1. Ngimba injala yitu ya mwambepo findu fiki, kangi yikukolelana bulebule nulusekelo?

 ULUSEKELO lwanaloli ghakaya itolo minong’ono amanunu agha ghikwisa nukuyonga. Loli umundu abaghile ukuya nalo kwa bwila pa bumi bwake. Bulebule? Yesu alingenie pabufumusi bwa pakyamba ukuti: ‘Basayiwa ababimenye ubulondo ni njala yabo ya mwambepo.’ (Mat. 5:3) Yesu asimenye ukuti abandu bapeliwe nubwighane ubwakummanya nukumwiputa Umpeli wabo, Yehova Kyala. Iyi yo ‘njala yitu ya mwambepo.’ Kangi panongwa yakuti Yehova yo ‘Kyala walusekelo,’ bosa aba bikumwiputa bikulondiwa ukuya balusekelo.​—1 Tim. 1:11.

2-3. (a) Ukufwana na isi Yesu ayobile, ngimba bo banani abangi aba babaghile ukuya balusekelo? (b) Ngimba tukuya pakuyobesania isyafiki mu nkhani iyi, kangi nongwa yafiki kwakulondiwa?

² Ngimba tubaghile ukuya balusekelo pene apa linga tukaya ni ndamyo? Hayi. Pabufumusi bwake bwa pakyamba, Yesu ayobile amasyu aghakukasya fiyo. Umwene atile. “Bosa aba bikusulumania”lumo panongwa yakuti bali nikitima pabutulanongwa ubu babombile pamo panongwa ya ndamyo, babaghile ukuya balusekelo. Yesu ayobile kangi ukuti “bosa aba bikufwimiwa panongwa ya bugholofu’ pamo “bikutukiwa” panongwa yakuti bikunkonga Kristu, babaghile ukuya balusekelo. (Mat. 5:4, 10, 11) Loli ngimba sibaghile ukubombiwa bulebule ukuya nulusekelo lwanaloli mfyakubombiwa bo ifi?

³ Yesu atumanyisyagha ukuti tukuya balusekelo komma panongwa ya isi tukwaghana nasyo pa bumi bwitu loli mwakwikutisiwa  ni fyakulya fyamwambepo nukuseghelela kwa Kyala. (Yak. 4:8) Ngimba tubaghile ukubomba bulebule isi? Mu nkhani iyi, tukuya pakuyobesania injila sitatu isi sibaghile ukututula ukuti tulwaghe ulusekelo lwanaloli.

4. Ngimba njila yiliku iyakwanda iyi yibaghile ukututula ukuti tulwaghe ulusekelo lwanaloli? (Salimo 1:1-3)

⁴ INJILA IYAKWANDA: Ukuti tulwaghe ulusekelo lwanaloli, tukulondiwa ifyakulya fyamwambepo. Abandu nifinyamana fyosa fikulondiwa ukulya ifyakulya fyakumbili ukuti fiye nu bumi. Loli abandu bene bo babaghile ukulya ifyakulya fyamwambepo. Kangi syo isi bikulondiwa ukubomba. Yesu atile: “Umundu fitikumpa ubumi fi fyakulya fyene, loli ilisyu lyosa ili likufuma nkanwa mwa Yehova.” (Mat. 4:4) Yonongwa yake isiku lililyosa tukulondiwa ukumanyila amasyu gha Kyala. Uwamasalimo atile: ‘Yo nsangalufu umundu uyu ikwikyela ukusibomba indaghilo sya Yehova kangi ikusinong’ona sisyo syene pamusi na pakilo.’​—Belenga Salimo 1:1-3.

5-6. (a) Ngimba tubaghile ukumanyila isyafiki mu Baibolo? (b) Ngimba Ibaibolo libaghile ukututula munjila yiliku?

⁵ Panongwa yakuti Yehova atughanile, umwene ikutumanyisya ukwendela mu Baibolo isi tukulondiwa ukubomba ukuti tuyeghe balusekelo. Tukumanyila isyakufwana nubwighane bwake pa nkhani ya bumi. Tukumanyila muno tubaghile ukuseghelela kumyake namuno ikutuhobokela ubutulanongwa bwitu. Kangi tukumanyila isyakufwana nulusubilo ulununu ulwa nkyeni ulu afingile. (Yere. 29:11) Ubwanaloli ubu tukumanyila mu Baibolo bukututula ukuya nulusekelo lwanaloli.

 ⁶ Tusimenye ukuti Ibaibolo lili nubulongosi ubwakutula fiyo pa bumi bwitu. Linga tukukonga ubulongosi ubu, tubaghile ukuya balusekelo. Linga mukwaghana ni ndamyo pa bumi bwinu, akabalilo kosa mubelengeghe Amasyu gha Yehova nukwinong’onelapo. Yesu atile: “Basayiwa aba bikulipilika ilisyu lya Kyala nukulisunga”​—Luka 11:28.

7. Ngimba findu fiki fibaghile ukubatula linga mukubelenga Amasyu gha Kyala?

⁷ Linga mukubelenga Amasyu gha Kyala, muhobokeghe na isi mukubelenga. Mwakifwanikisyo, ngimba mwaghenepo nikyakubombiwa bo iki? Umundu yumo apiyile ifyakulya ifi mufighanile fiyo. Loli panongwa yakuti mukaya nakabalilo pamo musofanisiwe ni findu fimo, mukulya mwanakalinga nukuleka ukutafuna kanunu. Bo mumalile ukulya, musyaghenie ukuti mwalyagha mwanakalinga kangi mukuketa ukuti mwalondiwagha ukulya panandipanandi ukuti muhoboke. Isi sibaghile ukufwana itolo nukubelenga Ibaibolo. Utubalilo tumo, tukubelenga mwanakalinga nukuleka ukupilikisya isi tukubelenga. Tuhobokeghe linga tukubelenga Amasyu gha Kyala; tufwaneghe tukuketa isi sikubombiwa nukwinong’onela isi tubelengile. Linga tukubomba isi tukuya pakuya balusekelo.

8. Ngimba “untumwa unsubiliwa nuwa mahala” ikufwanisya bulebule ubudindo bwake? (Keta amasyu gha pasi.)

⁸ Yesu amwimike “untumwa unsubiliwa nuwa mahala” ukuti atupeghe ifyakulya fyamwambepo pakabalilo kake. * (Mat. 24:45) Ifyakulya fyamwambepo fyosa ifi untumwa unsubiliwa ikutupa fikufuma Mmalemba. (1 Tes. 2:13) Isi sikututula ukuti tumanye isi Yehova ikulonda isi sikuyobiwa mu Baibolo. Yonongwa yake tukubelenga amagazini gha Ingasya ya Ndindilili na Wukani! kangi ni nkhani isi sikwaghiwa pa jw.org. Tukwitendekesya ingomano sya ku kipanga. Kangi umwesi ghulighosa tukuketelela ipulogilamu ya pa JW Broadcasting^® linga yandile ukwaghiwa. Linga tukughelaghela ukubelenga nukumanyila Ibaibolo, sikuya pakututula ukulwagha ulusekelo lwanaloli.

9. Ngimba njila yiliku iyabubili iyi yikutupangisya ukuti tulwaghe ulusekelo lwanaloli?

⁹ INJILA IYABUBILI: Ukuti tulwaghe ulusekelo lwanaloli, tukulondiwa ukupilikila ifundo sya Yehova. Uwamasalimo alembile ukuti: “Yo nsayiwa umundu uyu ikuntila Yehova, uyu ikwenda munjila syake.” (Sal. 128:1) Ukuntila Yehova kukusanusya ukungindika fiyo nukuleka ukubomba kilikyosa iki kibaghile ukunkalalisya. (Mbu. 16:6) Yonongwa yake tukulondiwa ukukindilila ukukonga ifundo sya Yehova isyakuyoba inunu nimbibi isi sikwaghiwa mu Baibolo. (2 Kor. 7:1) Tukuya pakuya balusekelo linga tukubomba ifindu ifi Yehova afighanile nukuleka ukubomba ifi afibengile.​—Sal. 37:27; 97:10; Rom. 12:9.

10. Ukufwana na Baroma 12:2, ngimba tuli nubudindo buliku?

¹⁰ Belenga Baroma 12:2. Umundu abaghile ukumanya ukuti Yehova ali nubudindo ubwakumanya isi syo nunu nimbibi loli abaghile ukusala ukukonga ifundo sya Kyala pamwene. Mwakifwanikisyo, umundu abaghile ukumanya ukuti iboma lili nubwabuke ubwakubika indaghilo isya lubilo ulu tubaghile ukwendesyela igalimoto pa nsebo. Loli lumo atikulonda ukukonga indaghilo isi. Ifyakukongapo fyake umwene ikwendesya mwakubopesya fiyo. Tubaghile ukunangisya ukwendela mfyakubomba fyitu nukusubila ukuti ukukonga ifundo sya Yehova, yo njila nunu iyakukindilila ukuya nu bumi. (Mbu. 12:28) Momuno Davidi yope aketelagha. Yonongwa yake ayobile isyakufwana na Yehova ukuti: “Yo uwe kunangisya injila ya  bumi. Nkyeni mmyako mo lulimo ulusekelo ulu lufikilepo; nkiboko kyako ikililo mo filimo ifya kusekesya bwila na bwila.”​—Sal. 16:11.

11-12. (a) Linga twaghene ni ndamyo pamo tuwile amaka, ngimba tukulondiwa ukuya maso ni syafiki? (b) Ngimba amasyu gha pa Bafilipi 4:8 ghikututula bulebule linga tukusala ifyakusangalusya?

¹¹ Linga twaghene ni ndamyo pamo tuwile amaka, tubaghile ukuketa ukuti tukulondiwa ukubomba ikindu kimo iki kibaghile ukututula ukuti tumalane ni ndamyo isi twaghene nasyo. Isi syakupilikiwa, loli tukulondiwa ukuya maso ukuti tungabombagha ikindu kimo iki Yehova akibengile.​—Ef. 5:10-12, 15-17.

¹² Mwakalata wake uwakubuka ku Bakristu ba ku Filipi, untumiwa Pauli abakasisye Abakristu aba ukuti bakindilileghe ukwinong’onela “syosa ingolofu, . . . syosa inyelu , . . . syosa inunu pakusiketa, [nalinga] bo bununu bumo.” (Belenga Bafilipi 4:8.) Nalinga ukuti isi Pauli alembile akayobagha fiyo isyakufwana ni nkhani ya fyakusangalusya loli isi alembile sibaghile ukupalamasya ifyakusangalusya ifi tukusala. Amughele isi: Linga amasyu aghakuti “ifindu” ghikwaghiwa pivesi, mughele ukuchenja nukubombela amasyu aghakuti “inyimbo,” “amavidiyo,” “amabuku,” pamo “amagemu gha mavidiyo.” Ukubomba isi kubaghile ukubatula ukumanya isi syakwitikisiwa kwa Kyala na isi sikaya syakwitikisiwa. Tukulonda ukuti isi tukubomba sikolelaneghe ni fundo sya Yehova isyabugholofu. (Sal. 119:1-3) Ukufuma apo, mwakukolelana namabyebye ghitu amanunu, sibaghile ukututula ukuti tulwaghe ulusekelo lwanaloli.​—Imbo. 23:1.

13. Ngimba njila yiliku iyabutatu iyi yikutupangisya ukuti tulwaghe ulusekelo lwanaloli? (Yohani 4:23, 24)

¹³ INJILA IYABUTATU: Muketesyeghe ukuti ukumwiputa Yehova kuli pamalo aghakwanda pa bumi bwinu. Yehova yo atupelile yonongwa yake tukulondiwa ukumwiputa. (Ubuset. 4:11; 14:6, 7) Ikindu ikyakulondiwa fiyo pa bumi bwitu kiyeghe ko kwiputa kwa Yehova munjila iyi umwene ikulonda, uku ko kwiputa “mwambepo na mbwanaloli.” (Belenga Yohani 4:23, 24.) Tukulonda ukuti mbepo mwikemo wa Kyala ghufighilileghe ukwiputa kwitu ukuti kukolelaneghe nubwanaloli ubu bukwaghiwa Mmasyu ghake. Ukwiputa kwitu kuyeghe pamalo aghakwanda nalinga ukuti tukwikala nkisu iki imbombo yitu yikukanisiwa. Lino abakamu na balumbu abakukinda 100 bapinyiwe mu jele panongwa yakuti Baketi ba Yehova. * Nalinga ukuti mo siyilile, abene bikughelaghela ukubomba kilikyosa iki babaghile ukufwanisya ukuti biputeghe, bamanyileghe kangi bababuleghe abangi isyakufwana nu Bunyafyale bwa Kyala. Linga tukufwimiwa, tukuhoboka fiyo panongwa yakuti Yehova ikututula ukwifimbilisya kangi isakutusaya fiyo.​—Yak. 1:12; 1 Pet. 4:14.

14. Ngimba findu fiki ifi unkamu wakilumyana uwa ku Tajikistan alyaghene nafyo kangi nongwa yafiki?

¹⁴ Abakamu na balumbu bitu bamo baghenepo ni ndamyo simo, loli bikunangisya ulwitiko lwanaloli panongwa yakuti bakongagha injila sitatu isi tuyobesenie. Inong’onela isi alyaghene nasyo unkamu Jovidon Bobojonov uwa fyinja 19, uwa ku Tajikistan, uyu akanile ukwingila ubusilikali. Pa Okutobala 4, 2019, balimpinyile ku kaya kake nukubuka nawe ku jele kuno alikele kwa myesi mingi kangi bambombelagha ifindu mwankhaza. Ifindu ifi balimbombile fyamanyiwe paliposa. Umwene akomiwe fiyo panongwa yakuti akanagha ukwingila ubusilikali nukufwala iyunifomu.  Ukufuma apo, ikhoti lyatile ali ninongwa kangi balintumile ukuti akabombeghe imbombo ingafu ku kampu ukufika pakabalilo aka pulezidenti alinhobokile nukuyoba ukuti abuliwe. Akabalilo kosa aka, Jovidon akindilile ukunangisya ubusubiliwa kangi ali walusekelo. Bulebule? Umwene utubalilo tosa abombagha ifindu fyamwambepo.

15. Ngimba Jovidon afwanisyagha bulebule ukufyagha ifyakulya fyamwambepo bo ali mu jele?

¹⁵ Bo ali mu jele, Jovidon akindililagha ukumanyila isya Yehova, nalinga ukuti akali ni Baibolo na mabuku ghitu. Ngimba isi syabombiwagha bulebule? Abakamu na balumbu bantwalilagha ifyakulya fyakumbili kangi balembagha amasyu gha mwilemba lya isiku pa findu ifi bamulile. Yonongwa yake umwene afwanisyagha ukubelenga Ibaibolo nukwinong’onelapo isiku lililyosa. Bo asokile mu jele, ayobile ifundo iyakuti: “Kwakulondiwa fiyo ukuti mubombeleghe ubwabuke bwinu muno mubaghile ukufwanisyila ukuti mumanye nyingi isyakufwana na Yehova mwakubelenga Amasyu ghake na mabuku ghitu.”

16. Ngimba Jovidon inong’onelagha isyafiki?

¹⁶ Unkamu Jovidon apilikilagha ifundo sya Yehova. Mmalo mwakwinong’onela nukubomba ifindu ifibibi, umwene inong’onelagha  fiyo isya Yehova na isi ikuketa ukuti nunu. Jovidon inong’onelagha fiyo isya kipeliwa ikinunu ikya Kyala. Nulubunju linga anyamwike apilikagha ukulila nukwimba kwa njuni. Pakilo aketagha umwesi nindondwa. Umwene atile: “Ifyabupe ifyakufuma kwa Yehova ifi, fikumbangisya ukuya walusekelo nukungasya fiyo.” Linga tukundaghisya ifindu fyamwambepo ni fyakumbili ifi Yehova ikutupa, tukuya pakuya balusekelo, isi sikuya pakututula ukuti twifimbilisyeghe.

17. Ngimba amasyu agha ghali pa 1 Peteri 1:6, 7 ghabaghile ukuntula bulebule umundu uyu aghene ni ndamyo iyakufwana itolo na iyi alyaghene nayo Jovidon?

¹⁷ Jovidon abikagha ukumwiputa Yehova pa malo aghakwanda. Umwene amenye ukulondiwa kwa kukindilila ukuya nsubiliwa kwa Kyala wabwanaloli. Yesu atile: “Umwiputeghe Yehova Kyala wako, yo umbombeleghe yuyo mwene.” (Luka 4:8) Abakulumba ba bwite na basilikali balondagha ukuti Jovidon aleke ukuya Nketi wa Yehova. Mmalo mwake umwene iputagha isiku lililyosa, pamusi na pakilo, ansumagha Yehova ukuti antule ukukindilila ukuya nsubiliwa. Kisita kwinong’onela ifindu fyankhaza ifi bambombelagha, Jovidon akindilile ukuya nsubiliwa. Ifyakukongapo fyake, umwene walusekelo panongwa yakuti ali nikindu kimo iki akalinakyo pakwanda bo akali ukupinyiwa mu jele. Umwene ali nulwitiko lwamaka panongwa yakugheliwa.​—Belenga 1 Peteri 1:6, 7.

18. Ngimba tubaghile ukukindilila bulebule ukuya balusekelo?

¹⁸ Yehova asimenye isi tukulondiwa ukuti tulwaghe ulusekelo lwanaloli. Linga tukukonga injila sitatu isi sikututula ukulwagha ulusekelo lwanaloli, tubaghile ukukindilila ukuya balusekelo nalinga ukuti tukwaghana ni ndamyo. Ukufuma apo, nanuswe tukuya pakufwanisya ukuyoba ukuti: “Basayiwa abandu aba Yehova yo Kyala wabo.”​—Sal. 144:15.