Munkhani iyi, twamanyile ukuti yilipo inkhani yimoyene iyakulondiwa fiyo iyi yikubapalamasya abandu nabandumi bosa, iyi ko kuyikemesya ingamu ingulumba iyakuti Yehova. Inkhani yabulaghili, ubu bo bulaghili ubununu fiyo ubwa Yehova, yo nkhani yimo iyakulondiwa fiyo. Mwakufwana itolo, inkhani yabusubiliwa bwa bandu yo yimo mwa nkhani yakulondiwa fiyo pakuyikemesya ingamu ya Yehova.

Nongwa yafiki tukuyoba ukuti inkhani iyakulondiwa fiyo yili pangamu ya Yehova nukuyikemesya? Isagha tuyobesanie ififukwa fitatu.

Ikyakwanda, Setano ayinyozile ingamu ya Yehova mungunda wa Edeni. Ilalusyo ili Setano alindalusisye Eva mbuyanja, lyanangisyagha ukuti Yehova akaya nikisa kangi indaghilo isi alimpele Adamu na Eva syali ngafu. Ukufuma apo, Setano ayobile ifindu ifi Yehova akayobilepo kangi atile umwene ntungulu. Setano ayinyozile ingamu ya Yehova. Umwene alinkukoleliwa ingamu “ya Mohesi,” iyi yikusanusya “untungulu.” (Yoh. 8:44) Panongwa yakuti Eva asubile ubutungulu bwa Setano, anangisye ukuti akalimpilikile Kyala kangi akalondagha ukuti andongosyeghe. (Bwa. 3:1-6) Setano ikukindilila ukuyoba isyabutungulu isyakufwana ningamu ya Yehova nubundu bwake. Bosa aba bikupilikila ubutungulu ubu bikunsambukila Yehova. Yonongwa yake ababombi ba Kyala bikuketa ukuti kubibi fiyo ukuyinyoza ingamu ya Kyala. Ukuyinyoza ingamu ya Kyala, ko uku kwapangisye indamyo nimbibi syosa pakisu.

Ikyabubili, ukuti ifyabumi fyosa fisasayiweghe, Yehova isakuyikemesya ingamu yake nukusosyapo fyosa ifi fikuyonanga ingamu iyi. Isi syakulondiwa fiyo kwa Yehova. Yonongwa yake atile: “Une nikuyapakuyipela nyikemo ingamu yangu ingulumba.” (Eze. 36:23) Kangi Yesu anangisye ukuti iki kyo kiyeghe pabwandilo munyiputo sya babombi abasubiliwa ba Yehova apa atile: “Ingamu yako yikemesiweghe.” (Mat. 6:9) Kangi utubalilo twingi Ibaibolo likuyoba ukulondiwa kwa kuyikemesya ingamu ya Yehova. Inong’onela ififwanikisyo finandi itolo: “Amumpeghe Yehova ubukulumba ubu bufwene ni ngamu yake.” (1 Sya. 16:29; Sal. 96:8.) “Mumwimbileghe nukuyipala ingamu yake insisya.” (Sal. 66:2) “Na yi ngamu yako yope nikuyighindika bwilabwila.” (Sal. 86:12) Akabalilo akangi aka Yehova ayobile ukufuma kumwanya, mwali mo mu tempile ku Yerusalemu kuno Yesu atile: “Tata, uyipeghe ubukulumba ingamu yako.” Yope Yehova alyamwile ukuti: “Njipele ubukulumba, kangi nikwandisyagha ukuyipa ubukulumba.”​—Yoh. 12:28. a

Ikyabutatu, utubalilo tosa ubwighane bwa Yehova bukukolelana ningamu yake, pamo utuyilo twake. Inong’onela muno ingamu ya Yehova yisakuyila yakulondiwa linga tugheliwe akabumalilo  kubumalilo bwa Fyinja 1,000 ifya Bulaghili bwa Kristu. Ngimba abandumi na bandu bosa bisakuyiketa bulebule ingamu ya Yehova pakabalilo ako? Pakabalilo ako, abandu batisakulondiwa ukunangisya ukuti basubiliwa panongwa yakuti abene bisakuya bagholofu. Bisakukaba ubumi bwa bwila na bwila. Kangi batisakulondiwa ukuti basimikisyile tasi linga ubulaghili bwa Yehova bo bununu fiyo. Pakabalilo ako, abandumi bosa kumwanya na bandu pakisu kyapasi bisakuya bakukolelana nukwitikisya ubulaghili bwa Yehova. Loli bule pakuyoba isya ngamu ya Yehova?

Pakabalilo ako, aliwesa isakumanya ubwanaloli ubwakuyoba isya Yehova kangi ingamu yake yisakukemesiwagha kwa bwila. Loli ingamu ya Yehova yikuya pakukindilila ukuya yakulondiwa fiyo ku babombi bake bosa, kumwanya na pakisu. Nongwa yafiki? Panongwa yakuti abene bisakuketa ukuti Yehova ikukindilila ukubomba ifindu ifyakuswighisya. Inong’onela isi: Panongwa yakuti Yesu isakughomokesya ubulaghili bosa kwa Yehova, Kyala isakuya “yo yuyo ntupu muli fyosa.” (1 Kor. 15:28) Ukufuma apo, abandu pakisu bisakuhobokagha “nubwabuke ubwa bukulumba bwa bana ba Kyala.” (Rom. 8:21) Kangi Yehova isakufwanisya ubwighane bwake ukuti abanake basaye mumbumba iyakukolelana kumwanya na pakisu kyapasi.​—Ef. 1:10.

Ngimba isi sisakubapalamasya bulebule aba bali mumbumba ya Yehova kumwanya na pakisu kyapasi? Bwanaloli ukuti twisakukindilila ukuya nubwighane ubwakuyipala ingamu ya Yehova. Uwamasalimo Davidi abuliwe ukulemba ukuti: “Atufiweghe Yehova Kyala . . . Ingamu yake insisya yo yighindikiweghe bwila na bwila.” (Sal. 72:18, 19) Kwa bwila na bwila, twisakukindilila ukuya nififukwa ifinunu ifya kuyipala ingamu yake.

Ingamu ya Yehova yikwimila kilikyosa ikyakufwana numwene. Ukwinong’onela ingamu ya Yehova, kukutukumbusya isya lughano lwake. (1 Yoh. 4:8) Akabalilo kosa twisakukumbukagha ukuti panongwa yakuti atughanile, Yehova atupelile, atupele ikemo lya kitabulilo, kangi ikulaghila mbugholofu. Kangi twisakukindilila ukuketa muno Yehova isakunangisyilagha ulughano kumyitu. Kwa bwila na bwila, twisakukasiwagha ukuseghelela kumyake pakuya Tata witu nukwimba inyimbo isyakuyipala ingamu yake.​—Sal. 73:28.