1-2. Ngimba njila yiliku inunu iyakubelenga nukumanyila Ibaibolo? Yoba ikifwanikisyo.

 TUFWANIKISYE ukuti lumo mukulonda ukula inyumba. Ngimba mubaghile ukuketa isyafiki bo mukali ukusala ikyakubomba? Ngimba mubaghile ukubomba isyafiki bo mukali ukula inyumba? Ngimba mubaghile ukuketa itolo muno yikubonekela kunkyeni? Kisita kukayika mubaghile ukuyiketa yosa nkati mfipinda nukuketa kilikyosa iki kili nnyumba. Mubaghile ukuketa ukuti kununu ukundalusya umundu yumo ukuti ababule muno bayengile inyumba iyi. Bwanaloli ukuti mubaghile ukulonda ukuketa tasi muno inyumba iyi mukulonda ukula yikubonekela.

² Tubaghile ukubomba mwakufwana itolo linga tukubelenga nu kumanyila Ibaibolo. Kalyoto yumo uwa Baibolo ayobile ukuti Ibaibolo lifwene itolo “ninyumba inywamu, indali fiyo iyi yiyengiwe pafaundeshoni unsolofu fiyo.” Po ngimba tubaghile ukumanya kanunu bulebule isi sili mu Baibolo? Linga mukubelenga mwanakalinga, mubaghile ukumanya itolo ifundo imbepe “isya mbwandilo isya masyu gha Kyala.” (Hib. 5:​12) Loli ukufwana namuno tukuyiketela inyumba nkati ukuti tumanye muno yiyilile, nanuswe tukulondiwa ukumanyila ifundo sya mu Baibolo ukuti tusipilikisyeghe kanunu. Injila inunu iyakumanyila Ibaibolo kokuketa muno amavesi ghamo agha mu Baibolo ghikukolelana na mavesi aghangi. Mughelegheleghe ukupilikisya isi mukusubila nukuketa inongwa iyi mukusubila ukuti syabwanaloli.

3. Ngimba untumiwa Pauli abakasisye Abakristu abinake ukubomba isyafiki, kangi nongwa yafiki? (Baefesi 3:​14-​19)

³ Ukuti tupilikisyeghe kanunu Amasyu gha Kyala, tukulondiwa ukumanyila ifundo insolofu isya Kyala. Untumiwa Pauli abakasisye Abakristu abinake ukuti biyipeghe ukumanyila Amasyu gha Kyala ukuti “babwaghanieghe muno buyilile ubwelefu,  ubutali, ubwinufu nubusolofu.” Isi syabatulagha ukuti “bikumbile nukwitoteka” ndwitiko. (Belenga Baefesi 3:​14-​19.) Nanuswe syo tukulondiwa ukubomba. Isagha tukete muno tubaghile ukubombela ukuti twiyipeghe ukumanyila Amasyu gha Kyala ukuti tupilikisyeghe kanunu isi ghikusanusya.

4. Ngimba tukulondiwa ukubomba isyafiki ukuti tuseghelele kwa Yehova? Yoba ififwanikisyo.

⁴ Pakuya Bakristu tutikulondiwa ukuti tumanyileghe itolo ifimanyilo ifipepe ifya mu Baibolo. Nubutuli bwa mbepo mwikemo wa Kyala, tukulondiwa ukumanyila “nifya mbusolofu bwa Kyala.” (1 Kor. 2:​9, 10) Mukulondiwa ukwiyipa ukuti mumanyileghe nubwighane ubwakuti museghelele kwa Yehova. Mwakifwanikisyo, mubaghile ukufufuza muno abanangisyilagha ulughano ababombi bake bakunyuma nukuketa muno isi sikunangisyila ukuti atughanile nanuswe. Mubaghile ukumanyila kangi muno Yehova alondelagha ukuti Abaisraeli bamwiputeghe nukuketa injila iyi ikulonda ukuti nanuswe tumwiputeghe. Lumo mubaghile ukumanyila fiyo ubusololi ubu Yesu afwanisye pakabalilo aka abombagha ubufumusi bwake pakisu.

5. Ngimba yilipo ifundo yimo iyi mukulonda ukuyifufuza pakumanyila kwa pamwibene?

⁵ Abamanyili bamo ba Baibolo babalalusisye ukuti bayobe ifundo insolofu isi bikulonda ukumanyila M’masyu gha Kyala. Mubaghile ukuketa ifundo isi bamo bayobile pabokosi ilyakuti “ Inkhani isi Sibaghile Ukubatula Ukumanyila Ifundo Insolofu Isya mu Baibolo.” Mubaghile ukuhoboka fiyo ukumanyila inkhani isi mwakubombela ibuku ilyakuti Watch Tower Publications Index pamo Buku Lakupenjera Nkhani la Ŵakaboni ŵa Yehova. Ukumanyila ifundo insolofu isya mu Baibolo, kubaghile ukukasya ulwitiko lwinu nukubatula ukuti ‘mummanye kanunu Kyala.’ (Mbu. 2:​4, 5) Lino isagha tuyobesanie ifundo yimo insolofu iya mu Baibolo iyi tukulondiwa ukuyimanya kanunu.

6.(a) Ngimba ipulani nubwighane fikindene bulebule? (b) Nongwa yafiki tukuyoba ukuti ubwighane bwa Yehova ku bandu na kukisu bwa “bwila na bwila”? (Baefesi 3:​11)

⁶ Mwakifwanikisyo, inong’onela isi Ibaibolo likuyoba isyakufwana nubwighane bwa Kyala.  Kulipo ukukindana pakati pakupanga ipulani nukuya nubwighane. Ukuya nipulani tubaghile ukukufwanikisya nukusala unsebo ughu ghukutulongosyela ku malo agha tukulonda ukubukako. Loli linga ifindu fimo fighele unsebo, tukabaghila ukwakufika ku malo agha tukulonda. Loli ubwighane, tubaghile ukubufwanikisya namalo agha tukulonda ukwakufikako. Tughamenye kanunu amalo agha tukubukako loli tubaghile ukwenda injila isyakukindana ukuti tukafike. Linga injila yimo yighaliwe, tubaghile ukwenda injila iyingi. Tukunndaghisya Yehova panongwa yakuti panandinapanandi ikufumbula ‘ubwighane bwa bwila na bwila’ mu Baibolo. (Ef. 3:​11.) Yehova abaghile ukusala injila isyakukindanakindana ukuti afwanisye ubwighane bwake kangi utubalilo tosa bukufwanisiwa panongwa yakuti “akandu kosa aka apelile kali nimbombo kumyake.” (Mbu. 16:⁠4) Kangi isi abombile, sikuyako kwa bwila na bwila. Ngimba ubwighane bwa Yehova findu fiki, kangi umwene achenjile ifindu fiki ukuti asabufwanisye?

7.Bo abandu bakwanda bansambukile Kyala, ngimba Yehova achenjile bulebule injila iyakuti afwanisye ubwighane bwake? (Matai 25:34)

⁷ Kyala ababulile abandu bakwanda isya bwighane bwake kumyabo. Abene bayagha “pakwisula nkisu nukukilambika nukuya balaghili pasi . . . pakandu kosa” pakisu. (Bwa. 1:​28) Bo Adamu na Eva bansambukile Kyala, nukupangisya ubutulanongwa ku bandu bosa, sikapangisye ukuti Yehova atoliwe ukufwanisya ubwighane bwake. Umwene achenjile injila iyakufwanisyila ubwighane bwake. Mwanakalinga, Yehova alimike Ubunyafyale bwake kumwanya ubu bwisakufwanisya ubwighane bwake ku bandu na pakisu kyapasi. (Belenga Matai 25:34.) Pakabalilo kake, mwalughano Yehova alintumile umwanake uwakwanda pakisu ukuti asabamanyisye abandu isya Bunyafyale nukubika ubumi bwake ukuya kitabulilo ukuti twabuliwe kubutulanongwa ninifwa. Ukufuma apo, bo Yesu asyukile abukile kumwanya ukuti akalaghileghe pakuya Mwalafyale wa Bunyafyale bwa Kyala. Loli filipo fingi ifi tukulondiwa ukumanyila ifyakufwana nubwighane bwa Kyala.

8.(a) Ngimba inkhani inywamu mu Baibolo yoyakuti fiki? (b) Ukufwana na Baefesi 1:​8-​11, ngimba Yehova isakufwanisya kangi isyafiki? (Keta ikithuzi kyapakikope.)

⁸ Inkhani inywamu mu Baibolo yoyakuti ingamu ya Yehova yisakemesiwe pakabalilo aka isakufwanisya ubwighane bwake pakisu kyapasi ukwendela mu Bunyafyale bwake ubu bwisakulaghiliwagha na Kristu. Ubwighane bwa Yehova bukabaghila ukuchenja. Umwene afingile ukuti isakufwanisya isi afingile bo muno ayobile. (Yes. 46:​10, 11; Hib. 6:​17, 18) Pakabalilo kake, ikisu kisakuya paladaiso muno abandu abagholofu abanduyungu lwa Adamu na Eva “bisakuyagha ndusekelo bwila na bwila.” (Sal. 22:26) Ukongelela pa isi, Yehova afingile ukuti isakufwanisya ifindu ifingi. Loli ubwighane bwake ubunywamu bo bwakuti ifipeliwa fyake fyosa, kumwanya na pakisu kyapasi fisakolelaneghe. Ukufuma apo, ifipeliwa fyake fyosa fisakwilambikagha kumyake pakuya Ndaghili wabo. (Belenga Baefesi 1:​8-​11.) Ngimba sikaya syakuswighisya ukuketa injila inunu iyi Yehova ikufwanisyila ubwighane bwake?

9.Linga tukubelenga Ibaibolo, ngimba tubaghile ukumanya bulebule isi sisakubombiwa nkyeni?

⁹ Inong’onela ubusololi ubu Yehova ayobile mungunda wa Edeni, ubu bukuyobiwa pa Ubwandilo 3:​15. b Ubusololi ubu bwayobagha ifyakubombiwa ifi fyayagha pakufwanisya ubwighane bwa Kyala. Loli ifyakubombiwa ifi fisakubombiwa panyuma pa fyinja 1,000. Mwakifwanikisyo, Kyala alimbulile Abrahamu ukuti, linga ingulilo nyingi sikindile, yumo mwa banduyungu lwake isakuya Kristu. (Bwa. 22:​15-​18) Ukufuma apo,  mu 33 C.E., Yesu afulasiwe ikitende, bo muno syayobeliwe ngani. (Imbo. 3:​13-​15) Ikyakubombiwa ikyabumalilo mubusololi ubu kyokyakuti “uwanduyungu” isakughutayaniagha untu wa Setano bo kukali kusyele ifyinja ifyakukinda 1,000. (Ubuset. 20:​7-​10) Kangi Ibaibolo likuyoba nyingi isi sisakubombiwa linga ubulughu bwa pakati pakisu kya Setano nigulu lya Yehova bufikile pabubibi.

10. (a) Ngimba fyakubombiwa filiku ifyankyeni ifi fikuya pakwanda mwalululu ukubombiwa? (b) Ngimba tubaghile ukwitendekesya bulebule mundumbula namminong’ono? (Keta amasyu ghapasi.)

¹⁰ Inong’onela ifyakubombiwa ifyakuswighisya ifi Ibaibolo lyayobile ngani. Ikyakwanda, ifisu fisakufumusyagha amasyu aghakuti “patengene pali kanunu itolo.” (1 Tes. 5:​2, 3) “Akabalilo kakako,” ubutolwe ubukulumba bwisakwanda linga abamaboma baghasambukile amatchalichi ghosa aghabutungulu. (Ubuset. 17:16) Ukufuma apo, kwisakuya ulonangiko bo “nnyamundu bambwene ikwisa mmabingu gha kumwanya namaka nubukulumba ubusisya.” (Mat. 24:30) Yesu isakubalonga abandu, mwakupaghula ing’osi ukufuma ku mbene. (Mat. 25:​31-​33, 46) Pakabalilo ako, Setano isakukindilila ukulimbana na Yehova. Panongwa yakuti ababengile ababombi ba Kyala, Setano isakufikasya ifikolo ifi mu Baibolo fikuyobiwa ukuti Gogi wa nkisu kya Magogi ukuti fibasambukile ababombi ba Yehova. (Eze. 38:​2, 10, 11) Pakabalilo akangi, abapakiwa aba basyele bisakubungana kumwanya ukuti bantule Kristu nifipeliwa ifyamaka ifyakumwanya ukuti balwe ubwite bwa Armagedoni, ubu bo bumalilo bwa butolwe ubukulumba. c (Mat. 24:31; Ubuset. 16:​14, 16) Ukufuma apo, ubulaghili bwa Kristu ubwa fyinja 1,000 bwisakwanda ukulaghila pakisu kyapasi.​—Ubuset. 20:6.

11. Ngimba ubumi bwa bwila na bwila ubu mukughulila bukusanusya isyafiki kumyinu? (Keta kangi ikithuzi.)

¹¹ Inong’onela muno ifindu fisakuyila nkyeni. Ibaibolo likuyoba ukuti Umpeli witu “abikilemo mbandu ubwighane bwakusimanyila isya nkyeni.” (Ndumbi. 3:​11) Inong’onela muno ubumanyani bwinu na Yehova bwisakuyila bwamaka. Mubuku ilyakuti Sendelerani kwa Yehova, peji 319, mukwaghiwa ifundo  iyakukasya iyakuti: “Linga twikele ubumi ifyinja amahandiledi, amasauzani, amamiliyoni kangi na mabiliyoni, twisakumanya nyingi isyakufwana na Yehova Kyala ukukinda isi tusimenye lino. Loli twisakuketa ukuti fikali filipo ifindu ifinunu ifingi ifyakuti tusamanyile. . . . Ubumi bwa bwila na bwila bwisakuya bwakulondiwa fiyo ukukinda muno twinong’onelagha kangi twisakuya nifyakubomba fingi, kangi ukuseghelela kwa Yehova akabalilo kosa kyo kisakuya kindu kyakuhobosya fiyo pabumi bwitu.” Pakabalilo kalino, bo tukukindilila ukumanyila Amasyu gha Kyala, ngimba tukulondiwa kangi ukufufuza isyafiki?

12. Ngimba tubaghile ukuketa bulebule kumwanya? Yoba ikifwanikisyo.

¹² Amasyu gha Kyala ghikuyoba ifindu finandi itolo ifi fisakubombiwa nkabalilo aka Yehova ‘isakulaghilagha fyosa.’ (Yes. 33:5) Ibaibolo likuyoba ifindu ifyakuswighisya ifyakufwana na Yehova nikighaba ikyakumwanya ikya gulu lyake. (Yes. 6:​1-4; Dan. 7:​9, 10; Ubuset. 4:​1-6) Mwakifwanikisyo, tubaghile ukubelenga ifindu ifyakuswighisya ifi Ezekieli afibwene pakabalilo aka “kumwanya kulinkwighuka polelo alinkukibona ikisetuka kya Kyala.”​—Eze. 1:1.

13. Ngimba mukwipilika bulebule ukufwana na isi Yesu ikubomba kumwanya bo muno pikuyobela pa Bahiburi 4:​14-​16?

¹³ Inong’onela ubudindo ubu Yesu ali nabo kumwanya pakuya Mwalafyale kangi Mputi Unkulumba uwakisa. Ukwendela mmyake, tubaghile ukuseghelela “kukikota ikya Bunyafyale ikya ipyana” ndwiputo nukunsuma ukuti atunangisyeghe ikisa nukututula “pakabalilo kabutolwe.” (Belenga Bahiburi 4:​14-​16.) Isiku lililyosa isagha twinong’oneleghe isi Yehova na Yesu babombile na isi bikutubombela ukufuma kumwanya. Ulughano lwabo kumyitu lukutupalamasya mundumbula kangi lukutukasya ukuti twiyipeghe ukumbombela Yehova.​—2 Kor. 5:​14, 15.

14. Ngimba njila yimo yiliku inunu iyi tubaghile ukunangisya ukuti tukunndaghisya Yehova na Yesu? (Keta kangi ifithuzi.)

¹⁴ Injila yimo inunu iyi tubaghile ukunangisya ukuti tukunndaghisya Kyala numwanake kokughelaghela ukubatula abangi ukuti baye Baketi ba Yehova kangi bafundiwa ba Yesu. (Mat. 28:​19, 20) Isi syo untumiwa Pauli abombile ukuti anangisye ukundaghisya kwa Kyala na Kristu. Umwene asimenye ukuti ubwighane bwa Yehova bo bwakuti “abandu bosa bapokiweghe nukuti bafikengepo pakubumanya ubwanaloli.” (1 Tim. 2:​3, 4) Pauli iyipagha fiyo pabubombeli bwake ukuti afwanisye ukubatula abandu bingi “mwakubapoka munjila syosa.”​—1 Kor. 9:​22, 23.

15. Ukufwana na Salimo 1:​2, ngimba findu fiki fikuya pakututula ukuya balusekelo?

¹⁵ Uyu alembile ikighaba kyakwanda ikya buku lya masalimo alingenie isya mundu uwalusekelo uyu “ikwikyela ukubomba indaghilo sya Yehova” kangi “ikusinong’ona sisyo syene pamusi na pakilo.” (Sal. 1:​1-3.) Joseph Rotherham uyu ikusanusya Ibaibolo ayobile mubuku lyake ilyakuti Studies in the Psalms isyakufwana na mavesi agha ukuti umundu uyu “ikulonda fiyo ubulongosi bwa Kyala, ikufufuza, ikumanyila kangi ikuya nakabalilo akatali akakwinong’onelapo.” Kangi alyongelile ukuti, “linga umundu akabelenga Ibaibolo isiku limo, ikuketa ukuti isiku ilyo libukile paitolo.” Mubaghile ukulwagha ulusekelo mwakubelenga Ibaibolo nukuhoboka nifundo nyingi isi musyaghile nukuketa ukukolelana uku kukuyapo nifundo isingi. Syakuhobosya fiyo ukufufuza ifundo insolofu isi sikwaghiwa Mmasyu gha Kyala.

16. Ngimba twisakuyobesania isyafiki munkhani iyakukongapo?

¹⁶ Ubwanaloli ubu Yehova ikutumanyisya Mmasyu ghake bupepe ukubupilikisya. Munkhani iyakukongapo, twisakumanyila ifundo yimo insolofu iya bwanaloli ili lyo tempile inywamu lya mwambepo ilya Yehova, ili Pauli alingenie mwakalata wake uwakubuka ku Bakristu Abahiburi. Mwisakuhoboka fiyo ukumanyila inkhani iyi.