiku ifi fibaghile ukubatula ukuti munsubileghe Yehova nukufwanisya ububombeli bwinu?

¹³ Mumanyileghe ukufuma ku aba bansubilagha  Yehova. Mu Baibolo muli ififwanikisyo fingi ifya bandu aba biyipagha pa kumbombela Yehova. Abene basayiwe na Yehova panongwa yakuti babombilepo simo ukunangisya ukuti bikunsubila umwene. Mwakifwanikisyo, Abrahamu akalekile akaya kake nalinga ukuti ‘akamanyagha na kuno abukagha’ kangi Yehova alinsayile. (Hib. 11:8) Kangi bo Yakobu alwile nuwandumi umwene alwambilile ulusayo. (Bwa. 32:24-30) Bo Abaisraeli bali pipi ukwingila Nkisu kya Lufingo, kali kabalilo aka abaputi balingile mu Lusoko lwa Yordani kangi abandu bafwanisye ukuloboka.—Yos. 3:14-16.

¹⁴ Mubaghile ukumanyilako ku fifwanikisyo ifya Baketi aba masiku agha aba bikunsubila Yehova. Mwakifwanikisyo, unkamu Payton nu nkasi wake Diana, bikuhoboka ukubelenga inkhani isya bakamu na balumbu aba bikubomba nyingi pakumbombela Yehova bo isi sikwaghiwa pa kighaba ikyakuti, “Ŵakajipeleka na Mtima Wose.” * Payton atile: “Linga tukubelenga isi balyaghene nasyo, syafwanagha itolo tukuketa umundu yumo ikulya ifyakulya ifinunu. Linga akabalilo kosa tukuketelela, sikutupangisya ukuti ‘tungele Kyala, nukuketa muno buyilile ubununu bwake.’” Lino, Payton na Diana bikubomba ububombeli kuno kukulondiwa ubutuli bwingi. Ngimba mubelengilemo inkhani isi? Kangi ngimba muketelilemo amavidiyo aghakuti Kupharazga ku Chigaŵa Chakutali—Australia kangi iyakuti Kupharazga ku Chigaŵa Chakutali—Ireland agha ghikwaghiwa pa jw.org? Amavidiyo agha ghabaghile ukubatula ukuti musyaghe injila isi mubaghile ukongelela ububombeli bwinu.

15. Ngimba abamanyani abanunu babaghile ukututula bulebule?

¹⁵ Musaleghe abamanyani abanunu. Kukuya kupepe fiyo ukulya ifyakulya ifi tukalyamo siku linga tuli nabamanyani bitu aba bikuhoboka ni fyakulya ifi. Mwakufwana itolo, linga tukwangala na aba bikumbika Yehova pamalo aghakwanda, tukuketa injila isi tubaghile ukongelela ububombeli bwitu kwa Kyala. Kent na Veronica aba bali bapweghi bikuketa ukuti ifundo iyi yabwanaloli. Kent atile, “Abamanyani na ba mu mbumba yitu bikutukasya ukuti tughele injila isingi isya bubombeli. Tusyaghenie ukuti ukwangala na bandu aba bikubika ifindu ifya Bunyafyale pamalo aghakwanda, bikututula ukuti tughele injila imbya.” Lino Kent na Veronica bikubomba ubupayiniya bwa padela ku Serbia.

16. Ukufwana nikifwanikisyo kya Yesu iki kikwaghiwa pa Luka 12:16-21, nongwa yafiki tukulondiwa ukwiyipa?

¹⁶ Mwiyipeghe kwa Yehova. Tutikulondiwa ukuwa amaka pa findu ifinunu ukuti tunhobosye Yehova. (Ndumbi. 5:19, 20) Loli linga tukutoliwa ukubomba nyingi pakumbombela Kyala panongwa ya findu ifi fikutuhobosya, tubaghile ukubomba ifindu ifibibi bo umundu uwa nkifwanikisyo kya Yesu uyu iyipagha ukuti afyaghe ifindu ifinunu nukuleka ukunhobosya Kyala. (Belenga Luka 12:16-21.) Unkamu Christian, uyu ikwikala ku France, atile, “Ngabombelagha kanunu akabalilo na maka ghangu ukumbombela Yehova nukuyitula imbumba yangu.” Umwene nu nkasi wake balinong’wine isyakwanda ubupayiniya. Loli ukuti bafwanisye isi, balondiwagha ukuleka imbombo. Ukuti babwagheghe ubutuli, abene balyandile akabizinesi kangi bahobokagha ni ndalama inandi iyi bayaghagha. Ngimba ukwiyipa kwabo kwali kwakutula? Christian atile, “Tukuhoboka fiyo nububombeli nukuketa muno abamanyili ba Baibolo bikumanyilila isya Yehova.”

17. Nongwa yafiki kubaghile ukuya kukafu ukughela injila imbya iyakufumukisya?

 ¹⁷ Mwiyipeghe ukukonga injila imbya isya kufumusya. (Imbo. 17:16, 17; 20:20, 21) Shirley, umpayiniya uwa ku United States, alondiwagha ukuchenja ubufumusi bwake pakabalilo ka mbungo ya COVID-19. Pakwanda, akahobokagha nubufumusi bwa pa foni. Bo ambilile ifimanyilo pakabalilo ka wakwendela idela, umwene alyandile ukufumusya pa foni akabalilo kosa. Umwene atile: “Pakwanda natilagha loli lino nguhoboka fiyo nukufumusya pa foni. Tukubafumukisya abandu bingi ukukinda muno twabombelagha ubufumusi bwa ku nyumba ni nyumba.”

18. Ngimba findu fiki fibaghile ukututula linga tukuketa ukuti kukafu ukongelela ubufumusi bwitu?

¹⁸ Muyeghe nubwighane kangi mubufwanisyeghe. Linga twaghene ni ndamyo, tukusuma ubutuli nukughelaghela ukwinong’onela isi tubaghile ukubomba. (Mbu. 3:21) Sonia uyu ikubomba ubupayiniya bwa kabalilo kosa na kagulu aka kikuyoba injobelo ya Chiromany ku Europe, atile: “Nighanile ukulemba pipepala isi ngulonda ukubomba nukubika pa malo amanunu. Mu kyakubikamo imyenda njambwile imisebo mibili iyi yikubuka ku malo aghakukindana. Linga ngulonda ukusala ifyakubomba, nguketa pa misebo iyi nukwinong’onela kuno ifyakusala fyangu fikundongosyela.” Sonia ikughelaghela ukuya naminong’ono amanunu pandamyo isi ikwaghana nasyo. Umwene atile, “Indamyo isi ngwaghana nasyo sibaghile ukufwana itolo nimato ili likumbinga pamo ibuliji ili likundula ukuti mfwanisye isi nsalile.”

19. Ngimba tubaghile ukunangisya bulebule ukuti tukundaghisya pa findu ifinunu ifi Yehova ikutupa?

¹⁹ Yehova ikutusaya munjila nyingi fiyo. Tubaghile ukunangisya ukundaghisya ifindu ifinunu ifi ikutupa mwakubomba syosa isi tubaghile ukufwanisya ukuti tunhobosyeghe. (Hib. 13:15) Isi sikongelelapo ukusyagha injila imbya isyakongelela ubufumusi bwitu kangi Yehova ikuya pakutusaya fiyo. Isiku lililyosa, isagha tughelegheleghe ukusyagha injila isyakuti ‘tungele Kyala, nukuketa muno buyilile ubununu bwake.’ Ukufuma apo, tukuya pakufwana na Yesu uyu ayobile ukuti: “Ifyakulya fyangu ko kubomba ubwighane bwa uyu andumile une, nukuyimalisya imbombo yake.”—Yoh. 4:34.