1. Nongwa yafiki abandu bingi bikusofanisiwa?

AMASIKU agha ghalipo amatchalichi mingi agha ghikuyoba ukuti Bakristu kangi bikuti bikumwiputa Kyala munjila iyi yikunhobosya. Yonongwa yake abandu bingi bikusofanisiwa. Abene bikulalusya ukuti, “Ngimba lilipo itchalichi limolyene ilya bwanaloli pamo amatchalichi ghosa ghikunhobosya Kyala?” Ngimba tuli nulusubilo losa ukuti isi tukumanyisya bwanaloli kangi ukuti injila iya kwiputa iyi Abaketi ba Yehova bikukonga amasiku agha yo iyi yakwitikisiwa na Yehova? Ngimba kwakulondiwa naloli ukuya nulusubilo bo ulu? Isagha tukete ubuketi bumo.

2. Ukufwana na 1 Batesalonike 1:5, nongwa yafiki untumiwa Pauli ali nulusubilo losa ukuti abumenye ubwanaloli?

² Untumiwa Pauli ali nulusubilo losa ukuti abumenye ubwanaloli. (Belenga 1 Batesalonike 1:5.) Umwene akasubilagha itolo panongwa yakuti syampangisyagha ukuya walusekelo. M’malo mwake, Pauli iyipagha fiyo ukumanyila Amasyu gha Kyala. Umwene asubilagha ukuti ‘ghosa Amalemba agha Mbepo wa Kyala aghatuyile.’ (2 Tim. 3:16) Ngimba amanyile isyafiki? Ukwendela M’malemba, Pauli abwaghile ubuketi ubwanaloli ubwakuti Yesu ali yo Mesiya uyu ayobeliwe ngani, ubuketi ubu abalongosi ba Chiyuda babukanile. Abalongosi aba, bayobagha ukuti bikumanyisya abandu ubwanaloli ubwakuyoba isya Kyala loli isi babombagha sikanhobosyagha Kyala. (Titi 1:16) Mwakukindana na bene, Pauli akasalagha isi alondiwagha ukusubila na isi akalondiwagha ukusubila ukufuma M’masyu gha Kyala. Umwene iyipagha ukumanyisya nu kukonga “syosa isi Kyala alinongw’ine.”—Imbo. 20:27.

3. Ngimba tukulondiwa ukumanya aba ansala aba malalusyo ghosa ukuti tuye nulusubilo ulwakuti tubumenye ubwanaloli? (Keta kangi ibokosi ilyakuti, “ Imbombo sya Yehova Naminong’ono Ghake—‘Fyapamwanya Fiyo.’”)

 ³ Bamo bikwinong’ona ukuti itchalichi lya bwanaloli likulondiwa ukufwanisya ukwamula ilalusyo lililyosya nalinga ghaye malalusyo agha ghatikwamuliwa mu Baibolo. Ngimba isi sibaghile ukubombiwa? Inong’onela ikifwanikisyo kya Pauli. Abakasisye Abakristu abinake ukuti “batupimeghe utundu tosa” loli ababulile kangi ukuti filipo ifindu fingi ifi umwene akafipilikisyagha. (1 Tes. 5:21) Umwene alembile ukuti, “Namanga ubumanyi tukumeghenyulako itolo,” kangi alyongelile atile, “po tukufwana tukuketela nkiketelo ndufunienie itolo.” (1 Kor. 13:9, 12) Pauli akapilikisyagha kilikyosa; mo muno siyilile nanuswe. Loli Pauli abumenye ubwanaloli bumo ubwakuyoba isya Yehova. Umwene asimenye ukuti isi asubilagha bwali bwanaloli.

4. Ngimba tubaghile ukukasya bulebule ulusubilo lwitu ulwakuti tubumenye ubwanaloli, kangi ngimba tukuya pakumanyila isyafiki isyakufwana na Bakristu ba bwanaloli?

⁴ Injila yimo iyi tubaghile ukukasyila ulusubilo lwitu ulwakuti tubumenye ubwanaloli ko kufwanikisya injila iya kwiputa iyi Yesu ayobile na iyi Abaketi ba Yehova bikukonga amasiku agha. Mu nkhani iyi, tukuya pakumanyila ukuti Abakristu ba bwanaloli (1) batikwiputa ku fifwani, (2) bikuyighindika ingamu ya Kyala, (3) babughanile ubwanaloli kangi (4) baghanene ukufuma pasi pandumbula.

5. Ngimba tukumanyilako isyafiki kwa Yesu isyakufwana ninjila inunu iyakwiputa kwa Kyala, kangi tubaghile ukukonga bulebule isi amanyisyagha?

⁵ Panongwa yakuti Yesu alinganile fiyo Yehova, umwene iputagha kumyake mwene pakabalilo aka ali kumwanya kangi bo ali pa kisu kyapasi. (Luka 4:8) Umwene abamanyisye abafundiwa bake ukuti babombeghe mwakufwana  itolo. Yesu na bafundiwa bake, bakabombilepo ififwani pakwiputa. Panongwa yakuti Kyala yo Mbepo, akayapo nayumo uyu abaghile ukupanga ikindu iki kibaghile ukufwana numwene. (Yes. 46:5) Loli bule pakuyoba isya fifwani fya bandu ifi bamo bikwinong’ona ukuti bikemo kangi bikufiputa? Ingomelesyo iyabubili pangomelesyo 10, Yehova atile: ‘Komma ukwitendekekesya akandu kamo aka kwiputako, pamo ikifwani kya kandu kamo aka kali mmisi kusi ku kisu . . . Ungafibungulukilagha.’ (Kuso. 20:4, 5) Abandu aba bikulonda ukunhobosya Kyala bikumanya ukuti umwene atikulonda ukuti twiputeghe ku fifwani.

6. Ngimba njila yiliku iyakwiputa iyi Abaketi ba Yehova bikukonga amasiku agha?

⁶ Abandu aba bamanyile inkhani isyambukulu bikuyoba ukuti Abakristu bakunyuma bamwiputagha Kyala mwene. Mwakifwanikisyo, ibuku ilyakuti History of the Christian Church likuyoba ukuti Abakristu bakunyuma “bakabombelagha” ififwani pakwiputa. Amasiku agha, Abaketi ba Yehova bikukonga injila iyi Abakristu bakunyuma bakongagha. Tutikwiputa ku fifwani bo “abikemo,” abandumi; pamo kwa Yesu. Kangi tutikwinamila indembela pamo ukubomba ikindu kilikyosa iki kibaghile ukunangisya ukuti tukwiputila ikisu. Kisita kwinong’onela isi abandu bikutufimbilisya ukubomba loli tukukindilila ukupilikila amasyu gha Yesu aghakuti: ‘Umwiputeghe Yehova Kyala wako yuyo mwene.’—Mat. 4:10.

7. Ngimba mo munjila siliku isi Abaketi ba Yehova bakindene fiyo naba matchalichi ghosa?

⁷ Amasiku agha, abandu bingi bighanile ukupilikisya isi abalongosi ba matchalichi bikufumusya. Abene babaghanile fiyo abalongosi aba kangi bikubiputa. Abandu bingi bikubika ku matchalichi ghabo kangi bikubapa indalama nyingi pamo ukutula igulu lyabo. Abandu aba bikusubila kilikyosa iki abalongosi babo bikuyoba. Abene bikunangisya ukuti bikuhoboka fiyo nabalongosi babo ukukinda namuno babaghile ukuhobokela ukumbona Yesu. Loli bosa aba bikumwiputa Kyala mu njila inunu, batikukonga isya bandu. Nalinga ukuti tukubaghindika aba bikulongosya, tukukonga ifundo ya Yesu iyakuti: ‘Umwe mwesa muli banyamundu.’ (Mat. 23:8-10) Tutikwiputa abandu, kali balongosi ba matchalichi pamo badyali. Kangi tutikubatula munjila yiliyosa. M’malo mwake tutikwingililapo pa fya nkisu. Yonongwa yake, tukindene fiyo na ba matchalichi abangi aba bikwiyoba ukuti Bakristu.—Yoh. 18:36.

8. Ngimba tukumanya bulebule ukuti Yehova ikulonda ukuti ingamu yake yighindikiweghe kangi ukuti umundu aliwesa ayimanye?

⁸ Pakyakubombiwa kimo, Yesu aliputile atile: “We Tata, uyipeghe ubukulumba ingamu yako.’ Yehova alyamwile ulwiputo ulu na masyu aghakufuma kumwanya, afingile ukuti ikuya pakuyighindika ingamu yake. (Yoh. 12:28) Pabufumusi bwake bosa, Yesu ayifumusyagha ingamu ya Tata wake. (Yoh. 17:26) Yonongwa yake Abakristu ba bwanaloli bikuketa ukuti lusako ukubombela ingamu ya Kyala nu kubabulako abangi ukuti bayimanye.

9. Ngimba Abakristu bakunyuma banangisyagha bulebule ukuti bayighindikagha ingamu ya Kyala?

⁹ Nkabalilo kakunyuma, bo ikipanga kya Bukristu kyandile itolo, Yehova ‘atalile ukubaketela abapanja ukuti eghemo mmyabo abandu aba kuya ba ngamu yake.’ (Imbo. 15:14) Abakristu aba bahobokagha fiyo ukubombela ingamu ya Kyala nu kubabulako abangi. Abatumiwa na bafundiwa babombelagha ingamu ya Kyala linga bikufumusya kangi linga bikulemba amabuku gha mu Baibolo. * Abene banangisyagha  ukuti bo bandu bene aba bamanyiwagha ningamu ya Kyala.—Imbo. 2:14, 21.

10. Ngimba buketi buliku ubu bukunangisya ukuti Abaketi ba Yehova bo bandu aba bikumanyiwa ningamu ya Kyala?

¹⁰ Ngimba Abaketi ba Yehova bandu aba bikumanyiwa ningamu ya Kyala? Inong’onela ubuketi ubu. Amasiku agha, abalongosi bingi ba matchalichi bikubomba kilikyosa ukuti basusye ifundo iyakuti Kyala ali ningamu. Abene basosisyemo mu Mabaibolo ghabo kangi batikulibombela imbombo mumatchalichi ghabo. * “Syakupilikiwa ukuti Abaketi ba Yehova bene bo aba bikuyighindika fiyo ingamu ya Kyala.” Tukuyifumusya ingamu ya Kyala kulikosa ukuti abandu bayimanye ukukinda itchalichi lililyosa. Tukubomba kilikyosa iki tubaghile ukufwanisya ukuti tukolelane ningamu yitu, iyakuti tuli Baketi ba Yehova. (Yes. 43:10-12) Tusosisye a Mabaibolo aghakukinda 240 miliyoni gha Malemba Ghakupatulika mu Mang’anamulilo gha Charu Chiphya, muno mukwaghiwa ingamu ya Kyala mu malo agha yasosiwemo na bandu bamo aba bikusanusya Ibaibolo. Kangi tukusosya amabuku aghakulingania isya Baibolo muno mukwaghiwa ingamu ya Kyala munjobelo isyakukinda 1,000.

11. Ngimba Abakristu bakunyuma banangisyagha bulebule ukuti babughanile ubwanaloli?

¹¹ Yesu abughanile ubwanaloli ubwakuyoba  isya Kyala nu bwighane bwake. Muno Yesu abombelagha ifindu fyanangisyagha ukuti abumenye ubwanaloli kangi abatulile abangi ukuti babumanye. (Yoh. 18:37) Abamanyili ba Yesu aba bwanaloli bope babughanile fiyo ubwanaloli. (Yoh. 4:23, 24) Yonongwa yake untumiwa Peteri ayobile ukuti ulwitiko lwa Bakristu ‘njila ya naloli.’ (2 Pet. 2:2) Panongwa ya lwitiko lwabo ulwamaka, Abakristu bakunyuma bakakolelanagha nifundo sya matchalichi, inyiho na minong’ono agha ghakakolelanagha nubwanaloli. (Kolos. 2:8) Mwakufwana itolo namasiku agha, Abakristu banaloli bikwiyipa ‘ukwenda mbwanaloli’ mwakughelaghela ukukonga isi bikusubila nu kubomba ifindu ifi fikukolelana na Masyu gha Yehova pabumi bwabo.—3 Yoh. 3, 4.

12. Ngimba findu fiki fikubombiwa linga aba bikulongosya basyaghenie ukuti bikulondiwa ukuchenja muno twayipilikisyilagha ifundo yimo, kangi nongwa yafiki bikuchenja?

¹² Abaketi ba Yehova batikuyoba ukuti utubalilo tosa bikupilikisya ifundo yiliyosa iya mu Baibolo. Abene utubalilo tumo bikusoba ukulingania ifundo yimo iya mu Baibolo pamo muno bikulongosyela ifindu nkipanga. Isi sitikutuswighisya. Ibaibolo likuyoba mwakupilikiwa kanunu ukuti ababombi bake bikupilikisya ubwanaloli linga akabalilo kakindilepo. (Kolos. 1:9, 10) Yehova ikufumbula ubwanaloli panandinapanandi kangi tukulondiwa ukughulila mbololo ukuti tubupilikisyeghe kanunu ubwanaloli. (Mbu. 4:18) Linga Abankabughatila Kakulongosya basyaghenie ukuti tukulondiwa ukuchenja muno twapilikisyilagha ifundo yimo pamo muno twabombelagha ifindu fimo, abene bikuchenja mwanakalinga. Amasiku agha, amatchalichi mingi ghikuchenja ifimanyisyo fyabo panongwa yakuti bikulonda ukubahobosya abandu babo pamo ukuti bamanyiwe nkisu. Loli Abaketi ba Yehova bikuchenja panongwa yakuti tukulonda ukuseghelela kwa Yehova nukumwiputa munjila iyi Yesu amwiputagha. (Yak. 4:4) Tutikuchenja panongwa yakuti aminong’ono gha bandu ghachenjile nkisu loli panongwa yakuti tukupilikisya kanunu ifundo sya mu Baibolo. Tubughanile fiyo ubwanaloli.—1 Tes. 2:3, 4.

13. Ngimba kayilo kaliku akakulondiwa aka Abakristu bakunyuma banangisyagha, kangi Abaketi ba Yehova bikunangisya bulebule akayilo aka amasiku agha?

¹³ Abakristu bakunyuma bamanyiwe panongwa yatuyilo twingi utununu, loli akayilo akakulondiwa fiyo aka bamanyiwe nako lwali lughano. Yesu atile: ‘Linga mukughanana po bisakubamanyagha bosa abandu ukuti muli bafundiwa bangu.’ (Yoh. 13:34, 35) Amasiku agha, Abaketi ba Yehova bikukolelana kangi bikuhoboka ukunangisania ulughano pa kisu kyosa. Tukindene fiyo na matchalichi ghosa panongwa yakuti uswe tuli bo mbumba yimoyene nalinga ukuti tukufuma mfisu ifyakukindanakindana kangi ninyiho isyakukindanakindana. Tukuketa ubuketi ubwakuti tughanene linga tuli pangomano isya kipanga, isya dela nisya kighaba. Isi sikututula ukuya nulusubilo losa ukuti tukumwiputa Yehova munjila iyi yikunhobosya.

14. Ukufwana na Bakolosi 3:12-14, ngimba yo njila yiliku inunu iyi tubaghile ukunangisania ulughano?

¹⁴ Amalemba ghikutukasya ukuti ‘tughananeghe twe babo batupu.’ (1 Pet. 4:8) Injila yimo iyi tukunangisyila ulughano bo ulu, ko kuhobokelana nindumbula yosa nukufisilana ilyoyo. Kangi tukuya nulusako ulwakunangisya ikisa nu kubambilila abakamu na balumbu bosa kunyumba syitu nalinga bo aba batukalalisye. (Belenga Bakolosi 3:12-14.) Linga tukunangisya ulughano bo ulu, tukunangisya ukuti tuli Bakristu banaloli.

15. Ngimba mo munjila siliku isi tukukonga injila isyakwiputa isi Abakristu bakunyuma bakongagha?

¹⁵ Tukukonga injila iyakwiputa bo iyi Abakristu bakunyuma bakongagha. Mwakifwanikisyo, tukubomba ifindu mumbatiko mwakufwana itolo na Bakristu bakunyuma. Tuli na bakwendela idela, abakulumba bakipanga na batuli nkipanga bo muno bope babombelagha. (Filip. 1:1; Titi 1:5) Mwakufwana itolo nabene, nanuswe tukupilikila indaghilo sya Yehova isyakuyoba isya kughonana, ubweghi, isi Kyala ikuyoba pa nkhani iyakubombela ilopa kangi tukufighilila ikipanga ku bandu aba batikulonda ukukonga indaghilo sya Kyala.—Imbo. 15:28, 29; 1 Kor. 5:11-13; 6:9, 10; Hib. 13:4.

16. Ngimba tukumanyilapo isyafiki pa Baefesi 4:4-6?

¹⁶ Yesu ayobile ukuti bingi bisakuyobagha ukuti bafundiwa bake loli bakaya bosa aba bisakuya banaloli. (Mat. 7:21-23) Amalemba ghope ghikuyoba ukuti, m’masiku ghakubumalikisyo, bingi bisakufwanagha “bikuntila Kyala.” (2 Tim. 3:1, 5) Loli Ibaibolo likuyoba mwakupilikiwa kanunu ukuti lulipo ‘ulwitiko lumolwene’ ulu Kyala ikwitikisya.—Belenga Baefesi 4:4-6.

17. Ngimba bo banani amasiku agha aba bikunkonga Yesu nu kunangisya ulwitiko lwanaloli?

¹⁷ Ngimba bo banani aba bikunangisya ulwitiko lwanaloli amasiku gha? Tulingenie kale ubuketi. Tuketile injila iyakwiputa iyi Yesu amanyisye kangi iyi Abakristu bakunyuma bakongagha. Alipo ansala yumoywene itolo, aba bo—Baketi ba Yehova. Tuli nulusako ulunywamu fiyo pakuya babombi ba Yehova nu kumanya ubwanaloli ubwakuyoba isya Yehova nu bwighane bwake. Isagha tukindilile ukubumilila ubwanaloli nindumbula yosa.