1. Ngimba Yehova ikulonda ukuti abandu bosa babombeghe isyafiki?

 YEHOVA abapelile abandu nubwabuke ubwakusala. Ubwabuke ubu mukububombela imbombo linga mukusala ifyakubomba. Ikyakusala ikinywamu fiyo iki umundu abaghile ukusala ko kwiyipa kwa Yehova nukuya mumbumba yake ya aba bikumwiputa. Yehova ikulonda ukuti aliwesa abombe isi. Nongwa yafiki? Panongwa yakuti abaghanile abandu kangi ikubalondela ifinunu. Ikulonda ukuti abene bahobokeghe pakuya bamanyani bake nukwikala kwa bwila na bwila.—Kukumbu. 30:​19, 20; Gal. 6:​7, 8.

2. Ngimba Yehova ikwipilika bulebule nabandu aba batikulapa? (1 Yohani 2:1)

² Loli Yehova atikumfimbilisya aliwesa ukuti ambombeleghe. Ikumwitikisya aliwesa ukusala ifi ikulonda ukubomba. Bule linga Unkristu uyu osiwe abombile ubutulanongwa ubunywamu? Linga atikulapa abaghile ukwepusiwa nkipanga. (1 Kor. 5:13) Loli nalinga sili bo ulu, Yehova ikughulila ukuti uyu abombile ubutulanongwa ikuya pakughomokela kangi kumyake. Yonongwa yake umwene abikile ikitabulilo—ukuti abahobokele aba balapile ubutulanongwa bwabo. (Belenga 1 Yohani 2:1.) Yehova yo Kyala walughano uyu ikulonda ukuti bosa aba babombile ubutulanongwa balape.—Zeka. 1:3; Rom. 2:4; Yak. 4:8.

3. Ngimba tukuya pakuyobesania isyafiki munkhani iyi?

 ³ Yehova ikulonda ukuti tukongeghe muno umwene ikubombela na aba babombile ubutulanongwa. Inkhani iyi yikuya pakulingania muno tubaghile ukubombela isi. Bo mukubelenga inkhani iyi, muketeghe (1) muno bayiketelagha inkhani ya butulanongwa ubunywamu nkipanga kya ku Korinti, (2) ubulongosi ubu untumiwa Pauli abikagha linga umundu alapile, kangi (3) isi Ibaibolo likuyoba isya muno Yehova ikubaketela Abakristu aba bikubomba ubutulanongwa ubunywamu.

MUNO BAYIKETELAGHA INKHANI YA BUTULANONGWA UBUNYWAMU NKIPANGA KYA KU KORINTI

4. Ngimba findu fiki fyabombiwe nkipanga kya ku Korinti? (1 Bakorinti 5:​1, 2)

⁴ Belenga 1 Bakorinti 5:​1, 2. Pabulendo bwake ubwabutatu, Pauli apilike inkhani syakitima isya kipanga ikipya ikya ku Korinti. Unkamu uwa nkipanga iki abombagha ubulowe nunkasi wa tata wake. Akayilo aka kali kakuswighisya kangi “ubulowe ubu butikubonekamo na mbapanja.” Loli ikipanga kyaketagha itolo ukuti fili kanunu ku nkamu uyu ukuya nkipanga. Kangi lumo bamo binong’onagha ukuti Kyala wakisa kangi ikubapilikisya abandu abasita bugholofu. Loli Yehova atikwitikisya ukuti ababombi bake babombeghe ubutulanongwa. Ifindu fyakukosya isoni ifi fyabombiwe, fyalyonenge imbili inunu iya kipanga. Kangi abaghile ukuti onangagha akayilo ka bakamu aba bangalagha nawe. Ngimba Pauli akibulile ikipanga ukubomba isyafiki?

5. Ngimba Pauli akibulile ikipanga ukubomba isyafiki, kangi asanusyagha isyafiki? (1 Bakorinti 5:13) (Keta kangi ikithuzi.)

⁵ Belenga 1 Bakorinti 5:13. Ukwendela mwa mbepo mwikemo, Pauli alembile kalata nukulingania ukuti uyu atikulapa epusiwe nkipanga. Ngimba Abakristu balondiwagha ukubomba nawe bulebule? Pauli ababulile ukuti “bangonganagha” nawe. Ngimba isi syasanusyagha isyafiki? Pauli alingenie ukuti ululaghilo ulu lukongelelapo ukuti “nafi fyakulya mungalyagha nawe.” (1 Kor. 5:11) Ukulya pampene numundu bo uyu ifyakulya kubaghile ukupangisya ukuti mwande ukwangala nawe. Pauli asanusyagha ukuti ikipanga kikalondiwagha ukubomba nawe pampene ifindu. Isi syayagha pakukifighilila ikipanga kufindu ifibibi. (1 Kor. 5:​5-7) Kangi isi syayagha pakuntula ukuti asyaghanie ukuti abombile ifindu ifibibi kwa Yehova kangi abaghile ukukosiwa isoni nukulapa.

6. Ngimba ikipanga nuntulanongwa bapalamasiwe bulebule nakalata wa Pauli?

 ⁶ Bo atumile kalata ku Bakristu ba ku Korinti, Pauli alyandile ukwinong’onela muno ikipanga kyayagha pakubombela panongwa ya isi alembile. Bo akabalilo kakindilepo, Titi alisile ninkhani iyakuhobosya fiyo. Ikipanga kyalyambilile kanunu kalata wa Pauli. (2 Kor. 7:​6, 7) Abene bakongile ubulongosi bwa Pauli. Kangi bo imyesi minandi yikindilepo ukufuma apa Pauli atumile kalata, uyu abombile ubutulanongwa alapile. Umwene achenjile akayilo kake kangi alyandile ukukonga injila sya Yehova. (2 Kor. 7:​8-11) Ngimba ukufuma apo Pauli akibulile ikipanga ukubomba isyafiki?

ISI IKIPANGA KYALONDIWAGHA UKUBOMBA NUMUNDU UYU ALAPILE

7. Ngimba ukumwepusya untulanongwa nkipanga kwali nifyakukongapo ifinunu filiku? (2 Bakorinti 2:​5-8)

⁷ Belenga 2 Bakorinti 2:​5-8. Pauli ayobile ukuti “umundu bo yuyuyu lumfwene ulufundo ulu afundiwe nabandu ba bingi.” Mmasyu aghangi, ulufundo ulu lwafwanisye  ubwighane bwake. Ubwighane bwakuti fiki? Ukuti alape ubutulanongwa bwake.—Hib. 12:11.

8. Ngimba Pauli akibulile kangi ikipanga ukubomba isyafiki?

⁸ Yonongwa yake Pauli akibulile ikipanga ukuti: “Munsweghe nukunsubisya” unkamu uyu onangile, kangi “munangisyeghe ulughano lwinu.” Mukulondiwa ukumanya ukuti Pauli alondagha ukuti ikipanga kibombeghe nyingi ukukinda ukumwambilila itolo umundu nkipanga. Pauli alondagha ukuti abakamu banangisyeghe ukuti banganile nukunhobokela ukwendela mfyakubomba nifyakuyoba. Isi sibaghile ukunangisya naloli ukuti ambililiwe nkipanga.

9. Nongwa yafiki bamo bakabilagha ukunhobokela untulanongwa?

⁹ Ngimba bamo nkipanga bakabile ukunangisya ukuti bamwambilile uyu alapile ukuti aghomokele kangi nkipanga? Amalemba ghatikuyobapo, loli lumo syo isi syabombiwe. Panongwa yakuti ifi abombile fyatwele indamyo nkipanga kyosa kangi nisoni ku bandu bamo. Bamo babaghile ukuketa ukuti kukali kununu ukumwambilila kangi nkipanga papo abene bakindililagha ukuya belu nkipanga. (Fwanikisya na Luka 15:​28-30.) Nongwa yafiki kwali kwakulondiwa ukuti ikipanga kinangisye ulughano ku nkamu uyu?

10-11. Ngimba findu fiki fyayagha pakubombiwa linga abakulumba bakanile ukunhobokela uyu alapile?

¹⁰ Inong’onela isi syayagha pakubombiwa linga abakulumba bakanile ukumwitikisya unkamu uyu alapile ukuti aghomokele, pamo linga aghomokile ikipanga kikalinnangisye ulughano. Ayagha pakusulumania nukuwa amaka. Ayagha pakwiketa ukuti akabaghila ukumbombela kangi Yehova. Kangi abaghile ukuwa amaka nukutoliwa ukuya kangi pabumanyani ubununu na Yehova.

¹¹ Linga abakamu na balumbu bayagha pakukana ukunhobokela uyu alapile, bayagha pakonanga ubumanyani bwabo na Yehova. Nongwa yafiki? Panongwa yakuti bayagha pakukonga akayilo ka Setano mmalo mwakunkonga Yehova pa nkhani yakuhobokela aba balapile. Bayagha pakuya kilwilo iki Umohesi ayagha pakubombela ukuti ammonange unkamu mwambepo.—2 Kor. 2:​10, 11; Ef. 4:27.

12. Ngimba ikipanga kibaghile ukunkonga bulebule Yehova?

¹² Ngimba mo munjila yiliku iyi ikipanga kya ku Korinti kyayagha pakunkonga Yehova, komma Setano? Mwakukonga injila iyi Yehova ikubombesyela ku aba balapile ubutulanongwa bwabo. Keta isi aba balembile Ibaibolo bayobile isyakufwana na Yehova. Davidi ayobile ukuti, “uli nnunu naloli kangi kuswa imbibi sya bandu.” (Sal. 86:5) Mika alembile ukuti: “Yo Kyala aliku uyu afwene nanuwe, uyu ikuswa imbibi sya aba basyeleko?” (Mika 7:18) Kangi Yesaya atile: “Untulanongwa wesa ayileke injila yake iyi asileke ninyinong’ono syake iniongafu isi ikwendamo, aghomokele kwa Yehova Kyala, ko kuti alwaghe ulupakisyo, aghomokele kwa Yehova Kyala witu po umwene isakunhobokela fiyo.”—Yes. 55:7.

13. Nongwa yafiki kwali kununu ukuti uyu alapile bangomokesye nkipanga? (Keta ibokosi ilyakuti “ Ngimba Unkamu wa ku Korinti Balingomokisye Ndili Nkipanga?”)

¹³ Ukuti bankonge Yehova, Abakristu ba kipanga kya ku Korinti balondiwagha ukumwambilila kangi nkipanga unkamu uyu alapile nukunnangisya ulughano. Mwakukonga ubulongosi bwa Pauli ubwakumwambilila kangi uyu alapile, ikipanga kyanangisye  “ukupilikila muli syosa.” (2 Kor. 2:9) Bwanaloli ukuti imyesi minandi itolo yo yakindilepo ukufuma apa alyepusiwe, loli ulufundo lwalintulile ukulapa. Yonongwa yake kikalipo ikifukwa ikyakuti aleke ukughomokela kangi nkipanga.

MUNO TUBAGHILE UKUKONGELA UBUGHOLOFU NIKISA KYA YEHOVA

14-15. Ngimba tukumanyilako isyafiki ku isi syabombiwe ku Korinti? (2 Peteri 3:9) (Keta kangi ikithuzi.)

¹⁴ Muno balongile inkhani ya ku Korinti, yalembiwe ukuti “luyeghe lumanyisyo kumyitu.” (Rom. 15:4) Ukufuma munkhani iyi tukumanyila ukuti Yehova atikwitikisya aba babombile ubutulanongwa ubunywamu ukukindilila ukuya nkipanga. Atikwitikisya ukuti abatulanongwa aba batikulapa banangisiwe “ikisa” nukukindilila ukubombela pampene na babombi bake abasubiliwa. Nalinga ukuti Yehova wakisa, loli atikwitikisya utuyilo utubibi. Ifundo syake pankhani ya nunu ni mbibi sitikuchenja. (Yuda 4) Bwanaloli ukuti ukubomba isi kukaya kunangisya ikisa panongwa yakuti kubaghile ukubika ikipanga pangozi.—Mbu. 13:20; 1 Kor. 15:33.

¹⁵ Loli tukumanyila ukuti Yehova atikulonda ukuti aliwesa apyutiwe. Umwene ikulonda ukubapoka abandu munjila yiliyosa iyi abaghile ukufwanisya. Ikubanangisya ikisa  abandu aba bachenjile nukulonda ukuya kangi pabumanyani numwene. (Eze. 33:11; Belenga 2 Peteri 3:9.) Pakabalilo aka unkamu wa ku Korinti alapile nukuleka injila syake imbibi, Yehova alimbombesyile Pauli ukukibula ikipanga ukuti unkamu uyu alondiwagha ukwambililiwa nkipanga nukunhobokela.

16. Ngimba tukwipilika bulebule pa isi syabombiwe ku nkamu wa ku Korinti?

¹⁶ Ikifwanikisyo kya kipanga kya ku Korinti kikututula ukuketa ukuti Yehova walughano, ngolofu kangi ikubomba ifindu mbwanaloli. (Sal. 33:5) Ukumanya isi kukutupangisya ukuti tukindilileghe ukunndaghisya Yehova. Aliwesa wa uswe ntulanongwa kangi ikulondiwa uluhobokelo ulwakufuma kwa Yehova. Aliwesa ali nififukwa ifyakunndaghisya Yehova panongwa ya kitabulilo iki kikupangisya ukuti tuhobokeliweghe. Syakusubisya kangi syakukasya ukumanya ukuti Yehova abaghanile ababombi bake kangi ikubalondela ifinunu.

17. Ngimba twisakuyobesania isyafiki munkhani isyakukongapo?

¹⁷ Ngimba amasiku agha bikubomba bulebule ninkhani sya bandu aba babombile ubutulanongwa ubunywamu? Ngimba abakulumba bakipanga babaghile ukunkonga bulebule Yehova ukuti bantule untulanongwa ukuti alape? Ngimba ikipanga kikulondiwa ukubomba isyafiki linga abakulumba basalile ukumwepusya pamo ukungomokesya umundu nkipanga? Amalalusyo agha ghikuya pakwamuliwa munkhani isyakukongapo.