Untumiwa Pauli abalembile Abakristu ba ku Tesalonike ukuti: “Linga yumo atikughitika amasyu ghitu agha mwa kalata yuyuyu, yo muye maso nawe, mungangalagha nawe.” (2 Tes. 3:14) Pakwanda, twatighi ubulongosi ubu bukubuka ku bakulumba. Kunyuma, abakulumba bayobagha inkhani iyakusoka linga umundu yumo ikukindilila ukukana ukukonga ifundo sya mu Baibolo nalinga ukuti bikunsoka. Ukufuma apo, umfumusi aliwesa alekagha ukwangala nawe.

Loli kwakulondiwa ukuti tuchenje. Ubulongosi bwa Pauli ubu, bukunangisya ukuti Unkristu aliwesa ikulondiwa ukusala mwene pa isi sibombiwe. Yonongwa yake abakulumba batikulondiwa ukuyoba inkhani iyakubasoka. Nongwa yafiki tukuchenja muno twalipilikisyilagha ilemba lya 2 Batesalonike 3:14? Inong’onela isi Pauli ayobagha bo ikubapa ubulongosi ubu buli mu vesi ili.

Pauli aketile ukuti bamo nkipanga bali “babwapufu ulwendo lwabo.” Abapagha ubulongosi ukufuma Mmasyu gha Kyala, loli abene bakabukongagha. Pabulendo bwake bumo, ababulile ukuti: “Uyu linga mwaghile ukuti atikulonda ukubomba imbombo, yo angalyagha ifyakulya.” Loli pope bamo bakanagha ukubomba imbombo ukuti bafyaghe ifyakulondiwa pabumi bwabo nalinga ukuti babaghile ukufwanisya. Mwakongelelapo, abene bingililangapo pankhani sya bangi. Ngimba Abakristu balondiwagha ukubomba bulebule ifindu nabandu aba bali babwapufu ndwendo lwabo?—2 Tes. 3:​6, 10-12.

Pauli atile, “Yo muye maso nawe.” Ilisyu lya Nkigriki ili, likusanusya ukuti tukulondiwa ukuya maso ukuti tuleke ukusofanisiwa nutuyilo utubibi utu tutubwene mmundu yumo. Pauli akibulagha ikipanga ubulongosi ubu komma abakulumba bene. (2 Tes. 1:1; 3:6) Yonongwa yake linga Unkristu aliwesa ambwene umwinake atikukonga ubulongosi bwa Kyala, abaghile ukusala pamwene ukuleka “ukwangala nawe.”

Ngimba isi syasanusyagha ukuti bambombeleghe ifindu bo muno bikubombela numundu uyu epusiwe nkipanga? Hayi. Yonongwa yake Pauli alyongelile ukuti: “Loli munsokeghe ukufwana bo wamyinu.” Yonongwa yake Abakristu babaghile ukukindilila ukuya pampene numundu bo uyu pangomano na mubufumusi. Loli babaghile ukusala ukuleka ukwangala nawe. Nongwa yafiki? Pauli atile, “kokuti isoni sinkoleghe.” Panongwa yakuleka ukwangala nawe, Unkristu uyu atikukonga ifundo sya mu Baibolo abaghile ukukosiwa isoni panongwa ya tuyilo twake nukuchenja injila syake.—2 Tes. 3:​14, 15.

Ngimba twe Bakristu tubaghile ukubukonga bulebule ubulongosi ubu amasiku agha? Ikyakwanda, tukulondiwa ukusimikisya ukuti akayilo “kabubwapufu,” kabibi fiyo bo muno Pauli ayobile. Umwene akayobagha isya bandu aba tukindene nabo amabyebye pankhani ya kusala ifyakubomba pamo aba tukindene nabo pankhani ya muno tukufiketela ifindu. Mwakongelelapo, umwene akabayobagha abandu aba batukalalisye. Mmalo mwake, Pauli abayobagha abandu aba bikuleka ukukonga ubulongosi bwa Kyala ubu bukupilikiwa kanunu.

Linga amasiku agha tumbwene Unkristu yumo umwinitu uyu ikunangisya akayilo kakuleka ukupilikila, a umundu aliwesa abaghile ukusala mwene ukuleka ukwenda pamo ukwangala nawe. Panongwa yakuti umundu aliwesa ikulondiwa ukusala pamwene, tutikulondiwa ukuyobesania naba mumbumba yitu aba tukubungana nabo. Kangi tutikulondiwa ukwangala numundu bo uyu pangomano pamo mubufumusi. Linga achenjile injila syake, tubaghile ukwanda kangi ukwangala nawe bo muno twabombelagha kunyuma.