INKHANI IYAKUMANYILA 42
ULWIMBO 103 Ŵaliska Ŵapelekeka Kuŵa Vyawanangwa
Munangisyeghe Ukuti Mukundaghisya Panongwa ya Banyambala aba Bimikiwe
“Bo ikufyuka kumwanya . . . , abapele abandu ifyabupe.” —EF. 4:8.
IFUNDO INYWAMU
Tukuya pakuketa muno abatuli bakipanga, abakulumba nabakwendela idela bikututulila namuno tubaghile ukunangisyila ukuti tukundaghisya panongwa ya isi abanyambala abasubiliwa aba bikubomba.
1. Ngimba findu fiki ifi Yesu atupele?
AKAYAPO umundu uyu abombilemo nyingi ukuti abatule abandu ukunkinda Yesu. Pakabalilo aka ali pakisu kyapasi, utubalilo twingi Yesu abatulagha abandu mwakubomba ifika. (Luka 9:12-17) Abapele abandu ikyabupe ikyapadela fiyo mwakubika ubumi bwake panongwa yabo. (Yoh. 15:13) Panongwa yakuti asyukile, Yesu ikukindilila ukututula. Bo muno ayobile ngani, alinsumile Yehova ukuti atupeghe mbepo mwikemo ukuti ghutumanyisyeghe nukutusubisya. (Yoh. 14:16, 17; 16:13) Kangi ukwendela pangomano syakipanga, Yesu ikukindilila ukutupa ifindu ifi tukulondiwa ukuti tubamanyisyeghe abandu Ibaibolo pakisu kyosa nukubapela bafundiwa.—Mat. 28:18-20.
2. Ngimba bamo mwa “fyabupe” aba bikuyobiwa pa Baefesi 4:7, 8, bo banani?
2 Kilipo kangi ikindu ikingi iki Yesu atupele. Untumiwa Pauli akiyobile bo Yesu abukile kumwanya ukuti, “abapele abandu ifyabupe.” (Belenga Baefesi 4:7, 8.) Pauli alingenie ukuti Yesu atupele abanyambala aba ukuti batutuleghe nkipanga munjila isyakukindanakindana. (Ef. 1:22, 23; 4:11-13) Amasiku agha, “ifyabupe” ifi fikongelelapo abatuli bakipanga, abakulumba bakipanga nabakwendela idela. a Panongwa yakuti bope basitabugholofu, abanyambala aba utubalilo tumo bikusoba. (Yak. 3:2) Loli Umwalafyale witu Yesu Kristu ikubabombela abanyambala abakulondiwa aba ukuti batutuleghe.
3. Lingania muno twesa tubaghile ukutulapo pa isi abanyambala aba bikubomba.
3 Yesu abapele abanyambala aba imbombo iyakukikasya ikipanga. (Ef. 4:12) Loli twesa tubaghile ukubombapo simo ukuti tubatule abanyambala aba bo bikubomba imbombo yabo. Tubaghile ukusifwanikisya isi nimbombo yakuyenga Inyumba ya Bunyafyale. Bamo bikubatula aba bikuyenga mwakubapa ifyakulya pamo ifindu ifingi. Mwakufwana itolo, ukwendela mu isi tukuyoba nukubomba, tubaghile ukubatula abatuli bakipanga, abakulumba nabakwendela idela ukuti tukikasye ikipanga. Isagha tuyobesanie ulusayo ulu tukulwagha panongwa ya isi bikubomba namuno tubaghile ukunangisyila ukuti tukundaghisya kubene na kwa Yesu, uyu “abapele abandu ifyabupe.”
ABATULI BAKIPANGA BIKUTUPA “UBUTULI”
4. Ngimba mo munjila simo siliku isi abatuli bakipanga babatulagha abinabo nkabalilo ka Bakristu bakwanda?
4 Nkabalilo ka Bakristu bakwanda, abakamu bamo bimikiwagha ukuya batuli bakipanga. (1 Tim. 3:8) Sikunangisya ukuti bo aba babikagha “ubutuli” aba Pauli abayobile. (1 Kor. 12:28) Yonongwa yake sikunangisya ukuti abatuli bakipanga babombile imbombo nyingi inunu ukuti abakulumba bayeghe nulusako lwakukimanyisya nukukitima ikipanga. Mwakifwanikisyo, abatuli bakipanga babaghile ukuti batulilepo ukula ifindu ifi fyalondiwagha ukuti bapange amabuku.
5. Ngimba bubombeli bumo buliku ubwakutula ubu abatuli bakipanga bikubomba amasiku agha?
5 Inong’onela fimo mwa findu ifyakulondiwa ifi abatuli aba bikubomba nkipanga kyinu. (1 Pet. 4:10) Babaghile ukupeliwa imbombo yakuketesya amaakaunti pamo ifighaba fya kipanga, ukukolela amabuku gha kipanga nukubapa abafumusi, ukutula ku fibombelo fya mavidiyo, ukubambilila abandu pangomano pamo ukutulapo pambombo yakutendekesya Inyumba ya Bunyafyale. Imbombo syosa isi sikutula ukuti ifindu fyendeghe kanunu kangi ndubatiko nkipanga. (1 Kor. 14:40) Mwakongelelapo, abatuli bakipanga bamo bikupeliwa inkhani isi sikuya Palukomano lwa Ukufumusya nu Bumi bwa Bukristu kangi ni nkhani sya mu Baibolo. Untuli wakipanga abaghile ukwimikiwa kangi ukuti aye ntuli wa uyu ikuketesya akagulu kabufumusi. Utubalilo tumo, unkulumba abaghile ukunsuma untuli wakipanga ukuti babuke nawe pakunkasya umundu yumo nkipanga.
6. Ngimba fifukwa fimo filiku ifi tukulondiwa ukubandaghisya abatuli bakipanga aba bikwiyipa?
6 Ngimba isi abatuli bakipanga bikubomba sikukitula bulebule ikipanga? Beberly, b umulumbu wa ku Bolivia, atile, “Ngubandaghisya fiyo abatuli bakipanga kyitu panongwa ya mbombo iyi bikubomba. Bandulile ukuti nimbeghe inyimbo, namulengepo pangomano, mbilikisyeghe kanunu inkhani nukupilikisya kanunu isi ngumanyilako ku mavidiyo nifithuzi. Bikutula ukuketesya ukuti abandu aba bisile pangomano bafighililiwe kangi bikubatula abakamu na balumbu aba bikutoliwa ukufwanisya ukufika pangomano ukuti bapilikisyeghe amapulogilamu kunyumba syabo. Linga ingomano simalike, bikulongosya pambombo yakwelusya pa Nyumba ya Bunyafyale, bikutulapo pamaakaunti nukuketesya ukuti twambilile amabuku agha tukulonda. Ngubandaghisya fiyo pafyosa ifi.” Leslie, uyu ikwikala ku Colombia kangi undume wake nkulumba wakipanga, atile: “Undume wangu ikulondiwa ubutuli bwa batuli bakipanga. Kisita batuli bakipanga, angali ikwikolania fiyo. Polelo ngubandaghisya fiyo panongwa yakuti bikwiyipa kangi bikutulapo fiyo.” Ngimba umwe mukwipilika bulebule panongwa ya mbombo isi abatuli bakipanga bikubomba nkipanga kyinu?—1 Tim. 3:13.
7. Ngimba tubaghile ukunangisya bulebule ukuti tukubandaghisya abatuli bakipanga? (Keta kangi ikithuzi.)
7 Nalinga tubaghile ukuhoboka na isi abatuli bakipanga bikubomba, loli Ibaibolo likutukasya ukuti tubandaghisyeghe. (Kolos. 3:15) Krzysztof, unkulumba nkipanga kimo ku Finland, anangisye ukuti ikubandaghisya munjila bo iyi, “Nguntumila ikadi pamo imeseji iyi ndembilemo ilemba nukulingania muno untuli wakipanga angasyile pamo ikifukwa iki ngundaghisya pabubombeli ubu abombile.” Pascal nunkasi wake Jael, aba bikwikala ku New Caledonia, utubalilo twingi bikubiputila abatuli bakipanga. Pascal atile, “Mwalululu, twabiputilagha nukunndaghisya Yehova panongwa yakutupa abatuli bakipanga kangi nukuti abatule abakamu aba pambombo yabo.” Yehova ikwamula inyiputo isi kangi ikipanga kyosa kikusayiwa.—2 Kor. 1:11.
ABAKULUMBA BAKIPANGA “BIKWIYULA UKUBOMBA MMYINU”
8. Nongwa yafiki Pauli ayobile ukuti abakulumba abinake “biyulagha”? (1 Batesalonike 5:12, 13)
8 Abakulumba bakipanga nkabalilo kakunyuma biyulagha fiyo ukukitula ikipanga. (Belenga 1 Batesalonike 5:12, 13; 1 Tim. 5:17) Abakulumba aba, ‘biyulagha’ nkipanga mwakulongosya pangomano nukusala ifyakubomba pakuya kabughatila kabakulumba. Kangi babapagha ubulongosi abakamu na balumbu mwalughano ukuti bakindilile ukuya nulwitiko lwamaka. (1 Tes. 2:11, 12; 2 Tim. 4:2.) Abanyambala aba biyulagha kangi ukuti basituleghe imbumba syabo ukuti baye nulwitiko lwamaka nukukindilila ukuya pabumanyani ubununu na Yehova.—1 Tim. 3:2, 4; Titi 1:6-9.
9. Ngimba mbombo simo siliku isi abakulumba bikubomba amasiku agha?
9 Amasiku agha, abakulumba bikwikolania fiyo. Abene bafumusi. (2 Tim. 4:5) Bikunangisya ikifwanikisyo ikinunu pambombo iyakufumusya mwakwiyipa, bikutendekesya imbatiko iyakufumusya nkighaba kyitu kangi bikutumanyisya muno tubaghile ukufumukisya nukumanyisya mwakubafika abandu pandumbula. Kangi abene balongi bakisa aba batikunsalila umundu mbundu bwake. Linga umundu yumo nkipanga abombile ubutulanongwa ubunywamu, abakulumba bikwiyipa ukuntula ukuti aghomolelepo ubumanyani bwake na Yehova. Loli bikuya maso kangi ukuti ikipanga kikindilile ukuya kyelu. (1 Kor. 5:12, 13; Gal. 6:1) Imbombo inywamu iyabakulumba, yo ya butimi. (1 Pet. 5:1-3) Bikwitendekesya ukuti bayobeghe kanunu inkhani isya mu Baibolo, bikwiyipa ukuti bammanyeghe kanunu umundu aliwesa nkipanga nukubomba ubulendo bwabutimi. Abakulumba bamo bikutulapo kangi pambombo yakuyenga nukutendekesya Inyumba sya Bunyafyale, ukuketesya imbombo sya palukomano lwakighaba, mu Komiti ya Kuyobesania na Bakipatala kangi na mu Magulu gha Kubendela Ababine, ukongelela pa mbombo isingi isi bapeliwe. Abakulumba bikubomba nyingi ukuti batutule.
10. Ngimba fifukwa fimo filiku ifi tukubandaghisya abakulumba aba bikwiyipa?
10 Yehova ayobile ngani ukuti abatimi aba bisakusipwelelelagha kanunu ing’osi syake kangi nukuti “sitisakuya nulutende kangi nubusulumanie.” (Yere. 23:4) Momuno umulumbu Johanna uyu ikwikala ku Finland alipilikile bo mama wake abinile fiyo. Johanna atile: “Kukafu fiyo ukuti numbule umundu muno ngwipilikila. Loli unkulumba yumo uyu ngalimmenye kanunu, ambilikisyagha mwakisa bo ngumbula isi niyayagha nasyo. Kangi aliputile nanine nukunsimikisyila ukuti Yehova anganile. Ndikukumbuka isi ayobile, loli ngukumbuka ukuti nalekile ukupasya. Ngusubila ukuti Yehova alintumile ukuti asandule pakabalilo akanunu.” Ngimba abakulumba babatulilepo bulebule nkipanga kyinu?
11. Ngimba tubaghile ukunangisya bulebule ukuti tukubandaghisya abakulumba? (Keta kangi ikithuzi.)
11 Yehova ikulonda ukuti tubandaghisyeghe abakulumba “panongwa ya mbombo syabo.” (1 Tes. 5:12, 13) Henrietta, uyu yope ikwikala ku Finland, atile: “Abakulumba bikubatula abinabo mwakwiyipa fiyo, isi sitikusanusya ukuti bali nakabalilo namaka mingi ukubakinda abangi pamo ukuti abene batikwaghana nindamyo pabumi bwabo. Utubalilo tumo ngubabula itolo ukuti: ‘Nsimenye ukuti uli nkulumba nnunu fiyo. Ngusubila nanuwe usimenye.’” Umulumbu Sera uyu ikwikala ku Türkiye, c atile: “Abakulumba bikulondiwa ukukasiwa ukuti bakindilile ukubomba imbombo yabo. Yonongwa yake tukulondiwa ukubalembela ikadi, ukubakolela ukuti tusalye nabo ifyakulya pamo ukubuka nabo mubufumusi.” Ngimba alipo unkulumba yumo uyu mukunndaghisya fiyo panongwa ya mbombo isi ikubomba nkipanga kyinu? Munnangisyeghe ukuti mukunndaghisya fiyo pa isi ikubomba.—1 Kor. 16:18.
Mubaghile ukubombapo simo ukuti mubatule abakamu aba bimikiwe ukuti bakindilileghe pambombo yabo (Keta amapalagilafu 7, 11, 15)
ABAKWENDELA IDELA BIKUTUYENGA
12. Ngimba gulu liliku ilingi ili Yesu alibikile ukuti lifikasyeghe ifipanga? (1 Batesalonike 2:7, 8)
12 Yesu Kristu abimike kangi abanyambala bamo ukuti bakituleghe ikipanga munjila iyingi. Mwakulongosiwa na Yesu, abakulumba ba ku Yerusalemu balintumile Pauli, Barnaba nabangi ukuya bakwendela idela. (Imbo. 11:22) Nongwa yafiki? Ikifukwa kyake kifwene itolo na iki abatuli bakipanga nabakulumba balimikiliwe: ukuti bafikasyeghe ifipanga. (Imbo. 15:40, 41) Abanyambala aba baliyipile mfindu fingi ukuti bafisubisyeghe ifipanga kangi babikagha ubumi bwabo pangozi ukuti babamanyisyeghe nukubakasya abangi.—Belenga 1 Batesalonike 2:7, 8.
13. Ngimba mbombo simo siliku isi abakwendela idela bikubomba?
13 Utubalilo twingi, abakwendela idela bikulondiwa ukwenda fiyo. Bamo bikwenda amabulendo amatali fiyo ukuti bakafike ku fipanga. Sabata aliwesa uwakwendela idela, ikuyoba inkhani isyakukindanakindana, ikubomba amabulendo gha butimi, ikupangisya ulukomano lwa bapayiniya, ulukomano lwa bakulumba ningomano isyakwitendekesya mubufumusi. Ikwitendekesya inkhani kangi ikuketesya ifyakubombiwa palukomano lwa dela nulwakighaba. Uwakwendela idela ikumanyisya pasukulu ya bapayiniya, ikutendekesya ulukomano lwa padela ulwa bapayiniya mudela lyake. Mwakongelelapo pambombo syosa isi, ikulondiwa kangi ukubomba ifindu ifyakulondiwa kangi utubalilo tumo ikupeliwa imbombo isi ofesi yikulonda ukuti abombe mwanakalinga.
14. Ngimba fifukwa fimo filiku ifi tukulondiwa ukubandaghisya abakwendela idela panongwa yakwiyipa kwabo?
14 Ngimba ifipanga fikusayiwa bulebule panongwa ya mbombo inywamu iyi abakwendela idela bikubomba? Unkamu yumo uwa ku Türkiye atile: “Ubulendo bulibosa ubu bisile pakipanga kyitu, ngukasiwa fiyo ukuti nangaleghe nukubatula fiyo abakamu na balumbu. Nangelemo nabakwendela idela bingi loli akayapo uyu alimbulilemo ukuti ikolenie fiyo nukutoliwa ukuyobesania nanine.” Johanna, uyu tunjobile pakwanda, alingile mubufumusi nuwakwendela idela, loli bakabaghile abandu nnyumba syabo. Johanna atile: “Loli pope ngulikumbuka ilisiku lila. Abakulu bangu babili bafumile itolo ukusokapo pakaya nukubuka ukwakubombela kubutali kangi nabasyukile fiyo. Uwakwendela idela alingasisye kangi alindulile ukupilikisya ukuti mwene nkisu ikipya mo kwisakuya kupepe ukwikala pabupipi nabamumbumba yitu. Twisakwangalagha kwa bwila na bwila.” Nanuswe mo muno tukubaketela abakwendela idela.—Imbo. 20:37–21:1.
15. (a) Ukufwana na 3 Yohani 5-8, ngimba tubaghile ukunangisya bulebule ukuti tukubandaghisya abakwendela idela? (Keta kangi ikithuzi.) (b) Nongwa yafiki tukulondiwa ukubandaghisya abakasi ba bakamu aba bikwiyipa nkipanga, kangi tubaghile ukubomba bulebule isi? (Keta ibokosi ilyakuti “ Mubakumbukeghe Abakasi ba Banyambala aba Bimikiwe.”)
15 Untumiwa Yohani alinkasisye Gayi ukuti abambilileghe abakamu abahesya nukubatula “pabuhesya bwabo bo mumo sibaghilile kwa Kyala.” (Belenga 3 Yohani 5-8.) Injila yimo iyi tubaghile ukubombela isi, ko kunkolela uwakwendela idela ukuti tukalye nawe ifyakulya kunyumba yitu. Injila iyingi, ko kwaghiwapo pangomano isyakwitendekesya ukwingila mubufumusi isi ikutendekesya. Leslie, uyu tunjobile pakwanda, anangisye ukuti abambilile munjila isingi. Umwene atile, “Nalinsumile Yehova ukuti abapeghe ifindu ifi bikulondiwa. Une nundume wangu twabalembile abakalata nukubabula muno batutulile bo bisile pakipanga kyitu.” Kumbuka ukuti abakwendela idela bikwaghana nindamyo kangi bikukatala bo muno twesa tukwipilikila. Utubalilo tumo, bikubina, bikutamiwa aminong’ono kangi bikuwa amaka. Ifundo isi mukuyoba pamo ifyabupe ifi mubaghile ukubapa, fibaghile ukuya yo ansala kunyiputo syabo isyakusuma ubutuli.—Mbu. 12:25.
TUKULONDIWA UBUTULI BWA BANYAMBALA ABA
16. Ukufwana na Isya Mbupingamu 3:27, ngimba malalusyo ghaliku agha abakamu babaghile ukwilalusya?
16 Pakisu kyosa, tukulonda ukuti abakamu bingi bayeghe “fyabupe.” Linga muli nkamu uyu osiwe, mubaghile ukutula munjila bo iyi. (Belenga Isya Mbupingamu 3:27.) Ngimba mukulonda ukuya ntuli nkipanga? Linga muli batuli nkipanga, ngimba mukulonda ukuya bakulumba bakipanga? d Ngimba mubaghile ukuchenja ifindu pabumi bwinu ukuti mwingile Isukulu ya Bafumusi ba Bunyafyale? Kusukulu iyi, mukuya pakumanyila nyingi kangi yikuya pakubatula ukuti Yesu ababombesyeleghe fiyo. Linga mukuketa ukuti mukabaghila ukufwanisya ukubomba isi, munsumeghe Yehova ukuti abatule. Munsume ukuti abapepo mbepo wake mwikemo ughu ghubaghile ukubatula ukufwanisya ukubomba ububombeli bulibosa ubu mupeliwe.—Luka 11:13; Imbo. 20:28.
17. Ngimba “ifyabupe” ifi fikunangisya isyafiki isya Mwalafyale witu, Kristu Yesu?
17 Imbombo inywamu isi bikubomba abakamu aba bimikiwe, buketi bwakuti Yesu ikutulongosya mmasiku aghabumalikisyo agha. (Mat. 28:20) Tukundaghisya fiyo panongwa yakuya nu Mwalafyale uwalughano kangi uyu ikumanya nukutupa ifi tukulondiwa ukongelelapo abakamu ukuti batutuleghe. Yonongwa yake tukulondiwa ukubandaghisya abanyambala abakwiyipa aba. Kangi mungibwagha ukunndaghisya Yehova, panongwa yakuti yo uyu ikutupa “ifyabupe fyosa ifinunu, nifyabupe fyosa ifipelelesye.”—Yak. 1:17.
ULWIMBO 99 Ŵabali Vikwi na Vikwi
a Abakulumba aba bali Nkabughatila Kakulongosya, abatuli ba Kabughatila Kakulungosya, aba Mukomiti ya Ofesi, nabangi aba bali mububombeli ubungi, bikumanyiwa kangi ukuti “fyabupe” ifi Yesu afilekile mbandu.
b Ingamu simo sichenjile.
c Pakwanda batighi Turkey.
d Ukuti mumanye isyakuti mubombe ukuti mufike pakwimikiwa ukuya ntuli nkipanga pamo nkulumba, keta inkhani iyamutu wakuti “Ngimba mwe Bakamu Mukwiyipa Ukuti Muyeghe Batuli ba Kipanga?” nuwakuti “Ngimba mwe Bakamu Mukwiyipa Ukuti Muyeghe Bakulumba ba Kipanga?” mu Ingasya ya Ndindilili iya Novembala 2024.
