INKHANI IYAKUMANYILA 42
Ngimba Yehova Ikuya Pakubapangisya Ukuti Mufwanisye Isyafiki?
“Kyala . . . yo uyu ikubomba mmyinu, isi mukulonda na isi mukubomba.”—FILIP. 2:13.
ULWIMBO 104 Mzimu Utuŵa Ntchawanangwa Chakufuma kwa Chiuta
ISI TUKUYA PAKUMANYILA *
1. Ngimba Yehova abaghile ukubomba isyafiki ukuti afwanisye ubwighane bwake?
YEHOVA abaghile ukubomba kilikyosa ukuti afwanisye ubwighane bwake. Mwakifwanikisyo, umwene M’manyisi, Nsubisi kangi Mfumusi wa masyu amanunu. (Yes. 48:17; 2 Kor. 7:6; Gal. 3:8) Loli umwene utubalilo tosa ikubombela abandu ukuti bafwanisye ubwighane bwake. (Mat. 24:14; 28:19, 20; 2 Kor. 1:3, 4) Yehova abaghile kangi ukutupa amahala namaka agha tukulondiwa ukuti tufwanisye ubwighane bwake. Isi syo ingamu yake yikusanusya, ukufwana namuno abandu bingi bikuketela.
2. (a) Nongwa yafiki utubalilo tumo tubaghile ukukayikila ukuti tutikufwanisya ukumbombela Yehova? (b) Ngimba tukuya pakuyobesania isyafiki mu nkhani iyi?
2 Twesa tukulonda ukuti tumbombeleghe Yehova, loli bamo babaghile ukukayikila ukuti batikufwanisya ukumbombela Yehova. Nongwa yafiki? Panongwa ya fyinja fyabo, indamyo, pamo amaluso. Kangi bamo bikwikutisiwa na isi bikubomba nukutoliwa ukukindilila ukubuka pankyeni. Mu nkhani iyi, tukuya pakuyobesania muno Yehova abaghile ukuntulila umundu aliwesa ukuti afwanisye ubwighane bwake. Ukufuma apo, tukuya pakuketa muno Yehova abatulile mwakubapa amaka nubwighane ababombi bake abakunyuma ukuti babombe nyingi. Pabumalilo, tukuya pakuyobesania isi tubaghile ukubomba ukuti tumbombeleghe Yehova.
MUNO YEHOVA IKUTUTULILA
3. Ukufwana na Bafilipi 2:13, ngimba Yehova abaghile ukututula bulebule ukuti tuye nubwighane ubwakumbombela?
3 Belenga Bafilipi 2:13. * Yehova abaghile ukututula ukuti tuye nubwighane ubwakumbombela. Ngimba abaghile ukubomba bulebule? Lumo tubaghile ukuketa ukuti nkipanga mukulondiwa ubutuli bumo. Pamo abakulumba ba kipanga babaghile ukubelenga kalata iyakufuma ku ofesi ukuti tukafumusyeghe kumalo agha kukulondiwa ubutuli. Isi sibaghile ukutupangisya ukwilalusya ukuti, ‘Ngimba mbaghile ukutulapo bulebule?’ Pamo lumo batupele ububombeli bumo ubwakutamia, loli tukuketa ukuti tukabaghila ukufwanisya ukubomba kanunu ubobombeli ubu batupele. Pamo linga tukubelenga amavesi ghamo agha mu Baibolo, tubaghile ukwilalusya ukuti, ‘Ngimba mbaghile ukubombela bulebule amavesi agha ukuti mbatule abangi?’ Yehova akabaghila ukutufimbilisya ukuti tubombeghe kilikyosa. Loli linga umwene aketile ukuti tuli bakwiyipa, abaghile ukututula ukuti tufwanisye ukubomba isi tukulonda.
4. Ngimba Yehova abaghile ukutupa bulebule amaka ukuti tufwanisye ukumbombela?
4 Yehova abaghile kangi ukutupa amaka ukuti tufwanisye ukumbombela. (Yes. 40:29) Umwene abaghile ukututula na mbepo wake mwikemo ukuti tongelele amaluso ghitu. (Kuso. 35:30-35) Ukwendela mu gulu lyake, Yehova abaghile ukutumanyisya muno tubaghile ukubombela ububombeli bumo. Linga tukamanya muno tubaghile ukubombela ububombeli bumo, tusumeghe ubutuli. Kangi, tuyeghe babuke ukunsuma Tata witu wakumwanya ukuti atupe “amaka amakindilisi.” (2 Kor. 4:7; Luka 11:13) Ibaibolo lili nififwanikisyo fingi ifya muno Yehova abatulile abanyambala na bakikulu mwakubapa amaka nubwighane ukuti bafwanisye ukumbombela. Linga tukuyobesania ififwanikisyo ifi, ghela ukwinong’onela muno Yehova abaghile ukututulila mwakufwana itolo.
MUNO YEHOVA ABATULILE ABANYAMBALA BAMO
5. Ngimba tukumanyilako isyafiki ukufwana namuno Yehova alintulile Mose ukuti abalongosye abandu bake?
5 Yehova alinsalile Mose ukuti abalongosyeghe Abaisraeli. Loli ngimba Yehova alimbombesyile ndili? Ngimba pali po pakabalilo aka Mose “amanyisiwe namahala ghosa gha Baegiputi”? (Imbo. 7:22-25) Hayi, Yehova alinsalile Mose bo antulile ukuti aye mundu wakwiyisya kangi mololo (Imbo. 7:30, 34-36) Umwene alintulile Mose ukuti aye nkifu ukwakuyoba nundongosi uwamaka ku Egiputi. (Kuso. 9:13-19) Ngimba tukumanyilako isyafiki muno Yehova alintulile Mose kangi namuno alimbombesyile imbombo? Yehova ikubatula bosa aba bikunangisya utuyilo twake utununu kangi na aba bikunsubila.—Filip. 4:13.
6. Ngimba tukumanyilako isyafiki muno Yehova alimbombesyile Barazilayi ukuti antule Mwalafyale Davidi?
6 Nkabalilo kakunyuma, Yehova alimbombesyile Barazilayi ukuti antule Mwalafyale Davidi. Davidi na bandu bake bali “ninjala, bakatele kangi balyumilwe” pakabalilo aka bambopagha, Abisalomu. Barazilayi, uyu ali nkangale pakabalilo aka, abikile ubumi bwake pangozi ukuti antule Davidi na bandu aba ali nabo. Barazilayi akinong’onagha ukuti panongwa yakuti akangele ko kuti akali wakulondiwa kwa Yehova. M’malo mwake, umwene abombile ifindu ifi alinafyo ukuti abatule ababombi ba Yehova aba balondiwagha ubutuli. (2 Samu. 17:27-29) Ngimba tukumanyilako isyafiki? Nalinga ukuti tukangele, Yehova abaghile ukutubombesyela imbombo ukuti tubatule Abakristu abinitu, aba nkisu kyitu pamo naba mfisu ifingi aba bikulondiwa ubutuli. (Mbu. 3:27, 28; 19:17) Nalinga ukuti tukabaghila ukwaghana nabo bamo aba bikutamiwa, loli tubaghile ukutulapo mwakubika indalama ukuti situle pambombo iya pa kisu kyosa kuno kukulondiwa ubutuli.—2 Kor. 8:14, 15; 9:11.
7. Ngimba Yehova alimbombesyile bulebule Simeoni, kangi isi sibaghile ukutukasya bulebule?
7 Yehova alimbulile unnyambala unsubiliwa Simeoni, uwa ku Yerusalemu ukuti akayagha pakufwa bo akali ukumbona Mesiya. Isi sibaghile ukuti syalinkasisye fiyo Simeoni, panongwa yakuti aghulile kwa fyinja fingi ukuti asambone Mesiya. Yehova alinsayile fiyo panongwa yalwitiko nukwifimbilisya kwake. Bo “mbepo mwikemo ansukenie,” isiku limo abukile ku nyumba ya Kyala. Bo afikile kula, umwene alimbwene Yesu bo nnini kangi Yehova alimbombesyile imbombo Simeoni ukuti ayobe ubusololi ubwakufwana numwana uyu ayagha pakuya yo Kristu. (Luka 2:25-35) Nalinga ukuti Simeoni akalikele akabalilo akatali ukuti akete muno Yesu ayagha pakubombela ubufumusi bwake pa kisu, umwene andaghisye fiyo panongwa ya lusako ulu ali nalo, kangi ikughulila ifindu ifinunu nkyeni! Unnyambala unsubiliwa uyu isakuketa muno ubulaghili bwa Yesu bwisakuyila bwakuhobosya ku bandu nkisu ikipya. (Bwa. 22:18) Nanuswe tubaghile ukundaghisya ulusako lulilosa ulu Yehova ikutupa mu gulu lyake.
8. Ngimba Yehova abaghile ukutubombesyela bulebule imbombo bo muno abombile na Barnaba?
8 Mfyinja fya kunyuma, Yosefu alitikisye ukuti Yehova ambombesyele imbombo. (Imbo. 4:36, 37) Panongwa yakuti Yosefu ali wakwiyipa fiyo mwakubasubisya abangi, abatumiwa balimpele ingamu iyakuti Barnaba, ko kuti “Nnya lusubisyo.” Mwakifwanikisyo, bo Sauli akali ukuya nkristu, abakamu bingi batilagha ukuya nawe pabupipi panongwa yakuti abanyozagha Abakristu aba bali nulusubilo mwa Yesu. Loli, Barnaba alinkasisye nukuntula Sauli kangi Sauli alindaghisye fiyo panongwa yakisa iki alinnangisye. (Imbo. 9:21, 26-28) Ukufuma apo, abakulumba ba ku Yerusalemu balondiwagha ukubakasya abakamu aba bikalagha kubutali ku Antiokia uwa ku Siria. Ngimba abene balintumile nani? Barnaba! Abene basalile kanunu. Bo afikile kula bapilike ukuti Barnaba “alinkubakasya bosa ukuti bamumilileghe Mwalafyale nindumbula isya lwifimbilisyo.” (Imbo. 11:22-24) Ukufwana itolo nanuswe, Yehova abaghile ukututula ukuya “banya lusubisyo” ku Bakristu abinitu. Mwakifwanikisyo, abaghile ukutubombesyela imbombo ukuti tubakasye aba abakamu babo bafwile. Pamo abaghile ukutukasya ukuti tumwendele pamo tumwimbile ifoni umundu yumo uyu abinile pamo ukumbula amasyu aghakukasya umundu uyu ikutamiwa aminong’ono. Ngimba mukuya pakwitikisya ukuti Yehova ababombesyele imbombo bo muno abombile na Barnaba?—1 Tes. 5:14.
9. Ngimba tukumanyilako isyafiki ukufwana namuno Yehova alintulile unkamu Vasily ukuti aye ntimi nnunu?
9 Yehova alintulile unkamu Vasily ukuti aye ntimi nnunu. Bo ali nifyinja 26 abikiwe ukuya nkulumba wakipanga, loli umwene apasyagha ukuti akabaghile ukufwanisya ukubatula abakamu na balumbu mwambepo, fiyofiyo aba baghanagha nindamyo. Loli, amanyile ifimanyilo ifinunu ukufuma ku bakulumba aba bali namaluso kangi alingile Isukulu iya Bafumusi ba Bunyafyale. Vasily aliyipile fiyo ukuti achenje. Mwakifwanikisyo umwene alembile ifindu fimo ifi alondagha ukubomba. Ifindu ifi abombile fyalintulile ukuti amalane nindamyo ya bogha. Umwene atile: “Ifindu ifi fyambangisyagha ukuya nubogha kunyuma lino fikumba ulusekelo. Linga Yehova andulile ukulyagha ilemba ilyakuti nunkasye unkamu pamo umulumbu nkipanga, sikumbangisya ukuya walusekelo fiyo.” Linga nanuswe tukukonga ikifwanikisyo ikinunu ikya Vasily kangi nukwitikisya ukuti Yehova atubombesyeleghe imbombo,
umwene abaghile ukutupa amaluso ukuti tufwanisye ukubomba nyingi nkipanga.MUNO YEHOVA ABATULILE ABAKIKULU BAMO
10. Ngimba Abigelo abombile isyafiki, kangi ngimba tukumanyilako isyafiki?
10 Davidi na bandu bake aba bali basubiliwa kumyake bafwimiwagha nu Mwalafyale Sauli, kangi balondiwagha ubutuli. Ababombi ba Davidi babukile kwa Nabali ukuti bakasume ifyakulya. Abene bali nubwabuke ukuti bakasume panongwa yakuti akabalilo kamo basifighilile ing’osi syake ndungalangala. Loli Nabali uyu ali mwimi akanile ukubapa kilikyosa. Isi syalinkalalisye fiyo Davidi kangi alinong’wine isya kungogha Nabali pampene na bannyumba yake. (1 Samu. 25:3-13, 22) Loli unkasi wake, Abigelo uyu ali m’moghi fiyo, ali nakayilo akanunu. Umwene anangisye ubukifu, alinkuwa mmalundi gha Davidi nukunsuma ukuti angayagha ninongwa ya kona ilopa mwakungogha Nabali. Mwakisa alinsumile ukuti Yehova yo antule. Amasyu aghakwiyisya agha Abigelo, nakayilo kake akanunu fyalimfikile pandumbula Davidi. Pabumalilo Davidi asyaghenie ukuti Yehova yo alintumile Abigelo kumyake. (1 Samu. 25:23-28, 32-34) Abigelo anangisye atuyilo utununu isi syapangisye ukuti aye wakulondiwa fiyo kwa Yehova. Mwakufwana itolo, abalumbu aba bikunangisya akayilo akanunu Yehova abaghile ukubabombesyela imbombo ukuti bakasye imbumba syabo nabangi nkipanga.—Imbo. 24:3; Titi 2:3-5.
11. Ngimba abana ba Shalumu babombile isyafiki, kangi ngimba bo banani aba bikubakonga amasiku agha?
11 Ifyinja fingi ifi fikindilepo, Yehova ababombesyile imbombo abana ba Shalumu ukuyenga kangi amalinga gha Yerusalemu. (Nehe. 2:20; 3:12) Nalinga ukuti tata wabo ali mwalafyale, loli abana ba Shalumu baliyipile ukubomba imbombo iyakutamia fiyo iyi. (Nehe. 4:15-18) Abene bakafwene na banyambala ba ku Tekoa, aba “balinkusita nukubikapo indumbula syabo” pambombo iyi! (Nehe. 3:5) Inong’onela ulusekelo ulu abana ba Shalumu bali nalo bo imbombo iyakuyenga ililinga yimalike kwa masiku 52! (Nehe. 6:15) Amasiku agha, abalumbu bikuhoboka mwakwiyipa ukutulapo pambombo iyakuyenga nukutendekesya ifi fyonangike mu gulu lya Yehova. Amaluso, ukwiyipa, nukusubiliwa kwabo fyakulondiwa fiyo ukuti imbombo iyi yende kanunu.
12. Ngimba Yehova abaghile ukutubombesyela bulebule imbombo ukufwana na Tabita?
12 Yehova alintulile Tabita ukuti aye “nimbombo inunu si nyingi kangi apagha nifyabupe,” fiyofiyo ku bandu abafwilwe. (Imbo. 9:36) Panongwa yakayilo kake akanunu nikisa, abandu bingi balilile bo afwile. Loli bahobwike fiyo bo untumiwa Peteri ansyusisye. (Imbo. 9:39-41) Ngimba tukumanyilako isyafiki kwa Tabita? Kali tuli bana pamo bakusi, banyambala pamo bakikulu, twesa tubaghile ukubombapo simo ukuti tubatule abakamu na balumbu bitu.—Hib. 13:16.
13. Ngimba Yehova alimbombesyile bulebule imbombo umulumbu Ruth uyu ali nisoni, kangi ngimba umwene ayobile isyafiki?
13 Umulumbu Ruth uyu ali nisoni alondagha ukuya mishonale. Pakabalilo aka ali mwana, umwene abukagha kunyumba ninyumba ukwakuyabila amatilakiti. Umwene atile, “Nahobokagha fiyo nimbombo iyi.” Loli ukufumusya kunyumba ninyumba kangi nukuyobesania na bangi isyakufwana nu Bunyafyale bwa Kyala, yali ndamyo nywamu fiyo kumyake. Nalinga ukuti ali nisoni, Ruth alyandile ubupayiniya bwa kabalilo kosa bo ali nifyinja 18. Mu 1946, umwene alingile isukulu ya Gilead iyakumanyisya Ibaibolo kangi ukufuma apo abombile ububombeli bwake ku Hawaii na ku Japan. Yehova alimbombesyile imbombo ukuti abombe nyingi pakufumusya amasyu amanunu ku fisu ifi. Bo afikile ifyinja fya m’ma 80, Ruth atile: “Yehova
angasyagha fiyo akabalilo kosa. Umwene andulile ukuti mmalane nubogha. Ndinulusubilo losa ukuti Yehova abaghile ukumbombesyela imbombo umundu aliwesa uyu ali nulusubilo mmyake.”TWITIKISYEGHE UKUMBOMBELA YEHOVA
14. Ukufwana na Bakolosi 1:29, ngimba tukulondiwa ukubomba isyafiki ukuti Yehova atubombesyele imbombo?
14 Ukufuma kunyuma, Yehova ababombesyelagha imbombo ababombi bake munjila isyakukindanakindana. Ngimba umwene ikwisa kubapangisya umwe ukuti mufwanisye isyafiki? Sikuya pakuboneka ukufwana namuno tukwiyipila pambombo iyi. (Belenga Bakolosi 1:29.) Linga tukwitikisya ukuti Yehova atubombesyeleghe imbombo, umwene ikuya pakututula ukuti tuye bakwiyipa pakufumusya, m’manyisi nnunu, nsubisi nnunu, waluso, mmanyani nnunu, kangi na syosa isi umwene ikulonda ukuti tufwanisye ubwighane bwake.
15. Ukufwana na 1 Timoti 4:12, 15, ngimba abakilumyana bikulondiwa ukunsuma Yehova isyafiki?
15 Bule pakuyoba isya bakamu abakilumyana aba bikukula mwambepo? Yilipo imbombo inywamu fiyo iyi yikulondiwa abatuli bakipanga aba bali namaka ukuti bambombele Yehova. Mfipanga fingi balimo abakulumba bingi ukukinda abatuli. Ngimba alipo yumo uwakilumyana uyu ikulonda ukwiyipa ukubomba ububombeli bumo nkipanga? Akabalilo kamo unkamu yumo atile, “Ndi walusekelo fiyo panongwa yakuti ngumbombela Yehova pakuya mfumusi itolo.” Linga momuno nanumwe mukwipilikila, munsume Yehova ukuti abatule ukuya nubwighane ubwakumbombela mwakuya ntuli wakipanga kangi ukuti abape amaka ukuti mubombeghe syosa isi mubaghile ukufwanisya pakumbombela. (Ndumbi. 12:1) Tukulonda ubutuli bwinu!—Belenga 1 Timoti 4:12, 15.
16. Ngimba tukulondiwa ukusuma ifindu fiki kwa Yehova, kangi nongwa yafiki?
16 Yehova abaghile ukubabombesyela imbombo ukuti mufwanisye ubwighane bwake. Yonongwa yake mukulondiwa ukunsuma ukuti abatule ukuya nubwighane ubwakumbombela, kangi munsume ukuti abape amaka agha mukulondiwa. Kali muli bana pamo bakusi, mubombeleghe akabalilo, amaka, namaluso ghinu ukuti mungindikeghe Yehova lino. (Ndumbi. 9:10) Mungitikisyagha ubogha ukuti bubapangisye ukutoliwa ukulwagha ulusako ulwakumbombela Yehova. Twesa tuli nulusako ulwakubomba syosa isi tubaghile ukufwanisya ukuti tungindike Tata witu wakumwanya!
ULWIMBO 127 Mtundu wa Munthu Uwo Nkhwenera Kuŵa
^ ipal.5 Ngimba mukulonda ukubomba nyingi pakumbombela Yehova? Ngimba mukuketa ukuti muli bakulondiwa kumyake? Pamo ngimba mukuketa ukuti mukabaghila ukubomba nyingi pakumbombela Yehova? Inkhani iyi yikuya pakulingania injila nyingi muno Yehova abaghile ukubombela ukuti atupe amaka nubwighane ubwakumbombela umwene.
^ ipal.3 Nalinga ukuti Pauli abalembile kalata Abakristu abakunyuma, loli amasyu agha alembile ghabaghile ukubatula ababombi bosa ba Yehova.