Akayumba aka bakabombelagha ukuya njila yakwingilila mbuyo ubwikemo fiyo ubwa tempile. Ibaibolo lya New World Translation of the Holy Scriptures ili lyasokile bo kikali ukufika ikyinja kya 2023 likuti, “akayumba aka kunkyeni kali katali amafiti 20, mwakufwana itolo namunguto sya nyumba yila kangi kali katali ukufyuka mmwanya amamita 120.” (2 Syambu. 3:4) Amabaibolo aghangi ghope ghikuti akayumba aka kali katali ukufyuka mmwanya amafiti “120.” Isi sikusanusya ukuti yali ngasya ya mamita 53.

Loli pakuyoba isya kayumba aka kali patempile lya Solomoni, Ibaibolo lya New World Translation ili lyapulintiwe mu 2023 likuti: “Mbutali bwake ukubuka kumwanya, akayumba aka kali amafiti 20,” pamo ukuti amamita 9. a Inong’onela ififukwa finandi itolo ifi fyapangisye ukuti paye ukuchenja uku.

Ubutali bwa kayumba aka butikuyobiwa pilemba lya 1 Banyafyale 6:3. Pilemba ili, undembi Yeremiya ikuyoba itolo muno akayumba aka kayilile mbwelefu nambusolofu komma ubutali bwake. Muchaputala ilyakukongapo, ikulingania nyingi isya fighaba ifingi ifyakuswighisya ifya tempile, ukongelelapo Sumbi wa kikuba, ifya kwimapo sumbi 10, kangi nimbanda sibili isya kikuba isi syali panja pakayumba aka. (1 Banyaf. 7:​15-37) Linga akayumba aka kali katali amamita aghakukinda 50 kangi kali katali ukukinda itempile lyosa, nongwa yafiki Yeremiya akayobile ubutali bwake? Kangi bo pakindile ifyinja amahandiledi mingi, Abayuda aba balembagha isya iyolo, batile akayumba aka kakali katali ukulikinda itempile lyosa ilya Solomoni.

Abakalyoto bikukayikila linga amamato gha tempile ghatuliwagha nakayumba aka kali katali amamita 120. Inyumba indali isya iyolo isi bayengile namabwe ningelwa, bo muno ghayilile amageti gha tempile lya ku Egiputi, syayagha na fawundeshoni umbalufu kangi syayagha nsekele kumwanya. Loli mukaya mo muno lyayilile itempile lya Solomoni. Abakalyoto bikusubila ukuti amamato ghake ghakakindile amafiti 6 pamo ukuti amamita 2.7 ubunywamu. Yonongwa yake Theodor Busink, uyu yo kalyoto wa fyakuyengayenga atile: “Ukufwana nubunywamu bwa imato lya [geti ya tempile], akayumba kala kakabaghile ukufwana amafiti 120 [mbutali bwake].”

Sibaghile ukubombiwa ukuti bakalyeghelile kanunu isi ilemba lya 2 Syambukulu 3:4 lyayobagha. Nalinga ukuti imipukutu yimo iya iyolo yikuyoba isya “120” muvesi ili, loli imipukutu iyingi imisubiliwa, bo umpukutu wa Codex Alexandrinus uwa mu 400 C.E nu wa Codex Ambrosianus uwa mu 600 C.E, yikuyoba isya “mafiti 20.” Nongwa yafiki undembi yumo asobile ukulemba “120”? Ilisyu ilyakuti “handiledi” nilyakuti “amafiti” ghikuboneka mwakufwana itolo Nkihiburi. Yonongwa yake undembi abaghile ukulemba ilisyu ilyakuti “handiledi” mmalo mwa “mafiti.”

Nalinga ukuti tukwiyipa ukufipilikisya ifindu ifi nukunangisya muno itempile lya Solomoni lyayilile naloli, loli tukubikapo amahala fiyo pa fighaba ifi itempile ili limilagha itempile inywamu ilyamwambepo. Tukundaghisya fiyo panongwa yakuti Yehova ikubambilila ababombi bake bosa ukuti bambombeleghe patempile ili.—Hib. 9:​11-14; Ubuset. 3:12; 7:​9-17.