UKWIMBA inyimbo lwali lwiho lwa Baisraeli. Utubalilo twingi, Ibaibolo likuyoba isya bandu bamo aba bali nifyakwimbila kangi bimbagha. Kangi ulubafu ulunywamu lwa Malemba ghalembiwe ukuya nyimbo. Mwakifwanikisyo, ibuku lya Masalimo, Ulwimbo Ulukulu nilya Inguto, ghalembiwe ukuya nyimbo. Mwakufwana itolo, ibuku ilyakuti Music in Biblical Life likunangisya ukuti Abaisraeli akabalilo kosa babombesyelagha fiyo inyimbo pabumi bwabo.

Bimbagha inyimbo pabumi bwa isiku nisiku. Abaisraeli bimbagha inyimbo ukuti banangisye muno bipilikilagha. (Yes. 30:29) Abakikulu bakubagha amalimba, bimbagha mwalusekelo, nukuvina pafyakusangalusya, pakabalilo aka bampakagha Umwalafyale, kangi linga abalwabwite batolile. (Balo. 11:34; 1 Samu. 18:​6, 7; 1 Banyaf. 1:​39, 40) Abaisraeli bimbagha kangi inyimbo linga ikitima kibakolile kangi linga yumo afwile. (2 Syambu. 35:25) Isi sikusanusya ukuti Abaisraeli basighanile fiyo inyimbo.

Abanyafyale ba Israeli basighanile inyimbo. Abanyafyale Baisraeli bapilikisyagha fiyo inyimbo. Umwalafyale Sauli alinkolile Davidi ukuti amwimbileghe inyimbo kunyumba yake. (1 Samu. 16:​18, 23) Pakabalilo aka Davidi ali Mwalafyale, ali nifyakwimbila, alembagha inyimbo kangi abasalile abandu ukuti bimbeghe patempile lya Yehova. (2 Syambu. 7:6; Amosi 6:5) Umwalafyale Solomoni ali nabanyambala nabakikulu aba bimbagha.—Ndumbi. 2:8.

Abaisraeli babombesyelagha inyimbo pakwiputa. Abanyambala, 4,000 bimbagha mu tempile ku Yerusalemu. (1 Syambu. 23:5) Babombesyelagha ifyela ifi fyalilagha, amapango nifisango pakwimba. (2 Syambu. 5:12) Loli bakaya bene aba bamenye ukwimba inyimbo pakwiputa. Abaisraeli bingi bimbagha inyimbo linga bali munjila pakabalilo aka babukagha ku Yerusalemu. (Sal. 120-134) Ukufwana na isi Abayuda bamo balembile, Abaisraeli bimbagha inyimbo sya Masalimo a pakabalilo ka Fyakulya fya Pasa.

Inyimbo syakulondiwa fiyo nakubabombi ba Yehova amasiku agha. (Yak. 5:13) Tukwimba inyimbo ukuti tumpaleghe Yehova. (Ef. 5:19) Linga tukwimba, tukukolelana nabakamu na balumbu bitu. (Kolos. 3:16) Kangi inyimbo sikutukasya linga twaghene nindamyo. (Imbo. 16:25) Ukwimba inyimbo yo njila yimo iyi tukunangisya ukuti tukunndaghisya Yehova kangi tunganile.