1. Ngimba Abakristu bikulondiwa ukukindilila ukubomba isyafiki?

NGIMBA mosiwe kale? Linga mo siyilile, ko kuti mwanangisye ku bandu ukuti muli nulwitiko mwa Yehova kangi mukulonda ukukolelana nigulu lyake. * Ukuyoba ubwanaloli, mukulondiwa ukukindilila ukukasya ulwitiko lwinu mwa Yehova nukusubila ukuti ikubombela igulu lyake amasiku agha.

2-3. Ngimba mo munjila yiliku muno Yehova ikulongosyela igulu lyake amasiku agha? Yoba ififwanikisyo.

² Amasiku agha, Yehova ikulongosya igulu lyake munjila iyi yikunangisya muno ayilile, ubwighane bwake kangi namuno ifundo syake siyilile. Isagha tuyobesanie utuyilo tutatu utwa Yehova utu ikunangisya mu gulu lyake.

³ Akayilo akakwanda, ‘Kyala atikusala.’ (Imbo. 10:34) Ulughano lo lwalimpangisye Yehova ukuti abike umwanake ukuya ‘kitabulilo ku bandu bosa.’ (1 Tim. 2:6; Yoh. 3:16) Yehova ikubombela ababombi bake ukuti bafumusyeghe amasyu amanunu ku bandu aba babaghile ukupilika mwakubatula ukuti basayiwe nikemo nukuti basapone. Akayilo akabubili, Yehova yo Kyala walubatiko nuwalutengano. (1 Kor. 14:33, 40) Yonongwa yake tukuketa ukuti ababombi bake bikumbombela ndutengano na ndubatiko. Akayilo akabutatu, Yehova yo ‘mmanyisi unkulumba.’ (Yes. 30:20, 21) Yonongwa yake igulu lyake likwiyipa fiyo ukubamanyisya abandu amasyu ghake ku kipanga na mubufumusi. Ngimba Abakristu bakunyuma bakongagha bulebule utuyilo twa Yehova utu? Ngimba ababombi ba Yehova bikukonga bulebule utuyilo utu amasiku agha? Kangi ngimba mbepo mwikemo ghubaghile ukubatula bulebule ukubomba pampene nigulu lya Yehova amasiku agha?

4. Ukufwana na Imbombo Sya Batumiwa 1:8, ngimba Yesu ababulile isyafiki abamanyili bake kangi butuli buliku ubu bikulondiwa?

⁴ Nkabalilo kakunyuma. Amasyu agha Yesu afumusyagha ghabapagha abandu ulusubilo. (Luka 4:43) Umwene ababulile abamanyili bake ukuti bakindilile ukubomba imbombo iyi alyandisye ukuti buye buketi ‘ukwakufika kuno kimalikile ikisu.’ (Belenga Imbombo Sya Batumiwa 1:8.) Loli batikuya pakubomba bene imbombo iyi. Bikulondiwa mbepo mwikemo ukuti “ghubatule” ukufwana namuno Yesu ababulile.—Yoh. 14:26; Zeka. 4:6.

5-6. Ngimba mo munjila siliku muno mbepo mwikemo wabatulile abafundiwa ba Yesu?

⁵ Abafundiwa ba Yesu balyambilile mbepo mwikemo pa Pentekositi, 33 C.E. Nubutuli bwa mbepo mwikemo, mwanakalinga balyandile ukufumusya kangi kwa kabalilo akapimba abandu bingi balyandile ukupilikisya amasyu amanunu. (Imbo. 2:41; 4:4) Bo abandu bandile ukubafwima, abene bakatilile pamo ukuleka ukufumusya m’malo mwake balinsumile Yehova ukuti abatule. Balinkwiputa balikuti: ‘Ubapeghe ababombi bako ukuliyoba ilisyu lyako nubukifu bosa.’ Popapo bosa balinkwisula na mbepo mwikemo, ‘balinkuliyoba ilisyu lya Kyala nubukifu.’—Imbo. 4:18-20, 29, 31.

⁶ Abafundiwa ba Yesu balyaghene kangi nindamyo isingi. Mwakifwanikisyo abene bakalinayo imipukutu iya malemba. Bakalinagho amabuku agha ghalinganiagha isya Baibolo ukufwana na agha tuli nagho masiku agha. Kangi balondiwagha ukubafumukisyila abandu aba bayobagha injobelo isyakukindanakindana. Kisita kwinong’onela indamyo syosa isi, abafundiwa abakwiyipa aba, babombile ifindu ifi fyabonekagha ukuti fikabaghila ukubombiwa. Kwa fyinja 30 abene bafumwisye amasyu amanunu ‘kufipeliwa fyosa kusi kumpalanga.’—Kolos. 1:6, 23.

7. Kwa fyinja 100 ifi fikindilepo, ngimba ababombi ba Yehova basimenye ukuti Kyala ikulonda ukuti babombeghe isyafiki kangi abene babombile bulebule?

⁷ Amasiku agha. Yehova ikukindilila ukubalongosya nukubapa amaka ababombi bake ukuti babombeghe ubwighane bwake. Umwene ikubalongosya ababombi bake ukwendela m’masyu ghake amatuyiliwa, Ibaibolo. Mu Baibolo tukubelenga isyakufwana nubufumusi bwa Yesu nululaghilo ulu abamanyili bake bikukindilila ukukonga ulwakufwana nimbombo iyi alyandisye. (Mat. 28:19, 20) Magazini yakunyuma iya Julayi 1881, yatile: “Yehova akatusalile ukuti abandu batupeghe ulughindiko pamo ukuti tuye nikyuma loli ukuti tubombeleghe ifindu ifi tuli nafyo ukufumusya amasyu amanunu.” Akabuku akakuti Awo Ŵali Kupika Mulimo, (To Whom the Work Is Entrusted) aka kasokile mu 1919, katile: “Imbombo iyi yikuboneka ukuti nywamu fiyo loli ya Mwalafyale kangi nubutuli bwake tukuya pakufwanisya.” Ukufwana itolo na Bakristu bakunyuma, abakamu aba bali bakifu kangi baliyipile fiyo pambombo iyi, abene bali nulusubilo losa ukuti mbepo mwikemo ghukuya pakubatula ukubafumukisyila abandu aba mfikolo fyosa. Nanuswe tukusubila ukuti mbepo mwikemo ghukuya pakututula amasiku agha.

8-9. Ngimba njila siliku isi igulu lya Yehova likubombela pakufumusya amasyu amanunu?

⁸ Igulu lya Yehova likubombela ifindu ifyakukindanakindana pakufumusya amasyu amanunu. Ifindu ifi fikongelelapo amabuku, amavidiyo, amagilamafoni, amagalimoto gha masipika, amapulogilamu gha pa lediyo kangi lino bikubombela fiyo intaneti. Kangi igulu lya Yehova likubomba imbombo iyakusanusya amabuku munjobelo nyingi ukukinda kunyuma. Nongwa yafiki? Panongwa yakuti abandu babaghile ukupilikisya amasyu amanunu munjobelo yabo. Panongwa yakuti Yehova atikusala; umwene ayobile ngani ukuti amasyu amanunu ghikwisa kufumusiwa ku bandu ‘aba mfikolo fyosa, aba  mfisu fyosa, aba munjobelo syosa na mbandu bosa.’ (Ubuset. 14:6, 7) Umwene ikulonda ukuti umundu aliwesa apilike amasyu amanunu.

⁹ Bule pakuyoba isya bandu aba kubaghile ukuya kukafu ukufika kukaya kabo ukuti tubafumukisyile? Ukuti tubafumukisyile abandu bingi, Yehova ikulitula igulu lyake ukuti libombeleghe injila isingi isyakufumukisyila. Mwakifwanikisyo, mu 2001, aba Nkabughatila Kakulongosya babitikisye abakamu na balumbu ba ku France ukuti bande ukufumusya mwakubombela amashelefu ninjila isingi isyakuyabila amabuku. Ukufuma apo, abakamu na balumbu aba fyisu ifingi balyandile ukubombela injila iyi. Ifyakukongapo fyake fyali finunu fiyo. Mu 2011 ipulogilamu imbya yalyandile ku United States nkaya ka New York kuno abandu bake bikuya bize fiyo. Nkyinja iki amabuku aghakufwana, 102,129 na magazini 68,911 ghayabiliwe. Kangi abandu abakufwana 4,701 basumile ukuti bande ukumanyila Ibaibolo. Ukuyoba ubwanaloli, mbepo mwikemo wa Kyala atulile fiyo pambombo iyi. Yonongwa yake aba Nkabughatila Kakulongosya balitikisye injila iyakufumusya mwakubombela amashelefu pa kisu kyosa kyapasi.

10. Ngimba tukulondiwa ukubomba isyafiki ukuti tufumusyeghe nukumanyisya kanunu?

¹⁰ Isi mukulondiwa ukubomba. Linga muli mubufumusi mubombeleghe amasakisyo agha mukumanyila pangomano. Kangi utubalilo tosa mufumusyeghe na kagulu kinu ka bufumusi. Abakamu na balumbu aba mu kagulu kinu babaghile ukubatula ukuti mumanyisyeghe nukufumusya kanunu kangi mubaghile ukukasiwa fiyo nikifwanikisyo kyabo ikinunu. Mukindilileghe ukufumusya nalinga ukuti mukwaghana nindamyo. Ukufwana itolo namuno umutu wa nkhani ghukuyobela, tukufwanisya ukubomba ubwighane bwa Kyala komma panongwa ya maka ghitu loli panongwa ya mbepo mwikemo. (Zeka. 4:6) Kangi tuli nulusubilo losa ukuti Yehova ikuya pakutupa amaka panongwa yakuti tukubomba imbombo yake.

11. Ngimba aba nkabughatila kakulongosya babombagha bulebule ukuti bakindilile ukuya bakukolelana nababombi ba Yehova?

¹¹ Nkabalilo kakunyuma. Aba nkabughatila kakulongosya ku Yerusalemu babombagha mwakukolelana  ukuti bakindilile ukuya palutengano na babombi ba Kyala. (Imbo. 2:42) Mwakifwanikisyo, bo inkhani iyabubutiwa yitamisye mu 49 C.E., aba nkabughatila kakulongosya, mwakulongosiwa na mbepo mwikemo bayobesenie inkhani iyi. Linga Abakristu aba bakakolelene pa nkhani iyi, imbombo yakufumusya yikayagha pakwenda kanunu. Nalinga ukuti bali Bayuda loli abatumiwa nabanyambala abakusi bakasofanisiwe ninyiho sya Bayuda pamo nifimanyisyo fyabo ifyabutungulu. M’malo mwake abene basubilagha amasyu gha Kyala na mbepo mwikemo ukuti abatule ukusala kanunu ifyakubomba. (Imbo. 15:1, 2, 5-20, 28) Ngimba ifyakukongapo fyake fyali fyo filiku? Yehova abasayile fiyo, abene bakindilile ukuya palutengano, bakolelene kangi imbombo yakufumusya yabukile pankyeni.—Imbo. 15:30, 31; 16:4, 5.

12. Ngimba findu fiki fikunangisya ukuti igulu lya Yehova amasiku agha likubomba ifindu ndubatiko na ndutengano?

¹² Amasiku agha. Igulu lya Yehova likubatula ababombi bake ukuti bakindilileghe ukuya palutengano kangi bakukolelana. Nkyinja kya 1895, magazini ya Zion’s Watch Tower ni ya Herald of Christ’s Presence iya Novembala 15 ghali numutu wakuti “Mbununu na Ndubatiko,” ughu ghufumile pilemba lya 1 Bakorinti 14:40. Inkhani iyi yatile: “Abatumiwa babalembile ifindu fingi Abakristu bakunyuma isyakufwana nukubomba ifindu ndubatiko . . . Kwakulondiwa fiyo ukukonga ‘syosa isi syalembiwe iyolo mmalemba ukuti luyeghe lumanyisyo kumyitu.’” (Rom. 15:4) Igulu lya Yehova amasiku agha, likwiyipa ukubatula Abakristu ukuti bakindilile ukuya palutengano kangi bakukolelana ukufwana itolo na Bakristu bakunyuma. Mwakifwanikisyo, linga mubukile ku kipanga ikingi mukumanya ikimanyilo kya Ingasya ya Ndindilili iyi mukuya pakumanyila kangi numutu wa nkhani ughu mukuya pakumanyila. Mwanakalinga, mukwipilika kuti muli babuke. Mbepo mwikemo wa Kyala mwene yo abaghile ukupangisya isi.—Zefa. 3:9.

13. Ukufwana na Yakobu 3:17, ngimba malalusyo ghaliku agha tukulondiwa ukwilalusya?

¹³ Isi mukulondiwa ukubomba. Yehova ikulonda ukuti ababombi bake ‘bayeghe mbunyamundu bwa mwa mbepo, lubapinyanieghe lu lutengano.’ (Ef. 4:1-3) Yonongwa yake mukulondiwa ukwilalusya ukuti: ‘Ngimba ngukasya ulutengano na bumobwene nkipanga? Ngimba ngubapilikila aba bikulongosya nkipanga?  Ngimba abangi babaghile ukunsubila linga nili nubudindo nkipanga? Ngimba ngwiyipa pakumbombela Yehova?’ (Belenga Yakobu 3:17.) Linga muketile ukuti mukulondiwa ukuchenja ifindu fimo pabumi bwinu, mwiputeghe kwa Yehova ukuti abape mbepo mwikemo. Linga mukughelaghela ukuti mbepo mwikemo ghubatule pabumi bwinu, abakamu na balumbu bikuya pakubaghana nukubaketa ukuti muli bakulondiwa fiyo.

14. Ukufwana na Bakolosi 1:9, 10, ngimba Yehova abatulile bulebule Abakristu abakunyuma ukupilikisya kanunu amasyu ghake?

¹⁴ Nkabalilo kakunyuma. Yehova ikuhoboka fiyo ukubamanyisya ababombi bake. (Sal. 32:8) Umwene ikulonda ukuti bammanye, banganeghe kangi bikaleghe nu bumi kwa bwila na bwila pakuya banake baghaniwa. Isi sikabaghila ukubombiwa kisita kumanyisiwa numwene. (Yoh. 17:3) Yehova abombesyile Abakristu bakunyuma ukuti babamanyisyeghe ababombi bake. (Belenga Bakolosi 1:9, 10.) Mbepo mwikemo ughu Yesu asumile wabatulile fiyo abafundiwa. (Yoh. 14:16) Wabatulile ukupilikisya kanunu amasyu gha Kyala nukukumbukila syosa isi Yesu ayobile nukubomba, isi sikwaghiwa mu mabuku agha masyu amanunu. Isi syakasisye fiyo ulwitiko lwa Bakristu abakunyuma, ulughano lwabo kwa Kyala, ku mwanake kangi na ku Bakristu abinabo.

15. Ngimba mo munjila siliku isi mukuketa ukuti Yehova ikufwanisya isi afingile pa Yesaya 2:2, 3?

¹⁵ Amasiku agha. Yehova ayobile ngani ukuti ‘mmasiku aghabumalikisyo,’ abandu aba mfikolo fyosa bisakubukagha ku kyamba ukuti bakamanyisiwe injila syake. (Belenga Yesaya 2:2, 3 NWT.) Tukuketa ukufwanisiwa kwa busololi ubu amasiku agha. Ukwiputa kwa bwanaloli kuli pamwanya fiyo ukukinda ukwiputa kwa butungulu. Kangi Yehova ikubapa ababombi bake ifyakulya fingi fyamwambepo ifi fili mu Baibolo. (Yes. 25:6) Umwene ikubombela ‘umbombi unsubiliwa nuwa mahala,’ ukuti atupeghe  ifyakulya fingi fyamwambepo munjila isyakukindanakindana. Mwakifwanikisyo, tukubelenga nukupilikisya inkhani kangi tukuketelela amavidiyo. (Mat. 24:45) Tukwipilika bo muno ummanyani wa Yobu, Elihu alipilikile, umwene atile: ‘Kyala yo mmanyisi uyu abakindile bosa.’—Jobu 36:22.

16. Ngimba mukulondiwa ukubomba isyafiki ukuti mukule mwambepo?

¹⁶ Isi mukulondiwa ukubomba. Mbepo wa Kyala ghukuya pakubatula ukukonga isi mukubelenga nukumanyila m’masyu ghake. Mwiputeghe mwakufwana itolo nu wamasalimo, uyu atile: “We Yehova, uli mmanyisyagha une injila yako, ukuti nendeghe mbwanaloli bwako, indumbula yangu yiyeghe yimoyene itolo ukukutila uwe.’ (Sal. 86:11) Kangi mukindilileghe ukubelenga nukumanyila Ibaibolo na mabuku aghangi agha igulu lya Yehova likubapa. Bwanaloli ukuti ubwighane bwinu bukaya bwakuti muye itolo na mahala. Loli mukulonda ukuti ubwanaloli ubu mukumanyila bubafikeghe pandumbula nukukonga isi mukumanyila pabumi bwinu. Mbepo mwikemo wa Yehova ghubaghile ukubatula ukubomba isi. Kangi mukulondiwa ukuti mubakasyeghe abakamu na balumbu binu. (Hib. 10:24, 25) Nongwa yafiki? Panongwa yakuti muli mumbumba yimoyene iya mwambepo. Musumeghe mbepo wa Kyala ukuti abatuleghe ukwamula ifundo isyakufuma pasi pandumbula linga muli pangomano kangi ukuti mubombeghe kanunu linga mupeliwe inkhani. Linga mukubomba ulu, mukuya pakunangisya kwa Yehova numwanake Yesu ukuti musighanile ‘ing’osi’ syabo isyakulondiwa.—Yoh. 21:15-17.

17. Ngimba mo munjila siliku isi mubaghile ukunangisya ukuti mukukolelana nigulu lya Yehova?

¹⁷ Mwalululu, igulu lyene ili likwisa kusyala pa kisu lyo ili lisakulongosiwagha na mbepo wa Kyala. Yonongwa yake mukulondiwa ukwiyipa fiyo ukuti mukolelaneghe nigulu lya Yehova. Munangisyeghe ukuti mubaghanile abandu bosa bo muno Kyala ikubombela mwakufumusya amasyu amanunu. Mukongeghe ulughano lwa Yehova mwakubomba ifindu ndubatiko na ndutengano nukukasya bumobwene nkipanga. Kangi mupilikisyeghe ku Mmanyisi winu Unkulumba mwakubombesyela ifyakulya fyosa fyamwambepo ifi ikubapa. Bo ikisu kya Setano iki kikubuka kubumalilo, mutikuya pakuya nubogha. M’malo mwake mukuya pakunangisya ubukifu nukuya mu gulu lya babombi abasubiliwa aba bikukolelana nigulu lya Yehova.