Ukufwana na 1 Bakorinti 15:8, Pauli atile: “Kunyuma kuli bosa alinkusetukila nanine ne nditi napapiwe bo akabalilo kakali ukufika.” Kunyuma, twalingenie ukuti Pauli ayobagha isya findu ifi alyaghene nafyo pakabalilo aka alimbwene Yesu nkisetuka kya bukulumba bwa kumwanya. Syafwanagha itolo apeliwe ngani ulughindiko ulwa kupapiwa pamo ukusyukila ku bumi bwa mwambepo, bo akabalilo ka kusyuka aka kakali ukufika. Loli bo tufufuzile kanunu ivesi ili, twaketile ukuti kununu ukuti tuchenje muno ivesi ili likuyobela.

Syabwanaloli ukuti Pauli apa ikuyoba isi syabombiwe ukuti achenje pa bumi bwake. Loli ngimba umwene asanusyagha isyafiki bo ikuyoba ukuti “napapiwe bo akabalilo kakali ukufika”? Filipo ififukwa fingi ifinunu ifi fyalimpangisye.

Umwene akaghulilagha ukuti ikuya pakuchenja. Utubalilo twingi linga umundu apapiwe bo akabalilo kakali ukufika sikuya syakuswighisya fiyo. Sauli (uyu alyandile ukumanyiwa ukuti Pauli) abukile ku Damaska pakubanyoza Abakristu, umwene akaghulilagha ukuti ikuya pakuketa ikisetuka kya Yesu uyu asyukile. Ukuchenja kwa Pauli kwali kwakuswighisya fiyo komma kumyake mwene loli na ku Bakristu aba abukagha pakubanyoza. Mwakongelelapo, ikyakubombiwa iki kyali kyakuswighisya fiyo kangi umwene alekile ukuketa.​—Imbo. 9:1-9, 17-19.

Umwene achenjile “pakabalilo akabibi.” Amasyu gha mu Kigiriki aghakuti “napapiwe bo akabalilo kakali ukufika” ghabaghile ukusanusya kangi ukuti “ukupapiwa pakabalilo akabibi.” Ibaibolo ilyakuti The Jerusalem likulingania ukuti: “Sikufwana itolo napapiwe pakabalilo aka nayumo akaghulilagha.” Pakabalilo aka Pauli achenjagha pa bumi bwake, bo Yesu abukile kale kumwanya. Mwakukindana na aba Pauli abayobile mu mavesi gha kunyuma, umwene akalimbwene Yesu bo ikusyuka nukubuka kumwanya. (1 Kor. 15:4-8) Bo Yesu abonike nkisetuka kwa Pauli kwalimpele ulusako Pauli ukuti ambone Yesu bo asyukile nalinga ukuti kabonekagha ukuti kali “kabalilo akabibi.”

Umwene ayobagha isyakufwana numwene mwakwiyisya. Ukufwana na isi abamanyili bamo bayobile, amasyu agha Pauli abombile apa ghabaghile ukunangisya ukuti ifindu fikali kanunu pa bumi bwake. Linga syo isi Pauli inong’onagha, ayagha pakunangisya ukuti akalondiwagha ukupeliwa ulusako ukuti aye ntumiwa. Yonongwa yake umwene ayobile ukuti: “Namanga une ndi nnandi ku batumiwa bosa ngabaghila nukuyobiwa ukuya ntumiwa, papo nakifwimagha ikipanga kya Kyala. Loli mwipyana lya Kyala ndi bo muno njilile.”​—1 Kor. 15:9, 10.

Sikuboneka ukuti Pauli akaghulilagha ukuti Yesu ikuya pakumbonekela nkisetuka pamo ukuchenja pa bumi bwake nukuketa ukuti akaya wakulondiwa ukuketa isi. Mulimosa muno syayilile, Pauli aketagha ukuti ikisetuka iki kyakulondiwa fiyo kumyake. Isi syanangisye ukuti umwene akakayikilagha ukuti Yesu asyukile ku bufwe. Yonongwa yake utubalilo twingi ayobagha isyakufwana na isi linga ikubafumukisyila abangi isyakufwana nukusyuka kwa Yesu.​—Imbo. 22:6-11; 26:13-18.