1. Ngimba pa 2 Bakorinti 3:1-3 pikututula bulebule ukundaghisya ulusako ulu tuli nalo ulwakubatula aba tukumanyila nabo Ibaibolo ukuti bosiwe? (Keta ikithuzi kya pakikope.)

NGIMBA mukwipilika bulebule linga mukunketa uyu mukumanyila nawe Ibaibolo ikosiwa? Ukuyoba ubwanaloli mukuhoboka. (Mat. 28:19) Kangi linga yomwe mwamanyilagha nawe Ibaibolo, mukuhoboka fiyo. (1 Tes. 2:19, 20) Aba bikosiwa lino bali bo “abakalata balutufyo,” komma ku aba bamanyilagha nabo bene loli ku bakamu na balumbu bosa.​—Belenga 2 Bakorinti 3:1-3.

2. (a) Ngimba ilalusyo liliku ilyakulondiwa ili tukulondiwa ukwinong’onelapo kangi nongwa yafiki? (b) Ngimba ukumanyila Ibaibolo findu fiki? (Keta amasyu gha pasi.)

² Syakuhobosya fiyo ukuketa ukuti ifyinja 4 ifi fikindilepo aba bikumanyila Ibaibolo * abakufwana 10,000,000 bikubafumusya umwesi ghulighosa pa kisu kyosa kyapasi. Kangi pa fyinja ifi, abandu abakukinda 280,000 balyosiwe ukuti baye Baketi ba Yehova kangi bafundiwa ba Yesu Kristu. Ngimba tubaghile ukubatula bulebule aba tukumanyila nabo Ibaibolo ukuti bosiwe? Yehova akali ikunangisya ubololo mwakubapa abandu ulusako ulwakuti baye bafundiwa ba Kristu. Yonongwa yake tukughelaghela ukubatula ukuti bosiwe mwanakalinga panongwa yakuti akabalilo kasyeli kapimba.​—1 Kor. 7:29a; 1 Pet. 4:7.

3. Ngimba mu nkhani iyi tukuya pakuyobesania isyafiki?

 ³ Panongwa yakuti lino kwakulondiwa fiyo ukupela abafundiwa, aba Nkabughatila Kakulongosya batupele ubulongosi ubwa muno tubaghile ukubatulila aba tukumanyila nabo Ibaibolo ukuti bosiwe. Mu nkhani iyi niyakukongapo, tukuya pakuketa isi tubaghile ukumanyilako ukufuma ku bapayiniya, abamishonale nabakwendela idela. * (Mbu. 11:14; 15:22) Abene bikulingania isi ummanyisi na aba ikumanyila nabo Ibaibolo bikulondiwa ukubomba ukuti ukumanyila kuyeghe kwakutula. Mu nkhani iyi, tukuya pakuyobesania ifindu 5 ifi aliwesa uyu ikumanyila Ibaibolo ikulondiwa ukubomba ukuti osiwe.

4. Ngimba tukulondiwa ukumanya isyafiki linga tukumanyila kwa kabalilo akapimba na uyu tukumanyila nawe Ibaibolo?

⁴ Abakamu na balumbu bingi bikumanyila na bandu Ibaibolo kwa kabalilo akapimba. Nalinga ukuti iyi yo njila inunu iyakubapangisya ukuti baye nubwighane ubwakumanyila Ibaibolo loli utubalilo twingi tukuyobesania nabo akabalilo akapimba kangi tukabaghila ukufwanisya ukuti tumanyileghe nabo sabata aliwesa. Ukuti babatule ukuya nubwighane ubwakumanyila Ibaibolo, abakamu na balumbu bamo bikubatumila amameseji nukubabula ilemba limo ilya mu Baibolo. Abene babaghile ukukindilila ukuyobesania nabo kwa myesi bo bakali ukwanda ukumanyila nabo Ibaibolo. Loli ngimba uyu ikumanyila Ibaibolo * abaghile ukwiyipa kwa Yehova nukosiwa linga tutikwiyipa ukumanyila nawe amasyu gha Kyala? Hayi.

5. Ukufwana na Luka 14:27-33, ngimba Yesu ayobile isyafiki isyakufwana namuno tubaghile ukubatulila aba tukumanyila nabo Ibaibolo?

⁵ Pakyakubombiwa kimo, Yesu alingenie isi umundu ikulondiwa ukubomba ukuti aye mfundiwa wake. Umwene ayobile isya mundu yumo uyu alondagha ukuyenga ingasya kangi numwalafyale uyu alondagha ukubuka ku bwite. Yesu atile uyu ikulonda ukuyenga inyumba, ‘ikutughala tasi pasi nukupima untengo’ ukuti akete linga ali nafyo ifya kumalikisya kangi yope umwalafyale ‘ikutughala tasi pasi nukwinong’ona’ linga abaghile ukwakulwa ubwite. (Belenga Luka 14:27-33.) Mwakufwana itolo, Yesu asimenye ukuti umundu uyu ikulonda ukuya mfundiwa wake ikulondiwa ukwinong’onela kanunu ifi ikulondiwa ukubomba ukuti ankongeghe umwene. Yonongwa yake nanuswe, tukulondiwa ukubakasya  aba tukumanyila nabo Ibaibolo ukuti tumanyileghe nabo sabata aliwesa. Ngimba tubaghile ukubomba bulebule isi?

6. Ngimba tukulondiwa ukubomba isyafiki ukuti tukindilile ukumanyila nabo Ibaibolo?

⁶ Muyobesanieghe na aba mukumanyila nabo Ibaibolo kwa kabalilo akatali. Lumo mubaghile ukuyobesania nabo amalemba mabili akabalilo kosa aka mwaghene nabo. Linga umwenenyumba ikulonda ukumanya nyingi, mubaghile ukunsuma linga abaghile ukughagha amalo aghakuti mwikale nukukindilila ukumanyila nawe. Muno umwenenyumba ikuya pakwamulila sikuya pakunangisya ukuti ikulonda naloli ukumanyila Ibaibolo. Loli linga mukulonda ukuti amanyile mwanakalinga, mubaghile ukundalusya linga ikulonda ukuti mumanyileghe nawe kabili pasabata. Loli tukulondiwa ukubomba nyingi ukukinda itolo ukumanyila nawe kamokene pamo kabili sabata aliwesa.

7. Ngimba ummanyisi abaghile ukwitendekesya bulebule ikimanyilo kilikyosa?

⁷ Pakuya mmanyisi, mukulondiwa ukwitendekesya kanunu ikimanyilo kilikyosa. Mubaghile ukwanda nukubelenga isi mukuya pakumanyila nukuketa amalemba. Musimanyeghe kanunu ifundo inywamu. Mwinong’oneleghe umutu wa nkhani, utumitu utunanditunandi, ilalusyo lya mu palagilafu, amalemba agha batile “belenga”, ifithuzi kangi na mavidiyo agha ghikulingania isya nkhani iyi mukuya pakumanyila. Ukufuma apo, mwinong’onele isya uyu mukumanyila nawe muno mubaghile ukwakuntulila nifundo isi mwitendekisye ukuti akapilikisye kanunu nukusikonga.​—Nehe. 8:8; Mbu. 15:28a.

8. Ngimba amasyu gha Pauli agha ghali pa Bakolosi 1:9, 10 ghikutukasya ukubomba isyafiki?

⁸ Linga mukwitendekesya, mwiputeghe kwa Yehova ukuti antule ummanyili winu. Munsumeghe ukuti abatule ukuti mumanyisyeghe ifundo sya mu Baibolo isi sibaghile ukumfika pandumbula. (Belenga Bakolosi 1:9, 10.) Mwinong’oneleghe ifi uyu mukumanyila nawe Ibaibolo akabaghila ukupilikisya na ifi akabaghila ukukolelana nafyo. Mukumbukeghe ukuti ubwighane bwinu bo bwakuti muntule ukuti osiwe.

9. Ngimba ummanyisi abaghile ukuntula bulebule uyu ikumanyila nawe Ibaibolo ukuti itendekesye isi ikuya pakumanyila? Lingania.

⁹ Tuli nulusubilo losa ukuti linga tukumanyila nawe akabalilo kosa, umwene ikuya pakundaghisya syosa isi Yehova na Yesu bikubomba  kangi ikuya pakulonda ukuti amanyile nyingi. (Mat. 5:3, 6) Ukuti akasiwe na isi ikumanyila, umwene ikulondiwa ukupilikisya fiyo isi ikumanyila. Ukuti abombe isi, mundingisanieghe ukulondiwa kwa kwitendekesya ikimanyilo kilikyosa mwakubelenga amalemba nukuketa muno abaghile ukukongela isi ikumanyila. Ngimba mubaghile ukuntula bulebule ukwitendekesya? Mwitendekesyeghe pampene nukumbula muno abaghile ukubombela. * Mundingisanieghe muno abaghile ukumwaghila ansala kangi nukugwala umzele ukuti fintuleghe ukukumbukila ansala. Ukufuma apo muntuleghe muno abaghile ukwamulila m’masyu ghake na ghake. Linga abombile isi, kubaghile ukuya kupepe ukumanya linga apilikisye kanunu isi ikumanyila. Loli filipo ifindu ifingi ifi mukulondiwa ukunkasya ukuti abombeghe.

10. Nongwa yafiki ukubelenga Ibaibolo isiku lililyosa kwakulondiwa kangi ngimba findu fiki fikulondiwa ukuti ukubelenga Ibaibolo kuyeghe kwakutula?

¹⁰ Ukongelelapo pakumanyila sabata aliwesa, uyu ikumanyila Ibaibolo abaghile ukukasiwa fiyo linga isiku lililyosa ikubomba ifindu fimo pamwene. Umwene ikulondiwa ukuti iputeghe kwa Yehova. Bulebule? Mwakupilikisya nukuyobesania na Yehova. Abaghile ukupilikisya kwa Kyala mwakubelenga Ibaibolo isiku lililyosa. (Yos. 1:8; Sal. 1:1-3) Munnangisyeghe muno abaghile ukubombela “Imbatiko ya Kubelenga Ibaibolo” iyi yikwaghiwa pa jw.org. * Ukuti atuliweghe nukubelenga Ibaibolo, munkasyeghe ukuti inong’oneleghe fiyo isi Ibaibolo likumanyisya isyakufwana na Yehova namuno abaghile ukusikongela isi ikumanyila pabumi bwake.​—Imbo. 17:11; Yak. 1:25.

11. Ngimba uyu ikumanyila Ibaibolo abaghile ukumanyila bulebule ukwiputa kanunu kangi nongwa yafiki kwakulondiwa ukuti iputeghe kwa Yehova akabalilo kosa?

¹¹ Munkasyeghe uyu mukumanyila nawe Ibaibolo ukuti ayobesanieghe na Yehova mwakwiputa isiku lililyosa. Linga mukwanda ukumanyila kangi napabumalilo mwiputeghe ukufumila pasi pandumbula kangi munjobeghe mulwiputo. Linga ikupilikisya muno mukwiputila, umwene ikuya pakumanyila muno abaghile ukwiputila ukufumila pasi pandumbula nukwiputa kwa Yehova Kyala ukwendela mu ngamu ya Yesu Kristu. (Mat. 6:9; Yoh. 15:16) Inong’onela muno ukubelenga Ibaibolo isiku lililyosa (ukupilikisya kwa Yehova) nukwiputa (ukuyobesania na Yehova) kubaghile  ukuntulila ukuti asegheleleghe fiyo kwa Kyala. (Yak. 4:8) Linga isiku lililyosa ikubomba isi, sibaghile ukuntula ukuti iyipe kwa Yehova nukosiwa.

12. Ngimba ummanyisi abaghile ukuntula bulebule uyu ikumanyila nawe Ibaibolo ukuti akusye ubumanyani bwake na Yehova?

¹² Tukulonda ukuti uyu tukumanyila nawe Ibaibolo amanyile isyakufwana na Yehova. Loli isi ikumanyila sikulondiwa ukuti simfikeghe pandumbula nukughelaghela ukusikonga. Yesu abamanyisyagha abandu ifindu ifi fyabafikagha pandumbula kangi abene bapilikisyagha kumyake. Abandu bankongagha panongwa yakuti isi abamanyisyagha syabafikagha pandumbula. (Luka 24:15, 27, 32) Uyu mukumanyila nawe Ibaibolo ikulondiwa ukunketa Yehova ukuya wanaloli, uyu abaghile ukuya nawe pabumanyani, ukuya yo tata wake, Kyala wake kangi mmanyani wake. (Sal. 25:4, 5) Muntuleghe ukuketa utuyilo utununu utwa Kyala witu. (Kuso. 34:5, 6; 1 Pet. 5:6, 7) Kisita kwinong’onela inkhani iyi mukuyobesania, muntuleghe ukumanya muno Yehova ayilile. Muntuleghe ukuti andaghisyeghe utuyilo utununu utwa Yehova, ulughano lwake, ikisa kangi nikibabilisi. Yesu atile, ‘ulukomelesyo ulukulumba lo lukuti, ‘unganeghe Yehova Kyala wako.’ (Mat. 22:37, 38) Mughelegheleghe ukuntula ukuti anganeghe Yehova.

13. Yoba ikifwanikisyo ikya muno tubaghile ukuntulila uyu tukumanyila nawe Ibaibolo ukuti amanyile isya tuyilo twa Yehova.

¹³ Linga mukuyobesania, mundinganie inongwa iyi munganile Yehova. Isi sibaghile ukuntula ukuti akusye ubumanyani bwake na Yehova. (Sal. 73:28) Mwakifwanikisyo, ngimba yilipo ifundo pamo ilemba limo mu buku ili mukumanyila ili likuyoba simo isyakufwana na Yehova bo ulughano lwake, amahala, ubwanaloli pamo amaka, ifi umwe fikubafika pandumbula? Mumbuleghe isi uyu mukumanyila nawe kangi ikulondiwa ukumanya ukuti iki kyo kifukwa kimo iki munganile Tata winu wakumwanya. Kilipo kangi ikindu kimo iki ikulondiwa ukubomba ukuti osiwe.

14. Ngimba pa Bahiburi 10:24, 25 pikuyoba isyafiki isyakufwana nukufika pangomano namuno sibaghile ukuntulila uyu ikumanyila Ibaibolo ukukula mwambepo?

¹⁴ Twesa tukulonda ukuti aba tukumanyila nabo Ibaibolo bosiwe. Injila yimo iyi tubaghile ukubatulila ko kubakasya ukuti bafikeghe pangomano. Ummanyisi yumo atile linga uyu ikumanyila Ibaibolo ikufika pangomano, ikukula mwanakalinga mwambepo. (Sal. 111:1)  Abamanyisi bamo bikubalingania aba bikumanyila nabo ukuti, babaghile ukumanyila nyingi ku ngomano ukukinda linga bikumanyila pampene. Belenga Bahiburi 10:24, 25 na uyu mukumanyila nawe Ibaibolo, nukumbula ukulondiwa kwa kufika pangomano. Munnangisye ividiyo ya mutu wakuti, Ngimba Findu Fiki Fikubombiwa Panyumba ya Bunyafyale? * Muntulegheghe ukuti amanye ukulondiwa kwakufika pangomano.

15. Ngimba tukulondiwa ukubomba isyafiki ukuti tunkasye uyu tukumanyila nawe Ibaibolo ukuti afikeghe pangomano akabalilo kosa?

¹⁵ Ngimba mukulondiwa ukubomba isyafiki linga uyu mukumanyila nawe Ibaibolo atikufika pangomano? Mwanakalinga mumbule ifundo simo isi mwamanyile pangomano kunyuma. Linga aketile muno mukubombela ningomano, yope abaghile ukwanda ukubungana. Mumpepo Ingasya ya Ndindilili kangi Imbatiko ya ngomano syitu iya Ukufumusya nu Bumi Bwitu Bwabukristu ifi utubalilo twingi tukumanyila pangomano. Munnangisyeghe isi mukwakumanyila kungomano sabata uwakukongapo kangi mundalusyeghe apa atikupilikisya kanunu. Isi ikwakuketa nukumanyila kungomano akakwanda, sikwakuya syakukindana fiyo na ku machalitchi agha iputagha. (1 Kor. 14:24, 25) Umwene ikwakwaghana na bandu abatuyilo utununu aba abaghile ukubakonga akangi aba babaghile ukuntula ukuti osiwe.

16. Ngimba findu fiki fikulondiwa ukuti tuntule uyu tukumanyila nawe Ibaibolo ukuti osiwe kangi tukwisa pakumanyila isyafiki mu nkhani iyakukongapo?

¹⁶ Ngimba tubaghile ukuntula bulebule uyu tukumanyila nawe Ibaibolo ukuti osiwe? Tubaghile ukuntula aliwesa ukuketa ukulondiwa kwa kumanyila Ibaibolo mwakunkasya ukuti amanyileghe sabata aliwesa nukwitendekesya ikimanyilo kilikyosa. Kangi tukulondiwa ukunkasya ukuti ayobesanieghe na Yehova isiku lililyosa nukukusya ubumanyani bwake numwene. Tukulondiwa ukunkasya ukuti afikeghe pangomano akabalilo kosa. (Keta Ibokosi pa peji 12, ilyakuti “ Isi Aba Tukumanyila Nabo Ibaibolo Bikulondiwa Ukubomba Ukuti Bosiwe.”) Loli ukufwana namuno inkhani iyakukongapo yikuyobela, filipo ifindu 5, ifi abamanyisi bikulondiwa ukubomba ukuti babatule aba bikumanyila nabo Ibaibolo ukuti bosiwe.