Keta muno Ibaibolo likwamulila amalalusyo agha.

Pa Imbombo sya Batumiwa 24:15 pikuyoba ukuti kwisakuyako “ukusyuka kwa bagholofu nabaniongafu.” Abagholofu bo bandu aba bo bakali ukufwa bampilikilagha Kyala, yonongwa yake ingamu syabo silembiwe mwa buku wa bumi. (Mala. 3:16) Abaniongafu bikongelelapo aba bafwile kangi bakali nulusako ulwakumanyila isya Yehova, yonongwa yake ingamu syabo sikalembiwa mwa buku wa bumi.

Pa Yohani 5:28, 29 pikuyoba isya magulu mabili aghakufwana itolo agha ghikuyobiwa pa Imbombo sya Batumiwa 24:15. Yesu ayobile ukuti “aba babombagha inunu bisakusyukilagha ku bumi, na aba babombagha imbibi bisakusyukilagha kukulongiwa.” Abagholofu babombagha inunu bo bakali ukufwa. Abene bisakusyukila ku bumi panongwa yakuti ingamu syabo sikali silembiwe mwa buku wa bumi. Loli abandu abaniongafu babombagha imbibi bo bakali ukufwa. Abene bisakusyukilagha kukulongiwa. Ingamu syabo sikali sikalembiwa mwa buku wa bumi kangi bisakulongiwa. Pakabalilo aka, abene bisakuya nulusako ulwakumanyila isya Yehova kangi ingamu syabo sisakulembiwa mwa buku wa bumi.

Pa Ubusetuli 20:12, 13 pikulingania ukuti bosa aba bisakusyuka bikulondiwa ukuti basapilikileghe “isi silembiwe mwa buku,” isi syo ndaghilo isi Kyala isakutupa nkisu ikipya. Bosa aba batisakupilikila, Yehova isakubapyuta.​—Yes. 65:20.

Pa Danieli 12:2 payobile ngani ukuti bamo aba bafwile bisakusyukagha, bamo “bisakwikyelagha mbumi bwa bwila, abangi bisakukubilwagha mbuywelufu ubusita kumalika.” Ivesi ili likuyoba isya kulongiwa kwa bumalilo kwa aba bisakusyuka. Abene lumo “bisakwikyelagha mbumi bwa bwila” pamo “bisakukubilwagha mbuywelufu ubusita kumalika.” Yonongwa yake kubumalilo bwa fyinja 1,000, bamo bisakukaba ubumi bwa bwila na bwila kangi bamo bisakupyutiwa kwa bwila.​—Ubuset. 20:15; 21:3, 4.

Inong’onela ikifwanikisyo iki. Ukusyuka kwa magulu mabili agha tubaghile ukukufwanikisya na bahesya aba bikulonda ukwikala nkisu ikingi. Iboma libaghile ukubitikisya abandu bamo ukwikala nkisu kwa kabalilo panongwa ya mbombo, loli bamo babaghile ukubitikisya ukwikala kwa kabalilo akanandi itolo panongwa yakuti bahesya. Loli amagulu ghosa agha ghikulondiwa ukughindika nukupilikila indaghilo sya nkisu ikyo ukuti baye benekaya ba nkisu kangi lumo bakabaghila ukubitikila ukuti bakindilile ukwikala nkisu. Ifyakubomba fyabo fyo ifi fibaghile ukupangisya ukuti abene bakindilile ukwikala nkisu iki. Mwakufwana itolo, ukulongiwa kwa bumalilo kwa aba bisakusyuka sisakweghela muno bisakunangisyilagha ubusubiliwa ni fyakubomba fyabo nkisu ikipya.

Yehova akaya itolo yo Kyala wa kisa loli umwene ikunangisya kangi ubwanaloli. (Kukumbu. 32:4; Sal. 33:5) Umwene isakunangisya ulughano lwake mwakubasyusya bosa abagholofu nabaniongafu. Loli ikulonda ukuti bosa basapilikileghe ifundo syake isyakuyoba isya nunu nimbibi. Aba bisakunangisyagha ulughano kumyake nukupilikila indaghilo syake, bo bene aba bisakukindilila ukwikala nkisu ikipya.