1. Ngimba Yehova ikubaketa bulebule ababombi bake?

 NGIMBA Yehova ikubaketa bulebule ababombi bake pakisu kyapasi? Umwene ikumanya linga tuli balusekelo pamo tusulumenie. (Sal. 37:18) Linga ikuketa ukuti tukughelaghela ukumbombela nalinga ukuti tukutamiwa naminong’ono, umwene ikuhoboka fiyo. Kangi ukukinda fyosa, umwene ikulonda ukututula nukutusubisya.

2. Ngimba Yehova ikubabombela isyafiki aba indumbula syabo siyetile, kangi tukusayiwa bulebule namuno ikutupasikisyila?

² Pa Salimo 147:3 pikuti Yehova ‘ikupinya ififulalo’ fya bandu aba indumbula siyetile. Ilemba ili likunangisya ukuti Yehova ikubatula mwalughano abandu aba bafulele mminong’ono. Loli ngimba tukulondiwa ukubomba isyafiki ukuti tuketeghe muno Yehova ikutupasikisyila? Inong’onela ikifwanikisyo iki. Dokotala uyu ali nuluso abaghile ukuntula umundu uyu afulele ukuti abumbuluke. Loli ukuti atuliwe umundu uyu afulele, ikulondiwa ukukonga kanunu ubulongosi bwa dokotala. Munkhani iyi, tukuya pakuketa isi Yehova ikuyoba Mmasyu ghake ku bandu aba bikutamiwa naminong’ono nukuketa muno tubaghile ukukongela ubulongosi bwake ubu ikutupa mwalughano.

YEHOVA IKUTUSIMIKISYILA UKUTI TULI BAKULONDIWA FIYO KUMYAKE

3. Nongwa yafiki bamo bikwiketa ukuti bakaya bakulondiwa?

³ Tukwikala nkisu iki abandu batikunangisania ulughano kangi syakitima ukuti abandu bingi bikwiketa ukuti bakaya bakulondiwa. Umulumbu yumo uyu ingamu yake yo Helen, a atile: “Nakulile mumbumba iyi abapapi bangu bakanangisaniagha ulughano. Tata wangu ali wankhaza fiyo kangi isiku lililyosa atuyobagha ukuti tukaya bakulondiwa.” Mwakufwana itolo na Helen, lumo nanumwe bababombilemo  ifindu fyankhaza, pamo ukwipilika ukuti mukaghaniwa. Linga mo siyilile, kubaghile ukuya kukafu kumyinu ukusubila linga alipo yumo uyu abaghanile naloli.

4. Ukufwana na Salimo 34:​18, ngimba Yehova afingile isyafiki kumyitu?

⁴ Nalinga ukuti abandu bamo bababombilemo ifindu ifibibi, loli mukulondiwa ukumanya ukuti Yehova abaghanile kangi ikubaketa ukuti muli bakulondiwa fiyo. Umwene “ali pipi itolo na bandu bosa aba indumbula syabo sisulumenie.” (Belenga Salimo 34:18.) Linga mukwiketa ukuti mukaya bakulondiwa, mukumbukeghe ukuti Yehova ikuketa utuyilo twinu utununu kangi ikubakwabila kumyake. (Yoh. 6:44) Akabalilo kosa umwene itendekisye ukubatula panongwa yakuti muli bakulondiwa fiyo kumyake.

5. Ngimba tukumanyilako isyafiki ukufwana namuno Yesu abombelagha ifindu nabandu aba banyoziwagha nabangi?

⁵ Tubaghile ukumanya muno Yehova ikwipilikila mwakwinong’onela ikifwanikisyo kya Yesu. Bo ali pakisu, Yesu abanangisyagha ikisa abandu aba biketagha ukuti bakaya bakulondiwa panongwa ya isi abandu bamo bababombelagha. (Mat. 9:​9-12) Bo unkikulu yumo ikusubila ukuti ikuya pakubumbuluka ku mbungo inywamu, akolile umwenda wa Yesu. Kangi Yesu alinsubisye nukunndaghisya panongwa ya lwitiko lwake. (Mar. 5:​25-34) Yesu akongagha kanunu fiyo utuyilo twa Tata wake. (Yoh. 14:9) Yonongwa yake mukulondiwa ukusubila ukuti Yehova ikubaketa ukuti muli bakulondiwa fiyo. Kangi ikuketa utuyilo twinu utununu, ukongelelapo ulwitiko ulu mukunangisya nulughano lwinu kumyake.

6. Ngimba mubaghile ukubomba isyafiki linga mukwiketa ukuti mukaya bakulondiwa?

⁶ Ngimba mubaghile ukubomba isyafiki linga mukwiketa ukuti mukaya bakulondiwa? Mubelengeghe amavesi gha mu Baibolo agha ghikubasimikisyila ukuti muli bakulondiwa kwa Yehova  nukwinong’onelapo. b (Sal. 94:19) Mungifwanikisyagha nabangi kangi munginong’onelagha fiyo pa isi mukutoliwa ukubomba. Yehova atikughulila ukuti mubombeghe nyingi ukukinda isi mubaghile ukufwanisya. (Sal. 103:​13, 14) Linga umundu yumo ababombilemo ifindu ifyankhaza, komma ukwiyipa inongwa pa isi ababombile. Mukumbukeghe ukuti Yehova isakubalonga bosa aba bikubabombela abinabo ifindu ifibibi nukubatula aba bikunyoziwa. (1 Pet. 3:12) Sandra, uyu balimbombilemo ifyankhaza bo mwana atile, “Utubalilo tosa ngunsuma Yehova ukuti niketeghe munjila inunu bo muno umwene ikungetela.”

7. Ngimba isi twalyaghene nasyo kunyuma sibaghile ukututula bulebule ukuti tumbombeleghe kanunu Yehova?

⁷ Komma ukukayikila ukuti Yehova abaghile ukubabombesyela imbombo ukuti mubatule abangi. Umwene abapele ulusako ulwakubomba nawe pampene imbombo iyakufumusya. (1 Kor. 3:9) Panongwa ya findu ifibibi ifi mwalyaghene nafyo, kubaghile ukuya kupepe ukupilikisya muno abangi bikwipilikila pandamyo isi bikwaghana nasyo. Mubaghile ukubomba nyingi ukuti mubatule. Helen uyu tunjobile pakwanda, alyambilile ubutuli kangi yope lino ikufwanisya ukubatula abangi. Umwene atile: “Niketagha ukuti ngali wakulondiwa. Loli Yehova andulile ukwipilika ukuti nganiwe kangi ikumbombesyela imbombo ukuti mbatuleghe abangi.” Lino Helen ikuhoboka ukubomba ubupayiniya bwa kabalilo kosa.

YEHOVA IKULONDA UKUTI TWITIKISYEGHE ULUHOBOKELO LWAKE

8. Ngimba Yehova ikutusimikisyila isyafiki pa Yesaya 1:18?

⁸ Ababombi ba Yehova bamo, bikukindilila ukutamiwa naminong’ono panongwa yabutulanongwa ubu babombile kunyuma bo bakali ukosiwa kangi bo bosiwe. Loli tukulondiwa ukukumbuka ukuti Yehova atughanile fiyo. Yonongwa yake atupele ikitabulilo ukuti tuhobokeliwe ubutulanongwa bwitu. Ikulonda ukuti tusayiweghe nikyabupe kyake iki. Yehova ikutusimikisyila ukuti linga ‘tugholwisye ifindu,’ c atikuya pakusunga ubutulanongwa bwitu. (Belenga Yesaya 1:18 NWT.) Tukundaghisya fiyo kwa Tata witu uwalughano, Yehova, panongwa yakuti atikukumbukila ubutulanongwa ubu twabombile kunyuma. Kangi umwene atikwibwa ifindu ifinunu ifi tubombile.—Sal. 103:​9, 12; Hib. 6:10.

9. Nongwa yafiki tutikulondiwa ukwinong’onela ubutulanongwa ubu twabombile kunyuma?

⁹ Linga mukutamiwa naminong’ono panongwa ya findu ifi mwabombile kunyuma, mughelegheleghe ukwinong’onela ifindu ifinunu ifi mukubomba lino na ifi mwisakubomba nkyeni. Inong’onela isi Pauli abombile. Umwene iyipagha inongwa papo pakwanda abafwimagha Abakristu, loli asimenye ukuti Yehova alinhobokile. (1 Tim. 1:​12-15) Ngimba umwene akindilile ukwinong’onela ubutulanongwa ubu abombile kunyuma? Umwene akabombile isi mwakufwana itolo namuno alekile ukwinong’onela ifindu ifi abombile pakwanda pakuya Muyuda. (Filip. 3:​4-8, 13-15) Mmalo mwake, Pauli akindilile ukwiyipa pambombo iyakufumusya nukughulila ifindu ifinunu nkyeni. Mwakufwana itolo na Pauli, mukabaghila ukuchenja ifindu ifibibi ifi mwabombile kunyuma. Loli lino mubaghile ukumpala Yehova nukunhobosya. Kangi mwinong’oneleghe fiyo ifindu ifinunu ifi Kyala afingile ukuti isakubapa nkyeni.

10. Ngimba tukulondiwa ukubomba isyafiki linga isi twabombile kunyuma syabakalalisye abangi?

¹⁰ Mubaghile ukutamiwa kangi naminong’ono panongwa ya findu fimo ifibibi ifi mwabombile kunyuma ifi fyabakalalisye abangi. Ngimba findu  fiki fibaghile ukubatula? Mubombeghe syosa isi mubaghile ukufwanisya ukuti mutendekesye ifi mwalyonangile pakwanda nukupepesya. (2 Kor. 7:11) Munsumeghe Yehova ukuti abatule aba bapalamasiwe panongwa ya findu ifibibi ifi mwababombile. Yehova abaghile ukubatula umwe na aba mwabonangile ukuti mukindilileghe ukumbombela umwene nukuya palutengano.

11. Ngimba tubaghile ukumanyilako isyafiki ku nsololi Yona? (Keta kangi kyapakikope.)

¹¹ Mumanyilengepo simo pa isi musobile kangi mwitikisyeghe ukuti Yehova ababombesyele imbombo munjila yiliyosa iyi ikulonda. Inong’onela ikifwanikisyo kya nsololi Yona. Mmalo mwakubuka ku Ninive kuno Kyala alintumile, umwene abukile kubungi. Yehova alimfundile kangi Yona amanyilepo simo pa isi asobile. (Yona 1:​1-4, 15-17; 2:​7-10) Yehova akalekile ukumbombesyela Yona pakuya nsololi. Alimpele ulusako ulungi ukuti abuke ku Ninive kangi Yona apilikile. Akalitikisye ukuti isi asobile kunyuma sintolesye ukubomba ububombeli ubu Yehova alimpele.—Yona 3:​1-3.

YEHOVA IKUTUSUBISYA UKWENDELA MWAMBEPO MWIKEMO

12. Ngimba Yehova ikutupa bulebule ulutengano linga twaghene nindamyo? (Bafilipi 4:​6, 7)

¹² Ukwendela mwambepo wake mwikemo, Yehova ikutusubisya linga twaghene nindamyo yimo. Inong’onela isi alyaghene nasyo Ron na Carol. Umwanabo unnyambala alighoghile mwene. Abene batile: “Twalyaghenepo nindamyo kunyuma loli iyi yali yakubaba fiyo. Utubalilo twingi twatoliwagha ukughona utulo, polelo twiputagha kwa Yehova kangi twalwaghile ulutengano ulu lukuyobiwa pa Bafilipi 4:​6, 7.” (Belenga.) Linga mukutamiwa naminong’ono panongwa yakuti mukwaghana nindamyo yimo, mumbuleghe Yehova ndwiputo muno mukwipilikila. Mubaghile ukuyobesania nawe akabalilo kosa. (Sal. 86:3; 88:1) Munsumeghe Yehova mwakwandisania ukuti abape mbepo wake mwikemo. Umwene ikuya pakubatula akabalilo kosa.—Luka 11:​9-13.

13. Ngimba mbepo mwikemo ghubaghile ukututula bulebule ukukindilila ukumwiputa Yehova mbusubiliwa? (Baefesi 3:16)

¹³ Ngimba yilipo indamyo yimo iyi yikubapangisya ukuti muweghe amaka? Mbepo mwikemo ghubaghile ukubapa amaka agha mukulondiwa ukuti mukindilileghe ukumwiputa Yehova mbusubiliwa. (Belenga Baefesi 3:16.) Inong’onela isi umulumbu Flora alyaghene nasyo. Umwene nundume wake, babombagha pampene ububombeli bwa bumishonale. Bo undume wake alekile ukuya nsubiliwa kumyake bamasisye ubweghi. Flora atile: “Syalimbabile fiyo mundumbula panongwa yakuleka ukusubiliwa kwake kangi ngamanyagha nikyakubomba. Nalinsumile Yehova ukuti andule na mbepo wake mwikemo ukuti mfwanisye ukwifimbilisya. Yehova alinsubisye, nalinga ukuti pakwanda syabonekagha ukuti sikabaghila ukubombiwa loli nakabile amaka nukufwanisya ukwifimbilisya panongwa yabutuli bwake.” Flora ikuketa ukuti Kyala antulile ukuti ansubileghe fiyo kangi ali nulusubilo losa ukuti ikuya pakuntula pandamyo yiliyosa iyi abaghile ukwaghana nayo. Flora ayobile kangi ukuti: “Amasyu gha pilemba lya Salimo 119:​32, ghikulingania kanunu muno Yehova alindulile. Ilemba ili likuti: ‘Mu njila ya ngomelesyo syako mo nikubopelagha, apa linga umbele indumbula ya mahala.’”

14. Ngimba tubaghile ukwitikisya bulebule mbepo wa Kyala ukuti ghututule?

¹⁴ Linga munsumile Yehova ukuti abatule na mbepo wake mwikemo, ngimba mukulondiwa ukubomba isyafiki? Mubombeghe ifindu ifi fibaghile ukubatula ukuti mukindilileghe ukwambilila mbepo wa Kyala. Isi sikongelelapo ukwaghiwapo pangomano nukufumusya. Mubelengeghe Amasyu gha Kyala isiku lililyosa. Isi sikuya pakubatula ukuti mubombeghe isi Yehova ikulonda. (Filip. 4:​8, 9) Bo mukubelenga, mwinong’oneleghe isya bandu aba bikuyobiwa mu Baibolo aba balyaghene nindamyo nukuketa muno Yehova  abatulile ukuti bifimbilisyeghe. Sandra, uyu tunjobile pakwanda, alyaghene nindamyo nyingi fiyo pabumi bwake. Umwene atile: “Inkhani ya Yosefu yalingasisye fiyo. Yosefu akalitikisye ukuti ingelo nifindu ifisitabugholofu ifi alyaghene nafyo fyonange ubumanyani bwake na Yehova.”—Bwa. 39:​21-23.

YEHOVA IKUTUSUBISYA UKWENDELA MU BAKRISTU ABINITU

15. Ngimba bo banani aba babaghile ukutusubisya, kangi babaghile ukututula bulebule? (Keta kangi ikithuzi.)

¹⁵ Linga twaghene nindamyo, Abakristu abinitu babaghile ukuya ‘lusubisyo kumyitu.’ (Kolos. 4:11) Ubutuli ubwakufuma ku bakamu na balumbu bitu yo njila yimo iyi Yehova ikutunangisyila ulughano lwake. Abakristu abinitu babaghile ukutusubisya nukutupilikisya kanunu linga tukulingania muno tukwipilikila. Babaghile ukutukasya nilemba lya mu Baibolo pamo ukwiputa pampene nanuswe. d (Rom. 15:4) Utubalilo tumo, unkamu pamo umulumbu abaghile ukutukumbusya muno Yehova ikufiketela ifindu, isi sibaghile ukututula ukuti tukindilileghe ukwifimbilisya. Abakristu abinitu babaghile ukututula kangi munjila iyingi, bo ukutupa ifyakulya linga tuli mundamyo.

16. Ngimba tukulondiwa ukubomba isyafiki ukuti twambilile ubutuli ukufuma kubangi?

¹⁶ Utubalilo tumo, tubaghile ukubasuma abangi ukuti batutule. Abakamu na balumbu bitu  batughanile fiyo kangi bikulonda ukututula. (Mbu. 17:17) Loli lumo bakabaghila ukumanya muno tukwipilikila pamo ifi tukulonda. (Mbu. 14:10) Linga mukutamiwa naminong’ono, muyeghe babuke ukubabula abamanyani binu abakusi mwambepo. Mubabuleghe muno babaghile ukubatulila. Lumo mubaghile ukuyobesania nunkulumba wakipanga yumo pamo babili aba mukuketa ukuti mubaghile ukuya babuke ukubabula aminong’ono ghinu. Abalumbu bamo baketile ukuti bikukasiwa linga bayobesenie numulumbu yumo unkusi mwambepo.

17. Ngimba ndamyo simo siliku isi sibaghile ukututolesya ukuti abangi batukasye, kangi tubaghile ukumalana nasyo bulebule?

¹⁷ Komma ukwipaghula. Panongwa yakuti mukutamiwa fiyo naminong’ono, utubalilo tumo mubaghile ukuleka ukwangala nabangi. Kangi utubalilo tumo, abakamu na balumbu bakabaghila ukubapilikisya pamo babaghile ukubayobela amasyu amabibi. (Yak. 3:2) Loli komma ukuleka ukwangala nabo. Yehova abaghile ukubabombesyela imbombo abene ukuti babakasye. Unkulumba yumo uyu ingamu yake yo Gavin, uyu ikubina imbungo ya minong’ono, atile: “Utubalilo twingi ngighana ukwangala nabinangu.” Loli Gavin achenjile nukwanda ukwangala nabakamu bake. Kangi utubalilo twingi ikwipilika kanunu linga abombile isi. Umulumbu yumo uyu ingamu yake yo Amy, atile: “Panongwa ya isi nalyaghene nasyo kunyuma, ngutamiwa fiyo ukuti mbasubileghe abandu. Loli ngughelaghela ukubaghana nukubasubila abakamu na balumbu bo muno Yehova ikubombela. Nsimenye ukuti isi sikunhobosya fiyo Yehova kangi sikumbangisya ukuya walusekelo.”

ISI YEHOVA AFINGILE NKYENI SIKUTUSUBISYA

18. Ngimba tukughulila isyafiki nkyeni, kangi lino tukulondiwa ukubomba isyafiki?

¹⁸ Mwalululu, Yehova ikuya pakusosyapo kilikyosa iki kikutupangisya ukuti tutamiweghe naminong’ono. (Ubuset. 21:​3, 4) Pakabalilo ako, ifindu ifyakubaba ifi tukwaghana nafyo lino ‘twisakwibwa fyosa itolo.’ (Yes. 65:17) Bo muno tumanyilile, lino Yehova ‘ikupinya ififulalo fyitu.’ Umwene atupele ifindu fingi ifi fibaghile ukutusubisya nukututula. Mughelegheleghe ukwambilila ubutuli bwake. Komma ukukayikila napanandi ukuti “umwene ikubiyayila umwe.”—1 Pet. 5:7.