1. Ngimba tukumanya bulebule ukuti tuli “m’masiku ghakubumalikisyo”?

NGIMBA mwapapiwe bo ikyinja kya 1914 kikindile? Linga mosiyilile, ko kuti mwikele nubumi ukufika “m’masiku ghakubumalikisyo” nkabalilo aka. (2 Tim. 3:⁠1) Twesa twaghenepo nindamyo kangi tupilikemo isyakufwana nifindu ifi Yesu ayobile ngani ukuti fikwisa kubombiwagha nkabalilo aka. Ifi fikongelelapo ubwite, injala, utusenyenda, imbungo imbela filalilali, imbela lutende, kangi nukufwimiwa kwa babombi ba Yehova. (Mat. 24:​3, 7-9, 12; Luka 21:​10-12) Kangi tukuketa abandu aba bikubomba ifindu mwakufwana itolo na isi untumiwa Pauli ayobile. (Keta ibokosi ilyakuti “Muno Abandu Bayilile Lino.”) Pakuya babombi ba Yehova, tusyaghenie ukuti tukwikala “m’masiku ghakubumalikisyo.”​—⁠Mika 4:⁠1.

2. Ngimba malalusyo ghaliku agha tukulondiwa ukwamuliwa?

² Panongwa yakuti pakindile akabalilo katali ukufuma mu 1914 ukufika lino, tukwikala nkabalilo ka “m’masiku ghakubumalikisyo.” Panongwa yakuti ubumalilo buseghelile fiyo, tukulondiwa ukumanya amaansala gha malalusyo aghakulondiwa fiyo bo agha: Ngimba findu fiki ifi fisakubombiwa kubumalilo bwa “masiku ghakubumalikisyo”? Kangi ngimba Yehova ikulonda ukuti tubombe isyafiki bo tukughulila ifindu ifi fikuya pakubombiwa?

3. Ukufwana nubusololi ubu buli pa 1 Batesalonike 5:​1-3, ngimba masyu ghaliku agha abalongosi ba nkisu bisakuyoba?

³ Belenga 1 Batesalonike 5:​1-3. Pauli ayobile isya “isiku lya Yehova.” Ukufwana namuno balibombile imbombo mu vesi ili, isi sikuyoba isya kabalilo aka “Babeloni Unkulumba,” unna wabalowe  kangi unna wafinyanyasi fya nkisu isakusambukiliwa, kangi isakumalika pisiku lya Armagedoni. (Ubuset. 16:​14, 16; 17:⁠5) Bo “isiku” ili likali ukufika, amaboma ghisakutighi “Patengene pali kanunu itolo!” (Abandu bamo aba bikusanusya amabuku bikuti: “ulutengano nukufighililiwa.”) Abalongosi ba nkisu utubalilo tumo bikubombela amasyu agha linga bikulonda ukuti ifisu fiye pabumanyani. * Loli, ghisakuya ghakukindana na masyu aghakuti “patengene pali kanunu itolo” agha Ibaibolo likulingania. Nongwa yafiki? Linga isi sibombiwe, abandu bingi bisakwinong’onagha ukuti abalongosi ba nkisu iki bafwanisye ukukifighilila kanunu ikisu. Loli ukuyoba ubwanaloli, aka ko kabalilo aka “ubutolwe ubukulumba” bwisa kwanda, ukufuma apo pisakuya “ulonangiko” pa kisu kyosa.​—⁠Mat. 24:⁠21.

4. (a) Ngimba tukulondiwa ukumanya isyafiki isyakufwana na masyu aghakuti “patengene pali kanunu itolo”? (b) Ngimba tusimenye isyafiki isyakufwana na masyu agha?

⁴ Tufimenye ifindu fimo ifi amasyu aghakuti “patengene pali kanunu itolo” ghikusanusya. Loli, ifindu fimo tukafimanya. Tukafimanya ifi fisakubapangisya abalongosi ba nkisu ukuti bayobe amasyu agha. Kangi tutikumanya linga abene bisakubombela injila yimoyene pamo nyingi ukuti bafumusye amasyu agha. Muli mosa muno fikwisa kuyila, uswe tumenye ukuti: Tutikulondiwa ukusubila ukuti abalongosi ba nkisu babaghile ukutwala ulutengano. M’malo mwake, Ibaibolo likutubula ukuti tuyeghe maso. Isi sikunangisya ukuti “isiku lya Yehova” lili pipi ukwanda!

5. Ngimba ilemba lya 1 Batesalonike 5:​4-6 likututula bulebule ukuti twitendekesye “Isiku lya Yehova”?

⁵ Belenga 1 Batesalonike 5:​4-6. Amasyu gha Pauli ghikutubula isi tukulondiwa ukubomba ukuti twitendekesye “Isiku lya Yehova.” Tutikulondiwa “ukughona utulo bo abangi.” Loli “tuyeghe maso” kangi twighelanieghe muli syosa. Mwakifwanikisyo, tukulondiwa ukuya maso fiyo ukuti tungeghangapo ikighaba pa findu fya ndyali. Linga tukweghapo ikighaba tukuya pakuya “ba nkisu.” (Yoh. 15:19) Tusimenye ukuti Ubunyafyale bwa Kyala bwene bo bwisa kutwala ulutengano pa kisu.

6. Ngimba tukulondiwa ukubatula abangi ukuti babombe isyafiki, kangi nongwa yafiki?

⁶ Ukongelelapo pakuya maso, tukulondiwa kangi ukubatula abangi ukuti baye maso ukufwana na isi Ibaibolo lyayobile ngani ukuti sikwisa kubombiwa nkisu. Tukumbukeghe ukuti linga ubutolwe ubukulumba bwandile, katisakuyako akabalilo akakuti abandu baseghelele kwa Yehova. Yonongwa yake imbombo iyakufumusya yakulondiwa fiyo lino! *

7. Ngimba Yehova ikughulila ukuti tubombeghe isyafiki lino?

⁷ Bo akabalilo kasyele panandi ukuti “isiku” lyake lifike, Yehova ikulonda ukuti tukindilileghe  ukufumusya kisita kuleka. Tukulondiwa ukumanya ukuti “tukukindilila ukubomba imbombo ya Mwalafyale.” (1 Kor. 15:58) Yesu ayobile isi tukulondiwa ukubomba. Bo ikuyoba isya findu ifi fikuya pakubombiwa m’masiku ghakubumalikisyo agha, umwene atile: “Loli fikuti amasyu amanunu ghalumbililiweghe tasi mfikolo fyosa.” (Mar. 13:​4, 8, 10; Mat. 24:14) Inong’onela isi: Linga akabalilo kosa mukubuka mubufumusi, mukutula fiyo ukufwanisya ubusololi bwa mu Baibolo ubu!

8. Ngimba imbombo yakufumusya amasyu gha Bunyafyale yikubuka bulebule pankyeni?

⁸ Ngimba tubaghile ukuyoba isyafiki isyakufwana namuno imbombo yakufumusya iya Bunyafyale yikubukila pankyeni? Ikyinja kilikyosa, abandu bingi bikupilikisya amasyu amanunu agha Bunyafyale. Mwakifwanikisyo, inong’onela muno inambala yabafumusi yikubalila pa kisu kyosa m’masiku ghakubumalikisyo agha. Mu 1914, abafumusi balipo 5,155 mfisu 43. Amasiku agha, abafumusi balipo 8.5 miliyoni mfisu ifyakufwana 240! Nalinga mo siyilile loli imbombo yitu iyakufumusya yikali yikukindilila. Tukulondiwa ukukindilila ukubafumukisya abandu ukuti Ubunyafyale bwa Kyala bwene bo bwisa kumasya indamyo sya bandu.​—⁠Sal. 145:​11-13.

9. Nongwa yafiki tukulondiwa ukukindilila ukufumusya amasyu gha Bunyafyale?

⁹ Imbombo yitu iyakufumusya yikuya pakukindilila mpaka pakabalilo aka Yehova isakuyobela kuti yimalike. Ngimba kabalilo kaliku aka kasyele ukuti abandu bam’manye Yehova na Yesu? (Yoh. 17:⁠3) Tutikumanya. Loli tumenye ukuti linga ubutolwe ubukulumba bwandile, umundu aliwesa uyu “imikiliwe kubumi bwa bwila” abaghile ukupilika amasyu amanunu nukusala ukumbombela Yehova. (Imbo. 13:48) Ngimba tubaghile ukubatula bulebule abandu aba bo akabalilo kakali ukumalika?

10. Ngimba butuli buliku ubu Yehova ikutupa ukuti tubamanyisyeghe abandu ubwanaloli?

¹⁰ Ukwendela mu gulu lyake, Yehova ikutupa fyosa ifi tukulondiwa ukuti tubamanyisyeghe abandu ubwanaloli. Mwakifwanikisyo, tukwambilila ubulongosi sabata aliwesa pangomano isya nkati mwasabata. Ingomano isi sikututula muno tubaghile ukuyobela pabulendo bwakwanda na pabulendo bwakughomokelako. Kangi tukumanyila muno tubaghile ukubombela ukuti tumanyile na bandu Ibaibolo. Igulu lya Yehova litupele kangi Amabuku Agha Tukubombela Pakumanyila na Bandu Ibaibolo. Amabuku agha ghikututula ukuti . . .

•   twande ukuyobesania na bandu,

• tuyobeghe munjila iyi abandu babaghile ukuhoboka nayo

• tubatuleghe abandu ukuti balonde ukumanya nyingi,

• tubamanyisyeghe ubwanaloli linga tukumanyila nabo Ibaibolo, kangi

• tubatuleghe bosa aba bikulonda ukumanya nyingi isya webusayiti yitu nukubakolela ku Nyumba sya Bunyafyale.

Bwanaloli ukuti, ukuya na mabuku agha kukaya kwakufwana. Loli tukulondiwa ukughabombela imbombo. * Mwakifwanikisyo, linga tumalile ukuyobesania nu mundu uyu ikulonda ukumanya nyingi, tukulondiwa ukumpa akatilakiti pamo amagazini, umwene abaghile ukukindilila ukubelenga ukufika apa tubaghile ukughomokelako kangi. Aliwesa ali nubudindo ubwakukindilila ukufumusya amasyu gha Bunyafyale umwesi ghulighosa.

11. Nongwa yafiki balyandisye ukuti abandu bamanyileghe Ibaibolo pa webusayiti?

¹¹ Yilipo injila iyingi iyi Yehova ikubatulila abandu ukuti bamanyile ubwanaloli, mwakifwanikisyo Ukumanyila Ibaibolo pa Webusayiti ya jw.org.^® Nongwa yafiki balyandisye ifimanyilo ifi? Umwesi ghulighosa, abandu bingi pa kisu kyosa bikulonda ukumanyila Ibaibolo pa webusayiti. Ifimanyilo fya pa webusayiti fibaghile ukubatula abandu ukuti bande ukumanyila ubwanaloli ubwa M’masyu gha Kyala. Bamo mwa bandu aba tukuyobesania nabo bakabaghila ukwitikisya mwanakalinga ukuti tumanyileghe nabo Ibaibolo. Linga mo siyilile mubanangisye amalo gha pa webusayiti yitu pamo mubatumile ilinki iya fimanyilo. *

12. Ngimba umundu abaghile ukumanyila isyafiki pa webusayiti?

¹² Pa webusayiti yitu iyi tukumanyila na bandu Ibaibolo pikwaghiwa inkhani isi: “The Bible and Its Author,” “The Bible’s Main Characters,” and “The Bible’s Message of Hope.” Ukufwana nifimanyilo ifi, abandu babaghile ukumanya:

• Muno Ibaibolo libaghile ukuntulila umundu

• Isya Yehova, Yesu, na bandumi

• Inongwa iyi Yehova apelile abandu

• Inongwa iyi tukutamiwa

Ifimanyilo ifi fikulingania kangi muno Yehova isakubombela ukuti. . .

• amasye indamyo ninifwa,

• abasyusye abafwe kangi

• asosyepo amaboma gha bandu nukubikapo Ubunyafyale bwake

13. Linga umundu amalile ukumanyila amasyu gha Kyala pa webusayiti, ngimba ikulondiwa ukumanyila kangi Ibaibolo nunketi wa Yehova? Lingania.

¹³ Linga umundu amalile ukumanyila ifimanyilo fya pa webusayiti, atikulondiwa ukumanyila kangi Ibaibolo nunketi wa Yehova. Yesu atupele ulusako ulwakupela abamanyili. Tuli nulusubilo losa ukuti abandu aba bikulonda ukumanya nyingi isyakufwana na masyu gha Kyala ukwendela pa webusayiti, bikundaghisya ifi bamanyile kangi bikulonda ukindilila ukumanyila. Linga mo siyilile lumo abene babaghile ukukwitisya ukuti tumanyileghe nabo Ibaibolo. Kubumalilo bwa kimanyilo kilikyosa, um’manyili ikulondiwa ukunsuma yumo ukuti amanyileghe nawe Ibaibolo. Isiku lililyosa igulu lya Yehova likwambilila abandu abakukinda 230 aba bikulonda ukuti bamanyileghe Ibaibolo isiku lililyosa! Umundu aliwesa uyu tukumanyila nawe Ibaibolo wakulondiwa fiyo!

14. Ukufwana nubulongosi bwa Yesu ubu buli pa Matai 28:​19, 20, ngimba tukughelaghela ukubomba isyafiki, kangi nongwa yafiki?

¹⁴ Belenga Matai 28:​19, 20. Linga tukumanyila na bandu Ibaibolo, tukulondiwa ukughelaghela ukuti “tupele abamanyili . . . , nukubamanyisya ukukonga syosa isi Yesu alaghile.” Tukulondiwa  ukubatula abandu ukuti bamanye ubununu ubwakuya kulubafu lwa Yehova nu Bunyafyale bwake. Isi sikusanusya ukughelaghela ukubakasya abandu ukuti babuketeghe ubwanaloli ukuya bwakulondiwa fiyo pabumi bwabo mwakukonga isi bikumanyila, nukwiyipa kwa Yehova mwakosiwa. Ukubomba isi ko kwene uku kubaghile ukubatula ukuti basapone pisiku lya Yehova.​—⁠1 Pet. 3:⁠21.

15. Ngimba tukabaghila ukufwanisya ukubomba isyafiki, kangi nongwa yafiki?

¹⁵ Ukufwana namuno tuyobile pakwanda, akabalilo kasyele kanandi fiyo ukuti ifindu ifibibi ifya nkisu iki fimalike. Yonongwa yake, tukabaghila ukufwanisya ukukindilila ukumanyila na bandu Ibaibolo aba batikulonda ukuchenja pabumi bwabo ukuti baye bamanyili ba Yesu. (1 Kor. 9:26) Imbombo yitu yakulondiwa fiyo! Balipo abandu bingi fiyo aba bikulonda ukupilika amasyu amanunu agha Bunyafyale bo akabalilo kakali ukumalika.

16. Ukufwana nilemba lya Ubusetuli 18:​2, 4, 5, 8, ngimba twesa tukulondiwa ukubomba isyafiki? (Keta amasyu gha pasi.)

¹⁶ Belenga Ubusetuli 18:​2, 4, 5, 8. Amavesi agha ghikuyoba isya kindu kimo iki Yehova ikulonda ukuti ababombi bake babombeghe. Abakristu bosa ababwanaloli batikulondiwa ukukolelana nikipanga kyabutungulu. Um’manyili wa Baibolo bo akali ukumanyila ubwanaloli abaghile ukuti ali nkipanga kyabutungulu. Umwene abaghile ukuti aghiwangapo panyiputo syabo na pafyakubombiwa ifingi. Lumo abaghile ukuti asangulagha indalama ku tchalichi lyake. Bo um’manyili wa Baibolo akali ukwitikisiwa ukuya mfumusi uyu akosiwa, ikulondiwa ukuleka ukuya kulubafu lwa kipanga kyabutungulu. Umwene ikulondiwa ukulemba kalata ku tchalichi lyake pamo ku gulu lililyosa ili likukolelana nikipanga kyabutungulu iyakubamanyisya ukuti akaya kangi kulubafu lwabo. *

17. Ngimba mbombo simo siliku isi Unkristu atikulondiwa ukubomba, kangi nongwa yafiki?

¹⁷ Unkristu wa bwanaloli ikulondiwa ukuketesya ukuti imbombo iyi ikubomba yitikukolelana nikipanga kyabutungulu. (2 Kor. 6:​14-17) Mwakifwanikisyo, umwene atikulondiwa ukweghapo ikighaba pambombo sya ku tchalichi. Mwakongelelapo, Unkristu uyu ikubomba ibizinesi na bangi atikulondiwa ukubomba ifindu ifi fikukasya ukwiputa kwabutungulu. Kangi linga ali nibizinesi yake, umwene atikulondiwa ukubomba ifindu pamo ukwitikisya imbombo iyi yikukolelana nikipanga kyabutungulu. Nongwa yafiki tutikulondiwa ukubomba isi? Panongwa yakuti tutikulonda  ukweghapo ikighaba pa fimanyisyo ninyiho isyabutungulu isi sitikukolelana nukwiputa kwa bwanaloli .​—⁠Yes. 52:11. *

18. Ngimba unkamu yumo akongile bulebule ubulongosi bwa mu Baibolo ukufwana nimbombo yake?

¹⁸ Ifyinja ifi fikindilepo, unkulumba wa kipanga uyu ali nibizinesi yake umundu yumo alinsumile ukuti akabombe imbombo iyakusongola ifipiki ku tchalichi mu tawuni iyi unkamu uyu ikilagha. Umundu uyu asimenye ukuti unkamu uyu akabalilo kosa akanagha ukubomba imbombo ku matchalichi. Loli pakabalilo aka umundu uyu atamiwe fiyo kangi akalimwaghile fundi uwakuti akabombe imbombo yake. Nalinga mo syayilile, loli unkamu uyu akindilile ukukonga ubulongosi bwa mu Baibolo nukukana ukwakubomba imbombo yila. Sabata wakukongapo, inyuzipepala yimo yanangisye ikithuzi ikya nsongola fipiki yumo akolile ikipingika iki bikubika mutchalichi. Linga unkamu witu uyu alitikisye ukubomba imbombo iyi, umwene yo ayagha pakuya pakithuzi iki kyali pa nyuzipepala iyi. Inong’onela muno Abakristu abinake bayagha pakwipilikila! Kangi inong’onela muno Yehova ayagha pakwipilikila.

19-20. (a) Ngimba tumanyile isyafiki? (b) Ngimba tukulondiwa ukumanyila kangi isyafiki?

¹⁹ Ibaibolo likuyoba kangi isya busololi ubungi ubwakulondiwa fiyo ubu bukuya pakufwanisiwa mwalululu na balongosi aba nkisu ubwakuti “patengene pali kanunu itolo.” Tukundaghisya fiyo panongwa ya isi Yehova atumanyisye, tumenye ukuti amaboma ghakabaghila ukufwanisya ukutwala ulutengano pa kisu. Ngimba tukulondiwa ukubomba isyafiki bo isi sikali ukubombiwa kangi bo ulonangiko lulipipi? Yehova ikughulila ukuti tukindilileghe ukufumusya amasyu gha Bunyafyale kisita kuleka nukughelaghela ukupela abamanyili bingi. Kangi tutikulondiwa ukukolelana nikipanga kyabutungulu. Isi sikongelelapo ukuleka ukuya kukighaba kya kipanga ikyabutungulu nukuleka ukubomba imbombo isi sikukolelana nikipanga kyabutungulu.

²⁰ Filipo ifindu ifingi ifi fikuya pakubombiwa kubumalilo bwa “masiku ghakubumalikisyo.” Kangi filipo ifindu ifingi ifi Yehova ikulonda ukuti tubombe. Ngimba findu filiku, kangi tubaghile ukwitendekesya bulebule ukufwana na fyosa ifi fikwisa nkyeni? Tukwisa kuketa mu nkhani iyakukongapo.