1-2. Ngimba findu fiki fikubapangisya ababombi ba Kyala ukuya balusekelo? (Yakobu 1:​22-25)

 YEHOVA nu Mwanake unganiwa bikulonda ukuti tuyeghe balusekelo. Uyu alembile Salimo 119:​2, atile: “Basayiwa abandu aba bikusikonga ingomelesyo syake, aba bikundonda Kyala nindumbula yosa.” Yesu atusimikisyile ukuti: “Basayiwa ukukinda aba bikulipilika ilisyu lya Kyala nukulisunga.”—Luka 11:28.

² Ababombi ba Yehova bandu balusekelo. Nongwa yafiki? Tuli nififukwa fingi, loli ikifukwa ikinywamu kyo kyakuti akabalilo kosa tukubelenga Amasyu gha Kyala nukwiyipa ukusibombela imbombo isi tukumanyila.—Belenga Yakobu 1:​22-25.

3. Ngimba tukusayiwa bulebule linga tukwinong’onela isi tubelengile Mmasyu gha Kyala?

³ Silipo injila nyingi isi tukusayiwa linga ‘tukusibomba isi amasyu gha Kyala ghikuyoba.’ Mwakifwanikisyo, linga tukukonga isi tukumanyila Mmasyu gha Kyala, tukunhobosya Yehova kangi isi sikutupangisya ukuti tuyeghe balusekelo. (Ndumbi. 12:13) Mwakongelelapo, linga tukukonga ubulongosi ubu buli Mmasyu gha Kyala, tukuya pabumanyani ubununu naba mumbumba yitu nabakamu na balumbu. Kangi tukuya balusekelo pabumi bwitu. Kangi fikututula ukwepuka kundamyo isi abandu bikwaghana nasyo panongwa yakuleka ukukonga indaghilo sya Yehova. Isi sikukolelana na isi Umwalafyale Davidi ayobile. Bo umwene ayobile isya ndaghilo, ubulongosi nubulongi bwa Yehova, Davidi amalisisye ulwimbo lwake namasyu aghakuti: “Uyu linga ikusikonga yo ikuyagha nifihombiwa.”—Sal. 19:​7-11.

4. Nongwa yafiki kukaya kupepe utubalilo tumo ukubelenga Amasyu gha Kyala?

⁴ Ukuyoba ubwanaloli, utubalilo tumo kutikuya kupepe ukubelenga Amasyu gha Kyala nukusibombela isi tumanyile. Nalinga ukuti tukwikolania fiyo pabumi bwitu, loli tukulondiwa  ukukagha akabalilo akakubelenga Ibaibolo ukuti tupilikisye isi Yehova ikulonda ukuti tubombeghe. Isagha tukete ghamo mwamasakisyo agha ghabaghile ukututula ukuti tubelengeghe Ibaibolo utubalilo tosa. Tukuya pakuyobesania kangi isi sibaghile ukututula ukuti twinong’oneleghe pa isi tukubelenga nukuketa ifi tubaghile ukubomba ukuti tunangisyeghe ukuti tukukonga isi tukumanyila pabumi bwitu.

MWIBIKILEGHE AKABALILO AKAKUBELENGA AMASYU GHA KYALA

5. Ngimba findu fimo filiku ifi fikutupangisya ukuti twikolanieghe fiyo?

⁵ Amasiku agha, ababombi ba Yehova bingi bikwikolania fiyo. Tukumalila amaawala mingi fiyo pakubomba ifindu ifi Ibaibolo likuti fyakulondiwa. Mwakifwanikisyo, bingi mwa uswe tukubomba imbombo iyakulembiwa ukuti tufyaghe ifindu ifyakulondiwa pabumi bwitu nifya mbumba syitu. (1 Tim. 5:8) Abakamu na balumbu bingi, bikubapwelelela abakamu babo ababine pamo abakangale. Kangi tukulondiwa ukuya nakabalilo kakubupwelelela ubumi bwitu. Ukongelelapo pambombo isi, tuli nimbombo isyakuti tubombe nkipanga. Imbombo yimo iyakulondiwa iyi tukulondiwa ukubomba, ko kwiyipa pakufumusya amasyu amanunu. Panongwa yakuti aliwesa ali nimbombo syosa isi, ngimba tubaghile ukukagha bulebule akabalilo akakubelenga Ibaibolo akabalilo kosa, ukwinong’onelapo nukusikonga isi likutubula?

6. Ngimba mubaghile ukubomba isyafiki ukuti mukindilileghe ukubelenga Ibaibolo? (Keta kangi ikithuzi.)

⁶ Ukubelenga Ibaibolo kyo kimo mwa “findu ifyakulondiwa fiyo” kumyitu twe Bakristu. Yonongwa yake ukubelenga Ibaibolo kukulondiwa ukuya pamalo aghakwanda pabumi bwitu. (Filip. 1:10 NWT) Pakuyoba isya mundu walusekelo, ichaputala ilyakwanda mubuku lya masalimo likwanda namasyu aghakuti: “Ikwikyela ukusibomba indaghilo sya Yehova, kangi ikusinong’ona sisyo syene pamusi na pakilo.” (Sal. 1:​1, 2) Isi sikusanusya ukuti tukulondiwa ukumalila akabalilo akatali pakubelenga Ibaibolo. Ngimba akabalilo akanunu akakubelengela Ibaibolo ko kaliku? Aliwesa  abaghile ukwisalila akabalilo aka kabaghile ukuya kanunu kumyake. Loli ikyakulondiwa fiyo kyo kyakuti, tusaleghe akabalilo aka kikuya pakututula ukuti tubelengeghe Ibaibolo akabalilo kosa. Unkamu Victor atile: “Nighanile ukubelenga Ibaibolo nulubunju. Nalinga ukuti kukuya kukafu ukulembuka nulubunju, loli ifindu ifyakunsofania fitikuya fingi. Aminong’ono ghikuya mmalo mwake kangi kukuya kupepe ukwinong’onelapo.” Lumo mo muno nanumwe mukubombela pabumi bwinu. Amwilalusye ukuti, ‘Ngimba akabalilo akanunu kumyangu akakubelenga Ibaibolo ko kaliku?’

TWINONG’ONELEGHE PA ISI TUKUBELENGA

7-8. Ngimba findu fiki ifi fibaghile ukutupangisya ukuti tungasayiwagha fiyo na isi tukubelenga mu Baibolo? Yoba ikifwanikisyo.

⁷ Linga mwibikile akabalilo kakubelenga Ibaibolo, kilipo kangi ikindu ikingi iki mukulondiwa ukuya nakyo maso. Ngimba fibombiwemo ukuti mwibibwe mwanakalinga ifundo yimo iyi mufumile itolo pakubelenga? Twesa situbonekilemo. Syakitima fiyo ukuti syo isi sibaghile ukubombiwa linga tukubelenga Ibaibolo. Mwakifwanikisyo, tubaghile ukusala ukuti tubelengeghe amachaputala mingi agha mu Baibolo isiku lililyosa. Isi nunu itolo. Tukulondiwa ukwibikila imbatiko nukughelaghela ukuyikonga. (1 Kor. 9:26) Loli tukulondiwa ukubomba nyingi ukukinda ukubelenga itolo Ibaibolo linga tukulonda ukuti tusayiweghe.

⁸ Inong’onela ikifwanikisyo iki: Utubalilo twingi amisi ghafula, ghakulondiwa fiyo kubandu nifyabumi ifingi. Loli linga ifula yitimile nyingi fiyo nkabalilo akapimba, amisi ghabaghile ukubalanila itolo. Linga isi sibombiwe, ko kuti ifula iyi yikaya nimbombo. Fikuya kanunu linga ifula yikutima panandipanandi panongwa yakuti amisi ghikwingila pasi pa mfu kangi ghikutula ukuti ifyakumela fikuleghe kanunu. Mwakufwana itolo, tutikulondiwa ukubelenga Ibaibolo mwakubopela nukutoliwa ukuya nakabalilo ka kwinong’onelapo, ukukumbuka nukukonga isi tukubelenga.—Yak. 1:24.

9. Ngimba tukulondiwa ukubomba isyafiki linga tusyaghenie ukuti tukubelenga Ibaibolo mwanakalinga?

⁹ Ngimba fibombiwemo ukuti mukubelenga Ibaibolo mwakubopela fiyo? Ngimba mubaghile  ukubomba isyafiki? Mubelengeghe panandipanandi ukuti mwinong’oneleghe isi mukubelenga pamo linga mumalile itolo ukubelenga muyeghe nakabalilo ka kwinong’onela isi mubelengile. Ukubomba isi kupepe itolo. Mubaghile ukusala ukuti mumalileghe akabalilo akatali linga mukumanyila ukuti mwinong’oneleghe. Pamo mubaghile ukusala ukubelenga amavesi manandi itolo ukuti akabalilo kingi aka kasyeleko mwinong’oneleghe. Victor uyu tunjobile pakwanda atile, “Ngubelenga panandi itolo Ibaibolo, lumo ichaputala limolyene. Panongwa yakuti ngubelenga nulubunju, sikundula ukuti ninong’oneleghe isiku lyosa pa isi mmanyile.” Mubaghile ukusala ukuti mubelengeghe fingi pamo finandi kangi komma ukubelenga mwakubopela ukuti mufwanisyeghe ukwinong’onelapo pa isi mukubelenga.—Sal. 119:97; keta ibokosi ilyakuti “ Amalalusyo Aghakuti Twinong’onelepo.”

10. Yoba ikifwanikisyo iki kikunangisya muno tubaghile ukubombela ukuti tukongeghe isi tukumanyila. (1 Batesalonike 5:​17, 18)

¹⁰ Amavesi ghalighosa agha mubelengile, mwinong’oneleghe muno mubaghile ukughabombela imbombo pabumi bwinu. Linga mukubelenga ikighaba kimo ikya Masyu gha Kyala, mwilalusyeghe ukuti, ‘Ngimba ubulongosi ubu mbaghile ukubukonga bulebule lino na nkyeni?’ Tufwanikisye ukuti mukubelenga ilemba lya 1 Batesalonike 5:​17, 18. (Belenga.) Linga mumalile ukubelenga amavesi mabili agha, mubaghile ukwima nukwinong’onela ukuti mukete muno mukubombela pankhani yakwiputa. Mwakongelelapo, mubaghile ukwinong’onela ifindu ifi mukundaghisya fiyo. Lumo mubaghile ukusala ukuti munndaghisyeghe Yehova pa findu fitatu. Nalinga ukuti mubaghile ukubombela amaminiti manandi pakwinong’onela ifi mumanyile mu Baibolo, fikuya pakubatula ukupilikisya isi Amasyu gha Kyala ghikuyoba. Kangi linga isiku lililyosa mukukonga isi mukumanyila mu Baibolo, fikuya pakubatula ukuti muye mbombi unnunu wa Yehova. Loli ngimba tubaghile ukubomba isyafiki linga tuli nimbombo nyingi isyakuti tubombe?

TUYEGHE NUBWIGHANE UBUNUNU

11. Nongwa yafiki tubaghile ukuwa amaka utubalilo tumo? Yoba ikifwanikisyo.

¹¹ Utubalilo tumo linga mubelengile Ibaibolo, mubaghile ukuwa amaka panongwa yakuti musyaghenie ukuti filipo ifindu fimo ifi mukulondiwa ukuchenja. Mwakifwanikisyo, inong’onela ukuti isiku limo mukubelenga amavesi ghamo agha ghikuyoba isya kuleka ukubasala abandu mbundu bwabo. (Yak. 2:​1-8) Musyaghenie ukuti mukulondiwa ukuchenja muno mukubabombela abandu ifindu kangi musalile ukuti muchenje. Ukubomba isi kununu itolo. Ukufuma apo, isiku ilingi mukubelenga  amavesi aghangi agha ghikunangisya ubununu bwakuya maso na isi mukuyoba. (Yak. 3:​1-12) Musyaghenie ukuti utubalilo tumo mukuyoba amasyu mwabukali kangi agha ghikuwisya amaka. Po musalile ukuti mubakasyeghe abininu linga mukuyoba nabo. Isiku ilingi mukubelenga amavesi agha ghikubasoka ukuti muleke ukuya bamanyani ba kisu. (Yak. 4:​4-12) Musyaghenie ukuti mukulondiwa ukuya maso fiyo na ifi mukusala ukubelenga, ukuketelela pamo ukupilikisya. Isiku ilyakukongapo, mubaghile ukuwa amaka nukwanda ukuketa ukuti kukafu fiyo ukuchenja ifindu fyosa ifi.

12. Nongwa yafiki mutikulondiwa ukuwa amaka linga isi mukubelenga mu Baibolo sikunangisya ukuti mukulondiwa ukuchenja? (Keta kangi amasyu ghapasi.)

¹² Linga filipo ifindu fingi ifi mukulondiwa ukuchenja pabumi bwinu, komma ukuwa amaka. Ubu buketi bwakuti muli nindumbula inunu. Linga tuli bakwiyisya, tukuya pakubelenga Amalemba nukuchenja apa pikulondiwa. a Kumbuka kangi ukuti tukulondiwa ukukindilila ukumfwala “umundu umpya.” (Kolos. 3:10) Ngimba findu fiki fibaghile ukututula ukuti tubombeghe isi Amasyu gha Kyala ghikuyoba?

13. Ngimba injila inunu iyakubombela isi tukumanyila yo yiliku? (Keta kangi ikithuzi.)

¹³ Mmalo mwakukonga fyosa ifi tukumanyila pakabalilo kamokene, tubombeghe ikindu kimokyene pamo fibili. (Mbu. 11:2) Mubombeghe isi: Lemba ifindu ifi mukulondiwa ukubomba. Ukufuma apo, musalepo kimokyene pamo fibili nukwanda ukufibomba. Ifindu ifingi musafibombe akabalilo akangi. Ngimba mubaghile ukwandila poki?

14. Ngimba mubaghile ukwanda ukubomba siliku?

¹⁴ Mubaghile ukusala ukwanda ukubomba ifindu ifinandinandi ifi mubaghile ukufwanisya.  Mubaghile ukwanda ukuchenja ifighaba ifi mukuketa ukuti fyakulondiwa fiyo ukuchenja. Linga musalile ukubomba simo, mufufuzeghe mmabuku ghitu. Lumo mubaghile ukubombela ibuku ilyakuti Watch Tower Publications Index pamo ilyakuti Buku Lakupenjera Nkhani la Ŵakaboni ŵa Yehova. Mwiputeghe kwa Yehova kangi munsumeghe ukuti abapepo “isi mukulonda na isi mukubomba.” (Filip. 2:13) Ukufuma apo, mubombeghe isi mumanyile. Linga ifindu fyandile ukwenda kanunu panongwa yakuti mufwanisye ukuchenja ikindu ikyakwanda, mukuya pakukasiwa ukuti muchenje ifingi.

TWITIKISYEGHE UKUTI ILISYU LYA KYALA ‘LIBOMBEGHE MMYITU’

15. Ngimba twe babombi ba Yehova tukindene bulebule nabandu bingi aba bikubelenga Ibaibolo? (1 Batesalonike 2:13)

¹⁵ Abandu bamo babelengilemo Ibaibolo kwa kabalilo akatali. Loli ngimba bikusubila naloli isi likumanyisya? Ngimba bikubomba ifindu ukufwana na isi Ibaibolo likumanyisya nukuchenja utuyilo twabo? Hayi. Abandu bingi batikukonga ubulongosi bwa mu Baibolo. Loli ababombi ba Yehova batikubomba bo ulu. Mwakufwana itolo na Bakristu abakwanda, tukwitikisya ukuti Ibaibolo “isyu lya Kyala, bo muno liyilile naloli.” Mwakongelelapo, tukwiyipa ukubomba isi tubaghile ukufwanisya ukuti tukongeghe ubulongosi bwa mu Baibolo pabumi bwitu.—Belenga 1 Batesalonike 2:13.

16. Ngimba findu fiki fibaghile ukututula ukuti tubombeghe isi Amasyu ghikuyoba?

¹⁶ Utubalilo tumo kukuya kukafu ukubelenga nukukonga isi Amasyu gha Kyala ghikuyoba. Tukulondiwa ukwiyipa ukukagha akabalilo akakubelenga Ibaibolo. Lumo tubaghile ukubelenga Ibaibolo mwanakalinga kisita kwinong’onela pa isi tubelengile. Lumo tubaghile ukuwa amaka panongwa ya findu ifi tukulonda ukuchenja pabumi bwitu. Indamyo yiliyosa iyi mubaghile ukwaghana nayo, yikabaghila ukubatolesya ukubomba isi. Nubutuli bwa Yehova, mubaghile ukumalana nayo. Isagha twambilileghe ubulongosi bwake, tungibwagha isi tukupilika kangi tubombeghe isi Amasyu ghake ghikutubula. Tukusubila ukuti linga tukubelenga fiyo Amasyu gha Kyala nukughabombela imbombo pabumi bwitu, tukuya pakuya nulusekelo.—Yak. 1:25.