INKHANI IYAKUMANYILA 43
ULWIMBO 90 Tikhwimiskane Yumoza na Munyake
Muno Tubaghile Ukubombela Ukuti Tungakayikilagha
“Loli mutupimeghe utundu tosa.”—1 TES. 5:21.
IFUNDO INYWAMU
Muno tubaghile ukumasyila ukukayikila uku kubaghile ukupalamasya ububombeli bwitu kwa Yehova.
1-2. (a) Ngimba malalusyo ghaliku agha ababombi ba Yehova babaghile ukwilalusya? (b) Ngimba tukuya pakumanyila isyafiki munkhani iyi?
ABANDU bingi, abakusi pamo abakeke bikukayikila a utubalilo tumo. Mwakifwanikisyo, inong’onela isya Nketi uwakilumyana uyu ikukayikila linga Yehova ikumwinong’onela. Panongwa ya isi, ikukayikila linga abaghile ukosiwa. Pamo mwinong’onele isya nkamu uyu asalile ukumbombela Yehova pakabalilo aka ali nkeke mmalo mwakulonda indalama nyingi. Panongwa yakuti ikutoliwa ukuyipwelelela imbumba yake, umwene abaghile ukwanda ukuketa ukuti akasalile kanunu bo wakilumyana. Pamo inong’onela isya mulumbu unkangale uyu akaya namaka. Abaghile ukuwa amaka panongwa yakutoliwa ukubomba isi abombagha pakwanda. Ngimba mwilalusisyemo ukuti: ‘Ngimba Yehova ikungeta naloli? Ngimba ifi mbombile kwa Yehova fyo fyakulondiwa? Ngimba ndi wakulondiwa kwa Yehova?’
2 Linga tutikughagha amaansala gha malalusyo agha, tubaghile ukuwa amaka nukuleka ukumbombela Kyala. Munkhani iyi tukuya pakuyobesania muno ukukonga ifundo sya mu Baibolo kubaghile ukututulila ukuti tungakayikilagha ukuti (1) Yehova ikuhoboka nanuswe, (2) ifi twasalile kunyuma fyali finunu, kangi ukuti (3) tuli bakulondiwa kwa Yehova.
NGIMBA TUBAGHILE UKUBOMBA ISYAFIKI LINGA TWANDILE UKUKAYIKILA?
3. Ngimba njila yiliku iyi yibaghile ukututula ukumalana nakayilo kakukayikila?
3 Injila yimo iyi tubaghile ukubomba ukuti tughagheghe amaansala ko kubelenga Amasyu gha Kyala. Linga tubombile isi, tukuya pakukasiwa, ukukula mwambepo, nukuya bakwitendekesya “ukwima ndwitiko.”—1 Kor. 16:13.
4. Ngimba tubaghile ukutupima bulebule “utundu tosa”? (1 Batesalonike 5:21)
4 Belenga 1 Batesalonike 5:21. Keta ukuti Ibaibolo likutubula ukuti “mutupimeghe utundu tosa.” Tubaghile ukumanya ukuti isi tukusubila syanaloli mwakusifwanikisya na isi Ibaibolo likuyoba. Mwakifwanikisyo, amwinong’onele isya wakilumyana uyu ikukayikila linga wakulondiwa kwa Yehova. Ngimba ikulondiwa ukusileka itolo kisita kumwagha ansala? Hayi, ikulondiwa ukuti “atupimeghe utundu tosa” mwakubelenga Ibaibolo nukuketa muno Yehova ikunketela.
5. Ngimba Yehova abaghile ukwamula bulebule amalalusyo ghitu?
5 Linga tukubelenga Amasyu gha Kyala, sifwene itolo ukuti Yehova ikuyoba nanuswe. Loli ukuti tupilikisye kanunu ifundo yimo, tukulondiwa ukubikapo indumbula. Tukulondiwa ukubelenga amalemba agha ghabaghile ukututula ukwamula amalalusyo ghitu. Tubaghile ukufufuza ifundo yimo mwakubombela amabuku agha igulu lya Yehova likutupa. (Mbu. 2:3-6) Tubaghile ukwiputa kwa Yehova ukuti atulongosyeghe linga tukufufuza nukututula ukughagha amaansala gha malalusyo ghitu. Kangi tubaghile ukuketa ifundo sya mu Baibolo ninkhani isi sibaghile ukukolelana namuno ifindu fiyilile kumyitu. Tubaghile ukukasiwa kangi ninkhani sya mu Baibolo isya bandu aba bope balyaghene nindamyo isyakufwana na isi tukwaghana nasyo lino.
6. Ngimba ingomano sikututula bulebule ukuti tumalane nakayilo akakukayikila?
6 Yehova ikuyoba nanuswe kangi ukwendela pangomano sya kipanga. Linga tukwaghiwapo pangomano akabalilo kosa, tubaghile ukupilika inkhani pamo linga abakamu nabalumbu bikwamulapo ifundo isi sibaghile ukututula ukumalana nakayilo akakukayikila. (Mbu. 27:17) Lino isagha tukete muno tubaghile ukubombela ukuti tuleke ukukayikila.
LINGA MUKUKAYIKILA UKUTI YEHOVA IKUHOBOKA NANUMWE
7. Ngimba bamo babaghile ukwilalusya ilalusyo liliku?
7 Ngimba mwilalusisyemo ukuti, ‘Ngimba Yehova ikungeta naloli?’ Linga mukwiketa ukuti mukaya bakulondiwa, mubaghile ukwinong’onela ukuti mukabaghila ukuya pabumanyani na Yehova uyu yo Mpeli wakisu kyosa. Umwalafyale Davidi yope alinong’winepo munjila bo iyi. Umwene aketile ukuti Yehova ikubaketa abandu kangi alalusisye ukuti: “We Yehova, ywani yope umundu ukuti unkumbukeghe, pamo ukuti umwinong’oneghe?” (Sal. 144:3) Ngimba mubaghile ukumwagha kughu ansala wa ilalusyo ili?
8. Ukufwana na 1 Samueli 16:6, 7, 10-12, ngimba Yehova ikuketa ifindu fiki mbandu?
8 Mu Baibolo tukumanyila ukuti Yehova ikubaketa abandu aba bikwipilika ukuti bakaya bakulondiwa ukuya bakulondiwa. Mwakifwanikisyo, Yehova alintumile Samueli ukuti abuke ku nyumba ya Yese ukuti akampake yumo mwabanake ukuya Mwalafyale wa Israeli. Yese abakolile abanake 7 ukuti babuke kwa Samueli loli akalinkolile Davidi uyu ali nkeke fiyo pa bosa. b Loli Yehova alinsalile Davidi. (Belenga 1 Samueli 16:6, 7, 10-12.) Yehova aketile muno Davidi ayilile nkati, ukuya wakilumyana uyu afiketagha ifindu fyamwambepo ukuya fyakulondiwa.
9. Nongwa yafiki mubaghile ukusubila ukuti Yehova ikuhoboka nanumwe? (Keta kangi ikithuzi.)
9 Amwinong’oneleghe muno Yehova ikunangisyila ukuti ikubaketa. Ikubapa ubulongosi ubu mukulondiwa. (Sal. 32:8) Isi sikusanusya ukuti umwene abamenye kanunu. (Sal. 139:1) Linga mukukonga ubulongosi bwa Yehova nukuketa muno bukubatulila, mukuya pakuketa ukuti Yehova ikuhoboka nanumwe. (1 Syambu. 28:9; Imbo. 17:26, 27) Yehova ikuketa syosa isi mukubomba ukuti mumbombeleghe nukumpilikila. Umwene ikuketa utuyilo twinu utwa nkati kangi ikulonda ukuya mmanyani winu. (Yere. 17:10) Ikulonda ukuti mwitikisye ukuya nawe pabumanyani.—1 Yoh. 4:19.
“Linga kundonda umwene [Yehova] po wisa kumwagha.”—1 Syambu. 28:9 (Keta ipalagilafu 9) c
LINGA MUKUKAYIKILA UKUTI IFI MWASALILE KUNYUMA FYALI FINUNU
10. Linga tukwinong’onela isi twasalile kunyuma, ngimba tubaghile ukwilalusya amalalusyo ghaliku?
10 Linga akabalilo kakindilepo, bamo babaghile ukwanda ukwinong’ona nukuketa linga ifi basalile finunu. Lumo bamo basalile ukuleka imbombo pamo ibizinesi panongwa yakuti balondagha ukumbombela Yehova. Lumo ukufika lino ifyinja fingi fikindile ukufuma apa basalile isi. Babaghile ukwinong’onela isya bandu bamo aba basalile ukukindana na isi abene basalile ukubomba kangi lino bikuhoboka nubumi panongwa yakuti bali nindalama nyingi. Yonongwa yake babaghile ukwilalusya ukuti: ‘Ngimba ifi mbombile kwa Yehova fyakulondiwa? Pamo ngimba fyapangisye ukuti ifindu fimo ifyakulondiwa finginde?’
11. Ngimba minong’ono ghaliku agha uyu alembile Salimo 73 ali nagho?
11 Linga amalalusyo bo agha ghikubatamya, mubaghile ukwinong’onela muno uyu alembile Salimo 73 ipilikilagha. Umwene abaketagha abandu aba bakambombelagha Yehova ukuti bali nubumi ubununu, bakabi kangi batikwiyaya. (Sal. 73:3-5, 12) Bo ikubaketa abene nubukabi bwabo, aketagha ukuti ukwiyipa kwake pakumbombela Yehova kukaya kwakulondiwa. Umwene atamiwagha “ilisiku lyosa itolo” panongwa yaminong’ono amabibi. (Sal. 73:13, 14) Ngimba amalene bulebule naminong’ono amabibi agha?
12. Ukufwana na Salimo 73:16-18, ngimba findu fiki fyalintulile uwamasalimo uyu ukumalana naminong’ono agha?
12 Belenga Salimo 73:16-18. Uwamasalimo abukile kumalo aghalutengano agha lyo itempile lya Yehova. Kumalo agha, ali nulusako ulwakwinong’ona kanunu. Apilikisye ukuti nalinga ukuti bamo babaghile ukuya nubumi ubununu, loli bakaya nulusako ulwakwisakwikala nubumi nkyeni. Bo asyaghenie isi, alwaghile ulutengano lwamundumbula, panongwa yakuti amenye ukuti ukubomba ifindu ifyamwambepo kununu fiyo. Yonongwa yake abikilepo indumbula pakumbombela Yehova.—Sal. 73:23-28.
13. Ngimba tubaghile ukulwagha bulebule ulutengano linga tukwilumbusya panongwa ya isi twasalile kunyuma? (Keta kangi ikithuzi.)
13 Nanumwe nubutuli bwa Masyu gha Kyala, mubaghile ukulwagha ulusekelo. Bulebule? Mukumbukeghe ifindu ifinunu ifi muli nafyo, bo ikyuma ikyakumwanya, nukufwanikisya na ifi abandu ba nkisu iki bikufyagha. Babaghile ukusubila fiyo ifi bafwanisye ukubomba pabumi bwabo panongwa yakuti batikusubila kilikyosa nkyeni. Loli uswe, Yehova afingile ukuti ikuya pakutusaya fiyo nukutupa ifindu ifinunu nkyeni. (Sal. 145:16) Kangi inong’onela isi: Ngimba tubaghile ukumanya naloli muno ubumi bwitu bwayagha pakuyila linga twayagha pakusala ifindu mwakukindana namuno twasalile? Loli tumenye ukuti aba bikusala ifindu panongwa yakuti banganile Yehova nabamanyani babo bikufyagha ifindu ifinunu.
Amwinong’oneleghe isya lusayo ulu Yehova afingile (Keta ipalagilafu 13) d
LINGA MUKUKAYIKILA UKUTI MULI BAKULONDIWA
14. Nongwa yafiki bamo bikwikayikila, kangi malalusyo ghaliku agha babaghile ukwilalusya?
14 Abandu ba Yehova abangi bikutoliwa ukubomba nyingi panongwa yabukangale, ububine nubulemale. Isi sibaghile ukubapangisya ukuti bipilikeghe ukuti bakaya bakulondiwa. Babaghile ukwilalusya ukuti, ‘Ngimba ndi wakulondiwa kwa Yehova?’
15. Ngimba uyu alembile Salimo 71 asubilagha isyafiki?
15 Uyu alembile Salimo 71 yope iketagha mwakufwana itolo panongwa yakuti akali namaka. Aliputile ukuti: “Ungandekagha bo amaka ghamalike.” (Sal. 71:9, 18) Nalinga ukuti akali namaka, loli uwamasalimo uyu asubilagha ukuti linga ikuya pakumbombela Yehova mbusubiliwa, Kyala ikuya pakumpa amaka. Uwamasalimo amanyile ukuti Yehova ikuhoboka na aba bikukindilila ukumbombela nalinga ukuti bikutamiwa.—Sal. 37:23-25.
16. Ngimba abakangale bakulondiwa kwa Yehova munjila yiliku? (Salimo 92:12-15)
16 Linga muli bakangale, mwinong’oneleghe muno Yehova ikubaketela. Umwene abaghile ukubatula ukuti muyeghe bamaka mwambepo nalinga ukuti mukwaghana nindamyo. (Belenga Salimo 92:12-15.) Mmalo mwakwinong’onela ifi mukutoliwa ukubomba, mubikeghe indumbula yinu pa isi mubaghile ukufwanisya ukubomba. Mwakifwanikisyo, mubaghile ukubakasya abangi ukwendela mu isi mukubomba ukuti mukindilile ukuya basubiliwa. Mubaghile ukubabula abangi muno Yehova abatulile kwa fyinja fyosa ifi nulusubilo ulu muli nalo ukuti Yehova isakufwanisya fyosa ifi afingile. Kangi mutikulondiwa ukwibwa ukuti inyiputo syinu, sibaghile ukubatula fiyo abangi. (1 Pet. 3:12) Kisita kwinong’onela muno ifindu fiyilile pabumi bwitu, aliwesa ikulondiwa ukubika ikindu kimo kwa Yehova na ku bangi.
17. Nongwa yafiki tutikulondiwa ukwifwanikisya nabangi?
17 Linga mutikwipilika kanunu panongwa yakuti mutikubomba nyingi pakumbombela Yehova, musimanye ukuti umwene ikundaghisya fyosa ifi mukufwanisya ukubomba. Lumo mubaghile ukwanda ukufwanikisya isi mukubomba na isi abangi bikubomba. Loli mutikulondiwa ukubomba isi. Nongwa yafiki? Panongwa yakuti Yehova atikubomba isi. (Gal. 6:4) Mwakifwanikisyo, Maria alimpele Yesu amafuta ghapamwanya fiyo. (Yoh. 12:3-5) Ukukindana na isi Maria abombile, unkikulu umfwilwe undondo abikile ututambala tubili utunandi fiyo mutempile. (Luka 21:1-4) Loli Yesu aketagha ukuti bosa banangisye ulwitiko lwamaka. Yehova ikundaghisya kilikyosa iki mukubomba panongwa yakwiyipa kwinu nulughano ulu mukunangisya nalinga ukuti sibaghile ukuboneka ukuti nandi.
18. Ngimba findu fiki fikuya pakututula ukuti tungakayikilagha? (Keta kangi ibokosi ilyakuti “ Amasyu gha Yehova Ghabaghile Ukubatula Ukuti Mungakayikilagha.”)
18 Twesa tukukayikila utubalilo tumo. Bo muno tuketile, Amasyu gha Kyala aghabwanaloli, ghabaghile ukututula ukumalana nakayilo aka. Mukulondiwa ukufufuza amaansala gha malalusyo ghinu kangi mukuya pakuya bakwikutisiwa. Yehova ikunketa umundu aliwesa pamwene. Ikundaghisya fiyo amakemo agha mukubika kangi ikuya pakubasaya fiyo. Tuyeghe nulusubilo losa ukuti Yehova abaghanile ababombi bake abasubiliwa.
ULWIMBO 111 Vifukwa Vyakuŵira na Chimwemwe
a ISI AMASYU GHAMO GHIKULINGANIA: Munkhani iyi, tukuyobesania isya ukukayikila uku kubaghile ukupangisya ukuti tuleke ukusubila linga Yehova atughanile pamo pa isi tusalile ukubomba. Uku kukaya kukayikila uku kukuyobiwa mu Baibolo uku kubaghile ukunangisya ukuti umundu akaya nulwitiko mwa Yehova na isi afingile.
b Nalinga ukuti Ibaibolo litikuyoba ifyinja ifi Davidi ali nafyo pakabalilo aka Yehova ansalagha, loli abaghile ukuti ali wakilumyana.—Keta Ingasya ya Ndindilili ya Chitumbuka iya Seputembala 1, 2011, peji 29, pala. 2.
