1. Ngimba bingi bikughelaghela bulebule ukuti babombeghe nyingi pakumbombela Yehova?

 TULI nimbombo nyingi iyakubomba bo ikisu ikibibi iki kikubuka kubumalikisyo. (Mat. 24:14; Luka 10:2; 1 Pet. 5:2) Twesa tukulonda ukuti tumbombeleghe Yehova muno tubaghile ukufwanisyila. Bingi bikubomba nyingi pabufumusi bwabo. Bamo bikulonda ukubomba ubupayiniya. Bamo ukubomba pa Beteli pamo ukutulapo pambombo iyakuyenga. Kangi abakamu bingi bikwiyipa ukuti bimikiwe ukuya batuli pamo bakulumba ba kipanga. (1 Tim. 3:1, 8) Yehova ikuhoboka fiyo linga ikuketa ababombi bake bikwiyipa ukuti bambombeleghe.—Sal. 110:3; Yes. 6:8.

2. Ngimba tubaghile ukwipilika bulebule linga tutikufwanisya ubwighane bwitu pakumbombela Yehova?

² Tubaghile ukuwa amaka linga tukuketa ukuti ubwighane bwitu pakumbombela Yehova butikufwanisiwa kwa kabalilo akatali. Pamo tubaghile ukuwa amaka linga tutikufwanisya ububombeli bumo panongwa yabukangale pamo indamyo isingi. (Mbu. 13:12) Momuno syayilile kwa Melissa. * Umwene alondagha fiyo ukubomba pa Beteli pamo ukwingila Isukulu ya Bafumusi ba Bunyafyale loli umwene atile: “Ngangele fiyo. Ngabaghila ukubomba ububombeli ubu. Utubalilo tumo nguwa amaka.”

3. Ngimba njila siliku isi yumo abaghile ukukonga ukuti ambilile ububombeli?

 ³ Bamo aba bakilumyana kangi bali namaka bikulondiwa ukuya bakusi nukukusya utuyilo tumo ukuti bafwanisye ubudindo bumo. Mwakifwanikisyo bikulondiwa ukuya bamahala, basaleghe mwanakalinga ifyakubomba, kangi bakwiyipa pambombo. Loli bikulondiwa ukuya bololo ukuti babombe kanunu imbombo kangi ukuti abangi babaghindikeghe. Linga mukwiyipa ukukusya utuyilo utu abakamu babaghile ukubapa ubudindo. Inong’onela isi alyaghene nasyo Nick. Bo ali nifyinja 20 asulumenie fiyo panongwa yakuti akalimikiwe ukuya ntuli nkipanga. Umwene atile, “Nguketa ukuti kilipo ikindu kimo iki ndikubomba kanunu.” Loli Nick akawile amaka. Umwene aghelaghelagha ukwiyipa nkipanga na pambombo iyakufumusya. Lino, ikubomba mu Komiti ya pa Ofesi.

4. Ngimba tukuya pakuyobesania isyafiki mu nkhani iyi?

⁴ Ngimba mukuwa amaka panongwa yakuti mutikufwanisya ubwighane bwinu pakumbombela Yehova? Linga mo siyilile, mumbule Yehova muno mukwipilikila. (Sal. 37:5-7) Mwakongelelapo, mubaghile ukubasuma abakamu abakusi mwambepo ukuti babatule muno mubaghile ukwiyipila pakumbombela Kyala, ukufuma apo mughelegheleghe ukukonga ubulongosi ubu babapele. Linga mubombile isi, mubaghile ukufwanisya ubwighane bwinu. Loli ukufwana namuno syayilile na Melissa, uyu tunjobile pabwandilo, lumo lino mukabaghila ukufwanisya isi mukulonda pakumbombela Yehova. Ngimba mukulondiwa ukubomba isyafiki ukuti mukindilile ukuya balusekelo? Ukuti twamule ilalusyo ili, mu nkhani iyi tukuya pakuyobesania (1) kuno mubaghile ukulwagha ulusekelo, (2) muno mubaghile ukukindilila ukuya balusekelo kangi (3) ubwighane ubu mukulondiwa ukuya nabo ukuti mongelele ulusekelo.

5. Ukuti tuye balusekelo, ngimba tukulondiwa ukwinong’onela ifindu fiki? (Undumbilili 6:9)

⁵ Pilemba lya Undumbilili 6:9, pikulingania isi sibaghile ukututula ukuti tuye balusekelo. (Belenga.) Umundu uyu ikuhoboka “nifi ali nafyo” ikundaghisya. Mwakukindana nu mundu uyu ikulonda ukuya nafyo fimo ikukindilila ukughulila ifindu ifi akabaghila ukufyagha. Ngimba tukumanyilako isyafiki? Ukuti tuye balusekelo, tukulondiwa ukwikutisiwa ni findu ifi tuli nafyo komma pa findu ifi tukabaghila ukufwanisya ukufyagha.

6. Ngimba kifwanikisyo kiliku iki tukuya pakuyobesania, kangi tukuya pakumanyilako isyafiki?

⁶ Ngimba bwanaloli ukuti mubaghile ukwikutisiwa na ifi muli nafyo? Abandu bingi bikwinong’ona ukuti sikabaghila ukubombiwa, panongwa yakuti tukukindilila ukumanyila ukubomba ifindu ifipya. Loli sibaghile ukubombiwa. Tubaghile ukuhoboka ni findu ifi “tuli nafyo.” Ngimba tubaghile ukubomba bulebule isi? Ukuti tumwaghe ansala, isagha tuyobesanie isya kifwanikisyo kya Yesu ikya matalenti iki kikwaghiwa pa Matai 25:14-30. Tukuya pakuketa isi tukumanyilako ukuti tukindilile ukuya balusekelo nalinga tukwaghana ni ndamyo.

7. Lingania mbupimba isya kifwanikisyo kya Yesu ikya matalenti.

⁷ Nkifwanikisyo iki, umundu ali pabulendo. Bo akali ukusokapo, abakolile ababombi bake nukumpa aliwesa amatalenti ukuti babombe ibizinesi. * Umumdu uyu asimenye ukuti ababombi bake bali namaluso aghakukindana yonongwa yake umbombi yumo  alimpele amatalenti 5, umbombi uyungi alimpele mabili kangi umbombi uwabutatu alimpele limolyene. Ababombi babili abakwanda baliyipile fiyo ukuti basyaghe indalama nyingi isya mwalafyale. Umbombi uwabutatu, akabombilepo nakimo pandalama isi balimpele, yonongwa yake umwalafyale alinkaghile.

8. Nongwa yafiki umbombi uwakwanda uwa nkifwanikisyo ali walusekelo?

⁸ Umbombi uwakwanda ali walusekelo fiyo panongwa yakuti umwalafyale wake alimpele kangi amatalenti 5. Isi syali ndalama nyingi fiyo, kangi sikunangisya ukuti umwalafyale wake ansubilagha fiyo. Loli bule ukuyoba isya umbombi uwabubili? Umwene abaghile ukuti awile amaka panongwa yakuti akalyambilile amatalenti mingi ukufwana nu mbombi uwakwanda. Loli ngimba abombile isyafiki?

9. Nongwa yafiki ikifwanikisyo kya matalenti kitikuyoba isya mbombi uwabubili? (Matai 25:22, 23)

⁹ Belenga Matai 25:22, 23. Yesu ayobile ukuti umbombi uwabubili akakalele panongwa yakwambilila amatalenti mabili. Kangi umwene akayobilepo ukuti: ‘Nongwa yafiki mwalafyale wangu ambele amatalenti manandi? Nanine niyipagha fiyo mwakufwana itolo numbombi uyu alyambilile amatalenti 5.’ Linga umwalafyale wangu atikundaghisya nguya pakughasunga amatalenti mabili agha nukwiyipa pa mbombo yangu.

10. Ngimba umbombi wabubili uyu abombile isyafiki na matalenti?

¹⁰ Mwakufwana itolo numbombi uwakwanda, umbombi uwabubili iyipagha fiyo pa mbombo iyi umwalafyale wake alimpele. Ifyakukongapo fyake, umwene alimongelile kangi  amatalenti mabili. Umwalafyale yula alimongelile umbombi wake panongwa yakwiyipa kwake. Kangi umwene alindaghisye fiyo nukumpa ubudindo ubungi.

11. Ngimba tubaghile ukongelela bulebule ulusekelo?

¹¹ Mwakufwana itolo nanuswe tubaghile ukongelela ulusekelo linga tukwiyipa pa mbombo yiliyosa iyi tupeliwe mu gulu lya Yehova. Tukulondiwa ukwiyipa fiyo pa mbombo yakufumusya nukweghapo ulubafu pafyakubombiwa ifya pakipanga. (Imbo. 18:5; Hib. 10:24, 25) Mwitendekesyeghe ingomano ukuti mukamulengepo mwakufika pandumbula. Tuketeghe ifi tupeliwe ukubomba pa ngomano isya nkati mwasabata ukuya syakulondiwa. Linga batusumile ukuti tutulepo pambombo yimo nkipanga, tukulondiwa ukuya basubiliwa nukubomba pakabalilo kake. Tutikulondiwa ukwinong’ona ukuti imbombo iyi batupele yikaya yakulondiwa kangi tukabaghila ukubomba pakabalilo kake. Tubikengepo indumbula ukuti tuye namaluso mingi pambombo yitu. (Mbu. 22:29) Linga tukwiyipa fiyo pambombo ya Yehova, tukuya pakuya pabumanyani ubwamaka fiyo na Yehova nukukindilila ukuya balusekelo. (Gal. 6:4) Kangi kukuya pakuya kupepe kumyitu ukuya balusekelo linga abangi bambilile ubudindo ubu twabulondagha.—Rom. 12:15; Gal. 5:26.

12. Ngimba findu fiki fyalintulile Melissa na Nick ukukindilila ukuya balusekelo?

¹² Ngimba mukunkumbuka umulumbu Melissa, uyu tunjobile mu palagilafu 2, uyu alondagha ukubuka ku Beteli pamo ukwingila Isukulu ya Bafumusi ba Bunyafyale? Nalinga ukuti akafwanisye isi alondagha, umwene atile: “Ngughelaghela ukubomba syosa isi mbaghile ukufwanisya. Isi sindulile ukuya walusekelo.” Kangi ngimba Nick abombile bulebule panongwa yakuti akalimikiwe ukuya ntuli nkipanga? “Ngwinong’onela ulusako ulu nalinalo bo ukufumusya nukwamulapo pangomano mwakufika pandumbula. Kangi nalembile ifomu iya bubombeli bwa pa Beteli kangi balingolile ikyinja ikyakukongapo.”

13. Ngimba findu fiki fibaghile ukubombiwa linga tukwiyipa pabubombeli ubu tukubomba lino? (Undumbilili 2:24)

¹³ Linga mukwiyipa fiyo pabubombeli ubu mukubomba lino, ngimba mukwisa pakufwanisya ubudindo ubungi nkyeni? Isi sibaghile ukubombiwa, bo muno syayilile na Nick. Kangi mwakufwana itolo na Melissa, mukuya pakukindilila ukuya balusekelo pabubombeli ubu mukumbombela Yehova. (Belenga Undumbilili 2:24.) Mwakongelelapo, mukuya pakukindilila kangi ukuya balusekelo panongwa yakumanya ukuti mukunhobosya Umwalafyale witu Yesu Kristu.

14. Ngimba tukulondiwa ukukumbukila isyafiki ukuti tufwanisye ubwighane bwitu ubwakumbombela Yehova?

¹⁴ Linga tukughelaghela ukubomba syosa isi tubaghile ukufwanisya pakumbombela Yehova ngimba sikusanusya ukuti tutikulondiwa ukumbombela nyingi? Hayi. Tukulondiwa ukuya nubwighane ubu bubaghile ukututula ukuti tufumusyeghe nukumanyisya kanunu kangi nukubatula abakamu nabalumbu. Tukuya pakufwanisya ubwighane ubu linga tukwiyipa mwakubatula abangi m’malo mwakwiyinong’onela twibene.—Mbu. 11:2; Imbo. 20:35.

15. Ngimba bwighane buliku ubu bubaghile ukubatula ukukindilila ukuya balusekelo?

¹⁵ Ngimba bwighane buliku ubu mukulondiwa ukuya nabo? Munsumeghe Yehova ukuti abatule ukumanya ubwighane ubu mukulonda ukufwanisya. (Mbu. 16:3; Yak. 1:5) Ngimba mukuya pakufwanisya ubwighane bumo ubu buyobiwe mu  ipalagilafu yakwanda iya mu nkhani iyi—mwakuya mpayiniya wakabalilo pamo wakabalilo kosa, ukubomba pa Beteli pamo  ukutulapo pambombo iyakuyenga? Pamo mubaghile ukumanyila injobelo iyingi pamo ukufumusya nkighaba ikingi. Mubaghile ukumanyila nyingi isyakufwana nubwighane ubu mwakubelenga ichaputala 10 mu buku ilyakuti Ŵakunozgeka Kuchita Khumbo la Yehova kangi mwakuyobesania na bakulumba ba nkipanga kyinu. * Linga mukughelaghela ukufwanisya ubwighane ubu, abangi bikuya pakuketa ukuti mukukula mwambepo kangi mukuya pakukindilila ukuya balusekelo.

16. Ngimba mukulondiwa ukubomba isyafiki linga mukutoliwa ukufwanisya ubwighane bumo?

¹⁶ Loli bule linga mukutoliwa ukufwanisya ubwighane bumo ubu tuyobesenie mu nkhani iyi. Mughelegheleghe ukubomba ubwighane bumo ubu mukuketa ukuti mubaghile ukufwanisya. Inong’onela ulusako lumo ulu.

17. Ukufwana na 1 Timoti 4:13, 15, ngimba unkamu abaghile ukubomba isyafiki ukuti aye m’manyisi nnunu?

¹⁷ Belenga 1 Timoti 4:13, 15. Linga uli nkamu uyu osiwe, kulondiwa ukughelaghela ukuti uye mmanyisi pamo njobi nnunu. Nongwa yafiki? Panongwa yakuti “ukwiyipa” pakubelenga, ukuyoba nukumanyisya sibaghile ukubatula aba bikupilikisya. Mukulondiwa ukughelaghela ukuya nubwighane bwakumanyila nukukonga ifundo yiliyosa mu ka bulosha akakuti Mwiyipeghe pa Kubelenga nu Kumanyila. Mumanyileghe ifundo yiliyosa pakabalilo kamokene, nukukonga isi mumanyile linga mukuyoba inkhani. Musumeghe ubutuli ukufuma ku nkulumba uyu ikubika ubulongosi bwa padela pamo ku bakulumba abangi ‘aba bikwiyipa pa kufumusya nu kumanyisya.’ * (1 Tim. 5:17)  Munginong’onelagha itolo ukukonga ikimanyilo ikya mu bulosha loli mubatuleghe na aba bikupilikisya ukuti bakasyeghe ulwitiko lwabo pa isi bikumanyila. Linga mukubomba isi, mukuya pakukindilila ukuya balusekelo.

18. Ngimba findu fiki fibaghile ukututula ukuti tufwanisye ubwighane bwitu ubwakufumusya?

¹⁸ Twesa tuli nimbombo iyakufumusya nu kupela abafundiwa. (Mat. 28:19, 20; Rom. 10:14) Ngimba mukulonda ukuya namaluso pambombo iyakulondiwa iyi? Mukulondiwa ukuya nubwighane ubwakuti mufwanisye isi linga mukubelenga nukukonga isi mukumanyila mu ka bulosha akakuti Ukumanyisya. Mubaghile ukusyagha ifundo isingi isyakutula mu kabuku akakuti Ukufumusya nu Bumi Bwitu Bwabukristu kangi na mavidiyo agha ghikwaghiwa pakighaba ikyakuti muno tubaghile ukufumusyila pa ngomano isya nkati mwasabata. Mubombesyeleghe injila isyakukindanakindana isi sibaghile ukubatula. Linga mukubomba isi, mukuya pakuya mfumusi kangi mmanyisi nnunu nukukindilila ukuya balusekelo.—2 Tim. 4:5.

19. Ngimba mubaghile ukukusya bulebule utuyilo twa Bukristu?

¹⁹ Linga mukwinong’onela isya bwighane bwinu, mutikulondiwa ukwibwa ikindu ikyakulondiwa fiyo uku ko kukusya utuyilo twa Bukristu. (Gal. 5:22, 23; Kolos. 3:12; 2 Pet. 1:5-8) Ngimba mubaghile ukubomba bulebule ukuti mufwanisye isi? Tufwanikisye ukuti mukulonda ukukusya ulwitiko lwinu. Mubaghile ukubelenga inkhani mu mabuku ghitu isi sikuyoba isya muno tubaghile ukukasyila ulwitiko lwitu. Mubaghile ukukasiwa linga mukuketelela JW Broadcasting^® isya muno abakamu na balumbu bikunangisyila ulwitiko lwamaka bo bikulimbana ni ndamyo isyakukindanakindana. Ukufuma apo, mwinong’oneleghe muno mubaghile ukubombela ukuti mukongeghe ulwitiko lwabo.

20. Ngimba tubaghile ukongelela bulebule ulusekelo nu kuleka ukuwa amaka?

²⁰ Kisita kukayika twesa tukulonda ukubomba nyingi pakumbombela Yehova. Kangi nkisu ikipya, twisakumbombelagha Kyala kisita ndamyo nayimo. Pakabalilo aka, linga tukughelaghela ukubomba isi tubaghile ukufwanisya, sikututula ukongelela ulusekelo lwitu nu kuleka ukuwa amaka. Ikindu kyakulondiwa fiyo, kyo kyakuti tukuya pakungindika nukunhobosya Yehova, ‘Kyala witu walusekelo.’ (1 Tim. 1:11)