Ukuti bafwanisye imbombo iyakufumusya, Abamanyili ba Baibolo balondiwagha ukuya bakifu. Abene bakalondiwa ukufumusya itolo “amasyu amanunu” ku balondo loli ‘nisiku ilyakubaghomokesya’ abandu ababibi.

Unkamu J. H. Hoskin, uyu ikwikala ku Canada, afumusyagha mwabukifu nalinga ukuti abandu bansusyagha. Mu 1921, umwene alyaghene numputi uwa tchalichi ilya Methodist. Unkamu Hoskin alyandile ukuyobesania nawe, atile: “Tukulondiwa ukuyobesania kanunu ukufuma mu Baibolo. Kangi linga tukakolelana pa fundo simo, tukulondiwa ukulekana mbololo nukukindilila ukuya pabumanyani.” Loli sikali syo isi syabombiwe. Unkamu Hoskin atile: “Bo tuyobesenie kwa maminiti manandi itolo umputi uyu akomile mwamaka ikifigho kangi ninong’onagha ukuti igalasi liwile pasi.”

Umputi uyu alinyumanile atile, “Nongwa yafiki ukabuka ku bandu aba bakaya Abakristu ukuti bo ukayobesanie nabo?” Unkamu Hoskin akalyamwile loli bo ikusokapo, alyandile ukwinong’ona ukuti umputi uyu atikubomba ifindu bo Nkristu.

Bo umputi uyu ikufumusya mu tchalichi lyake isiku ilyakukongapo, ayobile ifibibi ifyakufwana nu nkamu Hoskin. Unkamu Hoskin atile, “Umwene asisokile ing’osi syake, mwakubabula abandu ukuti nali mundu ntungulu fiyo ukukinda umundu aliwesa mu tawuni yila kangi nalondiwagha ukughoghiwa.” Isi sikalingwisisye amaka, umwene akindilile ukufumusya nu kuyobesania na bandu bingi. Umwene atile: “Nahobokagha fiyo ukufumusya ku malo agha.” Abandu bamo bayobagha ukuti, “Tusimenye ukuti kubomba imbombo ya Kyala, kangi bambagha ifindu ifi nalondiwagha.”

Ukuti babatule abandu ukupilikisya kanunu Ibaibolo, utubalilo tosa Abamanyili ba Baibolo balembagha amalalusyo gha mu Baibolo naba ansala mu magazini agha lino tukuti Awake! Mwaghiwagha amalalusyo agha mu Baibolo aghakuyoba isya bakilumyana agha abapapi bayobesaniagha na banabo. Abapapi babalalusyagha abanabo amalalusyo agha nukubatula akubagha aba ansala mu Baibolo. Amalalusyo ghamo ghali bo aghakuti, “Ngimba mu Baibolo mukwaghiwa amabuku malinga?” “Ngimba  Unkristu aliwesa ikulondiwa ukufwimiwa?” Amalalusyo agha ghabatulagha abakilumyana ukuti bayeghe bakifu pakufumusya.

Mwaghiwagha kangi amalalusyo gha mu Baibolo naba ansala aba babalembile abandu aba balimenye kanunu Ibaibolo. Aba ansala bake baghiwagha kubwandilo kwa buku ilyakuti Studies in the Scriptures. Abandu bingi bamanyile nyingi ukufuma ku malalusyo agha loli pakabalilo ako bafumwisye ukuti amalalusyo agha balekile ukusosya. Nongwa yafiki?

Abakamu aba balongosyagha, baketile ukuti abandu bikulondiwa ukumanyila inkhani yimoyene iya mu Baibolo pakabalilo kamokene. Yonongwa yake mu Novembala 1921 basosisye ibuku ilyakuti, The Harp of God. Abandu aba balondagha ukumanya nyingi kangi balyambilile ibuku ili, balitikisiwe ukuti bope bamanyileghe pabene. Ukumanyila uku kwabatulile abandu ukumanya isya bwighane bwa Kyala ubwakubapa abandu ubumi bwa bwila na bwila. Ngimba isi syatulile bulebule?

Linga umundu ambilile ibuku, bampagha akakhadi aka kayobagha isya mapeji agha ikulondiwa ukuti akabelenga mwibuku. Sabata uwakukongapo, ambililagha ikhadi ilingi ili lyayagha namalalusyo mingi aghakufwana na isi abelengile. Kubumalilo kwa khadi ili kwayagha imbombo iyakuti abombe sabata uwakukongapo.

Sabata aliwesa pabasabata 12, ummanyili ambililagha ikhadi ipya ilya kipanga iki kyayagha pabupipi. Utubalilo twingi amakhadi agha ghasungiwagha na bakulumba bakipanga pamo aba batoliwagha ukufumusya ku nyumba ni nyumba. Mwakifwanikisyo, Anna K. Gardner, uwakufuma ku Millvale, Pennsylvania, U.S.A., atile: “Bo basosisye ibuku ilyakuti The Harp of God, unkulu wangu uyu atamiwagha ukwenda, iliyipile fiyo ukutuma amakhadi agha malalusyo sabata aliwesa.” Linga ummanyili amalile ukumanyila, umundu yumo uwakufuma kukipanga amwendelagha ukuti asantule ukumanyila nyingi isyakufwana ni Baibolo.

Kubumalilo bwa kyinja, Unkamu J. F. Rutherford atumagha kalata ku fipanga fyosa. Umwene asyaghenie ukuti “Imbombo iyakufumusya isya Bunyafyale yifikile kosa kangi yibatulile abandu bingi ukukinda ifyinja fya kunyuma.” Kangi alyongilile atile: “Yilipo imbombo nyingi iyi tukulondiwa ukubomba. Mubakasyeghe abangi ukuti beghepo ikighaba pambombo iyakulondiwa fiyo iyi.” Kisita kukayika, Abamanyili ba Baibolo bapilikile ubulongosi ubu. Mu 1922 abene bafumwisye mwabukifu isya Bunyafyale ukukinda kunyuma.