1. Ngimba tukumanya bulebule ukuti imbombo yakupela abafundiwa yikupoka ubumi bwa bandu?

IMBOMBO yakupela abafundiwa yikupoka ubumi bwa bandu. Tukumanya bulebule? Pakabalilo aka Yesu abikagha ululaghilo ulu lukwaghiwa pa Matai 28:19, 20, atile: ‘Amubukeghe, . . . mukabapeleghe bafundiwa . . . , mukabokesyeghe.’ Ngimba tukumanya bulebule ukuti ukosiwa kwakulondiwa? Linga tukulonda ukuti tusapone, tukulondiwa ukosiwa. Umundu uyu ikulonda ukosiwa ikulondiwa ukusubila ukuti ikwisa kubwagha ubumi bwa bwila na bwila pene panongwa yakuti Yesu atufwilile. Yonongwa yake untumiwa Pauli ababulile Abakristu abinake ukuti: ‘Ulosyo lo lukubapoka umwe lino . . . ukwendela nkusyuka kwa Yesu Kristu.’ (1 Pet. 3:21) Yonongwa yake linga umfundiwa osiwe, ikuya nulusubilo ulwakwisa kwikala ubumi bwa bwila na bwila.

2. Ngimba pa 2 Timoti 4:1, 2 pikutukasya bulebule ukuti tuye bamanyisi banunu?

² Ukuti tupele abafundiwa, tukulondiwa ukukusya ‘amaluso ghitu.’ (Belenga 2 Timoti 4:1, 2.) Nongwa yafiki? Panongwa yakuti Yesu atupele ululaghilo ulwakuti: ‘Amubukeghe, . . . mukabapeleghe bafundiwa . . . , mukabamanyisyeghe.’ Untumiwa Pauli atile, ‘kindilila’ ukubomba imbombo iyi, ‘namanga linga kubomba bo bunobuno po kwisakwipokagha wimwene naba bikukupilika’. Kangi Pauli atile: ‘Utubalilo tosa uyeghe maso na ifi. . . kumanyisya.’ (1 Tim. 4:16) Yonongwa yake tukulondiwa ukuti tubamanyisyeghe kanunu abandu ukuti tubapeleghe bafundiwa.

3. Ngimba mu nkhani iyi tukuya pakumanyila isyafiki?

³ Utubalilo twingi tukubamanyisya abandu bingi ubwanaloli bwa mu Baibolo pa kisu kyosa. Loli ukufwana namuno twamanyilile  mu nkhani iyi yakindagha, tukulondiwa ukumanya muno tubaghile ukubatulila ukuti bosiwe nukuya bafundiwa ba Yesu Kristu. Mu nkhani iyi, tukuya pakumanyila ifindu 5 ifi ummanyisi aliwesa ikulondiwa ukubomba ukuti antule uyu ikumanyila nawe Ibaibolo ukuti osiwe.

4. Nongwa yafiki ummanyisi atikulondiwa ukuyoba nyingi linga ikumanyila numundu Ibaibolo? (Keta amasyu ghapasi.)

⁴ Tukuhoboka na isi tukumanyisya ukufuma M’masyu gha Kyala. Loli utubalilo tumo tubaghile ukwanda ukuyoba nyingi. Kali mukulongosya ikimanyilo kya Ingasya ya Ndindilili, Ukumanyila Ibaibolo Kwa Pakipanga pamo mukumanyila numundu pakaya, mutikulondiwa ukuti muyobeghe nyingi. Ukuti mubombeleghe Ibaibolo pakumanyisya, ummanyisi atikulondiwa ukuti alinganieghe inkhani pamo ilemba lililyosa ili alimenye ilyakufuma mu Baibolo. * (Yoh. 16:12) Inong’onela ifundo sya mu Baibolo isi mwasimenye pakabalilo aka mosiwagha namuno musimanyile lino. Kisita kukayika, pakabalilo aka mosiwagha mwafipilikisyagha fyene ifimanyisyo ifyakulondiwa ifyakufuma mu Baibolo. (Hib. 6:1) Pakindile ifyinja ukuti mupilikisye kanunu ifundo isi mukumanyila lino, yonongwa yake mutikulondiwa ukuti mum’manyisyeghe kilikyosa uyu mukumanyila nawe pakabalilo kamokene.

5. (a) Ukufwana na 1 Batesalonike 2:13, ngimba tukulonda ukuti uyu tukumanyila nawe apilikisyeghe isyafiki? (b) Ngimba tubaghile ukunkasya bulebule ukuti ayobeghe ifindu ifi ikumanyila?

⁵ Tukulonda ukuti aba tukumanyila nabo bapilikisyeghe isi bikumanyila ukufuma mu Baibolo. (Belenga 1 Batesalonike 2:13.) Ngimba tubaghile ukubomba bulebule isi? Munkasyeghe uyu mukumanyila nawe ukuti ayobeghe ifindu ifi ikumanyila. M’malo mwakuti utubalilo tosa mundingisanieghe amalemba gha mu Baibolo, mukulondiwa ukunsuma ukuti yope alinganie amalemba ghamo. Muntuleghe ukuketa muno amasyu gha Kyala ghikuntulila pabumi bwake. Mundalusyeghe amalalusyo agha ghabaghile ukuntula ukuti ayobepo aminong’ono ghake ukufwana nilemba ili abelengile. (Luka 10:25-28) Mwakifwanikisyo mundalusye ukuti: “Ngimba ilemba ili likukutula bulebule ukuketa kamo mwa tuyilo twa Kyala?” “Ngimba isi umanyile mu Baibolo sibaghile ukukutula bulebule?” “Ngimba kwipilika bulebule na isi umanyile?” (Mbu. 20:5) Ikyakulondiwa fiyo mukaya momuno uyu mukumanyila nawe ikwamulila loli muno ikuhobokela nukukonga isi ikumanyila.

6. Nongwa yafiki tukulondiwa ukubuka na bafumusi aba bali namaluso kwa uyu tukumanyila nawe Ibaibolo?

 ⁶ Linga mukumanyila numundu Ibaibolo, ngimba mukubuka nabafumusi aba bali namaluso? Linga syo mukubomba, mubalalusyeghe muno baketile pakabalilo aka mwamanyisyagha kangi namuno mwabombesyelagha kanunu Ibaibolo. Linga mukulonda ukuti mumanyisyeghe kanunu, mukulondiwa ukuya bakwiyisya. (Fwanikisya na Imbo. 18:24-26.) Ukufuma apo mubalalusye abafumusi linga bikuketa ukuti uyu mukumanyila nawe Ibaibolo ikupilikisya isi ikumanyila. Mubaghile ukunsuma umfumusi yumo ukuti amanyileghe na uyu mukumanyila nawe linga musokilepo kwa sabata yumoywene. Isi sikuya pakupangisya ukuti bakindilile ukumanyila nawe kangi uyu mukumanyila nawe ikuya pakuketa ukuti ukumanyila kwakulondiwa fiyo. Komma ukwinong’ona ukuti “mmanyili winu” kangi nayumo akabaghila ukumanyila nawe. Panongwa yakuti mukulonda ukuntula uyu mukumanyila nawe ukuti akindilile ukumanyila ubwanaloli.

7. Ngimba findu fiki fibaghile ukuntula uyu ikumanyila Ibaibolo ukuti ahobokeghe na isi ikumanyila?

⁷ Uyu mukumanyila nawe ikulondiwa ukuketa ukuti mukuhoboka nukusubila ubwanaloli ubu bukwaghiwa mu Baibolo. (1 Tes. 1:5) Isi sikuya pakumpangisya ukuti yope ahobokeghe na isi ikumanyila. Linga kwakulondiwa, mubaghile ukumbula muno ifundo sya mu Baibolo sibatulile pabumi bwinu. Ukufuma apo ikuya pakumanya ukuti Ibaibolo lili nifundo isyakulondiwa fiyo isi sibaghile ukuntula pabumi bwake.

8. Ngimba mukulondiwa ukubomba isyafiki ukuti muntule uyu mukumanyila nawe, kangi nongwa yafiki?

⁸ Pakabalilo kakumanyila, mumbuleghe uyu mukumanyila nawe indamyo isi abakamu na balumbu bikwaghana nasyo namuno bakwifimbilisyila. Mubaghile ukubuka numfumusi yumo uyu ikifwanikisyo kwake kibaghile ukunkasya uyu mukumanyila nawe Ibaibolo. Pamo mubaghile ukufufuza inkhani isyakukasya pa jw.org pakighaba ikyakuti, “Baibolo Likusintha Umoyo wa Ŵanthu.” * Inkhani na mavidiyo agha ghabaghile ukuntula ukuketa ukulondiwa kwakukonga ifundo sya mu Baibolo pabumi bwake.

9. Ngimba mubaghile ukunkasya bulebule uyu mukumanyila nawe ukuti ababuleghe aba mumbumba nabamanyani bake isi ikumanyila?

⁹ Linga uyu mukumanyila nawe ali pabweghi, ngimba unnine wambweghi yope ikumanyila? Linga atikumanyila, munsume ukuti yope aghiwengepo. Munkasyeghe ukuti ababuleghe aba mumbumba nabamanyani bake isi ikumanyila.  (Yoh. 1:40-45) Bulebule? Mubaghile ukundalusya ukuti: “Ngimba ubaghile ukulingania bulebule ifundo iyi ku ba mumbumba yako?” pamo “Ngimba lemba liliku ili ubaghile ukubombela ukuti ubasimikisyile abamanyani bako ukuti isi kumanyila syabwanaloli?” Linga mukubomba isi, mukuya pakuntula ukuti amanyisyeghe kanunu. Ukufuma apo linga abaghiliwe, abaghile ukwanda ukufumusya na bakamu na balumbu nkipanga. Mubaghile ukundalusya linga ammenye umundu yumo uyu abaghile ukulonda ukumanyila Ibaibolo. Linga alipo, mumwimbile mwanakalinga ukuti mwande ukumanyila nawe Ibaibolo. Munnangisye ividiyo iyakuti, Ngimba Findu Fiki Fikubombiwa Pakumanyila Ibaibolo? *

10. Ukufwana na 1 Batesalonike 2:7, 8, ngimba ummanyisi abaghile ukunkonga bulebule Pauli?

¹⁰ Abamanyisi bikulondiwa ukuti babapasikisyeghe fiyo aba bikumanyila nabo. Mwanakalinga abene babaghile ukuya bakamu na balumbu nkipanga. (Belenga 1 Batesalonike 2:7, 8.) Kubaghile ukuya kukafu ukuti baleke ukwangala nabamanyani babo bakunyuma nukughelaghela ukuchenja ukuti bande ukumbombela Yehova. Yonongwa yake tukulondiwa ukubatula ukuti babaghe abamanyani abanunu nkipanga. Muyeghe pabumanyani nawe mwakuya nakabalilo akakwangala nawe komma pakabalilo kene aka mukumanyila nawe Ibaibolo loli na pafyakubombiwa ifingi. Linga mukumwimbila ifoni, ukuntumila imeseji pamo ukumwendela, mubaghile ukunangisya ukuti mukumpasikisya.

11. Nongwa yafiki tukulonda ukuti aba tukumanyila nawo babaghe abamanyani nkipanga?

¹¹ Ukuti umwana akule kanunu, umundu aliwesa nkaya ikutulapo. Mwakufwana itolo, ukuti tupele abafundiwa, aliwesa nkipanga ikulondiwa ukutulapo. Yonongwa yake linga abamanyisi bikubatula aba bikumanyila nabo ukuti babamanye abangi nkipanga, babaghile ukubatula ukuti basegheleleghe fiyo kwa Yehova. Ukufuma apo babaghile ukuhoboka ukwangala na babombi ba Kyala kangi babaghile ukubatula munjila isyakukindanakindana. Tukulonda ukuti aliwesa ahobokeghe panongwa yakuya nkipanga, iki kyo kighaba kimo kya mbumba yitu ya mwambepo. Tukulonda ukuti aliwesa ahobokeghe nulughano ulu abakamu na balumbu bikunangisania. Isi sikuya pakumpangisya ukuti aleke ukukolelana na bandu aba bakabaghila ukuntula ukuti ambombeleghe Yehova. (Mbu. 13:20) Linga abamanyani bake bakunyuma balekile ukwangala nawe, umwene ikumanya ukuti abaghile ukubagha abamanyani abanunu mu gulu lya Yehova.​—Mar. 10:29, 30; 1 Pet. 4:4.

12. Nongwa yafiki tukulondiwa ukumbula uyu tukumanyila nawe isya kwiyipa kwa Yehova nukosiwa?

¹² Utubalilo twingi mumbuleghe isyakulondiwa kwa kwiyipa kwa Yehova ukuti osiwe. Panongwa yakuti ubwighane bwitu ubwakumanyila na bandu Ibaibolo bo bwakuti tubatule ukuti bambombeleghe Yehova. Linga mumanyile kwa myesi minandi kangi linga andile ukufika pangomano, ikulondiwa ukumanya ukuti mukulonda ukuntula ukuti aye yumo wa Baketi ba Yehova.

13. Ngimba uyu ikumanyila Ibaibolo ikulondiwa ukubomba isyafiki ukuti osiwe?

¹³ Filipo ifindu fingi ifi uyu ikumanyila Ibaibolo ikulondiwa ukubomba ukuti osiwe. Ikyakwanda, umwene ikulondiwa ukummanya kanunu, ukungana nukunsubila Yehova. (Yoh. 3:16; 17:3) Isi sikuya pakumpangisya ukuti akasye ubumanyani bwake na Yehova kangi nabakamu na balumbu nkipanga. (Hib. 10:24, 25; Yak. 4:8) Ukufuma apo, ikuya pakuleka ukubomba utuyilo twake utubibi nukulapa imbibi syake. (Imbo. 3:19) Kangi umwene ikubabula abangi isi ikusubila lino. (2 Kor. 4:13) Ukufuma apo ikwiyipa nindumbula yosa kwa Yehova kangi ikunangisya ukwiyipa uku mwakosiwa. (1 Pet. 3:21; 4:2) Isiku ili likuya lyakuhobosya fiyo kwa aliwesa. Linga afwanisye ukubomba syosa isi, muntuleghe ukuti akindilile ukubomba inunu.

14. Ngimba ummanyisi ikulondiwa ukubomba isyafiki ukuti antule uyu ikumanyila nawe ukubuka pankyeni?

¹⁴ Tukulondiwa ukuya bololo linga tukuntula uyu tukumanyila nawe ukuti abuke pankyeni nukwiyipa kwa Yehova ukuti osiwe. Kangi tukulondiwa ukumanya linga ali nubwighane ubwakumbombela Yehova. Ngimba ikughelaghela ukupilikila indaghilo sya Yesu? Pamo ngimba ikulonda itolo ukumanya ifindu ifyakuhobosya ifi fikwaghiwa mu Baibolo?

15. Ngimba findu fiki fibaghile ukuntula ummanyisi ukumanya linga uyu ikumanyila nawe ikubuka pankyeni?

¹⁵ Utubalilo tosa muketeghe linga ikubuka pankyeni. Mwakifwanikisyo, ngimba ikunangisya ukuti anganile Yehova? Ngimba ikwiputa kwa Yehova? (Sal. 116:1, 2) Ngimba ikuhoboka ukubelenga Ibaibolo? (Sal. 119:97) Ngimba ikufika pangomano akabalilo kosa? (Sal. 22:22) Ngimba achenjile pabumi bwake? (Sal. 119:112) Ngimba ikubabulako aba mumbumba nabamanyani bake isi ikumanyila? (Sal. 9:1) Ilalusyo ilyakulondiwa fiyo lyo lyakuti, ngimba ikulonda ukuya yumo mwa Baketi ba Yehova? (Sal. 40:8)  Linga atikubuka pankyeni mughelegheleghe ukumanya ifi fikumpangisya ukufuma apo, muyobesanie nawe mwakisa loli mbwanaloli. *

16. Ngimba po pakabalilo kaliku aka mubaghile ukuleka ukumanyila na uyu mukumanyila nawe?

¹⁶ Utubalilo tosa muketeghe linga mubaghile ukukindilila ukumanyila numundu yumo. Amwilalusye ukuti: ‘Ngimba uyu ngumanyila nawe ikutoliwa ukwitendekesya? Ngimba atikulonda ukuti afikeghe pangomano? Ngimba akali ali nutuyilo utubibi? Ngimba akali ikwiputa ku chalitchi lyake?’ Linga ansala yo wakuti ena, ukukindilila ukumanyila nawe kubaghile ukufwana itolo nukummanyisya umundu ukoghela loli atikulonda ukwingila m’misi. Linga atikuhoboka na isi ikumanyila kangi atikulonda ukuchenja pabumi bwake, kikayapo ikifukwa ikyakukindilila ukumanyila nawe.

17. Ukufwana na 1 Timoti 4:16, ngimba bosa aba bikumanyila Ibaibolo bikulondiwa ukubomba isyafiki?

¹⁷ Tukulondiwa ukuti tufwanisye ubudindo bwitu ubwakupela abafundiwa nukubatula aba tukumanyila nabo ukubuka pankyeni ukuti bosiwe. Yonongwa yake tukubombela Ibaibolo linga tukumanyisya kangi tukuhoboka nukusisubila isi tukumanyisya. Tukuya pakubakasya ukuti baye na bamanyani nkipanga. Kangi tukuya pakubakasya ukuti biyipe kwa Yehova nukosiwa nukuketa linga bikubuka pankyeni. (Keta ibokosi pa peji 13, ilyakuti, “ Isi Abamanyisi Bikulondiwa Ukubomba Ukuti Babatule Aba Bikumanyila Nabo Ibaibolo Ukuti Bosiwe.”) Tuli balusekelo fiyo panongwa yakuti tukutulapo pambombo yakupoka ubumi bwa bandu. Isagha twesa tubombeghe kilikyosa iki tubaghile ukufwanisya ukuti tubatule aba tukumanyila nabo Ibaibolo ukuti babuke pankyeni nukosiwa.