Ilemba ili likuti: ‘Komma ukuswigha linga waghile ukuti nkisu abalongosi bikubangalila abalondo kangi batikulongela inongwa sya bandu mbugholofu na mbwanaloli. Namanga undongosi wesa ikulindililiwa na uyu ali pamwanya ukunkinda umwene, kangi uyu ali pamwanya pali bosa yo ikubalindilila bosa.’​—Ndumbi. 5:8.

Linga tutikwinong’onela muno Yehova ikuketela pa nkhani iyi, tubaghile ukuketa ukuti amavesi agha ghikulingania isya bandu aba bali nubudindo muboma. Loli linga twinong’onile kanunu tubaghile ukuketa ukuti likuyoba isya bwanaloli ubwakuyoba isya Yehova, isi sibaghile ukutukasya nukutupa ulusubilo.

Ilemba lya Undumbilili 5:8 likuyoba isya balaghili aba bikubanyoza abalondo kangi batikubabombela abandu ifindu mbwanaloli. Undaghili likulondiwa ukukumbuka ukuti ikulindililiwa nu mundu yumo uyu ali nubudindo mu boma ukukinda umwene. Kangi babaghile ukuyapo abangi aba bali nubudindo ubwapamwanya. Syakitima ukuti mu maboma gha bandu, abalaghili bosa babaghile ukuya basyobi kangi abandu babaghile ukutamiwa panongwa ya busyobi bwabo.

Nalinga ukuti kilikyosa kibaghile ukuboneka kibibi, tubaghile ukusubisiwa panongwa yakumanya ukuti Yehova ‘ikubaketa nalinga bo balaghili aba bali pamwanya’ mu maboma gha bandu. Tubaghile ukusuma ubutuli kwa Yehova nukumbula syosa isi tukwiyaya nasyo. (Sal. 55:22; Filip. 4:6, 7) Tusimenye ukuti ‘amaso gha Yehova ghikwenesya kosakosa nkisu kya pasi ukubapa amaka aba bikwininga kumyake nindumbula yosa.’​—2 Syambu. 16:9.

Yonongwa yake ilemba lya Undumbilili 5:8 likutukumbusya isya kisu iki tukwikala lino kangi nukuti alipo uyu ali namaka ukubakinda bosa. Ikindu ikyakulondiwa fiyo, kyo kyakuti ivesi ili likututula ukumanya ukuti Yehova yo wapamwanya fiyo, Mwenemaka Ghosa. Umwene ikulaghila ukwendela mu mwanake, Yesu Kristu, Umwalafyale wa Bunyafyale. Kangi Kyala Umwenemaka Ghosa, uyu ikuketa kilikyosa, ikubomba ifindu mbwanaloli kangi ikubapasikisya abandu, mo muno yope numwanake ikubombela.