1-2. Ukufwana na 1 Timoti 6:20, ngimba Timoti alondiwagha ukubomba isyafiki?

UTUBALILO twingi tukubapa abangi ifindu fyitu ifyakulondiwa ukuti bafipweleleleghe. Mwakifwanikisyo tubaghile ukusunga indalama syitu ku banki. Linga tubombile isi, tukuya nulusubilo losa ukuti indalama syitu sikuya pakufighililiwa kangi bakabaghila ukuhiya. Yonongwa yake tukupilikisya kanunu isi ukunsubila umundu uyungi sikusanusya.

² Belenga 1 Timoti 6:20. Untumiwa Pauli alinkumbwisye Timoti ukuti alyambilile ikindu ikinunu fiyo iki ko kubumanya kanunu ubwighane bwa Kyala ku bandu. Kangi Yehova alimpele Timoti ulusako ulwa ‘kufumusya ilisyu’ kangi ‘nukubomba imbombo iyi ikubomba umfumusi uwa amasyu amanunu.’ (2 Tim. 4:2, 5) Pauli alinkasisye Timoti ukuti ukaketeghe bununu aka upeghiwe. Mwakufwana itolo na Timoti, nanuswe tupeghiwe ifindu ifyakulondiwa fiyo. Ngimba findu fiki? Kangi nongwa yafiki tukulondiwa ukufighilila ikindu ikyakulondiwa fiyo iki Yehova atupele?

3-4. Ngimba fifukwa fimo filiku ifi ubwanaloli bwa mu Baibolo bwakulondiwa fiyo?

³ Mwakisa Yehova atumanyisye ubwanaloli ubu bukwaghiwa m’masyu ghake, Ibaibolo. Ubwanaloli ubu bwakulondiwa fiyo panongwa yakuti bukututula muno tubaghile ukuyila pabumanyani ubununu na Yehova kangi bukulingania isi sibaghile ukututula ukuya balusekelo. Linga tukusubila ubwanaloli ubu nukubukonga, tukwabuliwa kufimanyisyo ifyabutungulu nutuyilo utubibi.​—1 Kor. 6:9-11.

 ⁴ Ikifukwa ikingi iki ubwanaloli bwakulondiwa fiyo kyo kyakuti Yehova ikusisetula ku bandu bene abakwiyisya aba ‘bimikiliwe.’ (Imbo. 13:48) Abandu abakwiyisya bikusubila ukuti umbombi unsubiliwa nuwa mahala ikutumanyisya ubwanaloli ubwa mu Baibolo. Tukabaghila ukumanyila ubwanaloli ubu patwibene kangi kikayapo nakimo ikyakulondiwa ukukinda ukubumanya ubwanaloli.​—Mbu. 3:13, 15.

5. Ngimba lusako luliku ulungi ulu Yehova atupele?

⁵ Yehova atupele kangi ulusako ulwakubamanyisya abangi ubwanaloli ubwakufwana numwene nubwighane bwake. Amasyu ghake agha tukufumusya ghakulondiwa fiyo panongwa yakuti ghikubatula abandu ukuya kukighaba kyake nukubapa ulusako ulwakuti basabwaghe ubumi bwa bwila na bwila. (1 Tim. 4:16) Kali tukufumusya fiyo pamo panandi, twesa tukutulapo pambombo iyakulondiwa fiyo iyi yikubombiwa amasiku agha. (1 Tim. 2:3, 4) Tuli nulusako ulunywamu fiyo ukuya babombanisi pambombo ya Kyala.​—1 Kor. 3:9.

6. Ngimba findu fiki fyabombiwe ku bandu aba batoliwe ukuya maso?

⁶ Nkabalilo ka Timoti Abakristu bamo batoliwe ukundaghisya ulusako ulwakuya babombanisi pambombo ya Kyala. Panongwa yakuti Dema afighanile ifindu fya nkisu, umwene ataghile ulusako ulwakumbombela Kyala pampene na Pauli. (2 Tim. 4:10) Figeli na Hermogene balekile ukufumusya panongwa yakuti batilagha ukuti bikuya pakwanda ukufwimiwa bo muno bamfwimilagha Pauli. (2 Tim. 1:15) Himenaya, Aliksandara na Fileti balekile ubwanaloli panongwa yakuti balyandile ukukolelana na bakususya. (1 Tim. 1:19, 20; 2 Tim. 2:16-18) Bosa aba pakwanda balinganile Yehova loli balekile ukwinong’onela ifindu fyakulondiwa fiyo ifi abapele.

7. Ngimba njila siliku isi Setano ikubombela ukuti atusyobe?

⁷ Ngimba Setano ikughelaghela bulebule ukuti atutolesya ukufighilila ubwanaloli ubu Yehova atupele? Keta injila simo isi Setano ikubombela. Umwene ikubombela ifyakusangalusya ukuti atutolesye ukupilikila ifundo sya Yehova. Ikughelaghela ukututilisya panongwa ya isi abandu bikuyoba pamo mwakutufwima ukuti tuleke ubwanaloli. Kangi ikughelaghela ukutukopa ukuti tupilikisyeghe ku ‘fimanyisyo ifyabutungulu’ ifyakufuma ku bakususya kuti tuleke ubwanaloli.​—1 Tim. 6:20, 21.

8. Ngimba tukumanyilako isyafiki kwa Daniel?

⁸ Linga tukaya maso, panandinapanandi tubaghile ukuleka ubwanaloli. Inong’onela isi Daniel * uyu aghaghanile fiyo amagemu alyaghene nasyo. Umwene atile: “Nalyandile  ukukoma amagemu bo ndini fyinja 10. Pakwanda nakomagha amagemu amanunu. Loli panandinapanandi nalyandile ukukoma amagemu agha ghikunangisya ifyankhaza ni fyamizimu.” Ukufuma apo, alyandile ukukoma amagemu kwa maawala 15 ilisiku lililyosa. “Ukuyoba ubwanaloli, amagemu agha nakomagha nakabalilo aka namalilagha, fyapangisyagha ukuti ubumanyani bwangu na Yehova bungayagha bwamaka. Loli Daniel atile, nasimenye kanunu ukuti ngakongagha isi Ibaibolo likumanyisya. Yonongwa yake linga tukaya maso nifyakusangalusya, kubaghile ukuya kupepe ukuleka ubwanaloli. Linga isi sibombiwe, tubaghile ukutagha ifindu ifyakulondiwa fiyo ifi Yehova atupele.

9. Ukufwana na 1 Timoti 1:18, 19, ngimba Pauli alimfwanikisye Timoti nanani?

⁹ Belenga 1 Timoti 1:18,19. Pauli alimfwanikisye Timoti nunsilikali kangi alinkasisye ukuti ‘akindilileghe ukulwa ubwite ubununu.’ Pauli akayobagha isya bwite ubu abandu bikulwa. Ngimba mo munjila yiliku iyi Abakristu bafwene itolo na basilikali aba bikulwa ubwite? Ngimba tuyilo tuliku utu tukulondiwa ukunangisya pakuya basilikali ba Kristu? Isagha tukete ifimanyilo 5 ifi tubaghile ukumanyilako kwa Pauli. Ifimanyilo ifi fikuya pakututula ukukindilila ukufighilila ubwanaloli

10. Ngimba ukwiyipa kwa Kyala ko kuti fiki, kangi nongwa yafiki tukulondiwa ukubomba isi?

¹⁰ Twiyipeghe fiyo kwa Kyala. Unsilikali unnunu ikuya nsubiliwa. Umwene ikwiyipa ukuti amfighilile umundu pamo ikindu iki akighanile fiyo. Pauli alinkasisye Timoti ukuti iyipeghe fiyo kwa Kyala pamo ukuti ukuya nsubiliwa kwa Kyala. (1 Tim. 4:7) Linga tukunangisya ulughano kangi tukwiyipa fiyo kwa Yehova, sikuya pakututula ukuti tukindilileghe ukufighilila ubwanaloli.​—1 Tim. 4:8-10; 6:6.

11. Nongwa yafiki tukulondiwa ukwimanyisya twibene?

¹¹ Tughelegheleghe ukubomba inunu. Unsilikali ikulondiwa ukwiyipa fiyo ukuti itendekesye ukulwa ubwite. Timoti akindilile ukuya wamaka mwambepo panongwa yakuti akongagha ubulongosi ubu Pauli ampagha ukuti alimbane nifinyonywa ifibibi, anangisyeghe utuyilo utununu kangi ukuti ayeghe nakabalilo akakwangala na Bakristu abinake. (2 Tim. 2:22) Loli ukuti isi sibombiwe, tukulondiwa ukwimanyisya twibene ukuti tutole ubwite ubwakulimbana nifinyonywa ifibibi. (Rom. 7:21-25) Mwakongelelapo, tukulondiwa ukuchenja utuyilo twitu utubibi nukwanda ukunangisya utuyilo utununu. (Ef. 4:22, 24) Kangi linga tukatele, tukulondiwa ukughelaghela ukuti tufikeghe pangomano.​—Hib. 10:24, 25.

12. Ngimba mo munjila siliku isi tubaghile ukukusya amaluso ghitu aghakumanyila Ibaibolo?

¹² Unsilikali ikulondiwa ukwitendekesya mwakubombela ifilwilo fyake ifya bwite. Ukuti aye namaluso umwene ikulondiwa ukubomba isi akabalilo kosa. Mwakufwana itolo, ukuti tuye namaluso tukulondiwa ukubombela kanunu amasyu gha Kyala. (2 Tim. 2:15) Tubaghile ukumanyila amaluso agha linga tuli kungomano. Loli linga tukulonda ukubatula abangi ukuti babuketeghe ubwanaloli bwa mu Baibolo ukuya bwakulondiwa, tukulondiwa ukumanyila Ibaibolo akabalilo kosa. Tukulondiwa ukubombela amasyu gha Kyala ukuti tukasye ulwitiko lwitu. Isi sikongelelapo nyingi ukukinda ukubelenga itolo Ibaibolo. Kangi tukulondiwa ukukonga isi tukumanyila nukufufuza m’mabuku ghitu ukuti tupilikisye kanunu amalemba. (1 Tim. 4:13-15) Ukufuma apo, tukuya pakufwanisya ukubombela kanunu amasyu gha Kyala ukubamanyisya abangi. Isi sikongelelapo nyingi ukukinda ukubabelengela itolo  amalemba. Tukulonda ukubatula abandu aba tukubafumukisyila ukupilikisya kanunu ilemba namuno libaghile ukubatulila. Linga tukughelaghela ukumanyila Ibaibolo akabalilo kosa, tubaghile ukubamanyisya kanunu abandu Ibaibolo.​—2 Tim. 3:16, 17.

13. Ukufwana na Bahiburi 5:14, nongwa yafiki tukulondiwa ukukindanisya pakati pa inunu nimbibi?

¹³ Tukindanisyeghe pakati pa inunu nimbibi. Unsilikali ikulondiwa ukumanya ifindu ifi fibaghile ukumfulasya namuno abaghile ukwifighilila. Nanuswe tukulondiwa ukumanya ifindu ifi fibaghile ukutufulasya nukubombapo simo ukuti twifighilile. (Mbu. 22:3; belenga Bahiburi 5:14.) Mwakifwanikisyo, tukulondiwa ukusala mwamahala ifyakusangalusya. Amapulogilamu gha pa TV utubalilo twingi ghikunangisya ifindu ifibibi. Ifindu bo ifi fitikunhobosya Yehova kangi kisita kukayika fibaghile ukonanga akayilo kitu. Tutikulondiwa ukuketelela ifyakusangalusya bo ifi, panongwa yakuti panandinapanandi fibaghile ukonanga ubumanyani bwitu na Yehova.​—Ef. 5:5, 6.

14. Ngimba ukukindanisya pakati pa inunu nimbibi kwalintulile bulebule Daniel?

¹⁴ Daniel uyu tunjobile pabwandilo, alyandile ukuketa ukuti ukukoma amagemu agha ghikunangisya ifyankhaza ni fyamizimu yali ndamyo. Umwene afufuzile amabuku pa Watchtower Library ukuti ghantule ukumalana nindamyo iyi ali nayo. Ngimba isi syalintulile bulebule? Umwene alekile ukukoma amagemu amabibi. Kangi alekile ukukoma amagemu amabibi pa intaneti kangi alekile ukwangala nabinake aba akomagha nabo amagemu amabibi. Daniel atile, “M’malo mwakukoma amagemu nalyandile ukwangala nabinangu aba kukipanga.” Lino Daniel ikubomba ubupayiniya kangi nkulumba wakipanga.

15. Nongwa yafiki inkhani syabutungulu mbibi fiyo?

¹⁵ Mwakufwana itolo na Timoti, tukulondiwa ukumanya ububibi bwa nkhani syabutungulu isi abakususya bikufumusya. (1 Tim. 4:1, 7; 2 Tim. 2:16) Mwakifwanikisyo, abene babaghile ukufumusya inkhani syabutungulu isyakufwana na bakamu na balumbu bitu pamo ukuti tulikayikileghe igulu litu. Inkhani bo isi sibaghile ukonanga ulwitiko lwitu. Tukulondiwa ukuleka ukusubila inkhani syabutungulu isi. Nongwa yafiki? Panongwa yakuti inkhani bo isi sikufumusiwa ‘na bandu aba bonangike amahala kangi ubwanaloli bwabo bunyakiwe.’ Ubwighane bwabo bo bwakuti ‘tukanikaneghe nabo.’ (1 Tim. 6:4, 5) Abene bikulonda  ukuti tusubileghe ubutungulu ubu bikuyoba nukuleka ukubasubila abakamu na balumbu bitu.

16. Ngimba tukulondiwa ukuya maso ni findu fiki?

¹⁶ Tuyeghe maso. Pakuya “nsilikali unnunu wa Kristu Yesu,” Timoti alondiwagha ukukindilila ukuya maso pambombo yakufumusya m’malo mwakwinong’onela fiyo ifindu ifyakumbili. (2 Tim. 2:3, 4) Mwakufwana itolo na Timoti, nanuswe tutikulondiwa ukuti twinong’oneleghe ifindu ifyakumbili. Linga tukwiyipa fiyo ukulonda ‘ikyuma’, tubaghile ukonanga ubumanyani bwitu na Yehova, tukabaghila ukundaghisya amasyu gha Kyala kangi tubaghile ukuleka ukwangala na bangi. (Mat. 13:22) Tukulondiwa ukwikala ubumi ubusita kulonda ifindu fingi nukubombela akabalilo namaka ghitu ‘ukubulonda . . .  tasi Ubunyafyale.’​—Mat. 6:22-25, 33.

17-18. Ngimba tukulondiwa ukubomba isyafiki ukuti tufighilile ubumanyani bwitu na Yehova?

¹⁷ Tubombengepo simo mwanakalinga. Unsilikali ikulondiwa ukwitendekesya ukuti akete muno abaghile ukwifighililila. Linga tukulonda ukufighilila ifindu ifi Yehova atupele, tukulondiwa ukubombapo simo mwanakalinga linga twaghene nifindu ifyakutilisya. Ngimba findu fiki ifi fibaghile ukututula? Tukulondiwa ukwitendekesya muno tubaghile ukubombela linga twaghene nifindu ifyakutilisya.

¹⁸ Mwakifwanikisyo, linga kuli ikyakubombiwa kimo, abandu bikubuliwa ukuti baghaghe amalo pamo ikifigho ikyakusokelapo linga ifindu fimo fibombiwe. Nongwa yafiki? Panongwa yakuti babaghile ukufwanisya ukusoka mwanakalinga linga ifindu fimo fibombiwe mwakunyomosya. Mwakufwana itolo, nanuswe linga tukuketelela TV tukulondiwa ukusimya linga pisile ifindu fimo ifibibi pamo inkhani syabakususya. Linga twitendekisye mwanakalinga, tubaghile ukufighilila ubumanyani bwitu na Yehova nukukindilila ukuya belu kumyake.​—Sal. 101:3; 1 Tim. 4:12.

19. Ngimba tukuya pakusayiwa bulebule linga tukufighilila ifindu ifyakulondiwa ifi Yehova atupele?

¹⁹ Tukulondiwa ukufighilila ifindu ifyakulondiwa fiyo ifi Yehova atupele bo ubwanaloli bwa mu Baibolo nulusako ulwakubamanyisya abangi. Linga tukubomba isi, tukuya pakuya na mabyebye amanunu, ubumi ubununu kangi nulusekelo panongwa yakubatula abandu ukummanya kanunu Yehova. Nubutuli bwa Yehova, tubaghile ukufwanisya ukufighilila ifindu ifi tupeghiwe.​—1 Tim. 6:12, 19.