IKYINJA kilikyosa, ing’osi nyingi isya padela sikughomokela nkipanga kya Bukristu. Inong’onela isya “lusekelo kumwanya” linga umundu yumo aghomokile. (Luka 15:7, 10) Linga mwaghomokile, mubaghile ukuya nulusubilo ukuti Yesu, abandumi na Yehova bikuhoboka fiyo ukubaketa ukuti mukukindilila kangi ukuya mbwanaloli. Loli bo mukukasya ubumanyani bwinu na Yehova, mubaghile ukwaghana ni ndamyo. Ngimba ndamyo siliku, kangi findu fiki fibaghile ukubatula?

Abakamu na balumbu bingi bikuwa amaka nalinga ukuti baghomokile nkipanga. Lumo mubaghile ukupilikisya muno Umwalafyale Davidi ipilikilagha. Nalinga ukuti ahobokeliwe ubutulanongwa bwake loli umwene atile: ‘Ubutulanongwa bwangu bo bumbinyenie itolo.’ (Sal. 40:12; 65:3) Linga umundu aghomokile kwa Yehova, abaghile ukukindilila ukwiyipa inongwa pamo ukuya nisoni kwa fyinja fingi. Isabelle alyepusiwe kwa fyinja ifyakukinda 20. * Umwene atile, “Kwali kukafu ukusubila ukuti Yehova abaghile ukunhobokela.” Linga muwile amaka, mukabaghila ukukasya kangi ubumanyani bwinu na Yehova. (Mbu. 24:10) Komma ukwitikisya isi ukuti sibombiwe kumyinu.

Bamo bikupasya ukuti bakabaghila ukubomba kilikyosa ukuti baye kangi pabumanyani na Yehova. Bo bangomokisye, Antoine atile: “Nalibibwe ifindu fingi ifi namanyile pamo ukubomba pakabalilo aka nali Nketi.” Panongwa yakwipilika bo ulu, bamo bikutoliwa ukubomba ifindu ifya mwambepo.

Mwakifwanikisyo, linga inyumba ya mundu yumo yonangike numbelo uwamaka fiyo, abaghile ukuwa amaka linga ikwinong’onela isya kabalilo namaka agha ikulondiwa ukuti ayenge kangi inyumba. Mwakufwana itolo, linga ubumanyani bwinu na Yehova  bumalike panongwa ya butulanongwa ubunywamu, mubaghile ukwanda ukupasya isyakufwana nukwiyipa ukuti muye kangi pabumanyani na Yehova. Loli ubutuli bulipo.

Yehova ikuyoba ikuti: ‘Oko, isagha lelo tuyobesanie.’ (Yes. 1:18) Mwayipile kale ukuti ‘muyobesanie.’ Yehova ikuhoboka fiyo panongwa yakwiyipa kwinu. Inong’onela isi: Panongwa yakuti mughomokile kwa Yehova, umwene abaghile ukubabombesyela ukuti anangisye ukuti Umohesi ntungulu.—Mbu. 27:11.

Mwakubomba isi, mukunangisya ukuti museghelile kale kwa Yehova kangi umwene afingile ukuti ikuya pakuseghelela kumyinu. (Yak. 4:8) Loli mukulondiwa ukubomba nyingi ukukinda ukwanda ukukolelana na bangi panongwa yakughomokela kangi nkipanga. Mukulondiwa ukukindilila ukukusya ulughano lwinu kwa Tata nu mmanyani winu Yehova. Ngimba mubaghile ukubomba bulebule isi?

Mughelegheleghe ukuya nubwighane ubununu. Lumo mukukindilila ukukumbukila ifundo isi mwamanyile isyakufwana na Yehova nulufingo lwake lwa Paradaiso. Loli lino mukulondiwa ukuya kangi nimbatiko inunu, ukuti mufwanisyeghe ukufumusya akabalilo kosa, ukubuka kungomano sya kipanga nukukindilila ukwangala na bakamu na balumbu. Inong’onela isya bwighane bumo ubu.

Mwiputeghe kwa Yehova akabalilo kosa. Tata winu ikumanya ukuti linga mukukindilila ukuya nikitima, sibaghile ukubapangisya ukuti mutoliweghe ukwiputa kumyake. (Rom. 8:26) Loli ukukinda fyosa, “ndwiputo mo mumilisyeghe itolo,” munsumeghe Yehova ukuti muye nawe pabumanyani. (Rom. 12:12) Andrej atile: “Nayagha nikitima fiyo kangi nisoni. Loli linga niputile nipilikagha kanunu kangi nayagha nulutengano ulwa mundumbula.” Linga mutikumanya isyakuyoba ndwiputo, inong’onela isya nyiputo sya kulapa isya Mwalafyale Davidi isi sikwaghiwa pa Salimo 51 na 65.

Mubelengeghe Ibaibolo akabalilo kosa. Isi sikuya pakubatula ukuti muye nulwitiko lwa maka nukukusya ubumanyani bwinu na Yehova. (Sal. 19:7-11) Felipe atile, “Panongwa yakuti ngabelengagha Ibaibolo akabalilo kosa ngali nulwitiko lwamaka kangi nalinkalalisye Yehova. “Ngalondagha ukunkalalisya kangi Yehova, yonongwa yake nalyandile ukumanyila Ibaibolo akabalilo kosa.” Nanumwe mubaghile ukubomba bo ulu. Linga mukulonda ubutuli ukuti musale inkhani isi mukulonda ukumanyila, mubaghile ukunsuma ummanyani winu uyu ali pabumanyani ubununu na Yehova.

Muyeghe kangi pabumanyani na bakamu na balumbu. Bamo aba baghomokile nkipanga, bikupasya ukuti abangi bikuya pakubakalalila. Larissa atile: “Isoni syangolagha fiyo. Naketagha ukuti mbafulesye kangi mbakalalisye fiyo abakamu na balumbu. Nakindilile ukwipilika bo ulu kwa kabalilo akatali.” Muyeghe nulusubilo ukuti abakulumba na bangi bikulonda ukubatula ukuti muye kangi pabumanyani ubwamaka na Yehova. (Keta ibokosi ilyakuti “ Ngimba Abakulumba Bikulondiwa Ukubomba Isyafiki?”) Abene bikuhoboka fiyo linga mughomokile nkipanga kangi bikulonda ukuti nanumwe muyeghe balusekelo.—Mbu. 17:17.

Ngimba findu fiki fibaghile ukubatula ukuti museghelele ku bakamu na balumbu? Mubunganeghe na bakamu na balumbu kangi mwingileghe nabo mubufumusi akabalilo kosa. Ngimba isi sibaghile ukubatula bulebule? Felix atile: “Abakamu na balumbu baghulilagha ukuti ngomokele nkipanga. Abene balinyambilile. Balindulile ukuti niye kangi kulubafu lwa kipanga kangi nukuketa ukuti Yehova anhobokile nukwanda ukumbombela kangi.”—Keta ibokosi ilyakuti “ Ngimba Mukulondiwa Ukubomba Isyafiki?”

Setano ikuya pakukindilila ukutwala indamyo ukuti abawisye amaka bo mukughelaghela ukukusya ubumanyani bwinu na Yehova. (Luka 4:13) Loli mukulondiwa ukwitendekesya ukuti mukasye ubumi bwinu bwa mwambepo.

Pakuyoba isya ng’osi syake, Yehova afingile ukuti: ‘Nisakusilonda isi siyongile kangi nisakusighomola isi sisobile injila, nisakusipinyapo syosa isi sifulele, nukusighangula isi sibinile.’ (Eze. 34:16) Yehova abatulile bingi ukuti baye kangi pabumanyani numwene. Mukulondiwa ukuya nulusubilo ukuti umwene ikulonda ukubatula ukuti muye nawe pabumanyani ubwamaka.