1919—Ifyinja 100 Ifi Fikindilepo
Mu 1919 ubwite ubunywamu ubwakwanda (ubwa pa kisu kyosa), ubu bwakindilile ukubombiwa kwa fyinja 4, bwamalike. Bo ifyinja fikindilepo, ifisu fyalekile ubwite kangi pa Januwale 18, 1919, bapangile akabughatila ka Paris Peace Conference. Ikindu kimo iki bayobesenie lwali Lufingo lwa Versailles, ulu lwamasisye ubwite ubu bwalipo pa Fyisu ifi fyakolelanagha na Germany. Isi bayobesenie mu Juni 28, 1919.
Palukomano ulu balyandisye akabughatila akapya aka kakoleliwagha ukuti League of Nations. Ubwighane bwa kabughatila aka bwali bo bwakuti bande ukukolelana nukukusya uletengano ulwa pa kisu kyosa ikyapasi kangi nukufighililiwa.” Amatchalichi mingi ghalyandile ukukolelana na kabughatila aka. Akabughatila ka matchalichi gha ku America kalitikisye ukuti “akabughatila akapya aka kikukolelana nu bwighane bwa Kyala pa kisu kyapasi.” Kangi akabughatila aka katulilepo mwakwandisya ifundo isyakutwala ulutengano pa kisu kyosa. Ikindu kimo iki bayobesanie palukomano ulu kyali kyakuti “bande ukubomba ifindu ifipya pa kisu kyosa ikyapasi.”
Balyandile ukubomba ifindu ifipya, loli batoliwe ukukolelana na banyambala bamo aba beghangapo ikighaba palukomano ulu. Mu 1919 imbombo yitu iyakufumusya yalyandile bo Yehova abapele ababombi bake amaka ukuti bande ukufumusya ukukinda kunyuma. Loli ikyakwanda Abamanyili ba Baibolo balondiwagha ukuchenja ifindu fimo ifi fikali fyakulondiwa pabumi bwabo.
ISI BABOMBILE BO BAYOBESENIE
Joseph F. Rutherford
Pa Chobeluka, Januwale 4, 1919 imbatiko iyakusala undongosi wa Watch Tower Bible and Tract Society yabikiwe. Pakabalilo aka, Joseph F. Rutherford, uyu abalongosyagha ababombi ba Yehova apinyiwe kisita nongwa ku Atlanta, Georgia, U.S.A., nabinake 7. Abakamu balondiwagha ukusala linga abakamu aba bapinyiwe balondiwagha ukukindilila pabudindo bwabo pamo hayi.
Evander J. Coward
Bo ali mu jele, Unkamu Rutherford apasyagha isyakufwana namuno igulu lyayagha pakukindilila. Umwene asimenye ukuti abakamu bamo bayagha pakuketa ukuti kununu ukuti basale umundu uyungi ukuti aye ndongosi. Pakifukwa iki, alembile kalata ku bosa aba babungene, nukusakisya ukuti Evander J. Coward yo aye ndongosi. Rutherford ayobile ukuti Coward ali “mololo,” “nsubiliwa,” kangi “wakwiyipa kwa Kyala.” Loli, abakamu bingi bali naminong’ono aghangi, abene balinong’wine ukuti bime tasi, basasale undongosi linga imyesi 6 yikindilepo. Abakamu aba bali kulubafu lwa bakamu aba bapinyiwe bope balitikisye. Loli bo bikuyobesania isyakuti babombe, abakamu bamo bakahobwike.
Richard H. Barber
Alexander H. Macmillan
Ukufuma apo umpinyiwa unnine A. H. Macmillan ikukumbukila ukuti isiku ilyakukongapo unkamu Rutherford agogodile ku kibumba kya jele muno balimwighalile nukuyoba ukuti, “Sosya ikiboko kyako panja.” Unkamu Rutherford alimpele kalata. Macmillan aketile amasyu amapimba agha kangi mwanakalinga asyaghenie isi ghasanusyagha. Amasyu agha ghali ghakuti: “RUTHERFORD WISE VAN BARBER ANDERSON BULLY AND SPILL DIRECTOR FIRST THREE OFFICERS LOVE TO ALL.” Isi syasanusyagha ukuti abalongosi bosa basaliwe kangi Joseph Rutherford, na William Van Amburgh baghomokile pabudindo bwabo. Yonongwa yake, Unkamu Rutherford akindilile ukuya ndongosi.
UKWABULIWA
Bo abakamu 8 bali mu jele, Abamanyili ba Baibolo babasumile abakamu na balumbu ukuti balembe abakalata ku boma abakusuma ukuti abakamu aba babuliwe. Abakamu na balumbu abakukinda 700,000 balembile abakalata. Pa Chitatu, Malichi 26, 1919, bo bakali ukutuma abakalata, Unkamu Rutherford na bakamu abangi aba bali nubudindo balyabuliwe.
M’masyu ghake bo ikuyoba ku bakamu na balumbu aba balimwambilile ku kaya, Unkamu Rutherford atile: “Nhobwike fiyo panongwa yakuti isi twaghene nasyo sikuya pakututula ukuti twitendekesye indamyo isi tukuya pakwaghana nasyo. . . Ukwiyipa kwinu kukali kwakuti mutusosye mu jele. Ubu bukali bwighane bwa mbombo yosa iyi . . . Ukwiyipa kwinu uku mwanangisyagha bwali bwighane bwakuti mufumusye ubwanaloli, kangi bosa aba babombile isi bambilile ulusayo.”
Indamyo syosa isi abakamu bitu baghanagha nasyo syanangisyagha ukuti Yehova yo abalongosyagha. Pa Meyi 14, 1919, ikhoti lyatumwile ukuti: “Abakamu bitu bakalongiwe kanunu, yonongwa yake lyaketile ukuti inongwa iyi yilongiwe kangi.” Abakamu aba bali pandamyo inywamu fiyo, kangi inongwa iyi yayagha pakumalika pene apa linga bayagha pakubaleka pamo linga bayagha pakulonga inongwa iyi. Loli inongwa iyi yikakindilile kangi. Ifyakukongapo fyake, Judge Rutherford afwanisye ukubafighilila abandu ba Yehova pa maso gha khoti inywamu ilya ku United States, isi syo abombagha utubalilo twingi bo abuliwe.
BALINKWIYIPA PAKUFUMUSYA
“Unkamu Macmillan atile, tukayagha pakwikala itolo kisita kubomba nayimo mwakungulila
Mwalafyale ukuti abuke nanuswe kumwanya.” kangi atile “Twaketile ukuti twalondiwagha ukubombapo simo ukuti tukindilile ukumanyila amasyu gha Kyala.”Loli abakamu ba ku ofesi inywamu bakakindilile ukubomba imbombo iyi babombagha kwa fyinja fingi. Nongwa yafiki? Panongwa yakuti pakabalilo aka bali mujele, ifindu ifi babombelagha pakupulinta amabuku fyalyonangike. Isi syabawisisye fiyo amaka, kangi abakamu bamo binong’onagha ukuti imbombo yakufumusya yimalike.
Ngimba aliwesa akindilile ukuhoboka nimbombo yakufumusya iyi Abamanyili ba Baibolo babombagha? Ukuti tumanye isi, Unkamu Rutherford ayobile inkhani. Umundu aliwesa ali mwabuke ukuti akapilikisye inkhani iyi. “Linga nayumo akayagha pakwisa kulukomano ulu,” Unkamu Macmillan atile, “twayagha pakumanya ukuti imbombo yakufumusya yimalike.”
Inyuzipepala yikunangisya Unkamu Rutherford bo ikuyoba inkhani iya mutu wakuti “The Hope for Distressed Humanity” ku Los Angeles, California, mu 1919
Pasabata pa, Meyi 4, 1919, nalinga abinile fiyo, Unkamu Rutherford ayobile inkhani iya mutu wakuti “The Hope for Distressed Humanity” ku Los Angeles, ku California. Abandu bingi balisile palukomano ulu loli bakapilikisye panongwa yakuti amalo ghakwikala ghali manandi. Isiku ilingi, abandu abangi abakufwana 1,500 balisile ku lukomano ulu. Abakamu balyamwile amalalusyo agha abandu balalusyagha kangi abandu bingi bahobwike fiyo!
Isi abakamu babombile syapalamasisye fiyo muno Abaketi ba Yehova bikubombela imbombo yabo iyakufumusya mpaka lino.
IFINDU FYAMWAMBEPO FYAKINDILILE UKWENDA KANUNU
Ingasya ya Ndindilili iya chizungu iya Ogasiti 1, 1919, yafumwisye ukuti kubwandilo bwa Seputembala, Ulukomano lwakighaba lwayagha pakubombiwa ku Cedar Point, Ohio. Um’manyili wa Baibolo uwa ku Missouri uyu ingamu yake
ali yo Clarence B. Beaty atile, “Aliwesa alitendekisye ukuti akaghiwepo palukomano ulu,” kangi atile, abakamu na balumbu abakukinda 6,000 balisile palukomano ukufuma kumalo aghakubutali. Mwakongelelapo umwene atile, ikindu iki kyapangisye ukuti ulukomano lunosye fiyo kyali kyo kyakuti, abandu abakukinda 200 balyosiwe mwasumbi wa Erie.Muno magazini iya The Golden Age, yabonekelagha ukufuma mu Okutobala 1, 1919
Pa Seputembala 5, 1919, pisiku lya nambala 5 Unkamu Rutherford afumwisye isya Magazini imbya, iyi yali nu mutu wakuti, The Golden Age. * Yali namasyu aghakulondiwa fiyo, yalingenie kanunu isya masyu gha Kyala nifindu ifingi muno fyendelegha.”
Abamanyili bosa ba Baibolo bakasiwe fiyo pakufumusya mwabukifu ukwendela mu magazini iyi. Ikalata iyakulingania muno imbombo yendelagha yatile: “Aliwesa uyu osiwe ali nulusako ulwa kufumusya amasyu gha Kyala.” Abandu bingi balitikisye ukuti bafumusyeghe amasyu gha Bunyafyale! Ukufika mu Disembala, abafumusi bakwiyipa balyambilile amagazini amapya aghakukinda 50,000.
bakamu ku Brooklyn, New York, bimile pagalimoto iyi yipimbile magazini iya The Golden Age
Kubumalilo bwa kyinja kya 1919, ababombi ba Yehova balyandile ukubala fiyo. Mwakongelelapo, amabusololi mingi aghakuyoba isya masiku ghabumalikisyo ghafwanisiwe. Ukugheliwa nu kwabuliwa kwa babombi ba Kyala, uku kukuyobiwa pa Malaki 3:1-4, kwafwanisiwe. Ababombi ba Yehova balyabuliwe kubutumwa ku “Babeloni Unkulumba,” kangi Yesu asalile “umbombi unsuliwa nuwamahala.” * (Ubuset. 18:2, 4; Mat. 24:45) Abamanyili ba Baibolo balyandile ukubomba imbombo iyi Yehova alondagha ukuti babombeghe.