INKHANI IYAKUMANYILA 41
Tukindilileghe Ukuya Basubiliwa Mpaka “Pabutolwe Ubukulumba”
“Amunganeghe Yehova, mwesa mwe bikemo bake! Yehova ikububatila abandu bake abasubiliwa.”—SAL. 31:23.
ULWIMBO 129 Tilutilirenge Kuzizipizga
ISI TUKUYA PAKUMANYILA *
1-2. (a) Ngimba abalongosi bankisu bikuya pakuyoba isyafiki mwalululu? (b) Ngimba malalusyo ghaliku agha tukulondiwa ukwamuliwa?
INONG’ONELA isya balongosi ba nkisu aba bandileko kale ukuyoba amasyu aghakuti “patengene pali kanunu.” Abene babaghile ukuketa ukuti ikisu kili nulutengano fiyo. Abalongosi bankisu bikulonda ukuti twinong’oneghe ukuti bikufwanisya ukusosyapo indamyo syosa isya nkisu. Loli abene bakabaghila ukukanisya isi sikuya pakubombiwa! Nongwa yafiki? Ukufwana nubusololi ubwa mu Baibolo, “nakalinga itolo lwisakubambulaniagha ulonangiko po kutisakuyako ukupona.”—1 Tes. 5:3.
2 Pali amalalusyo amanunu fiyo agha tukulondiwa ukwamuliwa: Ngimba findu fiki ifi fisakubombiwa ku babombi ba Yehova “pisiku ilyabutolwe ubukulumba”? Ngimba Yehova ikulonda ukuti tusabombe isyafiki pakabalilo ako? Kangi ngimba tubaghile ukwitendekesya bulebule lino ukuti tukindilile ukuya nulwitiko?—Mat. 24:21.
NGIMBA FINDU FIKI FISAKUBOMBIWA PAKABALILO KA “BUTOLWE UBUKULUMBA”?
3. Ukufwana nilemba lya Ubusetuli 17:5, 15-18, ngimba Kyala isakonanga bulebule “Babeloni Unkulumba”?
3 Belenga Ubusetuli 17:5, 15-18. “Babeloni Unkulumba” Isakonangiwa! Bo muno tuyobile pabwandilo, amaboma ghatisakuya namaka aghakukanisya isi sisakubombiwa pisiku lila. Nongwa yafiki? Nongwa yakuti “Kyala isakusibika mundumbula syabo ukuti babombeghe sisyo inong’wine yuyo.” Ngimba isi sikusanusya isyafiki? Kyala isakonanga amaboma ghosa ukongelelapo ikipanga kyabutungulu. * Umwene isakubika inyinong’ono syake mundumbula sya “mbembe kalongo” isya “kinyamana ikifubifu.” Imbembe kalongo sikwimila amaboma ghosa agha ghikukitula “ikinyamana” iki kyo kibughatila kya United Nations. (Ubuset. 17:3, 11-13; 18:8) Linga amaboma agha ghakisambukile ikipanga kyabutungulu, isi sisakunangisya ukuti isiku ilikulumba ilyabutolwe lifikile. Isi sisakuya syakutilisya fiyo ku mundu aliwesa pa kisu kyapasi.
4. (a) Ngimba fifukwa filiku ifi fisakupangisya ukuti amaboma ghakisambukile ikipanga kyabutungulu? (b) Ngimba abandu aba bali mfipanga fyabutungulu bisakubomba isyafiki?
4 Tutikumanya isi sisakupangisya ukuti amaboma ghansambukile Babeloni Unkulumba. Lumo abene bisakwinong’ona ukuti ikipanga kyabutungulu kikupangisya ukuti pangayagha ulutengano, yonongwa yake bikutoliwa ukufwanisya isi bikulonda. Kangi lumo bisakuyobagha ukuti ifipanga fyosa ifyabutungulu fili nikyuma kingi fiyo yonongwa yake tukutamiwa nubulondo. (Ubuset. 18:3, 7) Linga amaboma ghakisambukile ikipanga kyabutungulu ghatisakumonanga umundu aliwesa uyu ali nkipanga iki. M’malo mwake, sikuboneka ukuti amaboma agha ghisakonanga amagulu ghamo aghamatchalichi ghabutungulu. Linga amagulu agha ghonangiwe, abandu aba bali m’magulu agha bisakuketa ukuti abalongosi babo batoliwe ukufwanisya isi bafingile ukufuma apo abene batisakukolelanagha kangi nikipanga kyabutungulu.
5. Ngimba Yehova afingile isyafiki isyakufwana nubutolwe ubukulumba, kangi nongwa yafiki?
5 Ibaibolo litikuyoba ubutali bwakabalilo aka ukonangiwa kwa Babeloni Unkulumba kwisa kubombiwa, loli tusimenye ukuti isi sitisa kubombiwa kwa kabalilo katali. (Ubuset. 18:10, 21) Yehova afingile ukuti “isakutumulaniagha amasiku” agha butolwe ubukulumba ukuti “abapakiwa” bake kangi nikipanga kyabwanaloli bisebapone pisiku lila. (Mar. 13:19, 20) Loli ngimba Yehova ikulonda ukuti tusabombe isyafiki linga isiku ilikulumba ilyabutolwe kangi nubwite ubwa Armagedoni bwandile?
TUKINDILILGHE UKUMWIPUTA YEHOVA MWENE
6. Ngimba tukulondiwa ukubomba isyafiki ukuti tungayagha kulubafu lwa kipanga kyabutungulu?
6 Ukufwana namuno twamanyilile mu nkhani iyi yakindagha, Yehova ikulonda ukuti ababombi bake ababwanaloli bangakolelanagha na Babeloni Unkulumba. Loli, ukubomba isi kukaya kupepe yonongwa yake tukulondiwa ukwiyipa fiyo ukuti tungayagha kulubafu lwa kipanga ikyabutungulu. Tukulondiwa ukukindilila ukuya nkipanga kyabwanaloli mwakumwiputa Yehova mwene. Inong’onela injila sibili isi sibaghile ukututula ukuti tubombe isi.
Tungalekagha ukubungana pampene, nalinga po pakabalilo kandamyo (Keta ipalagilafu 7) *
7. (a) Ngimba tubaghile ukukindilila bulebule ukukonga utuyilo twabugholofu utwa Yehova? (b) Ngimba tukukasiwa bulebule na Bahiburi 10:24, 25?
7 Iyakwanda, tukindilileghe ukukonga utuyilo twabugholofu utwa Yehova. Tutikulondiwa ukubomba nabo utuyilo utubibi utwa nkisu. Mwakifwanikisyo, tungabombagha ubulowe, ukongelelapo ubweghi bwa banyambala pamo abakikulu benebene. (Mat. 19:4, 5; Rom. 1:26, 27) Iyabubili, tukindilileghe ukubungana pampene na Bakristu abinitu. Tubombeghe isi kuli kosa kuno tubaghile ukuya, ku Nyumba sya Bunyafyale, pamo munyumba sya baketi abinitu kangi na kuno abandu bakabaghila ukumanya. Kisita kwinong’onela isi sibombiwe, tutikulondiwa ukuleka ukubuka kungomano. M’malo mwake, tukulondiwa ukukindilila ukubungana pampene apa ‘isiku lya Mwalafyale liseghelile.’—Belenga Bahiburi 10:24, 25.
8. Ngimba amasyu agha tukufumusya ghikwisa kuchenja bulebule nkyeni?
8 Pakabalilo akabutolwe ubukulumba, kisita kukayika amasyu agha tukufumusya lino ghikwisa kuchenja. Lino, tukufumusya amasyu amanunu agha Bunyafyale nukughelaghela ukupela abamanyili. Loli pakabalilo ako, tukwisa kukindilila ukufumusya amasyu gha Kyala mwabukifu. (Ubuset. 16:21) Tukwisa kufumusyagha ukuti ikisu kya Setano kili pipi ukonangiwa. Linga akabalilo kafwene, tukwisa kuketa ukuti isi twafumusyagha sifwanisiwe kangi namuno tukwisa kubombelagha. Ngimba tukwisa kubombelagha injila isyakufwana itolo na isi twabombelagha kwa fyinja fingi pakufumusya? Pamo ngimba tukwisa kubombelagha injila isingi? Tutikumanya. Kisita kwinong’onela muno tukufumusyila, sikuboneka ukuti tukwisakuya nulusako ulwa kufumusya mwabukifu isya bulongi bwa Yehova!—Eze. 2:3-5.
9. Ngimba amaboma ghisakubomba isyafiki namasyu agha tukufumusya, loli ngimba tuli nulusubilo luliku?
9 Kisita kukayika, amasyu agha tukwisa kufumusyagha ghisakubakalalisya aba boma nukutukanisya ukuti tuleke ukufumusya. Mwakufwana itolo namuno tukubombela lino mwakusubila ubutuli bwa Yehova, tukulondiwa ukwisa kusubila ubutuli bwake pakabalilo ako. Tuli nulusubilo losa ukuti Kyala isakutupa amaka ukuti tusafwanisye ubwighane bwake.—Mika 3:8.
TWITENDEKESYEGHE UKUSAMBUKILIWA
10. Ukufwana na Luka 21:25-28, ngimba abandu bingi bisakubomba isyafiki pakabalilo kabutolwe ubukulumba?
10 Belenga Luka 21:25-28. Pakabalilo kabutolwe ubukulumba, abandu bisakuswigha fiyo ukuketa ukuti ifi baghulilagha kwa kabalilo akatali fikutoliwa ukubombiwa. Abene “bisakusulumania,” mwakubupasikisya ubumi bwabo bo bikwingila mwisiku lya ngisi nilya busulumanie. (Zefa. 1:14, 15) Pakabalilo ako, ubumi bwisakuya bwakutamya fiyo nalinga ko ku bandu ba Yehova. Panongwa yakuti tukaya kulubafu lwakisu, tukuya pakwaghana nindamyo nyingi. Lumo tutisakuya nifindu ifyakulondiwa pabumi bwitu.
11. (a) Nongwa yafiki abandu bisakubasambukila Abaketi ba Yehova? (b) Nongwa yafiki tutikulondiwa ukutila isiku lya butolwe ubukulumba?
* Bisakukolelana ukuti babasambukile ababombi ba Yehova. (Eze. 38:2, 14-16) Tukwisa kwanda ukupasya isi sisakubombiwa pakabalilo akabutolwe ubukulumba panongwa yakuti tutikumanya ifindu ifi fisakubombiwa pisiku ilyo. Loli, ikindu iki tukulondiwa ukubomba kyo kyakuti: Tutikulondiwa ukutila isiku lya butolwe ubukulumba. Yehova isakutupa ubulongosi ubu bwisa kututula fiyo. (Sal. 34:19) Tukwisa kufwanisya “ukwima nukuketa kumwanya” bo tusyaghenie ukuti “ukutabuliwa kwitu kuseghelile.” *
11 Linga akabalilo kakindilepo, bosa aba ifipanga fyabo fyonangiwe bisakukalala fiyo bo bikukibona ikipanga kya Baketi ba Yehova kikali kiliko. Abene bisakunangisya muno bisakukalalila mwakubamanyisya abangi ukwendela pa intaneti. Amaboma na Setano, bisakutubenga fiyo bo bikuketa ukuti ikipanga kyitu kikali kiliko. Abene batisakufwanisya ubwighane bwabo ubwa kusosyapo ikipanga kya Yehova. Yonongwa yake ubwighane bwa Kyala bwisa kufwanisiwa. Pakabalilo ako, amaboma ghisakuya pampene na Gogi wa Magogi.12. Ngimba “untumwa unsubiliwa nuwamahala” ikututula bulebule ukuti twitendekesye isi sikuya pakubombiwa nkyeni?
12 “Untumwa unsubiliwa nuwamahala” ikututula ukuti tukindilile ukuya basubiliwa mpaka pisiku ilyabutolwe ubukulumba. (Mat. 24:45) Injila yimo iyi ikututulila ko kwendela mungomano: Inong’onela isya ngomano isi sibombiwe ukufuma mu 2016 ukufika mu 2018. Ukwendela mungomano isi, tukasiwe fiyo ukuti tuye nutuyilo utununu utu tubaghile ukututula bo tukughulila isiku lya Yehova. Isagha tuyobesanie utuyilo utu.
TUKINDILILEGHE UKUYA BASUBILIWA, BAKWIFIMBILISYA, KANGI BAKIFU
Twitendekesyeghe lino ukuti tusapone pisiku ilyabutolwe ubukulumba” (Keta amapalagilafu 13-16) *
13. Ngimba tubaghile ukukasya bulebule ukusubiliwa kwitu kwa Yehova kangi nongwa yafiki?
13 Ubusubiliwa: Umutu walukomano ulu lwabombiwe mu 2016 wali wakuti “Lutilirani Kugomezgeka Kwa Yehova!” Ulukomano ulu lwatutulile fiyo ukuti linga tuli pabumanyani ubwamaka na Yehova, tukuya pakuya basubiliwa kumyake. Twamanyile ukuti tubaghile ukuseghelela kwa Yehova ukwendela ndwiputo kangi nukubelenga amasyu ghake. Ukubomba isi kukututula ukuti tumalane nindamyo isi tukwaghana nasyo. Bo ikisu kya Setano kili pipi ukumalika, tukuya pakwaghana nindamyo nyingi isi sikuya pakughela ukusubiliwa kwitu kwa Kyala. Tukuya pakukindilila ukubengiwa nabandu. (2 Pet. 3:3, 4) Isi sikuya pakubombiwa panongwa yakuti tukaya kulubafu lwa kisu. Yonongwa yake tukulondiwa ukukasya ukusubiliwa kwitu lino ukuti tusakindilile ukusubiliwa pakabalilo kabutolwe ubukulumba.
14. (a) Ngimba findu fiki fisakubombiwa ku bakamu aba bikulongosya? (b) Nongwa yafiki tukulondiwa ukuti tusaye basubiliwa?
14 Pakabalilo kabutolwe ubukulumba, ifindu fisakuchenja ku bakamu aba bikulongosya. Pakabalilo ako, abapakiwa bosa aba bali pa kisu kyapasi bisakubuka kumwanya ukuti basatule pabwite bwa Armagedoni. (Mat. 24:31; Ubuset. 2:26, 27) Isi sikusanusya ukuti aba bali Nkabughatila Kakulongosya batisakuyako kangi pa kisu kyapasi. Loli, abakilundilo ikikulumba bisakukindilila ukukolelana. Abakamu aba mabudindo bo bisakulongosyagha pakabalilo ako. Tukulondiwa ukwisa kunangisya ukusubiliwa kwitu mwakubatula abakamu aba nukukonga ubulongosi ubwakufuma kwa Kyala. Tusapilikileghe ubulongosi bwabo ukuti tusapone!
15. Ngimba tubaghile ukukindilila bulebule ukwifimbilisya lino, kangi nongwa yafiki kwakulondiwa?
15 Ukwifimbilisya: Umutu walukomano ulu lwabombiwe mu 2017 wali wakuti “Mungavukanga Yayi!” Ulukomano ulu lwatutulile fiyo ukuti tukasye ubumanyi bwitu ukuti tukindilile ukumalana nindamyo. Twamanyile ukuti tukabaghila ukumalana nindamyo patwibene. Loli tubaghile ukukindilila ukwifimbilisya ku ndamyo isi tukwaghana nasyo mwakunsubila Yehova. (Rom. 12:12) Tutikulondiwa ukwibwa isi Yesu afingile ukuti: ‘Loli uyu linga ikwifimbilisya ukufika kubumalikisyo, yo isakupokiwagha.’ (Mat. 24:13,) Ulufingo ulu lukusanusya ukuti tukulondiwa ukukindilila ukuya basubiliwa nalinga ukuti tukwaghana nindamyo. Linga tukwifimbilisya ku ndamyo lino, tubaghile ukuya nulwitiko ulwamaka bo akabalilo kabutolwe ubukulumba kakali ukufika.
16. Ngimba findu fiki fikutupangisya ukuti tuye bakifu, kangi ngimba tubaghile ukukindilila bulebule ukuya bakifu lino?
16 Ubukifu: Umutu walukomano ulu lwabombiwe mu 2018 wali wakuti “Muŵe ŵa Chikanga!” Inkhani isi syayobiwe palukomano ulu syatutulile fiyo ukukumbukila ukuti tukaya bakifu panongwa yabumanyi bwitu. Ukuti tuye bakifu tukulondiwa ukunsubila Yehova. Ngimba tubaghile ukumanyila bulebule ukuti tunsubileghe fiyo Yehova? Mwakubelenga amasyu ghake isiku lililyosa nukwinong’onelapo muno Yehova abapokile ababombi bake nkabalilo kakunyuma. (Sal. 68:20; 2 Pet. 2:9) Linga amaboma ghatusambukile pakabalilo kabutolwe ubukulumba, tukulondiwa ukwisa ukuya bakifu nukukindilila ukunsubila fiyo Yehova. (Sal. 112:7, 8; Hib. 13:6) Linga tukunsubila Yehova lino, tukuya pakuya bakifu ukufika apa Gogi isakutusambukilagha. *
TUKINDILILEGHE UKUYA NULUSUBILO ULWA BUPOKI
Yesu na basilikali bake bakumwanya mwalululu bikuya pakulongolela pabwite bwa Armagedoni ukuti bonange abalughu ba Kyala! (Keta amapalagilafu 17)
17. Nongwa yafiki tutikulondiwa ukutila ubwite bwa Armagedoni? (Keta ikithuzi kya pakikope.)
17 Ukufwana namuno twamanyilile mu nkhani iyi yakindagha, twesa tukwikala m’masiku Mbu. 1:33; Eze. 38:18-20; Zeka. 14:3) Pakabalilo kake Yehova isakundongosya Yesu nabasilikali bake ukuti balwe ubwite. Umwene isakuya pampene nabapakiwa aba bisakusyuka kangi nikilundilo kya bandumi. Abene bisakulwagha na Setano, imbepo inyali, kangi nabalaghili bosa aba nkisu.—Dan. 12:1; Ubuset. 6:2; 17:14.
ghakubumalikisyo. Loli tuli nulusako ulwa kwisakupona pisiku ilyabutolwe ubukulumba. Ubwite bwa Armagedoni bwisakuya bumalilo bwa findu fyosa ifibibi pa kisu. Loli, tutikulondiwa ukutila ikindu kilikyosa. Nongwa yafiki? Panongwa yakuti ubu bwisakuya bwite bwa Kyala. (18. (a) Ngimba Yehova afingile isyafiki? (b) Ngimba amasyu agha ghali pa Ubusetuli 7:9, 13-17 ghikutukasya bulebule?
18 Yehova afingile ukuti: “Kitisakuyapo kimo ikilwilo ikya kubafulasya umwe mwisakubatolagha bosa aba bikulongana nanumwe.” (Yes. 54:17) “Ikilundilo ikikulumba” ikyababombi abasubiliwa ba Yehova kikwisa ‘kusoka mbutolwe ubukulumba’! Ukufuma apo abene bisakukindilila ukumbombela Yehova. (Belenga Ubusetuli 7:9, 13-17.) Ibaibolo likutupa ubuketi bwingi ubwakuti tusubileghe ukuti tukwisa kupona nkyeni! Tusimenye ukuti “Yehova ikububatila ababombi bake abasubiliwa.” (Sal. 31:23) Bosa aba banganile nukumpala Yehova bisakuketa bo ingamu yake inyikemo yikukemesiwa.—Eze. 38:23.
19. Ngimba findu filiku ifyakuhosya ifi fisakubombiwa nkyeni?
19 Inong’onela muno ilemba lya 2 Timoti 3:2-5 lyayagha pakuyobela linga lyayagha pakuyoba isya bandu aba bali nkisu ikipya, aba batikupalamasiwa na Setano. (Keta ibokosi ilyakuti “Muno abandu ba Kyala bisakuyila.”) Unkamu George Gangas, * uyu ali Nkabughatila Kakulongosya, alingenie ukuti: “ Inong’onela muno ikisu kikwisa kuyila kyakuhobosya fiyo linga aliwesa isakumwiputagha Yehova! Mwalululu tukwisa kuya nulusako ulwakwikala nkisu ikipya. Tukwisa kwikalagha nubumi bwa bwila na bwila.” Isi syakuhobosya fiyo!
ULWIMBO 122 Muŵe Ŵakukhora, Ŵambura Kusunkhunyika!
^ ipal.5 Tusimenye ukuti “isiku ilikulumba ilyabutolwe” likuya pakwisa mwalululu. Ngimba findu fiki ifi fisakubombiwa ku babombi ba Yehova pisiku ilikulumba ili? Ngimba Yehova ikulonda ukuti tusabombe isyafiki? Ngimba tubaghile ukwitendekesya bulebule lino ukuti tukindilile ukuya nulwitiko mpaka pisiku ilyabutolwe ili? Tukuya pakumanyila nyingi munkhani iyi.
^ ipal.3 ISI AMASYU GHAMO GHIKULINGANIA: Ikipanga kyabutungulu kikwimila abandu bosa aba bikuti bikunkonga Kristu loli batikumwiputa Yehova ukufwana nifundo syake.
^ ipal.11 ISI AMASYU GHAMO GHIKULINGANIA: Amasyu aghakuti Gogi wa Magogi (kangi aghambupimba aghakuti, Gogi) ghikusanusya isya gulu ilya bandu aba bisakukolelana ukuti babasambukile ababombi ba Yehova.
^ ipal.11 Ukuti mumanye nyingi isi sisakubombiwa bo ubwite ubukulumba ubwa Armagedoni bukali, keta umutu 21 mu buku lya Chitumbuka ilyakuti Ufumu wa Chiuta Ukuwusa! Kangi ukuti mumanye nyingi isyakufwana nukusambukiliwa kwa Gogi wa Magogi namuno Yehova isakubafighilila ababombi bake pa Armagedoni, keta mutu 17 na 18 mu buku lya Chitumbuka ilyakuti Yehova Wawezgerapo Kusopa Kutuŵa!
^ ipal.16 Imbatiko yalukomano ulwa 2019 ulwamutu wakuti “Ulughano Lutikumalikamo Siku!” lukuya pakutukasya fiyo ukuti tukindilile ukufighililiwa nulughano lwa Yehova.—1 Kor. 13:8.
^ ipal.19 Keta inkhani iyakuti ‘Zochita Zake Zimtsata’ mu Ngasya ya Ndindilili iya Chichewa iya December 1, 1994.