1. Ngimba lusubilo luliku ulu Yehova atupele?

 YEHOVA atupele ulusubilo ulununu ulwakwisakwikala nu bumi kwa bwila na bwila. Bamo bali nulusubilo ulwakwisakwikala kumwanya pakuya fipeliwa fyamwambepo. (1 Kor. 15:50, 53) Loli bingi bali nulusubilo ulwakwisakwikala kwa bwila na bwila pa kisu nu bumi ubununu kangi mwalusekelo. (Ubuset. 21:3, 4) Kali tukughulila ukwisakwikala nu bumi kwa bwila na bwila kumwanya pamo pa kisu, ulusubilo lwitu lwakulondiwa fiyo kumyitu.

2. Ngimba tukusubila isyafiki, kangi nongwa yafiki?

² Amasyu aghakuti “ulusubilo,” bo muno baghabombile mu Baibolo, ghabaghile ukusanusya “ukughulila ukuti ifindu ifinunu fikuya pakubombiwa.” Ulusubilo lwitu ulwa nkyeni lwisakubombiwa naloli panongwa yakuti lukufuma kwa Yehova. (Rom. 15:13) Tusimenye ukuti umwene utubalilo tosa ikufwanisya isi afingile. (Kuba. 23:19) Tuli nulusubilo losa ukuti Yehova ali nubwighane namaka aghakubomba nukufwanisya kilikyosa iki ayobile. Yonongwa yake ulusubilo lwitu lutikufuma mu isi tukwinong’onela itolo pamo isi tukulonda ukuti sibombiwe. Loli lukufuma mu isi tusimenye ukuti syanaloli.

3. Ngimba tukuya pakuyobesania isyafiki mu nkhani iyi? (Salimo 27:14)

³ Tata witu wakumwanya atughanile fiyo kangi ikulonda ukuti tunsubileghe. (Belenga Salimo 27:14.) Linga ulusubilo lwitu mwa Yehova lwamaka, tukuya pakufwanisya ukwifimbilisya ku ndamyo nukunangisya ubukifu nulusekelo kisita kwinong’onela isi tubaghile ukwaghana nasyo. Isagha tukete muno ulusubilo lwitu lukutufighilila. Ikyakwanda tukuya pakuyobesania muno ulusubilo luli bo inyangula kangi ikitili. Ukufuma apo, tukuya pakuyobesania muno tubaghile ukukasyila ulusubilo lwitu.

4. Ngimba ulusubilo lwitu lufwene bulebule ni nyangula? (Bahiburi 6:19)

⁴ Mwa kalata wake uwakubuka ku Bakristu ba ku Hiburi, untumiwa Pauli afwanikisye ulusubilo lwitu ni nyangula. (Belenga Bahiburi 6:19.) Utubalilo twingi endagha pasumbi, yonongwa yake Pauli amenye ukuti inyangula babombelagha ku sitima ukuti yingendagha. Pakabalilo kamo, umwene akwelile isitima bo umbelo uwamaka ghusambwike. Pakabalilo ka mbelo aka, umwene ababwene aba bikwendesya isitima bikusopa inyangula mmisi ukuti isitima yingikolagha mmabwe. (Imbo. 27:29, 39-41) Mwakufwana itolo ni nyangula iyi yikupangisya ukuti isitima yingendagha ni mbepo, ulusubilo lwitu lukututula ukuti tusegheleleghe kwa Yehova nukuleka ukuwa amaka linga twaghene ni ndamyo isi sili bo umbelo uwamaka. Ulusubilo lwitu lukututula ukuya bololo linga tukwaghana ni ndamyo panongwa yakuti tukusubila ukuti ifindu fikuya pakuya kanunu. Tukumbukeghe ukuti, Yesu atusokile ukuti tukuya pakufwimiwa. (Yoh. 15:20) Yonongwa yake linga tukwinong’onela isi Yehova afingile, sikututula ukuti tukindilileghe ukumbombela.

5. Ngimba ulusubilo lwalintulile bulebule Yesu pakabalilo aka asyele panandi ukufwa?

⁵ Inong’onela muno ulusubilo lwalintulile Yesu ukukindilila ukuya nsubiliwa nalinga asimenye ukuti ikuya pakufwa inifwa iyakubaba fiyo. Pa Pentekositi 33 C.E., untumiwa Peteri ayobile ubusololi ubwa mu buku lya Salimo ubu bukulingania muno Yesu anangisyilagha ubololo nulusubilo, umwene atile: “Nguyagha ndusubilo; namanga umoyo wangu utisakughulekagha mbusyuka kangi utisakwitika ukuti umwikemo wako aboleleghe mwipumba. . . . Unyisusyeghe ulusekelo ni kyeni kyako.” (Imbo. 2:25-28; Sal. 16:8-11) Nalinga ukuti Yesu asimenye ukuti ikuya pakufwa, umwene ali nulusubilo ukuti Kyala ikuya pakunsyusya kangi ikwakuhobokagha panongwa yakuya na Tata wake kumwanya.​—Hib. 12:2, 3.

6. Ngimba unkamu yumo ayobile isyafiki isyakufwana nulusubilo?

⁶ Ulusubilo lwitu ulwa Bukristu lubatulile abakamu na balumbu bingi ukwifimbilisya. Inong’onela ikifwanikisyo kya Leonard Chinn, unkamu unsubiliwa uyu ikwikala ku England. Pakabalilo ka bwite ubwakwanda ubwa pa kisu kyosa, umwene apinyiwe mu jele panongwa yakuti akanile ukwingila ubusilikali. Kwa myesi mibili balimbikile mu jele kangi balimpele imbombo ingafu. Umwene atile: “Isi nalyaghene nasyo syalindulile ukumanya ukuti tukulondiwa ukuya nulusubilo ukuti twifimbilisyeghe.” Tuli nikifwanikisyo kya Yesu, abafundiwa, abasololi kangi nulusubilo ulununu ulwa mu Baibolo. Fyosa ifi fikutupa ulusubilo ulwa nkyeni kangi fikututula ukuti twifimbilisyeghe.” Ulusubilo lwali bo inyangula kwa Leonard, kangi mo muno siyilile na kumyitu.

7. Ngimba indamyo sikukasya bulebule ulusubilo lwitu? (Baroma 5:3-5; Yakobu 1:12)

⁷ Ulusubilo lwitu lukuya lwamaka linga tukwifimbilisya ku ndamyo nukuketa muno Yehova ikututulila. (Belenga Baroma 5:3-5; Yakobu 1:12.) Yonongwa yake lino ulusubilo lwitu lwamaka fiyo ukukinda pakabalilo aka twalyandile ukumanyila ubwanaloli. Setano ikulonda ukuti tuweghe amaka panongwa ya ndamyo isi tukwaghana nasyo, loli nubutuli bwa Yehova tubaghile ukufwanisya ukwifimbilisya.

8. Ngimba ulusubilo lufwene bulebule nikitili? (1 Batesalonike 5:8)

⁸ Ibaibolo likufwanikisya kangi ulusubilo lwitu nikitili. (Belenga 1 Batesalonike 5:8.) Unsilikali ikufwala ikitili ukuti afighilile untu wake linga ikulwa nabalughu. Pafyakubombiwa fyamwambepo, ukuti tuntole Setano  tukulondiwa ukufighilila aminong’ono ghitu. Umwene ikubombela ifindu ifyakukindanakindana ukuti atughele nukutusofania aminong’ono ghitu. Mwakufwana itolo na muno ikitili kikufighilila untu wa nsilikali, nuswe ulusubilo lwitu lukufighilila aminong’ono ghitu ukuti tukindilileghe ukuya basubiliwa kwa Yehova.

9. Ngimba findu fiki fikubombiwa ku bandu aba bakaya nulusubilo?

⁹ Ulusubilo lwitu ulwakwisakwikala kwa bwila na bwila lukuya pakututula ukusala kanunu ifyakubomba. Linga ulusubilo lwitu lukaya lwamaka kangi twandile ukwinong’onela ifinyonywa fyitu, tubaghile ukwanda ukwibwa isya lusubilo ulwakwisakwikala kwa bwila na bwila. Inong’onela isya Bakristu ba ku Korinti. Abene balekile ukuya nulusubilo lwamaka ulu Kyala afingile ulusubilo ulwa kusyuka. (1 Kor. 15:12) Pauli ayobile ukuti abandu aba bakali nulusubilo ulwa kusyuka, bihobosyagha bene. (1 Kor. 15:32) Amasiku agha bingi aba bakaya nulusubilo mu isi Kyala afingile bikubomba kilikyosa iki bighanile pa bumi bwabo. Loli uswe tukindene nabo panongwa yakuti tukusubila isi Kyala afingile. Ulusubilo lwitu luli bo ikitili iki kikufighilila aminong’ono ghitu nukututula ukuti tungisubilagha twibene, isi sibaghile ukonanga ubumanyani bwitu na Yehova.​—1 Kor. 15:33, 34.

10. Ngimba ulusubilo lubaghile ukutufighilila bulebule ku butungulu bwa Setano?

¹⁰ Ulusubilo lwitu lubaghile ukutufighilila ku minong’ono aghakuti tukabaghila ukunhobosya Yehova. Mwakifwanikisyo, bamo babaghile ukwinong’ona ukuti: ‘Ngabaghila ukuya yumo mwa aba bisakwikala nu bumi kwa bwila na bwila. Ngaya mundu wakulondiwa. Ngabaghila ukufwanisya ukukonga ifundo sya Kyala.’ Kumbukila ubutungulu ubu Elifazi ayobile kwa Yobu. Umwene atile: “Ngimba umwene umundu kandu kaki pa kisu ukuti aye nsitakababye nakamo?” Kangi atile kwa Kyala: Nongwa yafiki Kyala atikubasubila na babandumi bake nabababa bope bakaya belu nkyeni myake.” (Jobu 15:14, 15) Ubu butungulu bunywamu fiyo. Tukulondiwa ukukumbuka ukuti Setano yo uyu ikulonda ukuti twinong’oneghe bo ulu. Umwene asimenye ukuti linga tukwinong’ona bo ulu tutikuya pakuya nulusubilo. Yonongwa yake tukulondiwa ukukana ubutungulu bo ubu nukukindilila ukwinong’onela isi Yehova afingile. Kisita kukayika umwene ikulonda ukuti tusikale nu bumi kwa bwila na bwila kangi ikuya pakututula ukuti tufwanisye isi.​—1 Tim. 2:3, 4.

11. Nongwa yafiki tukulondiwa ukuya bololo bo tukughulila ukuti isi tukusubila sifwanisiwe?

¹¹ Utubalilo tumo kukuya kukafu ukunangisya ulusubilo lwamaka. Tubaghile ukutoliwa ukunangisya ubololo bo tukughulila ukuti Kyala afwanisye isi afingile. Loli panongwa yakuti Yehova aliko ukwanda bwila, muno umwene ikukaketela akabalilo fikindene fiyo na muno uswe tukukaketela. (2 Pet. 3:8, 9) Umwene ikuya pakufwanisya isi afingile munjila inunu loli akabaghila ukubomba bo muno uswe tukwinong’onela. Ngimba findu fiki fibaghile ukututula ukukindilila ukunangisya ulusubilo lwamaka bo tukughulila mbololo ukuti Kyala afwanisye isi afingile?​—Yak. 5:7, 8.

12. Ukufwana na Bahiburi 11:1, 6, ngimba ulusubilo lukukolelana bulebule nulwitiko?

¹² Tukuya pakukindilila ukuya nulusubilo lwamaka linga tukukindilila ukuseghelela kwa Yehova, uyu isakufwanisya isi tukusubila. Yonongwa yake Ibaibolo likutukasya ukuti tusubileghe ukuti Yehova aliko kangi umwene “ikubapa ifihombiwa bosa aba bikundonda.” (Belenga Bahiburi 11:1, 6.) Linga tukusubila  ukuti Yehova aliko naloli, tukuya pakuya nulusubilo losa ukuti umwene ikuya pakubomba syosa isi afingile. Isagha tuyobesanie injila isi sibaghile ukututula ukuti tukasyeghe ubumanyani bwitu na Yehova nukukindilila ukuya nulusubilo lwamaka.

13. Ngimba tubaghile ukuseghelela bulebule kwa Kyala?

¹³ Twiputeghe kwa Yehova nukubelenga Amasyu ghake. Nalinga ukuti tukabaghila ukunketa Yehova loli tubaghile ukuseghelela kumyake. Tubaghile ukuyobesania nawe ndwiputo, tukuya nulusubilo ukuti ikuya pakutupilika. (Yere. 29:11, 12) Tubaghile ukupilikisya kwa Kyala mwakubelenga Amasyu ghake nukwinong’onelapo. Bo tukubelenga isyakufwana namuno Yehova abapasikisyilagha aba banangisyagha ubusubiliwa kumyake nkabalilo ka kunyuma, ulusubilo lwitu lukuya pakuya lwamaka. Syosa isi sikwaghiwa Mmasyu gha Kyala “syalembiwe ukuti luyeghe lumanyisyo kumyitu; ukuti tuyeghe nulusubilo mbufisalyoyo na ndusubisyo lwa Malemba ghaghagha.”​—Rom. 15:4.

14. Nongwa yafiki tukulondiwa ukwinong’onela isi Yehova ababombile abangi?

¹⁴ Twinong’oneleghe muno Yehova ikufwanisyila isi afingile. Inong’onela isi Kyala abombile kwa Abrahamu na Sara. Abene bakangele kangi bakabaghile ukuya nabana. Loli Kyala afingile kumyabo ukuti bisakuya numwana. (Bwa. 18:10) Ngimba Abrahamu abombile bulebule? Ibaibolo likuti: “Umwene alinkwitika ndusubilo ukuti ikuyagha yo wise wa fikolo fi fingi.” (Rom. 4:18) Nalinga ukuti Abrahamu akasimenye muno Kyala ayagha pakufwanisyila ulufingo ulu loli umwene asubilagha ukuti Yehova ikuya pakufwanisya isi afingile. Umundu unsubiliwa uyu akawile amaka. (Rom. 4:19-21) Inkhani iyi yikututula ukuti akabalilo kosa tunsubileghe fiyo Yehova pa isi afingile, nalinga sikuboneka ukuti sikabaghila ukubombiwa.

15. Nongwa yafiki tukulondiwa ukwinong’onela isi Kyala atubombile?

 ¹⁵ Twinong’oneleghe isi Yehova atubombile. Inong’onela ulusayo ulu mulwaghile panongwa yakufwanisiwa kwa lufingo ulu luli Mmasyu gha Kyala. Mwakifwanikisyo, Yesu afingile ukuti Tata wake ikuya pakutupa ifindu ifi tukulondiwa pa bumi bwitu. (Mat. 6:32, 33) Kangi Yesu ikutusimikisyila ukuti Yehova ikuya pakutupa mbepo mwikemo linga tukunsuma. (Luka 11:13) Yehova ikufwanisya isi. Lumo mubaghile ukwinong’onela isya lufingo ulungi ulu afwanisye pa bumi bwinu. Mwakifwanikisyo, umwene afingile ukuti ikuya pakubahobokela, pakubasubisya nukubapa ifyakulya fyamwambepo. (Mat. 6:14; 24:45; 2 Kor. 1:3) Linga mukwinong’onela isi Kyala ababombile kale, mukuya pakukasya ulusubilo lwinu ulwa nkyeni.

16. Nongwa yafiki ulusubilo kyabupe kyapamwanya fiyo?

¹⁶ Ulusubilo lwitu ulwakwisakwikala kwa bwila na bwila kyabupe kyapamwanya fiyo ikyakufuma kwa Kyala. Tukughulila ubumi ubununu ubwa nkyeni—ubu tukuya pakuhoboka nabo mwalululu. Tubaghile ukulufwanikisya ni nyangula, iyi yikututula ukuti twifimbilisyeghe ku ndamyo bo ukufwimiwa ni nifwa. Tubaghile ukulufwanikisya kangi nikitili, iki kikutufighilila ku minong’ono amabibi ukuti tungabombagha ifindu ifibibi. Ulusubilo ulu lukututula ukuti tummanye kanunu Kyala namuno atughanile. Tukusayiwa fiyo linga tukukindilila ukukasya ulusubilo lwitu.

17. Nongwa yafiki tukuhoboka nulusubilo lwitu?

¹⁷ Untumiwa Pauli abakasisye Abakristu ba ku Roma ukuti “ndusubilo mo musekeleghe itolo”. (Rom. 12:12) Pauli ahobokagha panongwa yakuti asimenye ukuti linga ayagha pakukindilila ukuya nsubiliwa, ayagha pakubwagha ubumi bwa bwila na bwila kumwanya. Nanuswe tubaghile ukuya balusekelo panongwa yakumanya ukuti Yehova ikuya pakufwanisya isi afingile. Bo muno uwamasalimo atile: “Yo nsayiwa umundu . . . uyu ulusubilo lwake luli mwa Yehova Kyala wake, . . . uyu bwila na bwila atikwandukamo.”​—Sal. 146:5, 6.