INKHANI IYAKUMANYILA 43
Twiyipeghe Kwa Yehova Nindumbula Yosa
‘Yehova yo Kyala uyu ikulonda ukuti abandu bamwiputeghe yuyo mwene.’—NAHU. 1:2.
ULWIMBO 51 Ndise Ŵakujipeleka kwa Chiuta!
ISI TUKUYA PAKUMANYILA *
1. Nongwa yafiki Yehova ikulonda ukuti twiyipeghe kumyake nindumbula yosa?
YEHOVA ikulonda ukuti twiyipeghe kumyake nindumbula yosa panongwa yakuti yo Mpeli witu. (Ubuset. 4:11) Loli ukubomba isi kukaya kupepe. Nalinga tunganile kangi tukumpa ulughindiko, loli filipo ifindu fimo ifi fibaghile ukutupangisya ukutoliwa ukwiyipa kumyake nindumbula yosa. Tukulondiwa ukuketa muno isi sibaghile ukuyila. Ikyakwanda, isagha tuyobesanie isi ukwiyipa kwa Yehova nindumbula yosa sikusanusya.
2. Ukufwana nilemba lya Ukusoka 34:14, ngimba tukuya pakubomba isyafiki linga tukwiyipa kwa Yehova?
2 Mu Baibolo, ukwiyipa kwa Kyala sikusanusya ukungana nindumbula yitu yosa. Linga tuli bakwiyipa kwa Yehova, tukuya pakumwiputa yuyo mwene. Tutikuya pakwitikisya umundu yumo pamo ikindu kilikyosa pabumi bwitu ukuti kitutolesye ukwiyipa kumyake.—Belenga Ukusoka 34:14.
3. Nongwa yafiki ukwiyipa kwitu kwa Yehova kukaya kwa butungulu?
3 Ukwiyipa kwitu kwa Yehova kukaya kwa butungulu. Nongwa yafiki? Panongwa yakuti kukukolelana nifundo isi tukumanyila isyakufwana numwene. Tukuhoboka nutuyilo twake utununu. Tusimenye isi umwene asighanile na isi asibengile. Tukumanya isi ikulonda kangi tukukolelana nubwighane bwake. Tukundaghisya panongwa yakuti ikutupa ulusako ulwakuti tuye nawe pabumanyani. (Sal. 25:14) Ifundo syosa isi tukumanyila isyakufwana Numpeli witu sikututula ukuti tusegheleleghe fiyo kumyake.—Yak. 4:8.
4. (a) Ngimba Umohesi ikubombela ifindu fiki ukuti atutolesye ukwiyipa kwa Yehova? (b) Ngimba tukuya pakuyobesania isyafiki mu nkhani iyi?
Ef. 2:1-3; 1 Yoh. 5:19) Ubwighane bwake bo bwakuti ikulonda ukuti tufighaneghe ifindu fya nkisu nukutoliwa ukwiyipa kwa Yehova. Isagha tuyobesanie injila sibili isi Umohesi ikubombela ukuti atutolesye ukwiyipa kwa Yehova. Iyakwanda, ikutupangisya ukuti tusighaneghe fiyo indalama kangi iyabubili yo yakuti, ikulonda ukuti tungasalagha kanunu ifyakuhobosya.
4 Umohesi yo uyu ikulaghila ikisu iki, kangi umwene ikupangisya ukuti abandu bafighaneghe fiyo ifindu fya kumbili. (TUNGAYAGHA BAGHANANDALAMA
5. Nongwa yafiki tukulondiwa ukuya maso ukuti tungayagha baghanandalama?
5 Twesa tukulonda ukuti tuye nifyakulya, imyenda iminunu kangi namalo amanunu aghakwikala. Loli, tukulondiwa ukuya maso ukuti tungayagha baghanandalama. Abandu bingi amasiku agha aba bali kulubafu lwa kisu kya Setano “baghanandalama” kangi bighanile ukula ifindu fyapamwanya fiyo. (2 Tim. 3:2) Yesu asimenye ukuti abamanyili bake bayagha pakugheliwa ukuti basighaneghe indalama. Umwene atile, ‘Akayako umundu uyu abaghile ukubabombela abanyafyale babili, buno isakumbenga yumo nukungana uyungi, pamo isakumumililagha yumo nukunsyokela uyungi. Mukabaghila ukumbombela Kyala pamopene nukukibombela ikyuma.’ (Mat. 6:24) Umundu uyu ikumwiputa Yehova loli ikumalila akabalilo namaka ghake ukuti akyaghe ikyuma kya nkisu iki, ko kuti umwene ikubabombela abanyafyale babili. Umwene akabaghila ukwiyipa kwa Yehova nindumbula yosa.
Muno Abandu ba ku Laodikia Biketelagha . . . Kangi Muno Yehova na Yesu Babaketelagha (Keta ipalagilafu 6)
6. Ngimba tukumanyilako isyafiki ukufwana nubulongosi ubu Yesu abapele abandu ba ku Laodikia?
6 Kubumalilo bwa kyinja kya 90 C.E., abalongosi ba nkipanga ikya nkaya ka Laodikia bitufyagha ukuti: “Ndi nkabi, ngabile, ngapondwa nafimo.” Loli Yehova na Yesu, babaketagha ukuti “baywelufu, bapelakisa, balondo, bafwamaso Ubuset. 3:14-17) Linga nanuswe tusyaghenie ukuti twandile ukusighana fiyo indalama, mwanakalinga tukulondiwa ukuchenja aminong’ono ghitu. (1 Tim. 6:7, 8) Linga tutikuya pakuchenja, tubaghile ukwanda ukufighana fiyo ifindu fya nkisu kangi Yehova akabaghila ukwitikisya ukwiputa kwitu. Umwene “ikulonda abandu aba bikwiyipa nindumbula yosa.” (Kukumbu. 4:24) Loli ngimba indalama sibaghile ukuya syakulondiwa bulebule pabumi bwitu?
kangi basitakufwala.” Yesu abapele ubulongosi komma panongwa yakuti bali nikyuma loli panongwa yakuti basighanile fiyo indalama isi syabapangisyagha ukuti bonange ubumanyani bwabo na Yehova. (7-9. Ngimba mukumanyilako isyafiki ukufuma ku isi unkamu David alyaghene nasyo?
7 Inong’onela ikifwanikisyo ikya David, unkulumba wakwiyipa fiyo uyu ikwikala ku United States. Umwene atile ali mundu wakwiyipa fiyo pambombo. Ikampani iyi abombangako imbombo yalinkwesisye pabudindo kangi ambililagha indalama nyingi, abandu ba nkisu kyake banketagha ukuya mundu wakulondiwa fiyo. David atile “Akabalilo kamo, isi syambangisyagha ukwinong’ona ukuti ubu bwali buketi bwakuti Yehova ikunsaya.” Loli ngimba syali syabwanaloli?
8 David alyandile ukuketa ukuti imbombo iyi abombagha yalyandile ukonanga ubumanyani bwake na Yehova. Umwene atile “Linga ndi kungomano pamo mubufumusi, ninong’onelagha fiyo indamyo isi naghanagha nasyo ku mbombo. “Nayagha nindalama nyingi, loli natamiwagha fiyo naminong’ono kangi imbumba yangu yalyandile ukwaghana nindamyo.”
9 David aketile ukuti ikulondiwa ukusala ukubomba ikindu iki kyo kyali kyakulondiwa fiyo kumyake. Umwene atile, “Naketile ukuti ngulondiwa ukuchenja ukuti mbombeghe kanunu ifindu. David alondagha ukuchenja imbatiko yake iya ku mbombo kangi umwene alimbulie bwana Mat. 6:31-33.
wake isi alondagha ukubomba. Ngimba ifyakukongapo fyake fyali fyo filiku? Imbombo yalimalikile David! Ngimba umwene abombile isyafiki? Umwene atile, “Isiku ilyakukongapo, nalyandile ubupayiniya ubwa kabalilo. Ukuti abwaghe ubutuli, David nunkasi wake balyandile ukubomba imbombo iyakukolopa. Bo akabalilo kakindilepo, umwene alyandile ubupayiniya bwa kabalilo kosa, ukufuma apo yope unkasi wake alyandile ubupayiniya bwa kabalilo kosa. Imbumba iyi yasalile ukubomba imbombo iyi yabonekagha ukuya ya pasi fiyo kubandu bingi, loli imbombo iyi bikubomba yo yikaya yakulondiwa fiyo kumyabo. Nalinga ukuti indalama isi basyaghagha pabwandilo syali nyingi ukukinda isi bikusyagha lino, loli umwesi ghulighosa bikufwanisya ukufyagha ifyakulondiwa pabumi bwabo. Abene balondagha ukumbika Yehova pamalo aghakwanda, kangi abene basyaghenie ukuti Yehova ikubapasikisya bosa aba bikubika Ubunyafyale bwake pamalo aghakwanda.—10. Ngimba tubaghile ukuyifighilila bulebule indumbula yitu?
10 Kali tuli nindalama nyingi pamo nandi, loli tukulondiwa ukuyifighilila indumbula yitu. Bulebule? Tungakusyagha ulughano lwitu pakyuma. Kangi tungitikisyagha ukuti imbombo yo yiyeghe yakulondiwa ukukinda ukumbombela Yehova. Ngimba mubaghile ukumanya bulebule ukuti isi sikubombiwa kumyinu? Tukulondiwa ukwilalusya ukuti: ‘Ngimba akabalilo kosa ngwinong’onela isya mbombo linga nili pangomano pamo mubufumusi? Ngimba ngupasya muno nguya pakusyaghila indalama nkyeni? Ngimba indalama pamo ifindu ifya kumbili fikutwala indamyo ku myangu na ku mbumba yangu? Ngimba ngwiyipa ukubomba imbombo iyi abangi bikuyibona ukuya ya pasi nalinga ukuti yikumbangisya ukuya nakabalilo akakumbombela Yehova?’ (1 Tim. 6:9-12) Linga tukwinong’onela amalalusyo agha, isagha tukumbukeghe ukuti Yehova atughanile fiyo kangi afingile ku bosa aba bikwiyipa kumyake ukuti: “Ndisakukulekagha, kangi ndisakukutaghagha.” Yonongwa yake untumiwa Pauli alembile ukuti: “Ubumi bwinu bungayagha bwa bughanandalama.”—Hib. 13:5, 6.
TUSALEGHE KANUNU IFYAKUSANGALUSYA
11. Ngimba findu fiki ifi fibaghile ukubombiwa linga tutikusala kanunu ifyakusangalusya?
11 Yehova ikulonda ukuti tuhobokeghe nubumi, kangi ifyakusangalusya fibaghile ukututula ukuti tuhobokeghe. Yonongwa yake Ibaibolo likuti, “Ikikindilisi kununupo umundu ukuti alyeghe, anweghe kangi ikyeleghe muli ifi iyulagha ukufibombela.” (Ndumbi. 2:24) Loli, ifyakusangalusya fingi ifya nkisu fibaghile ukutonanga. Fibaghile ukupangisya abandu bingi ukuti bafighaneghe fiyo ifindu ifi fitikukolelana ni Baibolo.
Ngimba yonani uyu ikubasalila ifyakusangalusya? (Keta amapalagilafu 11-14) *
12. Ukufwana na 1 Bakorinti 10:21, 22, nongwa yafiki tukulondiwa ukusala kanunu ifyakusangalusya?
12 Tukulonda ukwiyipa kwa Yehova nindumbula yosa, yonongwa yake tukabaghila ukunwela “ikinwelo kya Yehova” na “nkinwelo kya mbepo inyali.” (Belenga 1 Bakorinti 10:21, 22.) Ukulya ifyakulya numundu yumo utubalilo twingi sikunangisya ukuti muli pabumanyani. Linga tukusala ifyakusangalusya ifi fikukasya ifya nkhaza, ifyamizimu, ifyabulowe, pamo utuyilo utungi utubibi, sifwene itolo nukulya ifyakulya nabalughu ba Kyala ifi umwene atutendekesyile. Ifyakukongapo fyake, tutikuya pakwifulasya twibene loli tubaghile kangi ukonanga ubumanyani bwitu na Yehova.
13-14. Ukufwana na Yakobu 1:14, 15, nongwa yafiki tukulondiwa ukuya maso nifyakusangalusya ifi tukusala? Fwanikisya.
13 Ngimba mo munjila yiliku iyi tubaghile ukufwanikisya ifyakusangalusya nifyakulya? Linga tukulya, tubaghile ukusala ifi tukulonda ukubika nkanwa. Loli linga tukumila itolo ifyakulya, tukabaghila ukusala muno tukulondela ukuti ifyakulya fibombeleghe imbombo mumbili witu. Ifyakulya ifinunu fibaghile ukututula ukuya nubumi ubununu; ifyakulya ifibibi fibaghile ukutupangisya ukuti tungayagha nubumi ubununu. Ifyakukongapo fyake tukabaghila ukufibona akabalilo kakako loli tubaghile ukufibona linga akabalilo kakindilepo.
14 Mwakufwana itolo, linga tukusala ifyakusangalusya, tukulondiwa ukusala ifi tukulonda ukufibika mminong’ono ghitu. Ukufuma apo tukuya pakuketa muno ifyakusangalusya ifi tusalile, fikuya pakupalamasyila aminong’ono nindumbula yitu. Ifyakusangalusya ifinunu fibaghile ukututula; loli ifyakusangalusya ifibibi fibaghile ukutonanga. (Belenga Yakobu 1:14, 15.) Tukabaghila ukumanya ifyakukongapo ifibibi pakabalilo kalakala, loli tubaghile ukuketa ububibi bwake linga akabalilo kakindilepo. Yonongwa yake Ibaibolo likutusoka ukuti: “Mungisyobagha: Kyala atikugheliwa. Buno ifi umundu ikusopa, fyo fifyo isakutondolagha; namanga uyu linga ikusopa mumbili wake yo isakutondolagha ulonangiko mu mumbili wake.” (Gal. 6:7, 8) Kwakulondiwa fiyo ukukana ifyakusangalusya fyosa ifi fikukasya ifindu ifi Yehova afibengile!—Sal. 97:10.
15. Ngimba kyabupe kiliku iki Yehova atupele ukuti tuhobokeghe nakyo?
15 Ababombi bingi ba Yehova bikuhoboka ukuketelela ipulogilamu iya pamwesi iya JW Broadcasting®. Umulumbu Marilyn atile: “JW Broadcasting yindulile fiyo ukuti niye walusekelo kangi nguketelela kilikyosa panongwa yakuti fikundula. Linga ndinimwene pamo ngwile amaka, ngubelenga inkhani iya mu Baibolo iyakukasya pamo nguketelela ipulogilamu iyakwiputa kwa nulubunju. Isi sikundula ukuti nsegheleleghe fiyo kwa Yehova na ku gulu lyake. Ipulogilamu ya pa JW Broadcasting yichenjile fiyo ubumi bwangu.” Ngimba nanumwe mukupindula nikyabupe ikyakufuma kwa Yehova iki? JW Broadcasting yikuya na mapulongilamu amapya umwesi ghulighosa, pikwaghiwa ifyakupilikisya, amavidiyo ninyimbo isyakukasya isi mubaghile ukuketelela nukupilikisya pakabalilo kalikosa.
16-17. Nongwa yafiki tukulondiwa ukuya maso fiyo nakabalilo aka tukumalila pafyakusangalusya, kangi ngimba tubaghile ukubomba bulebule?
16 Tutikulondiwa ukuya maso fiyo pene pafindu ifyakusangalusya loli na pakabalilo aka tukumalila pafindu ifyakusangalusya. Linga tutikuya maso, tubaghile ukumalila akabalilo kitu pafindu ifyakusangalusya ukukinda akabalilo aka tukumbombela Yehova. Bingi bikutoliwa ukuya maso nakabalilo aka bikumalila pafyakusangalusya. Umulumbu yumo uyu ali nifyinja 18 uyu ingamu yake yo Abigail atile: “Ukuketelela TV kukunhobosya linga ngutusya bo ngatele
nimbombo isi nabombagha. Loli linga ngaya maso, mbaghile ukumalila akabalilo kingi mwakuketelela TV.” Unkamu yumo uwakilumyana uyu ingamu yake yo Samuel atile: “Utubalilo tumo nguketelela amavidiyo manandi itolo pa intaneti. Nalyandile ukuketelela yimoyene, linga ngetelile, pakindagha amaawala matatu pamo 4 bongali ngaketelela kangi.”17 Ngimba tubaghile ukufighilila bulebule akabalilo aka tukumalila pakuketelela ifindu ifyakusangalusya? Ikindu kyakwanda tukulondiwa ukumanya tasi akabalilo aka tukumalila pakuketelela ifyakusangalusya. Bule ukuti tughele ukulemba imbatiko? Tubaghile ukulemba imbatiko iyakulingania isya kabalilo aka tukumalila pakuketelela TV, ukwangala pa intaneti kangi ukukoma amagemu pafoni yitu. Linga tuketile ukuti tukumalila fiyo akabalilo kitu pafyakusangalusya, tukulondiwa ukubika imbatiko. Tukulondiwa ukubika akabalilo kitu pafindu ifyakulondiwa pamalo ghakwanda, ukufuma apo tumalileghe akabalilo kanandi pafindu ifyakusangalusya. Kangi tukulondiwa ukunsuma Yehova ukuti atutule ukukonga kanunu imbatiko iyi tubikile. Ukubomba isi kubaghile ukutula fiyo ukuti tuye nakabalilo akakufwana kangi namaka agha tukulondiwa ukuti tufwanisyeghe ukumanyila Ibaibolo kwa patwibene, ukumanyila kwa pambumba, ingomano sya pakipanga, kangi nukumbombela Yehova mbufumusi. Tubaghile ukuhoboka kangi nakabalilo aka tukumalila pafyakusangalusya panongwa yakuti tukubika ifindu fyamwambepo pamalo ghakwanda.
TUKINDILILEGHE UKWIYIPA KWA YEHOVA
18-19. Ngimba tubaghile ukunangisya bulebule ukuti tukwiyipa kwa Yehova nindumbula yosa?
18 Bo amalile ukulemba isya kumalika kwa kisu kya Setano iki kangi nisya kisu ikipya iki kikwisa, untumiwa Peteri atile: “Popapo lelo mwe baghaniwa, bo mukusighulila sisisi, po mwiyuleghe ukuya belu mwe basitakababye nakamo, nakalema nakamo.” (2 Pet. 3:14) Linga tukupilikila ubulongosi ubu nukukindilila ukwiputa munjila iyi Kyala ikubohoka nayo tukuya pakunangisya ukuti tukwiyipa kwa Yehova nindumbula yosa.
19 Setano nikisu kyake iki ikuya pakughelagha ukutupangisya ukuti tubikeghe ifindu fyakumbili pamalo ghakwanda m’malo mwakumwiputa Yehova. (Luka 4:13) Loli nalinga ndamyo yiliyosa iyi tubaghile ukwaghana nayo, tutikuya pakumwitikisya umundu aliwesa pamo ikindu kilikyosa ukuti kitukanisye ukumwiputa Yehova. Tukuya pakukindilila ukwiyipa kwa Yehova nindumbula yosa!
ULWIMBO 30 Dada Wane, Chiuta Wane na Mubwezi Wane
^ ipal.5 Tukwiyipa fiyo ukuti tumbombeleghe Yehova. Loli ngimba tukwiyipa naloli nindumbula yosa? Ukufwana na isi tukusala ukubomba pabumi bwitu sikunangisya ukuti naloli tukwiyipa kumyake. Yonongwa yake ukuti tumanye linga naloli tukwiyipa nindumbula yosa kwa Yehova, tukuya pakuyobesania ifyakusala fibili ifi tubaghile ukusala pabumi bwitu, ukuya nkabi pamo ukumalila akabalilo pafyakusangalusya.
^ ipal.53 ISI IKITHUZI KIKULINGANIA: Tutikulondiwa ukulya ifyakulya ifi bapiyile kumalo amabibi. Nongwa yafiki tutikulondiwa ukuketelela ifyakusangalusya ifi fikukolelana nifyabwite, ifyamizimu kangi nifyabulowe?